2 SAMUEL 16 - Allah Wene Fano Wene Hupla Inane

Ziba Daud oba lagaikhesik wene emberek isukwa wene

¹ At Daud tom punu ebeba herakfuluk abel elikwe pisikhe hak he, aremnogoat at Ziba Mefiboset amingmingengge a'nogo wam keledai helou mene inom ai mene inom emberek wuthogo wanhikhesik, roti werago mene 200 nen inom, anggur enggen eiselek-maiselek iringik mene ebe 100 nen inom, e enggen fano mene hele yelela mene 100 nen inom, i anggur amusu su misik meneba kwalegengge inom, wam andem amboroba liak fesikhesik waluk lagaikhe.

² Lagaikhemo at raja Daud en mel yagatikhe: ”Yoma mondogat he, nena mene faget waluk wagen,” iluk heinok wokhasikhemo, at Ziba nen he, ”Wam keledai ya re, hat hagainafuri hinom amboroba lagaluk lagu mene iluk waluk wagi o. Nen, roti inom, e enggen inom yoma re, hat hagoromi noageluk waluk wagi ya. Nen, i anggur amusu keralek yoma re, it ekhe o leimo afuni le'ma yoma nugunem inomame lek agu halok nunggu mene iluk waluk wagi o,” iluk yagatikhe.

³ A'nogo yagatikhemo, at raja nen he, ”At Mefiposet hat hoe enupogot Saul omba a'nogo re, ebe o koma werek?” iluk heinok wanhikhemo, aren he, ”At endawimo nen he, nomba Saul en afuni Israel mene ferinarek welagaikhe mene andi, yogondak ambotkwe an nen ferinarek logouwagaluk mennobagagun iluk endawimo anggasikhe andi nen he, ebe o Yerusalemat werego,” iluk yagatikhe.

⁴ A'nogo yagatikhemo, at raja Daud en Ziba mel yagatikhe: ”Halok he, o yogondak huli nen he, yi mene ti mene at Mefiposet eise welagarek mene andi mondogat, hat eise a'no o,” iluk yagatikhemo, aren he, ”Noe halaboge, an nebe hat hoba liok ugu mondok logouwago, noe,” iluk yagatikhe.

Simei nen Daud homan fesikhe wene

⁵ A'nogo iluk, at Daud o Bahurim lagaikhe hak he, ap enu Gera, aiba o andoma mene, at Saul eisok erokwe mene, amlogo enu Simei andi, afuni raja Daud inom lagaukwa mene omanogo inoba horokhogo waga logolik Daud homan filik wagaikhe.

⁶ Daud ebe at agoromi tentara omanogo nen inom, inogogwi kabelek mene perwira ekhe nen inom, inomen tulemet fesukwasik fisogo werek kwelek meneat he, at Simei nen helep huk oba fuginabik-fuginabik wagaikhe.

⁷ A'nogo fugerisilik waga logolik, Daud oba homan yi'nogo fesikhe: ”Hobabut mondok weak, afuni inoare mene yi ri, yoma logogin mondok lek, helalan-helalan o.

⁸ Haren at Saul en ferinarek welagaikhe mene andi telogo wanhigindik, ap Saul oe agot inebe mondok hokhorogo inoatigin andi nen, nineisena Tuhan nen afuni haren ferinarek welagen mene andi hamlogo Absalom en ferinarek logouwagaluk arat wogetemo o. Ma re, yogondak hat arat nongagen o. I'hii! Afuni inoare mene yi. Nongagen,” iluk wenagetikhe.

⁹ A'nogo wenagetikhemo, ap Zeruya amlogo Abisai Yoab agot andi nen he, Daud mel yagatikhe: ”Noe. Ap obabut wam obabut hangge mene ari, hat hebe weagerogo homan hobagagu kwelek alelogo herakfiki lagen andi nenahalok? An nen alonggop tekhogo wasigen yaganom o!,” iluk yagatikhe.

¹⁰ A'nogo yagatikhe meneat he, at Daud en Abisai oe Yoab emberek mel yagaisasikhe: ”Nineisena Tuhan nen lakfei wagama, homan nobagali'lago meneat logou hak. Ma re, niren he, hat sa nen a'nogo ino iluk yagahetemo eise agendik ikhi lagen, iluk yagasugun elo'lego. Halok he, aren homan nobagauwagen he, at ebe wati'lek herakfeni o,” iluk yagaisasikhe.

