2 SAMUEL 23 - Allah Wene Fano Wene Hupla Inane

Daud ane elugun warogo isikhe wene

¹ At Yakub eisena Allah nen ap Isai amlogo Daud ebe kain enupogot logouwagaluk menfesihkesik he, ebe ap hokho enuwerek mene logouwageluk hilingisogo fesikhe. Nen, at Daud enat he wuni afuni Israel mene faget felalogo wati lagaikhe. Nen at Daud ane elugun oba isikhe re yi'nogo:

² ”An noba Tuhan Areagun nen yaganetikhemo re, awene melalek inom, ane menogo fesikhe mene inom he, an nambeba werek,

³ Yakub eisena Allah a'nogo nen ikhi logolik he, nit afuni Israel mene, fetninarek welagarek mene nen, an wene yaganeti logolik, yi'nogo yaganetikhe, ”Raja nen he yi'nogo hilingiterek, at ebe tulem logolik he afuni holhu mene katokhogo melalinafik, Tuhan oba ailorogo hilingitik, hilingitu halok he,

⁴ at andi re meiso arat ninggeresik, mo asinandi lakfei wagunem, engga oba mum welagarek mene, afin-fin hilingisogo fikherek hak, At ebe andi higit welagarek,” iluk ikhe,

⁵ ”Andi hakhogo nek, afuni an nen tagomangge mene ogore, At Allah nen fanorinafi logogin, An noba wene wa'nete mene andi re agaum esigin mondok lek. Nen aren yi'nogo hilinghafi logoin iluk abok wene yaganete mene andi re ekhe pelabigin lek. Andi re mondok-mondok logogin mene faget hilingi'mo re, Allah nen hilinghafi logogin iluk yaganete mene andi ebe asuageluk he, an nalonget nobagagik, an nendawimo anggigirek mene a'nogo re higithogo nek hilingnobagagik, nane hologo hilingnobagagik, ili'lago andi o.

⁶ A'nogo meneat he, it afuni ekhe nineisena Tuhan ane hologo hilingiri'lagwi lek mene andi re, alok-alogengge woukhogo lakfisagarek mene hangge hilingi'mo re, afuni inenggi nen senesu mo re, mondok elo'lek,

⁷ Ap misigen ekhe enggimo saplingge e meneba ogo, at he, posiemanggen meneba ogo legengge nen enggi senesu lek hak, afuni ariginik mene andi re endu nen mondogat weraginafunem, elo'lek asuhak enego,” iluk ikhe,

At Daud agoromi kaindek weim tok inenggi pukweak mene a'nogo re yi

⁸ At Daud agoromi kaindek weim tok inenggi pukweak welagaukwa mene andoma inenu re yi: Attak mene re Ishbaal o Hakhmoni agun andi it, ’Esa Henagan Triwira’ ikhi lagaukwa mene andi inoe melalinafu mene welagaikhe. At andi nen he enggi misik sambul ap inebe 800 nen mene inom weim yafikhe mene re, aren arige kabelek oba afuni andi inebe mondok felelenghogo inoatikhe.

⁹ Esa Henagan mene andiba nen ap pirenek mene enu re Eleazar hun Dodo amlogo it Ahohi inap andi mene. Aren he Daud inom lagaikhesik afuni Filistin mene inom weim yabugun iluk esa logalhi lagaukwa mene omanogo inom weim yabi lagaikhe. Lagaikhesik he it Israel inap weim yafi lagaukwa mene a'nogo sugulogo wagunem he,

¹⁰ at Eleazar a'nogo nek he ap Filistin mene omanogo inoasigin iluk amururu weak hilingitunem en he, at ebe omame lek agaikhe. Nen linggene andi sambul he At Tuhan nen inomame hokho mene wogisasikhe. It Israel inap esa logalek sugulogo lagaukwa mene omanogo re at Eleazar weim yafunem inom sebesi wagaukwasik he, it ap inoatukwa mene inasu weim yabuogeluk labeti lagaukwa mene omanogo nonggolhi lagaukwa.

¹¹ Esa Henagan a'nogoba nen ap henaganek mene enu re Sama hun Age amlogo awi Harari mene andi. Attak ekhe it Filistin inap o Lehi yabu weinali enggen mep mene yabumo yagoma omanogo kabogetukwasik hilingitunemen it afuni Israel mene re inailo nen pugulhukwa.

¹² Oba nen he, at Sama a'nogo nek he ailorogo lagi'legengge weim yafu mondok welagaikhesik, it Filistin inap inebe hokhorogo inoatikhesik inomame leget fisasikhe. Aren ariginhikhe andiba re yabu yago a'nogo re fano telfesikhe. Nen At Tuhan nen it Israel mene inoba inomame aga logouwageluk he a'nogo hilingfisikhi lagaikhe andi.

^13-14 Linggene amu sambul ekheba re enggen ugu palhu sambul horogasi wagu kwelek he it Daud agoromi perwira inebe 30 nen aremnogo nen he it inebe henagan elokhoma mene aremnogo nek o Adulam oumo andoma pisukwa. Andem oba re at Daud he oumo andi fikhit kagalek were'ma pisukwa. Nen, it Filistin inap he o Refaim tonggoma inawi tenda sali wagaukwa, it mene esa misik ekhe re o Betlehem sebeli kwisukwa.

