2 SAMUEL 15 - Allah Wene Fano Wene Hupla Inane

Absalom en Daud ninabit uageluk afuni Israel mene inendawimo kagalhi lagaikhe wene

¹ A'nogo wanhikhemo, at Absalom onggwarek faget kereta weim yafarek mene a'nogo misik ekhe inom, nen wam kuda inom andogorogo fesikhesik, ap inebe 50 nen inom nikhi logogun mene inayonggo fesikhe.

² O hundik-handik, at Absalom ebe huberat siakhogo eluk a'luk humusek leget pa'leget wuri'mo kwe ambe palek oba, o kain enupogot aiba kuogoluk kwagarek oba era'lu horokhogo andoma menlasi laluk welagaikhe. A'nogo were'ma, it afuni ekhe wene weregen inebe lombok at kain raja nen pilingisogo legetfisoageluk wagunem aren wolisaluk heinok yi'nogo wogisikhi lagaikhe: ”Hat hunggulenu ki mene,” iluk heinok wogisugunem, iren he, ”An nunggulenu ti mene,” iluk yagati lagaukwa.

³ A'nogo yagatunem at Absalom en he, ”Hat wagen andi wene werek higithogoat wagen. Haren wene inoba fegen andi eberogoat meneat he wene andi fano pilingisugun mene ap ekhe at kain enupogoren menfigi'le'ma elo'lego,” iluk yagaisikhi lagaikhe.

⁴ A'nogo yagaisaluk, ekhe mel yagaisikhi lagaikheat: ”Nen we ap wene inoba figik, kotik, ugu mene andi an men-nobagaumo nek he, afuni ekhe inawene werek mene inebe lombok an noba wagunem, an nen wene andi higithogo pilingisogo leget fisikhi logou hago,” iluk yagaisikhi lagaikhe.

⁵ A'nogo yagaisugunem, it afuni ekhe ineindep awi yagaisogo hai wasuogoluk Absalom oba horokhogo wagunem he, aren enggi fakfisaluk, hai inambe saluk warinafi lagaikhe.

⁶ At Absalom en afuni Israel mene inebe lombok inawene werek mene raja nen pilingisogo legetfouwagaluk wagunem a'nogo hilingiti lagaikhe andi nen, it afuni Israel mene inendawinggen wanhi lagaikhe andi.

^7-8 A'nogo hilingitu werek kwelek 4 tahun hilinglagaikhemo, at Absalom en raja Daud oba yi'nogo yagatikhe: ”An nebe o Siria andoma o enu Gesur logolik, nineisena Tuhan oba wene wareti logolik he, haren an yaganeti logolik, hambotkwe Yerusalem lan, iluk yaganeten halok, lambigen he, o Hebron lambik hat fogethafi logolik hat faget hilingisigin o, iluk wene waretigi andi nen he, ebe hilingisigiluk o Hebron lagalugen yagaheti o,” iluk yagatikhe.

⁹ A'nogo yagatikhemo, at raja Daud en he, ”Fano, lano o,” iluk yagatikhemo, at Absalom ebe o Hebron lagaikhe.

¹⁰ A'nogo meneat he, at ebe oan lagi'lek logolik, ap ekhe inayonggo fesikhesik lakfisikhi logolik, ”Hiren afuni Israel mene inunggulenu lombok mondogat mel yagaisilik lano: Pinggong hokho a'nogo mene ane pak ikhe halok he, hiren he, o Hebron andoma Absalom nit afuni Israel mene ninoe raja hilinglaga o, iluk hinane hokhorogo ino o, iluk yagaisilik lano o,” iluk wene warogo lakfisasikhe.

¹¹ A'nogo iluk lakfisasikhesik lagunem, ap ekhe inebe 200 nen mene inayonggo fesikheat. A'nogo fesikhesik o Yerusalem en at ombo'ne o Hebron lagaukwa. It andi at Absalom en he, ”Daud ninabit, ninoe Absalom logouwak,” iluk uageluk afuni inendawimo kagalhi lagaikhe andi inonggot logolik wonogat lagaukwa.

¹² At Absalom a'nogo lagaikhesik Allah anggo warogo noleti logolik, ap ekhe inayonggo fesikhesik, it ap Daud agoromi kaindek, ”Wene andi weak, yi higit,” iluk yagati lagaukwa mene ekhe enu Ahitofel, o Gilo were'ma wolesi loagaluk lakfisasikhe. A'nogo hilingiti logolik, Absalom en afuni inendawimo kagalhi logolik, ”Nit ninoe raja Daud he ninabit, at he Absalom andi aro,” iluk uageluk inendawimo kagalik nikhi lagaikhe re, andi. A'nogo inendawimo kagalhunem, afuni at Absalom ebikhit mene re inebe hokho arik hokho arik mondok hokhorogoat hilinglagaukwa.