¹¹ A'nogo yagaisasikhesik, hobuk at Abisai inom, at Daud agoromi mondogat inom, yi'nogo yagaisasikhe: ”An namlogo nonggwaregen tati mene ogore, nebe noasigiluk walhili'lago andi. Nen, ap Benyamin mene yi hunogo meneat hilingi'mo re, u hagat yaganeri'logo o. At nineisena Tuhan nenat, yi'nogo ino, iluk yagatemo nen ili'lago logou hak. Halok, at oba yi'nogo ti'nogo ekhe hilingitubo. We, aren homan nobagauwageluk herakfisani.

¹² We At Tuhan eilenggen werek kwelek a'nogo yaganeri'logo halok, Arenat onggo fikhi logolik, homan nobagaikhe mene andi onggo fano hilingnabigin weregat anggigi o,” iluk yagaisasikhe.

¹³ A'nogo yagaisasikhesik, at agoromi inom he pikhit pi lagaukwama, at Simei a'nogo inombo'ne weak-weagat tom alemkwe nen muginarek pikhi logolik, helep inom kweang inom fugerisilik pisikhe.

¹⁴ At kain raja ebe inom, agoromi mondogat inom, i Yordan ima pisukwasik inomame mondok lek agaikhemo re, set andoma walasukwa.

At Absalom kota Yerusalem kwi wagaikhesik hilingitikhe wene

¹⁵ A'nogo werek kwelek, at Absalom inom, ap Israel mene ekhe at ombo'ne lagaukwa mene mondogat inom, Ahitofel inom, inom he o kota Yerusalem kwi wagaukwa.

¹⁶ A'nogo kwi wagunem, at Husai unggulenu Arki mene Daud agailak emberek oba lombokhogo logolik ane hologo hilingiti lagaikhe mene a'nogo, Absalom emberek ambi agaukwasik he, mel yagatikhe: ”Ninoe henupogorat logoino o. Ninoe henupogorat logoino o,” iluk ane hokhorogo yagatikhe.

¹⁷ A'nogo yagatikhe meneat he, at Absalom en Husai mel yagatikhe: ”Hagailak Daud ebe hendawi mondok welagendek a'nogo, ombo'ne lagi'lek welagen andi nenahalok,” iluk heinok wokhasikhe.

¹⁸ A'nogo yagatikhemo, at Husai nen he, ”Lego. Nineisena Tuhan nen inom, afuni yoma nen inom, afuni Israel mene mondogaren inom, menfaga mene halok, an at andiat werekwe asimbik nemberek logogun o.

¹⁹ Andi nen he, an sa faget hilingiti logogin anggegen. At kain enupogot amlogo hat fagerat hilingiti logogin lek nogo? Hat fagerat hilingiti logogin o. An hat heisena ebe raja werek oba, at faget hilingiti lagarik. Andi hak, yogondak hat hebe raja werek kwelek hat faget hilingiti logogin o,” iluk yagatikhe.

²⁰ A'nogo yagatikhemo, hobuk at Absalom en Ahitofel mel yagatikhe: ”Nit hilingisugun mene senggerogo yaganom o,” iluk yagatikhe.

²¹ A'nogo yagatikhemo, at Ahitofel en he, ”Hat hebe heisena amingmingengge mene agagwi woginafikhe mene o heisena aiba serogo logouwagaluk fisaluk laga mene andoma inoba kwimbik he hinom nogo ino. A'nogo hilingisigin andiba, afuni Israel mene mondogaren he, At eisena mondok apsiri nen hilingite higi, iluk futfigik, ap hat hombo'ne wagaikha mene andi ebenagaik inailo mondok legat hilinglagik, ugun o,” iluk yagatikhe.

²² A'nogo yagatikhemo, at Absalom awi su mene o eisena aiba tum oba obuluk enagoma andoma wurogo fisasukwama, at Absalom ebe o su mene wutukwaba andi kwisikhesik eisena agagwi amingmingengge mene omanogo inom nogo ugunem afuni Israel mene mondogaren ineilenggen hikhi lagaukwa.

²³ Andem sambul he, Ahitofel en, ”Yi'nogo hilingi'no,” iluk komorinafunem, wene Allah ebe nen ugu mene hanggeat hologo hilingiti lagaukwa. Andi re, at Daud en hologo hilingiti lagaikhe hak, at Absalom en a'nogoat hilingiti lagaikhe.