2 SAMUEL 13 - Allah Wene Fano Wene Hupla Inane

Amnon inom Tamar inomen hilingitukwa wene

¹ Hun Daud amlogo abo Absalom a'nogo erei helengge enu re Tamar, nen, hele andi re at ebe agap oba eil alili mondok fano hilingik welagaikhe. A'nogo hilingi'mo re hun Daud amlogo ekhe enu Amnon agaisa amu mene nen tagongge a'nogo nen hele andiba endawinggen ninggi lagaikhe.

² At endawinggen nunggunem endawimo nen he, hele ari ninom nogoilo agwi iluk ebeti lagaikhe. Oba nen he at Tamar ebe agun oan heligi'le'ma, nen ap inom ogore nogogu aple oan hilingi'mo, at Amnon a'nogo nen ninggi'nogo ninom nogoilo e, iluk anggikhi lagaikhe. At a'nogo endawimo hundik-handik ebetu were'ma re oba ou hunitikhe.

³ Nen at Amnon agailak ekhe awenggelek mondok weak mene enu re Yonatab, at Daud oe hun Simea amlogo andi welagaikhe.

⁴ Andi nen he at Yonadab en he Amnon oba yagati logolik, ”Hun raja amlogo yi re, hat he linggene hundik-handik hoba sinurogo nek welagen andoma re nenahalok? Wene ninggi'nogo mene ekhe hilingigen?” iluk heinok wokhasikhe. A'nogo heinok wokhasikhemo at Amnon nen ikhi logolik he, ”An he hele Tamar an nare Absalom erei andiba nendawinggen nunggu nen hilingiti lagi o, nare,” iluk yagatikhe.

⁵ A'nogo yagatikhemo at Yonadab en at oba ikhi logolik he, ”Andi re enggin lek abi! Hat hebe ou wanhu mene hakhogo hilinglasimbik nogokhi logolik logoin. Nen, hat heisena nen kwelakhea wagu halok he at oba ikhi logolik he, ’Hunai, hele Tamar a'nogo wesimbik an sumburu nagain mene ekhe wo'nesuakhogoluk yagaheti o, at yoma wesimbik an nagain mene yoma nen isagaisogo wo'nesumo neilenggen nen hambik enek he, an nen higit nagain o,’ iluk yaga'no.

⁶ A'nogo yagatikhemo, at Amnon a'nogo ou wanhu mene hakhogo wengik logolik welagaikhe. A'nogo were'ma nen at Daud a'nogo amlogo neilenggen hagain iluk wagaikhemo re, At Amnon nen ikhi logolik he, ”Hunai, hele Tamar a'nogo wesimbik kue ekhe werasumo nek he, an sumburu na hak hilingnabigin enggere wesuakhogo yaga'no o, neisena,” iluk yagatikhe.

⁷ A'nogo yagatikhemo re at Daud en a'logo Tamar a'nogo hondosi loageluk o istana at ebe werek oba omanogo wene yi'nogo warogo lakfesikhe, ”Hat he hoe Amnon oba lambik he at obaget kue hilingisi lan o,” iluk lakfesikhe.

⁸ A'nogo lakfesikhemo at Tamar a'nogo lagaikhesik kwelakhasikhe re at Amnon a'nogo wengik logolik nogogunem hasikhe. Hasikhesik he aren bumbu endebat ekhe wanhikhesik he, kue at Amnon elokhoma aremnogo eilenggen werek kwelek weratikhe.

⁹ A'nogo hilingitikhesik he kue a'nogo panci elema nen heiselogo wulakfei wagaikhesik he, it ekhe inoba wogo'ni, iluk yagaisasikhe. A'nogo yagaisasikhemo nen he at Amnon a'nogo ninggi'legengge logolik he aren he yi'nogo isikhe, ”It inebe mondogat o yi nen wulibuakhogo re yagaisan o,” iluk yagatikhe.

¹⁰ A'nogo yagaisasikhemo it omanogo mondogat o senggele'ma omanogo nen mondogat wulibi lagaukwama re, at Amnon nen Tamar oba yagati logolik, ”Kue andoma waluk an nogokhi lagiba ya wesimbik he henggi nen nambema wo'nesime o, iluk yagatikhemo at Tamar a'nogo aren isikhe mene higithogo hilingitikhe.

¹¹ Oba nen at Tamar en kue a'nogo enggim wanhikhesik wogosigin ha'ma nen he, at Amnon nen hele a'nogo enggi fakfesikhesik yagati logolik he, ”Hele yi nagore, an nemberek nogouwogen eme o!” iluk yagatikhe.

¹² A'nogo yagatikhemo at hele a'nogo nen ikhi logolik he,” Eige noe, a'nogo hilingnafun o! Nit afuni Israel mene were'ma yoma re ariginik mene yi re ekhe hilingiri'lagwi mondok lek hilingi'mo re, haren homameba kwanirek mene andi hilingisuogen iluk he an yaganetun o.

¹³ Nen an nen a'nogo hilingisimbik he, nelokhe o koma hinagaisogo fei lagain anggegen? Nen, hat ogore it afuni Israel mene were'ma yoma nen he henu weaget fikhi logogunat. Oba nen he haren at raja ebe yagasigin andi nek he mondok fano o, haren an hagweap eroageluk andi re aren fano igin logou hago,” iluk yagatikhe.