At Daud o Yerusalem herakfisaluk o ale'ma heise lagaikhe wene

¹³ A'nogo hilinglagaikhemo ap misik ekhe nen Daud yagasi waga logolik he, ”Afuni Israel mene inebe at Absalom werekwe mondok agaikha o,” iluk yagasi wagaikhe.

¹⁴ A'nogo yagatikhemo, at Daud en he agoromi kaindek o Yerusalem inom welagaukwa mene mondogat mel yagaisasikhe: ”At Absalom enggi welagi'legat weak-weak wesimbik nit ninebe ninoasinogoluk he, heise o ale'ma louwogo. Nit oan lagunem mu'ninarek laga-logolik mabenet ninobagambik he, afuni o kota yoma werek mene inebe felelenghogo inoasinogo o,” iluk yagaisasikhe.

¹⁵ A'nogo yagaisasikhemo, iren he, ”Fano, noe. Haren, yi'nogo hilingisuok, iluk yaganisegen halok, nit hamingmingengge mene yi, hat hane hologo hilingisugun o, ninoe,” iluk yagatukwa.

¹⁶ A'nogo yagatukwama, at raja amingmingengge mene agagwi woginafikhe mene hemi inebe 10 nek at aiba isatana andoma serogo logouwagaluk fisaluk, at againafuri ekhe inebe mondogat inom, agoromi inom lagaukwa.

¹⁷ At raja ebe inom afuni logoin mene inom, mondogat o kota herakfuluk wulibuogoluk he o ebe elugunmo wuri'mo andi horokhogo esa logali lagaukwa.

¹⁸ At raja agoromi kaindek pegawai mene inom omanogore abel fena fikhit menlarik lagaukwama re, ap tentara at raja ebe serogo welagaikharek mene omanogo re raja elokhoma higit erathigik logalhukwama, it ap tentara o Gat en wagaukwa mene inebe 600 nen omanogo ogore at elokhoma erathigik logalhukwaat.

¹⁹ Esa a'nogo logalhukwama at inoe raja nen eilenggen isilik lagaikhesik he, ap tentara inebe 600 nen mene woginarek nikhi lagaikhe mene enu Itai andiba mel yagatikhe: ”Hat he, nit ninombo'ne wagen andi nenahalok? We hambotkwe laluk, ap raja ket mene andi hinom logoumo nek he fano. Hat hebe yatmaat meneat ap pogat wagagindik welagen andi lek nogo a?

²⁰ Hat an ninom ninenggi ekhe inomat hokhorogo welago le'ma re, an nen hat ninom o ekhema nen ekhema higilogo lagik nikhi logouwok, iluk yagahetu aplere elo'lego. An yi nebe o toma lageluk, iluk he tukhumhogo nonggwarek nonggot aro. Andi nen he, hat hagaila'lak hinunggulenu misik mene andi woginarek hambotkwe lan o. We At Tuhan nen hendawi hundik logolik, setharek mondok logouwago,” iluk yagatikhe.

²¹ A'nogo yagatikhe meneat he, at Itai nen he, mel yagatikhe: ”Nineisena Tuhan eluk welagarek mene inom, nen noe hat hebe inom, hinoak. An hat herakhobagaluk lagain he, nabiro. We, hat hebe o koma lagen halok nemberegat nikhi logogun o. Heluk welagen halok, nemberegat nineluk logogun. Wa'lagen halok, nemberegat wa'lasugun o, noe,” iluk yagatikhe.

²² A'nogo yagatikhemo, at Daud en he, ”A'nogo egen halok he fano, ninom louwogo,” iluk yagatikhe. A'nogo yagatikhemo, at Itai agoromi tentara esa woginarek nikhi lagaikhe mene inom inagainafuri inom lagaukwa.

²³ At Daud agoromi tentara omanogo inom o kota inebe welagaukwa ba a'nogo herakfuluk wulifunem he, it afuni o andoma welagaukwa mene omanogo inebe mondogat inane hokhorogo le agaukwa. A'nogo le agu kwelek, at Daud agoromi tentara esa logalek woginarek nikhi lagaikhe mene omanogo mondogat inom i Kidron palogo wulifukwasik, o leimo afuni le'ma higit andoma lagaukwa.

