2 SAMUEL 22 - Allah Wene Fano Wene Hupla Inane

At Daud omame agaikhesik wuni watikhe wene

¹ At Daud ebe ap Saul en ogo, aselei mene nen ogo inebe mondogaren wasuogoluk ugunem, nineisena Tuhan nen telogo filik waga lagaikhe andi nen he, Allah fogerati logolik, wuni yi'nogo watikhe:

² ”Tuhan neisena, an nen Hat hoba nendawi hundik mondok welagirek andi nen he, an nomame re Hat hebeat welagen o.

³ An nebe welagirek oba leget pa'leget omamerogo waganek mene hangge, Tuhan hebe welagen, An nebe logouwageluk helep tom eil hak he Allah hebeat welagen, nen an fano logouwagaluk Aren sing itarek hangge laberogo fetnarek werego. Nen nailo legengge logouwageluk hundik-handik fetnarek mondok werego.

⁴ An nen nane hokhoba neisena Tuhan enu hombuk paligin obaat hombuk palhi lagi. Arenat an naselei mene inoba nen lologo nobagali'lago.

⁵ An he wa'lagaikharek mene nen haningisogo kwela'nabi weri'lagwi. Nen, leget nobagauwogeluk mene nen he i fu wagarek higit sebelnabi weri'lagwi.

⁶ An he wa'lagaikharek mene nen maserogo kwela'nabi weri'lagwi. Wa'lagaikharek mene andi re paik hele fagarek hakhogo nelokhoba websek werek.

⁷ An nendawinggen firik logolik Neisena Tuhan enu hombuk palhi lagi. An neisena Allah nen lebetnabuageluk nane kweti lagi. At Aiba nen an nane igirek mene esanggo holheresik he, Aren higithogo lebetniikherek

⁸ Nen At Allah a'mage lagunem he, kweang mondogat abologetik, leigetik ikherek. Tom-tom anduli liabek mene ma'lima talotik, leik waririm etik ikherek.

⁹ At ambisang elekwe nen he endu so'le mone'luk wuliferek. Nen endu ebe inom enggen inom he ambelema nen palogo wuliferek.

¹⁰ O pogot heal haluk he, At ebe pi wagarek, Nen, At ebe lagain kwe re ohena muli mene ebene eisok filik lagarek.

¹¹ At he malaikat ekhe enu kerub a'nogo meneba lagaluk tarogo weri'lago, nen, at ogolabi legeisogo tarogo fun-fun weri'lago,

¹² At ebere mum meneba huli'liphogo werek, nen hena eil mondok hik weak ambumsek mene andoma nen he At ebe maserogo kwelabek.

¹³ At ebe elokhoma nen eilabut kulung hikhi logolik, hena inom, meiso sogenggen mene inom, endu inom, pelabi wagarek.

¹⁴ A'nogo wulibi wagunem At Tuhan ebe tulem omanogo nen unggunggu suphogo anethugunem he, At Esin Lego welagarek mene a'nogo nen esanggo holherek.

¹⁵ Aren he andok omanogo sup-sap isigik, aselei mene omanogo hesangge-pesangge hilingfisigik ikherek. Aren he aselei mene omanogo heise loageluk eilabut kulunghogo lakfigik-wakfigik ikherek.

¹⁶ At Tuhan nen aselei mene inoba a'mage lagaluk ane pararak etu sambul andi re, i laut yenggelek mene fem a'ma ma'lima mondogat weinam agarek, nen kweang a'ma timuk liabek mene ma'lima hurogo lagarek

¹⁷ Tuhan ebe legoma poma nen enggi pelabi waga logolik, i agum uan meneba nen sen nobagaikhesik lisogo liak nobagai wagaikhe.

¹⁸ Ap an naselei mene inomame mondok hokho mene inenggimo nen inom, it an inabit nabi'lagwi mene inoba nen inom, it inebe inomame hokhorek logolik, an ninom walha elo'lek mene inom andomaba nen, an nili wo'nafikhe.

¹⁹ An noba enggin-fenggin agunem andem he it naselei mene nen noasuogeluk weri'lagwi, oba nen neisena Tuhan nen he an telnaferego.

²⁰ Aren an noba endawi hundik logolik he, fikhalogo wulak nobagagik, weak meneba nen telnobagagik ikherek.

²¹ An nen fano hilingitu mene faget he neisena Tuhan nen onggo fili'lago, an nen weak ekhe hilingiti lek andi nen he Aren fanot nobagali'lago.

²² An he At Tuhan nen awene melalek yi'nogo hilingi'no ti'nogo hilingi'no iluk yaganisugu mene a'nogo hologo nek hilingitu welagi. An nen At neisena Allahba nen kwanirogo amu fikhit laga lagi lek.

²³ At awene melalek werek mene a'nogo re an nen ibi-eberogo nen futfikhi lagi o, nen Aren yi'nogo hilingi'no ti'nogo hilingi'no iluk ikherek mene a'nogo re, an nen ekhe pelakfigi'lek higithogo nek hilingiti lagi o.

²⁴ An weak noba le'ma, weak ekhe hilingiti hanogoluk an nebe heise wulifirek andi re, At mondok elu o.

²⁵ Andi nen he, At Tuhan eilhanem an neluk logolik higithogo hilingitirek mene andi inom, tegelogo welagirek mene andi inom faget onggo Arenat hilingnobagaikherego.

²⁶ Tuhan neisena, Hat he ap Hat hoba tiphogo hilingitarek mene re, Haren ogo it inoba tiphogo nek hilingfisegendego, nen it fanorogo hilingitarek mene inoba re fano mene nek hilingfisegendego.

