2 SAMUEL 18 - Allah Wene Fano Wene Hupla Inane

Absalom mabenet fesukwasik ebe watukwa wene

¹ A'nogo wogosi wagaukwama, at raja Daud en he agoromi tentara andogorogo fisasikhesik he, aren inebe wendeberogo re esa 1.000 nen higik, esa ekhe 100 nen higik, hilingfisilik lagaikhe. A'nogo hilingfisasikhesik he it esa wendeberogo fisasikhe mene omanogo melalinafi logogun mene inogogwi kaindek perwira menfisilik lagaikhe.

² A'nogo menfisilik lagaikhesik, weim anggwe henagan meneba yabi wesuagaluk lakfisa wagaikhe. A'nogo lakfisa waga logolik, weim anggwe ekheba inoe Yoab, nen anggwe ekheba re inoe Abisai Yoab agot a'nogo, nen weim anggwe ekheba re Itai aiba Gad mene a'nogo nen woginarek wesuagaluk lakfisa wagaikhe. A'nogo lakfisa waga logolik, mel yagaisasikhe: ”An nebe ogore hit ninomat logoin o,” iluk yagaisasikhe.

³ A'nogo yagaisasikhe meneat he, it agoromi nen he, mel yagatukwa: ”Iren hat hebeat herakhabik nikho andi nen he, Ninom louwok, iluk ugun o, noe. Iren he, nit mu'nisikhi logolik heise pugulogo wulakninobagagun he a? At he, ninebe ekhe minggilogo ninoasugun he a. Nit a'nogo hilingninabimbik, it inendawinggen yamuk ugun mondok elo'lego. It inendawimo nen anggikhi logolik he, Daud agoromi inebe 10.000 mene inoasumo andi elo'lek. At he, at ebe esin mene andi wasimbik enek he, fano, iluk anggili'lagwi andi nen he, hat hebe o kota yoma logolik lebetnisikhi logogin o,” iluk yagatukwa.

⁴ A'nogo yagatukwama, at raja nen he, ”Halok he, fano. Hirenaro,” iluk yagaisasikhesik, agoromi tentara mene inebe 1.000 huliba logalhik, 100 huliba logalhik, isukwa mene omanogo inebe o kota elonggoma nen erarogo leget pa'leget ambe palekwe nen wulibi wagu kwelek, at Daud ebe nek he kwe ambe palek oba mendek welagaikhe.

⁵ A'nogo menlagaikhesik, Yoab inom, Abisai inom, Itai inom, mel yagaisasikhe: ”An nalisikhogo, Absalom ebe alage oan mene andi, ebe warogo fugubo,” iluk yagaisasikhemo, agoromi tentara esa logalek omanogo mondogat wene isikhe mene andi inesanggo holhukwa.

⁶ A'nogo yagaisasikhemo, at Daud agoromi tentara esa logalek omanogo wagaukwasik, it ap tentara Israel mene omanogo inoba wulifukwasik, weim o Efrayim enggama andoma yafukwa.

⁷ A'nogo yafi logolik, andi sambul at Daud agoromi tentara esa logalek omanogo nen he, tentara Israel mene omanogo mabenet fisasukwasik, inebe 20.000 nen mondok hokhorogoat inoatukwa.

⁸ Weim o andoma liak figik, pelak figik mondok hokhorogo yafi logolik, inoatukwa mene andoma we endebat hangge mene at he, enggama inoak agaukwasik wa'lagaukwa mene nek he mondok hokhorogoat wa'lagaukwa.

⁹ A'nogo inoarik wagunem, at Absalom wam enu bagal ambot oba hurek lagaikhe hak he, ap tentara Daud agoromi mene inom ambi agaukwasik, heise wesigin ha'ma nen he, e pai hokho mene a'makwe humusek wagunem anggo bagal a'nogo nek e enggi sebelek a'makwe nen lokhogo wagu kwelek he, at Absalom a'nogo alonggop e enggiba hobalagaikhe. A'nogo hobalagaikhemo omanogo werek kwelek he, anggo bagal a'nogo nek he uarek hela wagaikhe.

¹⁰ A'nogo werek kwelek Daud agot tentara mene ekhe eilenggen haluk Yoab mel yagasi lagaikhe: ”Noe, ap Absalom a'nogo e hokho mene enggiba hobalek were'ma neilenggen higi o,” iluk yagatikhe.

¹¹ A'nogo yagatikhemo, at Yoaben he, ”At ebe eberogoat heilenggen hegen a? Heilenggen hegendigat he ebe wati'lek herakfegen andi nenahalok? Haren ebe wa'lenma re an nen onggo uang perak 10 nen inom hobakhe pugetu misigat ekhe inom wokhe'le o,” iluk yagatikhe.