¹⁵ A'nogo sebeli kwisukwama at Daud a'nogo aiba faget endawi ou agaikhemo aren ikhi logolik he yi'nogo isikhe, ”Eige, an he o Betlehem kwe kuguba i mogo habuli'mo a'nogo mene hinagongge ekhe wo'nelepma noba lombukhogo nele agwi!,” iluk ikhi lagaikhe.

¹⁶ A'nogo ugunem it ap sikhe fisogo mene inogogwi perwira inebe henagan aremnogo nen inesanggo holhukwasik he, it ap Filistin mene inawi tenda salogo were'ma omanogo soganisaluk kwi lagaukwasik i a'nogo hinagaisogo waluk Daud wogosi wagaukwa. Meneat he, at Daud en he i a'nogo ninggi'lek kweisalogo Tuhan faget iluk wogetikhe.

¹⁷ A'nogo wogetikhesik aren ikhi logolik he, ”Tuhan neisena, an he i yi nagain lego! Nen an i yi namo nen he, andi re ap inebe ninoasugun iluk wenggele'legengge hilingita mene omanogo inamep na hak andi re nagain lego!” iluk isikhe. Andiba re at Daud en i a'nogo ninggi'lek he, nabit iluk herakfisasikhe. It ap inebe henagan mene mondok enggen tagani andem en hilingitukwa mene re andi.

^18-19 Nen, it ap inebe 30 nen it sikhe fisogo mene inogogwi perwira aremnogo inunggulenu re, ”Esa 30” nen andem salinarek welagaukwa. It andi inebe re at Abisai Yoab agot hun Seruya amlogo a'nogo inoe kain logolik melalinafi lagaikhe. Aren he arige kabelek oba re ap inebe 300 nen inoatikhe. Andiba re at afuni nen legeisogo fogetfikhi lagaukwa. Oba nen he at he it inenu, ”Esa Henagan” ikhi lagaukwa mene andi nen inomamerek welagaukwa andi hak he, hilingik welagaikhe lek.

²⁰ Ap misik ekhe it sikhe fisogo mene inogogwi perwira andem en mene enu weinamhogo welagaikhe agun he hun Benaya, ap Yoyada amlogo awi Kabzeel mene andi.

²¹ At nek he agun andi nen he, ap Mesir agun ekhe arige kabelek enggim logolik alilingge liklouksek agun ekhe warogo fesikhe. Nen at Benaya nen he arige tomuk oba ninom yabugun iluk lagaikhesik, ap Mesir agun a'nogo arige kabelek enggim fisogo welagaikhe mene a'nogo re telogo wanhikhesik he oak wik-wok aplere ebe talogo fesikhe.

²² At Benaya it inenu ”Esa 30” u hak Tridasawira” ikhi lagaukwa mene andi nen hilingitikhe mene re andi.

²³ It Esa andiba mene re at Benaya andi elokhoma hakhogo welagaikhe, oba nen he, at he it inenu ekhe, ”Esa Henagan? ikhi lagaukwa mene andi nen hilingik welagaukwa andem hakhogo hilingik welagaikhe lek. At Daud en it at ebe kagalek werek mene omanogo inoe kepala logouwageluk menfesikhe.

^24-39 It ”Esa 30” nen andiba mene inenu re yi: Asael hun Yoab agot andi inom he, Elha hun Dodo amlogo awi Betlehem mene andi inom he, Sama inom, Elika awi Harod mene andi inom he, Heles awi Palti mene andi inom he, Ira hun Ikes amlogo awi Tekoa agun andi inom he, Abiezer awi Anatot mene andi inom he, Mebunai awi Husa agun andi inom, Salmon awi Amohi agun andi inom, Maharai awi Netofa agun andi inom, Helep hun Baana amlogo awi Netofa agun andi inom, Itai hun Ribai amlogo awi Gibea it Benyamin mene nen wilayah andoma meneba inom he, Benaya awi Pinaton agun andi inom he, Hidai awi o Gaas tonggoma andoma agun andi inom he, Abialbon awi Araba agun andi inom he, Asmawet awi Bahurim mene andi inom he, Elyahba awi Saalbon agun andi inom he, hun Yasyen againafuri andem inom he, Yonatan inom he, Sama awi Harari mene andi inom he, Ahiam hun Sarar amlogo awi Harari mene andi inom he, Elifelet hun Ahasbai amlogo awi Maakha agun andi inom he, Eliam hun Ahitofel awi Gilo agun andi inom he, Hezrai awi Karmel agun andi inom he, Paerai awi Arbi agun andi inom he, Yigal hun Natan amlogo awi Zoba agun andi inom, Bani awi Gad agun andi inom, Selek awi Amon mene andi inom, Naharai awi Beerot mene at Yoab asikhe waluk nikhi lagaikhe agun andi inom he, Ira inom Gareb inom inawi Yetri mene andem inom welagaukwa. It inebe andem mondogat lambulogo re 37 nen logolik, it inebe sikhe enggen inap enek elokhomarogo welagaukwa mene re andem.