2 SAMUEL 20 - Allah Wene Fano Wene Hupla Inane

Ap Seba nen Daud inom weim palek logolik wolelenggen inafi lagaikhe wene

¹ O kota Gilgal andoma re ap weagerogo fisikhi lagaikkhe mene ekhe enu re Seba welagaikhe. At andi ebere hun Bikri amlogo, at unggulenu Benyamin mene welagaikhe. A'nogo were'ma, at Daud ebe inanggilukhogo waluk wagunem, at Seba nen he trompet furogo anethikhi logolik ane hokhoba yi'nogo ikhi lagaikhe, ”Nit he at Daud ninom hundik welago lek a'nogo. Ninggi'nogoluk niren at murok logoin nogo? Hit afuni Israel mene yi sani, inaiba louwogo!” iluk ane humeti lagaikhe.

² A'nogo humetunem it afuni Israel mene omanogo nen at Daud a'nogo herakfuluk he at Seba ombo'ne lagaukwa. Oba nen it Yehuda inap enek he at Daud oba tipsek logolik i Yordan ima nen waga lagaukwasik pikhit o Yerusalem kwi wagaukwa.

³ At Daud a'nogo awi silimo omanogo asi wagaikhesik he, helime agagwi inamingmingengge meneba nen agagwiet inafikhesigen o fisogo logoino, iluk fisaluk lagaikhe mene omanogo o at raja awi istana kagalek welagaikhe mene a'nogoba fisa wagaikhe. Fisa wagaikhesik he it inamolongge mondok hokhorogo fikfukhogo hilingfisasikhe, oba nen he it hemi andem at Daud inom ekhe nogogi'lek sogwe higit welagaukwasigen wa'larik lagaukwa.

⁴ At raja a'nogo nen Amasa oba wene fikhi logolik, ”Afuni Yehuda mene andogerisaluk we hinenggi henaganek mene andiba re hat hinomat we'ni o,” iluk isikhe.

⁵ A'nogo isikhemo re at Amasa a'nogo lagaikhesik he afuni omanogo andoget inabigin iluk lagaikhe, oba nen he at a'nogo re at raja nen linggene en fesikheba aremnogo higithogo wagaikhe lek.

⁶ A'nogo wagaikhe le'ma re at raja nen he Abisaiba ikhi logolik he, ”At Seba andi re, ap Absalom en endebat hak weaget ninafi lagaba nen, aren he hokhorogo weaget ninabigiluk werego. Enggere aren awi leget pa'leget omamerogo waganek mene omanogo sebeli kwimbik he, at ebe nit welagoba nen eluk wulibinogore, an nagoromi woginabimbik muginarek lano,” iluk yagatikhe.

⁷ A'nogo yagatikhemo re, it Yoab mene esa logalek omanogo inom he it esa at raja ebe faget kagalek nikharek mene omanogo inom, nen it ekhe esa fena omanogo inom he at Abisai a'nogo nen woginarek o Yerusalem en muginarek louwogeluk lagaukwa.

⁸ It a'nogo o Gibia helep hokho mene were'ma omanogo lagaukwa hak he, at Amasa a'nogo it heraginabik wagaikhesik ambi asi wagaikhe. Andi sambul he, at Yoab asu weim louwogeluk labetarek mene laberogo enggarok awinggaba kwelagaisogo ouwa'ma pukhogo welagaikhe. At a'nogo hukhogo elokhoma asi lagaikhe re enggarok a'nogo awinggaba nen waganogo lagaikhemo karok ebenek enggi hare fikhit higili lagaikhe.

⁹ Ariginhikhemo re, at Yoab en Amasa ba ikhi logolik, ”Nagailak, hat ninggi'nogo welagen?” iluk at Amasa a'nogo ambe tobesigiluk hakhogo enggi pikhit kwe nen omboro pilingiti lagaikhe.

¹⁰ Ariginhunem aremnogo at Amasa a'nogo re Yoab karok enggi hare fikhit welagaikhe mene a'nogo eilenggen higi'lek welagaikhe. Were'ma nen we ferekhogo aremnogoat at Yoab en Amasa alabut talogo potfesikhemo, elonggomangge omanogo kweang kwe mondogat eil-kweilhogo taik isikhe. A'nogo watikhe aremnogobaat wa'lagaikhemo re hobuk ekhe inom talhi'lek herakfesikhe.

¹¹ A'nogo wa'lagaikhemo at Yoab agot ekhe at Amasa warek a'nogo era'lu andoma mendek welagaikhengge a'nogo ane kweti logolik, ”Ap sa nen at Yoab ogo Daud ogo inebikhit asigin anggikhe halok he, Yoab ombo'ne logoin o!” iluk isikhe.

¹² Nen at Amasa warek mep enek mondok hilingik engge a'nogo re ebekwe lagaikharek oba tulem omanogo welagaikhe. Were'ma re at Yoab agot a'nogo nen it afuni kwe andi kwe wagu mene re andoma nek kamo ugunem isasikhesik he, aren he ap warek a'nogo lisogore yabumo fei lagaikhesik he selimut oba salogo fesikhe.

