2 SAMUEL 2 - Allah Wene Fano Wene Hupla Inane

Daud afuni Yehuda mene inoe raja logouwagaluk menfesukwa wene

¹ At Daud le wuni a'nogo arat isikhesik, Tuhan oba mel yagatikhe, ”Neisena, hat endawimo nen he, at Daud en afuni Yehuda mene o kota ekhe ferinarek logouwagen loak, iluk anggegen halok he layoga?” iluk heinok wokhasikhemo, At Tuhan nen he, ”Fano, lano o,” iluk yagatikhemo, at Daud en he, ”O kota ki layok?” iluk heinok wokhasikhemo, Tuhan nen he, ”O kota Hebron lan o,” iluk yagatikhe.

² A'nogo yagatikhemo, at Daud ebe inom, agagwi inebe pire, he Ahinoam o Yisreel mene inom, he Abigail, o Karmel mene ap Nabal agwe sogwe a'nogo inom, wagaukwa.

³ A'nogo wagunem, at agoromi omanogo inagagwi inagainafuri inom inebe lombok Daud ombo'ne wagaukwaat. A'nogo wagaukwasik, o kota Hebron inom, esanggokwe andoma inom welagaukwa.

⁴ A'nogo wagaukwasik were'ma, afuni Yehuda mene o Hebron wagaukwasik, at Daud ebe it inoe raja logouwagaluk menfesukwa. A'nogo menfesukwama afuni nen he, ”At Saul ebe warek a'nogo re afuni Yabesh mene o Gilead werek mene omanogo nen kweangma salha,” iluk isukwama esanggo holhikhesik he,

⁵ ap ekhe inayonggo fesikhesik, lakfisikhi logolik, mel yagaisano isikhe: ”Hit hinobabut mandok fano higithoge hinoe raja ebe kweangma salhep andi nen he, At Tuhan nenat hit hinoba fanot hinobagakhi logouwago.

⁶ A'nogo hilingitep andi nen he, At Tuhan nenat endawi hundik hilinghinafik sethinarek mondok welagik ikhi logouwak. Nen hiren a'nogo hilingitep andiba re, an nen ogo hit hinoba fanorogo nek hilinghinobagakhi logogin aro.

⁷ Nen hit hineisena raja Saul a'nogo ebe arat wa'lagaba nen he, it ap Yehuda inaben an nebe raja logouwageluk menfanha hilingi'mo re, hinendawinggen hambukhogo logolik hinailo legengge hinendawigngen serogo logoni o,” iluk wene warogo lakfesikhe.

Israel mene faget inoe raja Isyboset logouwageluk menfesukwa wene

⁸ Abner hun Ner amlogo at Saul agoromi tentara inoe panglima welagaikhe mene a'nogo inom, Isyboset hun Saul amlogo a'nogo inom, emberek heise wulifukwasik he i Yordan palogo elikwe fikhit o Mahanaim andoma lagaukwa.

⁹ Andoma nen at Abner en he, Isyboset a'nogo o wilayah Gilead inom, Asyuri inom, Yizreel inom, Efraim inom, Benyamin inom andi nen it afuni Israel mene mondogat faget inom, inoe raja logouwageluk menfesukwa.

¹⁰ At Isyboset ebe umur 40 tahun hilingik kwelek raja menfesukwama, aren tahun pire melalinafu welagaikhe. Oba nen he it inunggulenu Yehuda mene re at Daud oba lombokhogo logolik, ane hologo hilingiti lagaukwa,

¹¹ nen at Daud ebere o Hebron logolik it afuni Yehuda mene melalinafu were'ma nen enek he tujuh setengah tahun hilingitikhe.

It Israel mene inom Yehuda mene inom weim yafukwa wene

¹² Linggene misik sambul he at Abner a'nogo o Mahanaim en he o kota Gibeon andoma lagain iluk it Isyboset agoromi mene fena inom eiso'marogo lagaikhe.

¹³ Nen, at Yoab (agaisa enu Zeruya) a'nogore at Daud agoromi inom o kota andi lagaukwaat. Ap esa pire logalek fena nen fena nen lagaukwa mene omanogo arogo Abner ebikhit mene re, i mogo esanggo yi fikhit werek kwelek, Yoab ebikhit mene re i mogo esanggo eli fikhit logolik he, inelokhe yet-yet aga lagaukwa.

¹⁴ A'nogo hilingiti logolik at Abner en Yoab oba ikhi logolik he, ”Yogo, hat hagoromi inom an nagoromi inom wal-wal asuak ta!” iluk isikhemo, ”Fano o,” iluk isikhe.

¹⁵ A'nogo isikhemo re it ap inunggulenu Benyamin mene hun Isyboset fikhit mene re inebe 12 nen menlasi wagaukwama, at Daud agoromi mene ogore inebe 12 nenat menlasi lagaukwa.

¹⁶ A'nogo menlasi lagaukwasik inesi lit-lathogore inebe abirengge aremnogoat ekhe nen ekhe talogo figik, ekhe nen ekhe talogo figik hilingirik lagaukwa-lagaukwa re inebe mondogat wa'lagaukwa. Ariginhukwama re o Gibeon obalik a'nogo hilingitukwa ba andem enu re, ’Karogane yabumo,’ iluk ikhi lagaukwa.

