2 SAMUEL 21 - Allah Wene Fano Wene Hupla Inane

At Saul en tagomangge mene unggum inoba fesukwasik inebe pinggi inoatukwa wene

¹ At Daud ebe raja logolik ferinarek were'ma andem he sumburu ouwak mondok elo'lekhogo lagasikhesik tahun henagan inukhogo welagaikhe. A'nogo hilingik were'ma re at Daud en he a'nogo agaikhe mene andi faget Tuhan nen yi'nogo ti'nogo yaganesuageluk kinotikhemo, At Tuhan nen ikhi logolik he, ”Sumburu ouwak lagaikhe andi erore at Saul inom at eisok erokwe mene inom weak hilingitaba o, iren he ap Gibeon mene mondogat inoata andi nen,” iluk yagatikhe.

² (Afuni Gibeon mene andoma re it Israel inap inom seberek mene re lek, athe ap Amori mene inap oba nen he irogo andogorogo inamu welagaukwa inap. Afuni Israel mene nen he it wene abok yagaisikhi logolik, Niren hit he hinoasugun lek we hineluk hinobagagun, iluk yagaisasukwaba nen he it Israel mene inom, Yehuda mene inom inobaget wenggelhi logolik he, it inebe mondogat inoatukwa.) A'nogo hilingfisasukwama nen he at Daud en wolinafikhesik he,

³ it inoba heinok wogisikhi logolik,” Hiren afuni Tuhan againafuri fanot fisikhi logobagaigen he, an nen hit hinoba weaget hinafi lagaukwa mene faget onggo fagain anggigi hilingi'mo re, hit hinoba ninggi'nogo mene hilingisiok?” iluk yagaisasikhe.

⁴ A'nogo yagaisasikhemo iren onggo ikhi logolik he, ”Nit ninawene at Saul inom, at eisok erokwe mene inom, inoba agaikhe mene andi re emas, perak oba leget fou mo re elo'lek, nen niren ogo afuni Israel mene misik ekhe wasugun iluk ogo anggikhi lago mondok legaro,” iluk yagatukwa. A'nogo yagatukwama at Daud en ikhi logolik he, ”Ariginik halok he, an nen hit hinoba ninggi'nogo hilingisuak, anggikhi lagep?” iluk heinok wogisasikhemo.

⁵ Iren onggo ikhi logolik he, ”At Saul Tuhan nen wenagaisogo raja menfesikhe mene a'nogo nen he, nit mondogat leget ninobagaigeluk hilingninafi lagama re, afuni Israel meneba nen he nit mondogat legarik logoin anggikhi lago o.

⁶ Arigini'mo re, at Saul en tagomangge mene andoma nen ap mene nek inebe 7 nen andem niren Tuhan elokhoma nen o Gibea kota at raja Saul onggwarek aiba andoma nen inoasimbik inebe eba kologo fisouwogen he wo'nisan o,” iluk yagatukwa. A'nogo yagatukwama at raja nen ikhi logolik he, ”Fano, enggere it inebe an nen hit wokhisagain o,” iluk yagaisasikhe.

⁷ Oba nen he, at Daud inom Yonatan inomen wene hombuk pal-pal agaukwama re, at Yonatan amlogo Mefiboset a'nogo re wogisigi'legengge herakfisasukwa.

⁸ At Daud en woginafikhe mene Armoni inom Mefiboset inom andem he, at Saul againafuri at Rizpa hun Aya agun a'nogo nen taginafikhe mene. It andem inom he at Saul a'logo Merab a'nogo againafuri abengge inebe 5 nen aremnogo inom enek he woginafikhe. Yenggerugwi andem he at Merab hun Adriel Barzilai amlogo o Mehola mene a'nogo nen wanhikhesik taginafikhe mene.

⁹ It inebe a'nogo re afuni Gibeon mene inoba wogisasukwama re, inebe 7 nen aremnogo re Tuhan elokhoma hilingitunem omanogo seberogoat eba porogo fisasukwama wa'lagaukwa. Unggum wa'lagaikharek mene inoba fesukwa andi re ebe o e ilit sabelhu mene a'nogo wurep kobok iwagu kwelek, jelai omanogo palhu sambul hilingitukwa.