²⁴ A'nogo laga logolik, ap Allah eisewerek mene imam Zadok inom, Abyatar inom, ap inunggulenu Lewi mene mondogat ekhe Peti Wene Warogo nineisena Tuhan nen wo'ninafikhe iluk hilingik a'nogo waluk lagaikharek mene omanogo nen Peti andi waluk andoma fei wagaukwasik inom welagaukwa. A'nogo logolik, it afuni Daud inom logoin mene omanogo inebe mondogat o kota andi herakfuluk oan wulifi'lek logolik, peti andi wanhi'lek welagaukwa.

²⁵ A'nogo werek kwelek, afuni arat wulifukwama at raja nen Zadok mel yagatikhe: ”Nineisena Tuhan an nebe endawit nabigin halok, an nambotkwe o Yerusalem wesimbik, Peti ebe inom, obalik welagarek oba inom, neilenggen ha wesuageluk wo'narek wesigin aro. Andi nen he, peti ari ambotkwe kota fei lani o.

²⁶ A'nogo meneat he, At Tuhan nen an nebe endawit nafi'lek halok he, an nebe faget andi re At endawimo anggagain mene higithogo hilinglasuak anggikhi lagi o,” iluk yagatikhe.

²⁷ A'nogo yagatikhesik, wene ekhe Zadok mel yagatikhe: ”Hat hamlogo Ahimaas inom, Abyatar amlogo Yonatan emberek inom, hinomat lobagaigen yagaisilik lambik he, hinendawimo hambukhogoat hinambotkwe o kota kwini o.

²⁸ Nen, an he o leimo i palogo wulibi lagaikharek oba andoma lambik logolik, hat hane holek logogin o. Nen, an nebe i palogo wulibi laluk o lei fikhit andoma asi lagi'lek werek kwelek he o Yerusalem oba wene ekhe werek halok he haren yaganesi we'no o,” iluk yagatikhe.

²⁹ A'nogo yagatikhemo, at Zadok Abyatar emberek Peti a'nogo waluk inambotkwe o Yerusalem wagaukwasik welagaukwa.

³⁰ A'nogo wagaukwama, at Daud eisok sepatu laberek mene nonggologo fesikhesik, afuni inom lagaukwa mene mondogat inom punu Zaitun oba lagakhi logolik, ”Nit fong wati lago,” iluk enegat asuagaluk, su inunggul oba yanggulogo le arik lagasukwa.

³¹ A'nogo lagakhi logolik, afuni nen he, Daud mel yagatukwa: ”Ahitofel ogo re, Absalom en, Daud nabit, noe Absalom aro, iluk uagaluk endawimo kagalhemo aro,” iluk yagatukwama, at Daud en he, samban mel isikhe: ”Neisena Allah. At Ahitofel en wene komorinafi logogin mene andi, ekhe ebe aga logoinogoluk hilingfikhi logoino o, neisena,” iluk yagatikhe.

³² A'nogo yaga'luk, Daud ebe tom punu ebeba afuni nen samban nineisena Tuhan fogerati logolik hilingitarek oba andoma lagasikhe hak he, ap ekhe Daud oba lombokhogo welagaikhe mene ap unggulenu Ariki mene enu Husai andi asu libilogo lakfisasikhesik, wul unggul ebene yugulogo oba wagaikhe.

³³ A'nogo wagaikhemo, at Daud en mel yagatikhe: ”Hat hebe an nemberek logoin halok, an noba engginet fogoin andi elo'lego.

³⁴ A'nogo meneat he, hat hebe hambotkwe kota lagain halok, Absalom mel yaga'no: An attak heisena faget at ane hologo hilingitirek andi hak, hobuk hat faget hane hologoat hilingiti logogin o, iluk yaga'no. A'nogo yagati logogin andiba, at Ahitofel en raja faget komoti logogin mene andi ebe aga logogin lego.

³⁵ Ap Allah eisewerek mene Zadok inom, Abiatar inom, andoma were'maat lagain o. Ap kain raja aiba andoma nen wenenggak ekhe ugunem esanggo holhi logogin mene andi, mondogat it yagaisikhi logoino o.

³⁶ Zadok amlogo Ahimaas inom, Abiatar amlogo Yonatan inom, ineisugwi inom lagaikhasik andomaat werego. Andi nen he, wene hat hesanggo holhi logogin mene andi mondogat, iren an yaganesi wesuagaluk yagaisikhi logoino o,” iluk yagatikhe.

³⁷ A'nogo yagatikhemo, Husai Daud agailak a'nogo ambotkwe o Yerusalem wagaikhe. A'nogo wagaikhe andi sambul at Absalom o Yerusalem wagaikheat.