2 SAMUEL 19 - Allah Wene Fano Wene Hupla Inane

At Yoab en, ”Daud weak hilingiten,” iluk fakhogo yagatikhe wene

¹ At Daud en a'nogo hilingitikhemo afuni nen he, ”At Daud amlogo Absalom faget fong wati logolik ouwak le agu werego,” iluk Yoab yagasi wagaukwa.

² At Daud agoromi tentara mene omanogo afuni nen he, ”Daud amlogo faget ouwak le agu werego,” iluk isukwama inesanggo holhukwasik he, andi sambul weim inomame agaukwasik inagaiyegetukwangge a'nogo agaumhogo re inendawinggen heiselhikhe.

³ A'nogo hilingitukwasik, ap tentara weim heise wulifaresik, inenggali nen inaiba pikhit lagaikharek andi hak, inane legat linglong o kota a'nogo kwi wagaukwa.

⁴ At raja a'nogo elokhe salogo le ane hokhorogo aga logolik, mel isikhe: ”Namlogo e, Absalom namlogo e. Absalom namlogo e,” iluk le agaikhe.

⁵ Le a'nogo agu were'ma, at Yoab raja Daud oba lagaikhesik he mel yagatikhe: ”Hat hebe inom, hagainafuri inom, hagagwi ebe mene inom, hamingmingengge mene inom, hinoa'lep mene re hagoromi tentara nen telhinafa meneat he, yogondak haren inenggali warogo fisegen o.

⁶ Ap hat hebe inabit mene omanogo hendawirinafi logolik he, hebe inendawi mene omanogo habiret fisikhi lagen andi nailo e. A'nogo hilingiten andiba re, honggwarek hagoromi tentara mene inogogwi mene inomat inebe mondok elo'lek hilingisogo fisegen andi. Hat hendawimo nen he, yogondak Absalom ebe eluk werek kwelek, it andi inebe mondogat wa'la'lepma fano, iluk nit mondogat faget ikhi lagen higi.

⁷ Yogondak hat hebe menla'luk hagoromi inendawimo fanorogo inendawinggen sebeli wulibin o. Haren a'nogo inoba wulifi'lek kamo egen halok he, o yogondak hubanggo yiat, it ekhe hat setharek hinom welagi'lek felelenghogo pugulugun o, iluk Tuhan enu hombuk palogo yagaheti o. A'nogo hilingisugun halok andi re hat hebe ta'lagagin oba nen weak hilinglagunem hilik waga lagen mene andi endebat hangge meneat he, yogondak yi nek he weak mondok hokho mene agunem hagain o,” iluk yagatikhe.

⁸ A'nogo yagatikhemo, at inoe raja a'nogo siakhogo menlagaikhesik he, leget pa'leget ambe palek oba era'lu wulibi wagaikhesik andoma welagaikhe. A'nogo hilingitikhemo, it ap ekhe nen he, ”At ebe andoma hurek werek,” iluk isukwama, agoromi tentara mene inesanggo holhukwasik he, at oba andogosi wagaukwa. A'nogo hilingitu kwelek, it ap tentara Israel mene omanogo inebe mondogat weim heise pikhit inailokwe lombok he'la lagaukwa.

At Daud ambotkwe o Yerusalem wagaikhe wene

⁹ A'nogo agaikhemo re it afuni Israel mene werekwe a'nogo re inane hokhorogo sagalhi logolik, mel isukwa: ”At raja Daud en he, nit afuni Filistin mene nen inom, ninaselei mene ekhe nen inom, inawe a'ma fetninarek were'ma telninafikhe lek nogo? Arenat telninafikhe o. A'nogo meneat he, at ebe ap Absalom agaiserogo o yoma herakfisaluk heise wele'ma lagaikhe andi.

¹⁰ Andi nen he, niren Absalom nit ninoe raja logouwagaluk menfogo meneat he, yogondak at ebe weim yafi logolik wata andi. Andi nen he, ap nit mene ekhe nen ogo at raja Daud andi hondo'luk ambotkwe waluk wagep lek andi nenahalok?” iluk isukwa.

