2 SAMUEL 14 - Allah Wene Fano Wene Hupla Inane

At Yoab en Absalom nekhengge hondo'luk wesigin iluk hilingitikhe wene

¹ At raja Daud en amlogo Absalom faget endawirati lagaikhe mene andi re we at Yoaben elu welagaikhe,

² andi nen aren he ekhe afe hebelek mene o Tekoa were'ma hondosi loageluk miminginafikhe. Miminghogo lakfisasikhemo re, he a'nogo hondo'luk wagaukwama, Yoab en he a'nogoba ikhi logolik, ”He hat he heranhogo afuni fong watarek mene hakhogo logolik hasu pelagi su laberogo re amusu amben fano mene inebene yugulharek mene omanogo yugulhi'legengge logoino. A'nogo logolik he, hemi inaguni inendawi mondok hundik mene wa'lagunem inenggi aninurogo le agu wela'luk hakhogo logoino.

³ A'nogo logombigen raja oba lambik he haren yi'nogo yaga'no,” iluk he, Yoab en he a'nogo nen igin mene eluet fesikhe.

⁴ A'nogo yagatikhemo he a'nogo raja were'ma lagaikhesik aren eindep awi yagaisogo raja fogerati logolik he yi'nogo isikhe, ”Noe hat mondok lego mene nen an hamingmingengge yi lebetnabin o!” iluk yagatikhe.

⁵ A'nogo yagatikhemo at raja a'nogo nen he, ”Nena mene weregen?” iluk heinok wokhasikhemo he a'nogo nen ikhi logolik he, ”An hamingmingengge yi re nebe sogwe mene oba nen he nenggi lek mene o. Nen, an hamingmingengge nagun he arat wa'lagama o.

⁶ An hamingmingengge nagainafuri ap mene inebe pire, nen linggene misik sambul he o leimo omanogo nen yei fesukwasik he ap telinafu mene ekhe le'ma re at ekhere ebe pinggi wa'laga.

⁷ Nen, yogondak he it an hamingmingengge neisok erokwe mene a'nogo an ninom naselei mene agaikhasik logolik he, an hamingmingengge namlogo andi nen agailak watemo re iren ogo unggum he ebe pinggi wasugun iluk an namlogo ekhe andi wo'nisan o iluk, miming nafu werek. Enggere an hamingmingengge nen namlogo andi wogisagain halok he an nebe noak enek logogin. Iren he an nen we misik andiba nek he hobuk ambisangma ta'lasugun iluk nendawinggen tiphogo welagi mene a'nogo re ebe wasugunat andi, nen iren he an hamingmingengge nagun faget omalik abengge ekhe tagaisogo at ambisangma mene ekhe logouwageluk fogoin legat andi,” iluk yagatikhe.

⁸ A'nogo yagatikhemo re raja nen onggo ikhi logolik he, ”Wene andi re an nenat pilingisigin enggere hat he haiba lan,” iluk yagatikhe.

⁹ A'nogo yagatikheba nen he a'nogo nen ikhi logolik, ”Noe mondok lego hagun, noe haren ninggi'nogo mene hilinglasigin halok ogore, an hamingmingengge ninom, it neisok erokwe mene ninom ambisangma ninoba asigin mene andi wanugun enego, ninoe hat inom heisok erokwe mene inomen weak he fugo,” iluk yagatikhe.

¹⁰ A'nogo yagatikhemo nen he raja nen onggo ikhi logolik, ”Ap ekhe nen inane yi'nogo ti'nogo iluk yagahetu halok he, an nambit woginarek we'no, hobuk ap andi nen hat hoba a'nogo ekhe lalhabigin mondok lego,” iluk yagatikhe.

¹¹ A'nogo yagatikhemo he a'nogo nen ekhe inom yagati logolik, ”An hamingmingengge nomalik wate mene andi faget ap ekhe nen an nen ogo unggulmo wasigin iluk hilingiti logolik, ap a'mage ekhe inom hokhorogo lagaluk an nomalik ekhe andi ogo wasinogore, noe haren heisena Tuhan Allah andiba samban in o,” iluk yagatikhe. A'nogo yagatikhemo at raja a'nogo nen yagati logolik he, ”Tuhan Eluk Mondok welagarek mene enuba hilingi'mo re, hat homalik oba yi'nogo ti'nogo we endebengge iluk ogo ekhe hilingfogoin mondok lego,” iluk yagatikhe.