¹⁷ Wene andi hilinglagaikhemo ombo'ne re, weim mondok elo'lekhogo yafukwasik he it Abner agoromi inom, Israel mene inagoromi tentara inom omanogo re at Daud agoromi tentara omanogo nen inomame leget fisasukwa.

¹⁸ He Seruya eagwi inebe henaganet engge inenu re Yoab inom, Abisai inom, Asael inom he, andem were'ma nen a'nogo hilinglagaikhe. Nen at Asael andi nen kwe fungethugunem he no kijang en lagarek andi hakhogo furung warogo fungethikhi lagaikhe.

¹⁹ Andiba re aren hun Abner a'nogo re sirok-murok lagaikhe.

²⁰ A'nogo murok lagunem he, at Abner a'nogo elokhe ambotkwe hebekhogo yethasikhesik heinok wokhikhi logolik he, mel isikhe, ”Hat ari re Asael a'nogo a?” iluk heinok wokhasikhemo, aren ikhi logolik he, ”Io,” iluk yagatikhe.

²¹ A'nogo yagatikhemo at Abner en ikhi logolik, ”An mu'narek wagu lek! Hat he it ap sikhe fisogo mene andoma mene misik ekhe fakfembik he asikhe telogo helanogen he walhan!” iluk yagatikhe. Oba nen he at Asael a'nogo nen he murogat lagaikhe.

²² A'nogo murok nugunem at Abner a'nogo nen nekhengge ikhi logolik he, ”Hat he an mu'naregat wagu lek, hobuk he an nen hebe pinggi hoasigiluk welagi. Enggere an nen hoe Yoab andi elokhoma ninggi'nogo hilingisu hak nogo?” iluk yagatikhe.

²³ A'nogo yagatikheba nen he at Asael a'nogo kamogi'legat murok enek nugu nen he, at Abner en arige kabelek a'nogo ambothan tunghogo at Asael a'nogo al talogo re sige a'nogo elonggolokwe nen liabek agabo enggap-gap oba furulhogo watikhe. A'nogo watfesikhemo re, Asael a'nogo elokhe sogoum hulambetikhesik aremnogoat ebe wa'lagaikhe. A'nogo wa'lagaikhemo re ap at ebe warek were'ma asi wagaukwa mene omanogo re andem enek kamo i wagaukwa.

²⁴ Oba nen he at Yoab inom Abisai inom enek he pikhit at Abner a'nogo murok lagaukwa. Murok lagaukwasik he o mo ubuk ugu kwelek he it o Ama punuba o Giah mo liabi wagarek fikhit werek mene, o Gibeon nen he lei fikhit omanogo asi lagaikhe.

²⁵ Omanogo nen he it inunggulenu Benyamin inap he at Abner a'nogo inom mangotukwasik weim yafu aple punu misik ekhe asilimo andoma nen esa fologo erathigik yanggulhi lagaukwa.

²⁶ Omanogo nen at Abner en Yoab oba ane humeti logolik he, ”Nit he weim yafu mondok logogun a? Hat he weim yafi lago mene yi ambisangma re mondok weak mene nek weinam asigin a'nogore hendawinggen wenggelhikhi lagen lega? Nit yoma re hagaila'lak ninunggulenu misik mene o. Hat henggi miren hakhogo wela'luk, haren hagoromi inoba, hit ninagaila'lak andoma muginarek lagu lek, iluk yagaisigi'lek alokhogo mondok logogin nogo?” iluk yagatikhe.

²⁷ A'nogo isikhemo re at Yoab en onggo ikhi logolik he, ”Allah Eluk Mondok welagarek mene enuba hilingi'monggere, haren hane a'nogo ekhe ilen le'ma nen he, an nagoromi nen eberogo hit mukhinarek lagu kwelek enek o hobit hubet huli hilingla'lebo,” iluk yagatikhe.

²⁸ A'nogo isikhesik he, at Yoab en he afuni Israel mene muginarek lagu lek iluk enegengge trompet ane a'nogo futhasikhemo re, iren muginarek laga lagaukwa mene a'nogo pal fesukwa.

²⁹ A'nogo hilingitukwasik he at Abner a'nogo agoromi inom he hup hundik lagaukwasik o Yordan tonggoma logali lagaukwasik, ohealekwe re linggene inukhogo a'nogo laga lagaukwasik he o Mahanaim asi lagaukwa.

³⁰ A'nogo hilingitukwasik at Abner murok laga lagaukwa mene a'nogo herakfesukwasik he, aren agoromi omanogo mondogat kaboget fisasikhesik kwelagisilik lagaikhe re, at Asael wa'lagaikhe mene a'nogo inom he it fena 19 nen inene inomt inebe le'ma isasikhe.

³¹ At Daud agoromi nen ap inunggulenu Benyamin mene Abner inom weim yabi wagaukwa mene omanogo re inebe 360 nen inoatukwa.

³² A'nogo hilingitukwasik at Yoab inom, agoromi inom a'nogo re abo Asael warek a'nogo pia'luk lagaukwasik he o Betlehem at ero mene salinafi lagaukwaba omanogo sali lagaukwa. Lagaukwasik warek a'nogo salfuluk he it a'nogo hup hundik laga lagaukwasik o fem hubet werek kwelegat he o Hebron asi lagaukwa.