^11-12 Wene a'nogo isukwa mene andi, it ekhe nen raja Daud arat yagasi lagaukwama esanggo holhikhe. Esanggo a'nogo holhikhesik, ap Allah eisewerek mene Zadok Abyatar emberegen afuni Yehuda mene inogogwi wene heinok yi'nogo wogisoagaluk inoba lakfisa wagaikhe: ”It ekhe nen, at raja Daud aiba ambotkwe wesuageluk nebe wo'nabuogoluk ugu kwelek, hit hinebe noe nagot an werekwe mene meneat he, a'nogo igi'lek ebe hobugen wo'nabuogeluk welagep andi nenahalok, iluk ikhe,” iluk yagaisoagaluk lakfisa wagaikhe.

¹³ A'nogo lakfisa waga logolik, ap Amasa oba yi'nogo yagasuageluk lakfisa wagaikheat: ”Hat hebe an nagailak lek nogo! An nen o yogondak huli nen hat hebe an nagoromi tentara mene inoe ap Yoab obulu'mo menhobagagin o, nen lek halok he, At Allah nenat nebe noasuago, iluk ikhe,” iluk yagasuagaluk lakfisa wagaikhemo wagaukwasik, yagatukwa.

¹⁴ Wene a'nogo lakfei wagaikhe andiba, at Daud en afuni Yehuda mene mondogat inendawinggen wanhikhemo, iren he, at Daud ebe inom, agoromi tentara mene inebe mondogat inom, inomat inambotkwe o at Daud ebe welagaikheba wesuagaluk wene warogo lakfesukwa.

¹⁵ A'nogo isukwama, at Daud wesigiluk i Yordan aik oba wagaikhe. Wagaikhemo, afuni Yehuda mene Daud ebe wagunem wanhukwasik he, i Yordan palogo wulibi wagunem salmaginafik, yerinarek welagik, uogeluk o Gilgal arat lagaukwasik welagaukwa.

^16-17 Laga logolik, ap Gera unggulenu Benyamin mene amlogo enu Simei afuni inunggulenu Benyamin mene ekhe inebe 1.000 nen woginarek afuni Yehuda mene omanogo inom weak-weak Daud ebe wanuogoluk lagaukwaat. A'nogo lagu kwelek, at Ziba Saul againafuri mene inamingmingengge a'nogo againafuri ap inebe 15 inom, amingmingengge mene inebe 20 nen inom, woginarek lagaikhesik, at kain Daud ebe oan wagi'lek werek kwelek i Yordan palogo wulifukwa.

¹⁸ A'nogo lagaukwasik were'ma, at raja Daud ebe wagaikhemo, iren Daud againafuri i Yordan palogo woginarek wulibi wagaukwa. A'nogo woginarek wulibi waga logolik, at kain Daud en it leberisoagaluk yagaisugunem, at endawimo anggasikhe hagat leberisasukwa. Raja Daud a'nogo i palogo wulibi wesigiluk ugunem, at Simei eindep awi yagaisogo Daud awe a'ma kwisikhesik hai wati logolik, mel yagatikhe,

At Daud obabut fano nen ap Simei wene oba figi'lek sebelogo fesikhe wene

¹⁹ ”Haren an hamingmingengge yi, an nebe weak asuagaluk yaganetikhe mene, iluk yaganetun o, noe. An nen hat o Yerusalem herakfuluk wagunem hebe weak asuagaluk yagahetigi mene andi, haren hendawimo enggen figi'lek sebel fisano o, noe.

²⁰ An hamingmingengge nen andi weagat hilingitigimo, iluk arat futfigi andi nen he, ap an werekwe mene Yusuf en tagongge mene ekhe oan wagi'lek werek kwelek, an tak wokhabigiluk yogondak wagi yi o, noe,” iluk yagatikhe.

²¹ A'nogo yagatunem, Zeruya amlogo Abisai a'nogo nen esanggo holhikhesik he, Daud mel yagatikhe: ”At Simei andi re ap Tuhan nen wenagaisogo fikhe mene oba homan fesikhe agun hilingi'mo re, at ane onggo ebe pinggi wasugun fano,” iluk isikhe.