¹² A'nogo isikhesik he a'nogo nen ikhi logolik, ”Noe henu mondok lego hagun, an nen nane we endebat halok, fano uak anggan,” iluk yagatikhemo, at raja a'nogo nen ikhi logolik he, ”Fano,” iluk yagatikhe.

¹³ Andi isikhemo he a'nogo nen ikhi logolik, ”Noe hat hambeba nen hane egen andiba re noe hat amlogo longgo ilaga mene a'nogo aiba wesuageluk yagati'legengge nen egenma re, noe hat onggwaregen enek weak hilingiti lagen. Nenahalok noe haren afuni Allah againafuri mene inelokhoma weak ariginik mene andi hilingiten nogo?

¹⁴ Nit ninebe mondogat he i kweangma kweisalisaluk nekhengge andogosu lek a'nogo hak hilingi'mo re, ninebe mondogat he wa'lasugun enek, nen Allah nen ogore ap mondogat wa'lagu mene hobuk ineluget fou lek hak. Arigini'mo re noe haren ap longgo i lagaikha mene omanogo nekhengge inambotkwe inaiba wesuageluk ebesin.

¹⁵ An hamingmingengge noe hambit wagi yi re, aben noasuogeluk hilingitu nen an nen ebeti logolik wene yi re noe hat ninom ninane seberogo masimbik noe haren lebetninabigin iluk, nendawimo eberek logolik welagi.

¹⁶ An hamingmingengge nen anggikhi logolik he, noe haren an nane holfuluk an hamingmingengge nebe inom, an nagainafuri inom ninoasugun iluk hilingitu hobalhu werek mene andomaba nen ninagap telninabigin anggikhi lagi. It andi nen he nit kweang At Allah nen againafuri faget iluk wogisasikheba omanogo nen pugulogo wulak ninobagauwogeluk wenggelhasik hilingiri'lagwi.

¹⁷ Noe hat he hebe malaikat pogoroba yonggo Allah nen lakfisa wagarek mene omanogo higit hilingik logolik, kwanirek mene inom, fano mene inom, enekhogo penhikhi lagen hagun welagenma re, an hamingmingengge nen wenggel hikhi logolik he, noe hat heisena Tuhan Allah nen wene wathetikhe mene an yaganeten mene andi re eberogo an hamingmingengge nagap telogo yaganetigin iluk nendawimo eberogo anggikhi lagi. A'nogo ebeti lagimo re noe heisena Tuhan Allah a'nogo nen hat hebe hinom hundik logolik fetharek mondok logouwago!” iluk yagatikhe.

¹⁸ A'nogo yagatikhemo at raja nen ikhi logolik he, ”An nen amu mene ekhe heinok wokheagain enggere haren higithogo nek ino,” iluk yagatikhemo, at he a'nogo nen ikhi logolik he, ”Yaganom o,” iluk yagatikhe.

¹⁹ A'nogo yagatikhemo at raja a'nogo nen yagati logolik, ”Hat he abo Yoab a'nogo nen mimingisogo lakhobagai wagama a?” iluk heinok wokhasikhemo, he a'nogo nen onggo yagati logolik he, ”Noe hat honggwarek helu welagen hilingi'mo re an nen labelogo noe haren heinok wo'neegen mene andi faget u re elo'lego. Eberogo hilingi'mo re an hamingmingenggere Yoab en laknobagai waga logolik he yi'nogo ino, iluk yaganete higithogo yagaheti lagi o, noe.

²⁰ Oba nen he aren a'nogo hilingite andi re wene werek mene andi ero higithogo pilinglasuageluk hilingite. Noe hat he malaikat pogoroba yonggo omanogo nen hibilik-hebelek logolik fano mene inelu agik, weak mene inelu agik ikhi logolik hilingitarek omanogo hakhogo hilingik welagen,” iluk yagatikhe.

²¹ A'nogo isukwasik he at raja nen Yoab woletikhesik yagati logolik he,” Hat hendawimo anggikhi lagen mene andi re an nen tiphogo hilinghobagagin enggere, haren Absalom a'nogo hondosi laluk he waluk yoma we'no,” iluk yagatikhe.