²⁷ Afuni inebe enogo fakhaluk welagaikharek mene inoba re, Hat hebe fano horek welagen mene a'nogo inugisegendek, oba nen he, ap kwanirogo hilingitarek mene inoba halok he, Hat haselei mene hilingfisikhi lagen o.

²⁸ Afuni inendawinggen sebelek mene re Haren telinafendego. Meneat he, afuni fogerakhagarek mene re, haren sebel fisegendego.

²⁹ An naesage re Harenat ibilnafi lagen, Neisena Allah harenat an o mummo were'ma seleget nafi lagen.

³⁰ An nen it naselei mene legetfisoagaluk he, Harenat nomamet fikhi lagen o. An neisena Allah nen lebetniugunem he naselei mene inaleget pa'leget esia'le harogo inoasi kwigirego.

³¹ At Allah nen hilingiterek mene andi re endebengge iluk ogo ekhe taganet lagarek lek, Tuhan nen abok wene wa'nisasikhe mene andi re eberogo anggikhi logogun fano. Afuni At a'ma hina'lasi kwagarek mene re sing itarek hak ferinarek werego.

³² Nineisena re we Tuhan Allah andi amu aro. Nen, nit ninebikhit agarek mene re Allah andiat werek.

³³ At Allah andi nen enek an nomamet nobagagik, an kwe nailo legengge loageluk hilingnobagagik ikherek.

³⁴ An neisok rusa eisok hakhogo wurik mene hilingnobagaikherek. An nebe tom ebene fano nikhi logouwageluk wo'narek mondok nikherek.

³⁵ An nen weim yafu aple faget he Arenat yanggulnaferek hilingi'mo re, an nen sikhe oak omame meneba nen ogore elok lithaluk pisinget higi aplerek.

³⁶ Tuhan neisena, Harenat an ma'murogo fetnarek logolik telnafi lagen o. Nen Hat homameba re an agorogo fetnarek welagen. Haren hilingnobagakhi lagen oba re an nenuwerek mene aga lagi o.

³⁷ An afuni nen hele warogo wo'narek lanogoluk Haren halnafunem, an neisok yagan-tagan pule pu lek hak.

³⁸ An nen it naselei mene muginarek laluk he inebe mabenet fisigirego. It a'nogo inambothan sugulogo laluk inareng mondok legasi lagaikharek.

³⁹ An nen it inebe hambokhogo hugisugunem he it inambotkwe menlagaikharek mondok lego. It inebe warogo weingfisugunem, an neiso'ma nen feisakhogo menlagaikharek mondok legaro.

⁴⁰ Haren he, an weim yabuagaluk homame wo'netunem naselei mene mabenetfisaluk, nomame aga lagi o.

⁴¹ Harenat an naselei mene weim heise puguluagaluk hilinginafi lagen o. Afuni an inabit mene re inebe legetfisikhi lagi o.

⁴² Iren inane kweri'lagwi mene at he, ap ekhe nen ogo leberisagarek legaro. Nen, iren Tuhan oba hombuk palharek mene at he, Aren onggo yagaisikherek legaro.

⁴³ An nen he, it inebe wulil tagalogo inoatunem kweang aling hakhogo hesangge-pesangge hilinglagaikharego. Nen it inebe fesi ebekhe kwe andi hakhogo felelenghogo lakfisigirego.

⁴⁴ Haren an afuni Hat hane sagalogo fuluk hilingiri'lagwi mene inoba nen fikhalogo wulak nobagagik, afuni inunggulenu hokhorogo inoe kain lego logouwageluk nobagagik ikhi lagen. Afuni inunggulenu amu mene an inonggot meneba nen ogore, an na'ma namingmingengge asi weri'lagwi.

⁴⁵ It afuni pok meneba nen ogore an na'ma sebe i weri'lagwi. Nen an nen yi'nogo hilingisugun o iluk yagaisugunem he, iren tiphogo nek hilingiri'lagwi.

⁴⁶ It inailo lek hilingitarek mene a'nogo mondogat lek agama re, it inebe inoak leikhogo re o kota leget omamerogo waganek mene elonggoma omanogo nen wulibi weri'lagwi.

⁴⁷ Neisena Tuhan he eluk mondok werek! An werekwe a'luk telnaferek mene andi fogeratu mondok logogun. Allah an nebe telnaferek mene andi Hokho agun hilingi'mo re At enek legeisogo fikhi logogun.

⁴⁸ Arenat naselei mene inoba nen nalonget nobagaluk, afuni inunggulenu amu mene re an na'ma sebelogo fisa weri'lago.

⁴⁹ Aren he an naselei mene ninom weim yaforek mene inenggiba nen, telogo nobagali'lago. Tuhan neisena, it naselei mene inenggimo nen Harenat an nalonget obagakhi lagen, funi inobabut inawulagam mondok weak mene inoba nen Haren ma'murogo fetnarek mondok welagen.

⁵⁰ Andi faget he it afuni inunggulenu lombok inanggele'ma nen legeisogo hobagakhi logogin o. Nen Hat hobaget wuniba fogethafu mondok logogin.

⁵¹ At Allah nen raja Aren unggul sebelogo menfikhe mene ebikhit agasik omame hokho mene wogetemo alonget fikhe. Aren he ap Aren menfikhe mene, Daud inom at eisok erokwe mene inom, a'nogo endawi hundik hilinginafu mondok logogin,” iluk wuni wati lagaikhe.