²² A'nogo yagatikhe meneat he, at Daud en Abisai oe Yoab emberek mel yagaisasikhe: ”Hit Zeruya againafuri yi re, an nen igin mene andi hiren sagalogo fogoin lego. An o yogondagen afuni Israel mene inoe raja hilinglagiat andi nen he, afuni Israel mene ekhe wene inoba fembik inoasugun mondok lego,” iluk yagaisasikhe.

²³ A'nogo yagaisasikhesik, hobuk at Simei mel yagatikhe: ”An nen hat wene hoba fembik hebe hoasigin lek, iluk hombuk palogo sebelhi lagi o,” iluk yagatikhe.

At Daud obabut fano nen ap Mefiposet endawiratikhe wene

²⁴ A'nogo yagatikhemo, at Mefiboset Saul omba a'nogo Daud ebe wanigiluk inom lagaukwaat. At Mefiboset Daud o Yerusalem herakfuluk wulifikhe huli nen hobuk ambotkwe fanoat wagaikhe andi huli re, eisok sobalhi'lek, omboro palhi'legat logolik, asu sobalhi'legat laberek welagaikhe.

²⁵ A'nogo welagaikhesigen, o Yerusalem en Daud ebe wanigiluk lagaikhemo, at Daud en mel yagatikhe: ”Mefiboset hat he, an wulibi wagagi andi sambul nombo'ne wulibi wagi'lek kamo isigin andi nenahalok?” iluk yagatikhe.

²⁶ A'nogo yagatikhemo, at Mefiboset en he, ”Noe halaboge. An hamingmingengge yi nawe wut warek andi, hat helu o. Andi nen he, an nebe wam keledai ambot oba lagaluk hurek hat hombo'ne nikhi logogiluk an namingmingengge Ziba a'nogo oba wam keledai ekhe an faget tegelogo fanuagaluk yagatigi meneat he, aren lalnafikhe o.

²⁷ Arenat an wene noba le'maat an nenu weak hilingisogo eranen weneat yagahetikhe, noe. A'nogo meneat he, noe hat hebe re, malaikat higit welagen andi nen he, hendawimo nen, fano hilingisu yi'nogo iluk anggegen halok he, andiat hilingnobagain o, noe.

²⁸ An hamingmingengge neisena inom, nagainafuri inom inebe mondogat haren wene ninoba fesigindik felelenghogo ninoatigin meneat he, it inoati logolik, an enek he, hat haiba sumburu ninggi logouwagaluk yaganetigin andi. A'nogo mene re, yogondak an hamingmingengge nen yi'nogo ti'nogo hat kino ekhe yagahesu re elo'lego, noe,” iluk yagatikhe.

²⁹ A'nogo yagatikhemo at raja nen he, ”An nen, Saul angge yi mene ti mene mondogat hat inom, Ziba inom, hemberek wokhisagaluk wene arat igimo hilingi'mo re, haren wene yi'nogo ti'nogo ekhe ugun o,” iluk yagatikhe.

³⁰ A'nogo yagatikhemo at Mefiboset en he, ”Esin he, hat hebe fano hambotkwe wagenma ninendawinggen yamuk ikhesi'mo re, yi mene ti mene egen andi mondogat he, at Ziba amunek heloago. An he nabit, noe,” iluk yagatikhe.

At Daud obabut fano nen at Barzilai endawiratikhe wene

³¹ Nen, at Barzilai aiba Gilead mene o Rogolim en raja Daud i Yordan palogo wulibi wagunem waluk wesigiluk ombo'ne wagaikhe.

³² Ap Barzilai andi ebe arat yaman agaikhesik umur 80 tahun agaikhe mene. At ebe enggi werek agun logolik angge yi mene ti mene mondok hokhorogo were'ma, attak at Daud ebe o Mahanaim were'ma re, sumburu nunggu mene at Barzilai nenat wogoti lagaikhe agun.

³³ Andi nen, at Daud en Barszilai mel yagatikhe: ”Nemberek o Yerusalem louwogo, ninom a'lima logolik yi mene ti mene hat hamolo mene an nen tegelogo hobagagunem helikhi logogin o,” iluk yagatikhe.