²² A'nogo yagatikhemo at Yoab a'nogo Daud a'ma eindep awi yagaisogo fogeratikhesik he yi'nogo isikhe, ”Neisena haren an hamingmingengge nen yi'nogo hilingnabin iluk kino yagaheti mene a'nogo nane holhen andiba re neisena haren an hamingmingengge yogondagen hendawit nabigin higi iluk arat nelu aga o. We At Allah nenat neisana hat hebe fanot hafi logouwak!” iluk yagatikhe.

²³ A'nogo yagatikhesik he at Yoab a'nogo abo Absalom hondo'luk he Yerusalem wesigin iluk he o Gesur lagaikhe.

²⁴ Oba nen he raja a'nogo nen ikhi logolik he, at Absalom ebere o raja awi silimo istana ba omanogo logogin lek iluk isikhe. Nen, aren ikhi logolik he, ”At andi ebe an neilenggen hagain nabiro,” iluk isikhemo, at Absalom a'nogo re raja ambit lagi'lek aiba pikhirat lagaikhe.

Absalom hun Daud inom sebetukwa wene

²⁵ At Absalom ebere ap mondok fano elokhe pugunsek amlogo iluk it Israel inap were'ma andoma inebe mondogaren foget fikhi lagaukwa. At eisok agut oba nen pikhit esiba mondogat he fano mondok welagaikhe. Nen at ebe pugunsek aple andi sebelek hak kwelek ap ekhe aren ambolkwe pugunsek mene ekhe welagaukwa mondok lek.

²⁶ Esi re mondogat hikweak hilingi'mo re enggin agu aple nen he tahun misik oba re inenggi misigam palhi lagaukwa. At esi palogo fugu mene andi re raja nen ilirengge enggin walhikherek mene a'nogoba walhugunem he 2 kilo hilinglaga lagaikhe.

²⁷ Hun Absalom ebere againafuri abengge inebe henagan nen helenggere we misik mene re eil alili mondok fano pigin-pugunsek a'logo enure hele Tamar andi welagaikhe.

²⁸ At Absalom a'nogo re tahun pire hunugusogo o Yerusalem welagaikheba nen he raja inom iluk ogo ekhe ambi aga lagaukwa mondok lek.

²⁹ A'nogo welagaukwama, linggene misik oba re at Absalom en he Yoab raja inom ambi asuakhogo wole'ni iluk yagaisasikhemo, at yagasi lagaukwaba nen he aren an wagu aple re nabiro, iluk kamo isikhe. Kamo isikhemo at Absalom en ekhe inomat woletikheba nen he at Yoab a'nogo nekherogoat wagi'lek kamo isikhe.

³⁰ A'nogo aga lagaikhemo re at Absalom en amingmingengge omanogo inoba yagaisikhi logolik, ”Hit he Yoab eabu, an neabumo aremnogo nen fena fikhit jelai yago mene omanogore hinelu nogo a? Yabu yago mene andi endu fasi lani o,” iluk yagaisasikhemo it omanogo lagaukwasik endu fasi lagaukwa.

³¹ A'nogo hilingitikhemo re at Yoab a'nogo Absalom oba wagaikhesik heinok wokhikhi logolik he,” Nenahalok hat hamingmingengge nen an neabu jelai yago omanogo lei fata nogo?” iluk heinok wokhasikhe.

³² Ma re, at Absalom en onggo ikhi logolik he,” An nen he hat hebe raja oba lambik wene heinok wokhagain mene wenggelogo figirik, wolhafi mene re kamo egen andi nen o. Nen wene ebe yi'nogo heinok wanilen iluk, ’An he o Gesur herakfuluk yoma wagagi andi re ninggi'nogo faget nogo, we alomarogo omari? An nen he o andoma logou mene at he ninggi'nogoluk yoma wagagi nogo? Ikhe ino,’ iluk isigimo nen o,” iluk isikhesik at Absalom en ekhe inom ikhi logolik he,” An nebe at raja were'ma elokhoma hondo'narek lan o, nen aren ambi an nebe weak hilingite amlogo iluk anggugu halok he ebe pinggi noasugun andi fanoaro,” iluk yagatikhe.

³³ A'nogo yagatikhemo re at Yoab a'nogo raja Daud were'ma at Absalom en kino isikhe mene a'nogo yagasi lagain iluk lagaikhe. A'nogo lagaikhemo re at raja nen Absalom a'nogo raja a'ma eindep awi yagaisogo elokhe sogoum fogerasi wagaikhemo, raja nen he ebene elokhe tophogo hai watikhesik ebe wanhikhe.