¹⁰ A'nogo hilingitukwama re, at hele Rizpa Saul agwe amingmingenggeba nen agweap erasikhe mene a'nogo nen su karung mene onggwarek faget ap warek were'ma helep amboloba omanogo talfesikhesik welagaikhe. Were'ma at hele Rizpa nen he o linggene sue nen, hubanggo re mene olomene nen ap warek andoma na wesinogo iluk, herakfigi'lek o enggen ugu palhu sambul a'nogo huli nen pikhit engga lologo pikherek huli a'nogo o meiso agu huli a'nogo re herakfuluk lagi'lek kagalek mondok welagaikhe.

¹¹ A'nogo hilingitikhemo re at hele Rizpa nen hilignitikhe mene a'nogo at Daud oba yagasi lagaukwama,

¹² at Daud en he hun Saul oak siling inom, Yonatan oak siling inom, omanogo afuni o kota Gilead meneba nen wani lagaikhe. (It afuni andoma nen he o kota Bet-San kweang wogole'ma nen it Filistin inaben at Saul Tom Gilboa oba nen omame lek hilingisogo fuluk, ap warek omanogo taganogo fesukwasik, ap inoak andoma hinatukwasik fisogo were'ma wani lagaukwa).

¹³ At Saul oak inom, Yonatan oak inom, omanogo andem en waluk wagaukwasik he it inebe 7 nen kelogo fisasukwa mene omanogo inoak inom misi'mo andogorogo fesukwa.

¹⁴ A'nogo andogorogo fesukwasik he at Saul oak inom, Yonatan oak inom, it inebe 7 nen aremngo inoak inom he, hun Saul eisena Kish nen afuni salinafarek oba o Sela wilayah it Benyamin meneba andoma salinafukwa. At raja nen wene melalek yagaisasikhe mene a'nogo mondogat hilingitukwama nek he, Allah it inaiba inanggweangma andoma faget samban isikhe mene a'nogo esanggo holhikhesik onggo yagaisasikhe.

Ap Filistin mene inoagese mondok uan meneba nen mabenet fisasukwa wene

¹⁵ It afuni Filistin mene inom Israel mene inom, omanogo weim nekhengge yafukwama, at Daud inom agoromi inom a'nogo it ap Filistin inap inom weim yabi lagaukwa. Yabi lagaukwama nen yafu kwelek a'nogo re at Daud a'nogo omame mondok lek agaikhesik oba lebelekhogo hilinglagaikhe.

¹⁶ A'nogo hilinglagaikhesik were'ma nen he, ap ekhe oagese uan agun enu re Yisbi-Benob andi wagaikhe. Arige re no perunggu helep hangge mene enggin he 3 kilo mene fisogongge a'nogo welagaikhe. Nen at andi nen enggarok he ket mene ouwa'ma kelik welagaikhe, nen at endawimo anggikhi logolik he, eberogoat at Daud he an nen wasigin iluk, anggasikhesik wagaikhe.

¹⁷ Oba nen he Abisai hun Seruya amlogo a'nogo nen at Daud lebetha wagaikhe. Aren he hun oagese uan agun a'nogo oba herogo sagali ikhi logolik he, ebe pinggi warogo fesikhe. A'nogo watikhe mo, at Daud agoromi nen he inoe ebe faget agap telogo mel isukwa, ”Afuni israel mene inebe mondogat lek hilingisogo ninobagau ha'ma re, ninoe hat he weim ninom yabi logoin legenggere, hane tekhogo wene watnisan o,” iluk yagatukwa.

¹⁸ A'nogo yagatukwama nen he, nekhengge weim it Filistin inap inom, o Gob andoma yafukwa. Weim andi yafi logolik he, hun Sibkhai o Husa agun nen he ap oagese uan agun ekhe enu re Saf andi warogo fesikhe.

¹⁹ Nen, weim amu sambul ekheba re it Filistin mene inom o Gob kwe andoma yafi logolik he, Elhanan hun Yair o Betlehem mene a'nogo amlogo nen he, hun Goliat aiba o Gad mene warogo fesikhe. At Goliat en arige andi obakhe re e su itarek mene obakhe hangge hilingik welagaikhe.

²⁰ Andi nen it Filistin inap inom, a'nogo nekhengge o Gat kwe weim yafukwa. Andoma re ap oagese uan mene weim yafu aple faget nonou sek-segerogo hilingiterek agun ekhe welagaikhe.

²¹ A'nogo logolik he, aren it Israel mene faget piliphogo pelaginafi lagaukwama re abo Yonatan hun Simea amlogo at Daud oe a'nogo nen warogo fesikhe.

²² At Daud agoromi inomen ap inebe 4 en inoatukwa mene andem he, it ap inoagese uan mene o Gat inap omanogo inambisangma mene inoatukwa.