³⁴ A'nogo yagatikhe meneat he, at Barzilai nen he, ”Noe an nebe neluk ekhe inom logogin le'ma re, hat nemberek o Yerusalem tulemat logoin andi nahalok?

³⁵ An nebe umur 80 tahun arat agari'mo re, yi fano mene, yi weak mene, iluk penesu mondok elo'lego. Nen, sumburu inom, i inom, nunggunem enduk nambema mondok legat agik, afuni wuni watunem inane nesanggo holu elo'legat agik ikheo, noe. Andi nen he, noe hoba engginet fagain andi elo'lego.

³⁶ Haren yi mene ti mene hokhorogo wo'nesigiluk egen andi, an wanigin mondok elo'lego, noe. An he, we, hat wokharek i Yordan aik eliba horok andi huli lakhobagai lagain o, noe.

³⁷ Lakhobagaluk he, an ogo naiba nambotkwe lambik an nebe neisena nagaisa inebe wa'lagaukwama salinafukwaba andoma horokhogo wa'lasigiluk lagain o. A'nogo meneat he, an namlogo Kimham yi hemberek lani o. Lambik, hat hendawimo nen he, Yi'nogo fano hilingisogo fisagain, iluk anggagain mene andiat hilingisogo feino o, noe,” iluk yagatikhe.

³⁸ A'nogo yagatikhemo at raja nen he, ”Kimham ebe an nemberek lambik he, hat hendawimo hamolo anggegen mene andiat oba higithogoat hilingisogo fagain o. Haren kino yaganeten higithogo mondogat hat halisikhogo wogoti logogin o,” iluk yagatikhe.

³⁹ A'nogo yaga'luk, at Daud agoromi tentara mene mondogat inom i Yordan palogo wulibi wagaukwa. Wulibi waga logolik, Daud en Barzilai hai ambe saluk watikhesik, ”Allah nen fanothabuago,” iluk lakfesikhemo, at Barzilai aiba ambotkwe lagaikhe.

It Israel mene nen, ”Daud raja nit ninoe,” igik, Yehuda mene nen, ”Lek, nit ninoe,” igik, inane sagalek pagalek hilingitukwa wene

⁴⁰ A'nogo lagaikhemo, it ap tentara Yehuda mene inebe mondogat inom Israel mene inebe fena inomen at raja Daud ombo'ne i Yordan palogo wulibi wagaukwasik he, at Daud he Kimham ombo'nerogo waluk he pikhit o Gilgal wagaikhe.

⁴¹ Wagaikhemo, it ap Israel mene mondogat at raja oba wagaukwasik, mel yagatukwa: ”Noe, nit ninagaila'lak Yehuda mene inendawimo nen he, At ninoe raja ebe inom, againafuri mondogat inom, agoromi tentara mene inom, inom inebe nit ninamunegen i Yordan palogo salmaginafik, yerinarek welagik, u mene o, iluk aga andi nenahalok nogo?” iluk yagatukwa.

⁴² A'nogo yagatukwama, it ap Yehuda mene nen he, yi'nogo yagaisasukwa: ”Eberogoat at raja andi re nit ninoe meneat he, hiren nit nenahalok hina'mage lagaikhesik wena'nisikhi lagep? Nit ninamburu at ninoe raja nen wo'nisikhi lagama nen yaganisegeba? I a, at he, nineisok onggo wo'nisikhemo nen yaganisegeba! Tulemat ikhi lagebo,” iluk yagaisasukwa.

⁴³ A'nogo yagaisasukwama, it ap Israel mene nen he, ”Ninoe raja andi ebe hit meneat he, hiren at ane legesugun he, hinebe endebat hangge meneat he, nirenek he, ninebe hokhorogo, ninunggulenu 10 nen logolik, at ane hokhorogo legesugun o. A'nogo meneat he, hiren nit ninoba hinendawimo seramet ninobagegep andi nenahalok nogo? Ninoe raja ebe ambotkwe wesuageluk niren tak yagato andi hinendawimo ebe'ni o,” iluk yagaisasukwa. A'nogo ikhi logolik, ap Israel mene inane endebat liokhogo hangge isukwa meneat he, ap Yehuda mene enek he, inane sebelu mondok elo'lekhogo ninghogoat isukwa.