¹² A'nogo yagatikhe meneat he, ap a'nogo nen he, ”Uang perak mene 1.000 nen onggo wo'nesumo mene ogore, ninoe raja amlogo andi, an nen ebe wasigin he, nabiro. At ninoe raja nen he, an nalisikhogo, Absalom ebe alage mene a'nogo watubo, iluk at onggwaregen noe hat hebe inom, Abisai inom, Itai inom, yagahisugunem nit mondogat arat ninesanggo holho anggigi.

¹³ An nen eberogoat Absalom ebe neilenggen higirik andemat ebe wa'lema re, at ninoe raja yi wene ti wene mondogat esanggo holherek enek andi nen he, wene andi faget esanggo holilepsik he, an wene noba fugunem, hat noe nen an nebikhit asilen he elo'legat anggigi,” iluk yagatikhe.

¹⁴ A'nogo yagatikhemo at Yoab en he, ”Arat egen. hat nemberek andi faget ninane uanhogo lirik louwok lek,” iluk isikhe. A'nogo isikhesik at Yoab a'nogo nen he arige kabelek ebe henagan mene wanhikhesik he at Absalom a'nogo re ebe elugengge e enggiba a'nogo hobalek logolik eiselogo pore'ma hilingitunem amigenggen tulem tanghogo wat fesikhe.

¹⁵ A'nogo hilingfesikhemo at Yoab agoromi tentara mene inebe 10 nen omanogo nen he at Absalom a'nogo yei warogo ebe pinggi wat fesukwa.

¹⁶ A'nogo watukwasik, at Yoab en pinggong ane hokho mene anetfesikhemo re, agoromi tentara nen, ap tentara Israel mene hobuk mugisa wagi'lek kamo isukwa.

¹⁷ A'nogo kamo isukwasik, at Absalom ebe warek a'nogo o leimo andoma kiling uan mene elema pelakfesukwasik, helep hokhondek meneba sibik-sebekhogo ambe hetokhogo helep som kololokhogo liakfesukwasik. Nen, it ap tentara Israel mene omanogo weim heise pikhit inailokwe lombok pugulhukwa.

¹⁸ Nen, attagat at Absalom ebe eluk logolik, amlogo ap ekhe takhasikhe lek andi nen he, aren tagongge mene afuni ekhe logogun mondok lek andi nen he, tugu ekhe at onggwarek faget inendawi wenggelogo logouwagaluk o enu raja andonggwe ikhi lagaukwaba andoma ekhe wutikhe. Tugu andi enu at Absalom onggwarek enu mene salhikhemo re o yogondak huli afuni mondogat inelu logolik, ”Absalom antugu,” iluk agarek andi.

”Absalom ebe wata,” iluk Daud yagasi lagaukwa wene

¹⁹ A'nogo hilingitukwasik, hobuk at Zadok amlogo Ahimaas en Yoab mel yagatikhe: ”An humusek ninoe raja Daud oba lambik, at aselei mene nen ebe wa'lep mene nineisena Tuhan nen telogo fikhe wene yi endawimo agaiyek asuagen he, yagasi lageluk yagaheti o,” iluk yagatikhe.

²⁰ A'nogo yagatikhemo, at Yoab en he, ”At ninoe raja amlogo ebeat wato andi nen he, yogondak wene waluk at yagasi logoin mondok lego. We, hobuk halok enek he higit yagasi lanogo,” iluk yagatikhe.

²¹ A'nogo yagasikhesigat he, hobuk at Yoab amingmingengge aiba Etiopia mene a'nogoba mel yagatikhe, ”Wene hat heilenggen hegen mene andi, at ninoe raja oba weak-weak yagasi lan o,” iluk yagatikhemo, amingmingengge mene a'nogo eindep awi yagaisogo hai watikhesik he, humusek mondok lagaikhe.

²² A'nogo lakfesikhemo at Ahimaas nen Yoab mel yagatikhe: ”A'nogo lakfegen meneat he, an nen yagasi lagaluk yagaheti aro,” iluk yagatikhemo, at Yoab en he, ”Namlogo e, at laga meneat he, hat lagaluk ningsegat ikhi lagen andi nenahalok?” iluk yagatikhesik, mel yagatikhe: ”Hat yonggo lagain andi faget, aren heisok onggo wokhesigin mondok lego,” iluk yagatikhe.