¹³ Ap warek a'nogo ebekhalem en lisogo wulakfesukwama nek he, afuni mondogat omanogo re inanggwe pikhit louwogeluk laga logolik he at Seba a'nogo murok lagaukwa.

¹⁴ Nen, at Seba re it afuni inunggulenu Israel mene werekwe omanogo mondogat ya kwigik ta kwigik lagaikhesik he o Abel-Bet-Maakha asi lagunem it hun Bikri unggulenu mene omanogo re mondogat inom lagaukwa.

¹⁵ At Yoab agoromi nen holhasukwa re, at Seba a'nogo andoma werek ugunem holhukwasik he iren o kota a'nogo hukhogo kwelabi lagaukwa. Lagaukwasik iren he o kota leget pa'leget abel endakwe haningisogo omanogo kweang kabogerik lagasukwasik he, leget fak waganek a'nogo sunukhogo pelabugun iluk he kweang a'makwe habulik kwisukwa.

¹⁶ O kota andiba re he obabut hebelek mene ekhe welagaikhengge a'nogo re, leget fak mene amboloba aremnogo lagasikhesik mendek logolik ane ikhi logolik he, ”Holini! Holini o! An Yoab ninom ninane ugun enggere at wesuakhogo yaga'ni,” iluk kweti lagaikhe.

¹⁷ A'nogo ugunem at Yoab he a'nogo ambit lagaikhemo, he a'nogo nen heinok wokhikhi logolik he, ”Noe hat arire Yoab a'nogo a, amu mene a?” iluk heinok wokhasikhemo, at Yoab en he, ”Io,” iluk yagatikhe. A'nogo yagatikhemo at he a'nogo nen ikhi logolik he, ”Noe, nane ikhi lagi mene yi holin o,” iluk yagatikhemo re, ”Fano, an nesanggo holek welagi,” iluk at Yoab en andi isikhe.

¹⁸ A'nogo isikhemo at he a'nogo nen ikhi logolik he, ”Attak he afuni nen yi'nogo ikhi lagaukwa, ’Wene yi'nogo ti'nogo elu asuageluk halok he, o kota Abel andoma lano, ugunem a'nogo hilingiti lagaukwa.

¹⁹ Nit ninawi kota Abel ari re mondok hokho mene hilingik, nen o afuni Israel mene werekwe andoma nen he o arire tiphogo nek hilingitarek aiba, nen ebe ogore yi wene ti wene onggorengge we wonghogo werek awi.’ Oba nen he, nenahalok noe haren wolelenggenhogo fagain iluk hilingiti lagen? Noe hat he At Tuhan anggweang onggwaregen mene ari weagerogo fagain iluk hendawimo hamolo logolik hilingiti lagen a?” iluk yagatikhe.

²⁰ A'nogo yagatikhemo re at Yoab en ikhi logolik he, ”We ibi-eberogo nen he mondok lego! An nen hit hinawi kota ari weaget figik, wolelenggen hogo figik igin iluk he eberogo nen anggigi lego!

²¹ Wene andi niren wenggelho mene re lek oba nen he, nit he ap misik ekhe enu Seba hun Bikri amlogo, awi o Efraim tom oba mene andi nen, at raja Daud a'nogo inom weim palek logolik weak-bekahogo hilingfisugu weregen herarik wagosi'mo re, at andi werek halok he an nenggim foumo o kota yi herakfuluk nambotkwe naiba lagain o,” iluk isikhe. A'nogo yagatikhemo at he a'nogo nen ikhi logolik he, ”Ap andi unggul palek he niren leget fak waganek ariba nen hukhesi wesugun o,” iluk yagatikhe.

²² A'nogo yagatikhesik at he a'nogo inom, ap inawenggelek mene omanogo inom he lagaukwasik, at Yoab endawimo anggasikhe mene a'nogo yagaisa lagaukwama re, at Seba unggul a'nogo tegetukwasik he at Yoab ambit hugesi wagaukwama, Yoab en trompet ane futhasikhemo, it agoromi omanogo o kota a'nogo herakfisaluk he inawi lombok pugulhukwa. Nen, at Yoab ogore o Yerusalem raja ba yagasi lagain iluk lagaikhe.

At Daud a'ma yabu hilingiti logoukwa mene a'nogo re yi

²³ At Daud en yabu at a'ma hilingiti logogun mene menfisasikhe mene a'nogo inebe re yi: It afuni Israel mene mondogat faget inoe kain panglima re hun Yoab menfesikhe. Nen at Daud onggwarek ebe kagalek nikhi logogun mene inoe re Benaya hun Yoyada amlogo a'nogo menfesikhe.

²⁴ Yabu inane ninghogo yagaisugu kwelek hilingitu mene faget inoe re hun Adoram andi menfesikhe. Nen, uang negara andi faget fisogo mene re Yosafat at Ahilud amlogo andi menfesikhe.

²⁵ O negara andi faget lisu palhu mene re Seya menfesikhe. Imam he Zadok inom Adoram inom menfisasikhe.

²⁶ Nen imam o istana at onggwarek werek oba omanogo faget he ap Ira awi kota Yair mene menfesikhe.