²³ Andi yagatikhe mene at he, at Ahimaas en he, ”A'nogo lagain lek egen andi nenahalok? An lagain aro,” iluk yagatikhemo, at Yoab en he, ”Lagain anggegen halok he, lan o,” iluk yagatikhemo, at Ahimaas kwe i Yordan ima tonggokwe nen humusek mondok he, ap Yoab amingmingengge aiba Etiopia mene lagaikhe a'nogo hobugetfisaluk attak lagaikhe.

²⁴ Lagaikhe hak he, at Daud ebe kwe ambe elonggokwe mene honggolek endakwe mene honggolek tulem andoma hurek were'ma, ap ekhe eilenggen peneti logolik welagaikhe mene a'nogo re pa'leget ambe palek a'nogo tum oba lagasikhesik welagaikhe. Logolik eilenggen yetha wagaikhe re, ap mene ekhe humusek lagunem hasikhe.

²⁵ A'nogo hasikhesik, ane hokhorogo at oe raja Daud yagati logolik he, ”Ap ekhe humusek weri'lago,” iluk yagatikhemo, at raja nen he, ”At amunek weri'lago halok he, wene fano mene waluk weri'lago o,” iluk yagatikhe. Nen, at ap yonggo lagaikhe mene a'nogo inoba horogat asi lagu kwelek,

²⁶ ap eilenggen welagaikhe mene a'nogo eilenggen hobuk yetha wagaikhe re, ap ekhe hobuk humusegat lagunem yetha wagaikhesik ane hokhorogo raja mel yagatikheat: ”Yethan, ap ekhe amunek humusek weri'lago aro,” iluk yagatikhemo, at raja nen he, ”At andi ogo, wene fano meneat waluk weri'lago o,” iluk yagatikhe.

²⁷ A'nogo yagatikhemo, at ap eilenggen welagaikhe mene a'nogo nen he, ”Ap attagat weri'lago andi re, Ahimaas weri'lago. At anggwe enegat yethigi o,” iluk yagatikhemo, at raja nen he, ”At andi obabut fano mene o. Andi re, at wene fano mene waluk weri'lago,” iluk yagatikhe.

²⁸ A'nogo yagatunem he, at Ahimaas a'nogo arat lagaikhesik, ane hokhorogo at raja oba hai watikhesik he eindep awi yagaisogo wene yi'nogo yagatikhe: ”Ap noe hebe inabiren hoasuogoluk ikhi lagaikha mene omanogo heisena Tuhan Allah nen inebe hat henggiba fikhe andi nen, At hai wasuogo,” iluk yagatikhe.

²⁹ A'nogo yagatikhemo, at raja nen he, ”Absalom ebe alage mene a'nogo eluk wulife a?” iluk heinok wokhasikhemo, aren he, ”Neisena henu hokho mene an fage nebe at Yoab en laknobagai wagu kwelek andem he afuni inane hokhorogo sagalhunem nesanggo holhaluk waginggere, wene ninggi'nogo hilinglagama he, an hamingmingengge re nonggoro,” iluk yagatikhe.

³⁰ A'nogo yagatikhemo, at raja nen he, ”Hebe esanggoma a'lem menlasi lan o,” iluk yagatikhemo Ahimaas ebe esanggoma andem menlasi lagaikhe.

³¹ A'nogo menlasi lagaikhesik werek kwelek, at Yoab amingmingengge mene a'nogo ebe arat lagaikhesik he, at raja mel yagatikhe: ”An wene fano mene noe yagahesigiluk wagi o. Ap hat hebe inabiren hoasuogoluk ili'lagwi mene omanogo nineisena Tuhan nen omame wokhetemo, inebe mondogat mabenetfisegendik arat homame agen o,” iluk yagatikhe.

³² A'nogo yagatikhemo, at raja nen he, ”Absalom ebe alage mene a'nogo eluk wulife a?” iluk heinok wokhasikhemo, aren he, ”Ap hat haselei mene inom, it ekhe hebe inabiren hoasuogoluk hilingiti lagaikha mene omanogo inom, hilinglagaikha hak he, ap alage mene a'nogo ogore, andoma higirat hilinglaga o, noe,” iluk yagatikhe.

³³ A'nogo yagatikhemo, at raja wene andi esanggo holhikhesik, endawimo mondok weak agaikhesik he o senggelek ambolkwe meneba kwe ambe palek a'nogo amboloba le arik lagasikhesik mel isikhe: ”Namlogo e. Absalom, namlogo e. Absalom namlogo e. Hat hobali'mo an wa'lasu mene, Absalom namlogo e, namlogo e,” iluk le agaikhe.