¹⁴ A'nogo isikheba nen he at Amnon nen hele aren isikhe mene a'nogo holhi'lek he, at ebe ogore omame logolik nogo nen he agot a'nogo omameba ninghogo fakfesikhesik inom nogosukwama ebe weaget fesikhe.

¹⁵ Oba nen he a'nogo weagerogo fesikhesik at Amnon a'nogo nen he Tamar oba abit agaikhesik oba haro fesikhe mene andi re attak endawinggen nunggunem hilingiti lagaikhe mene aremnogo re we endep hak oba nen he ebe hilingitikhesik a'mage agot oba fesikhe andi nek he mondok hokho mene. A'nogo hilingitikhesik he aren agot a'nogoba ikhi logolik he, ”Hela, wulibin!” iluk yagatikhe.

¹⁶ A'nogo yagatikhe ba nen he at Tamar en ikhi logolik he, ”Ah, noe a'nogo omare ninggi'nogo iluk nogo? Haren an mugusogo wulaknabigin halok he, haren fage hilingiten mene a'nogore we endep hak oba nen he, hilingiti lagen mene yi nek he mondok weak mene hilingiti lagen!” iluk yagatikhe.

¹⁷ A'nogo logolik he at onggwarek faget eabu hilingiti lagaikhe mene a'nogo woletikhesik yagati logolik he, ”Hele yi waluk kwe a'ma fikhit kwe nen wulakfisambik he kunci wat fein o,” iluk yagatikhe.

¹⁸ A'nogo yagatikhemo re at eabu hilingiti lagaikhe mene a'nogo nen he hilingisin iluk yagatikhe mene a'nogo higithogo hilingitikhe. At hele Tamar a'nogo asu re jubah pisarek mene enggiba uanhogo labeti lagaikhe mene welagaikhe. O andem oba re it helime inaguni oan lombolinafi'lek mene re, inasu ariginik mene nek labeti lagaukwa. Andi nen he at amingmingengge a'nogo nen he hele a'nogo wulibuageluk yagatikhesik kwe kelok a'ma fikhit mene mondogat watfesikhe.

¹⁹ At hele Tamar a'nogo re asu jubah a'nogo tilip-talaphogo lakfisasikhesik he wul unggul oba yugul fesikhesik, enggi pire nen elokhe salogo le mondok weakhogo le arik lagaikhe.

²⁰ A'nogo le arik lagunem at Absalom a'nogo nen eilenggen hasikhesik heinok wokhikhi logolik he, ”Hat he eberogo Amnon nen weaget hobagaikhemo a? Arat nagot, haren hobuk ekhe wenggelu fuk. At andi re hat hoe hilingi'mo re it afuni amu mene ekhe yagaisa fuk,” iluk yagatikhe. Andi nen at Tamar a'nogo re at oe Absalom aiba omanogo amunek oba sinurogo endawimo weak agaikhesik welagaikhe.

²¹ A'nogo were'ma re at raja Daud a'nogo nen agaikhe aple a'nogo faget esanggo holhikhesik he, at a'mage mondok hokho mene lagasikhe.

²² At Absalom en he at agot Tamar inom nogosukwasik ebe weaget fesikhe mene a'nogo faget Amnon oba a'marikhogo endawimo sebelek logolik he, at inom ane matu aple abithogo welagaikhe.

At Absalom endawimo sebelek welagaikhe mene a'nogo onggo obali'mo fesikhe wene

²³ A'nogo hilingitukwasik oba nen he tahun pire welagaukwasigen at Absalom a'nogo re o Baal-Hazor o Efraim horokhogo omanogo wam domba esi palhunem seni isatikhe. Nen, a'nogo isati logolik he, at raja againafuri ap mene re inebe mondogat inayonggo fesikhe.

²⁴ Nen, aren raja Daud ambit lagaikhesik yagati logolik he, ”Hunai, an he wam domba esi palhunem seni isasigin enggere, hunai hat inom, it ap hokho inap o silimo yoma werek mene omanogo inom wesugun namolo o,” iluk yagatikhe.

²⁵ Oba nen he at raja a'nogo nen onggo yagati logolik he, ”Lego, namlogo, nit ninebe mondogat andoma wesumo nen he hat hoba engginet fogo hanogo o,” iluk yagatikhe. A'nogo yagatikhemo nen he at Absalom a'nogo nen mimingituat weregen he, at eisena nen he, Andi re fano hilingi'no, iluk yagatikheba nen he, ”An he eberogo nen wesigin lek,” iluk yagatikhe.

²⁶ A'nogo yagatikhemo at Absalom en ikhi logolik he, ”Ariginik halok he, An nagailak Amnon a'nogo an ninom logoin nen he fano in,” iluk yagatikhe. A'nogo yagatikhemo re at raja nen he, ”At andi hinom logoin lego,” iluk yagatikhe.

²⁷ Oba nen he at Absalom a'nogo nen ninghogoat mimingitu weregen he, At Daud en he, ”Amnon inom nen nagainafuri fena omanogo hinomat lani o,” iluk yagatikhe. [A'nogo yagatikhemo re lagaukwasik at Absalom en nunggungge mondok fano mene onggo hokho mene nek isagaisogo liafikhe.]

²⁸ Isati logolik aren amingmingengge omanogo inoba komotfisikhi logolik he, ”Hiren he at Amnon andi hineilenggen wanino o. At ambi anggur amusu nambik lugu-lugwi palhunem andem an nen enegengge hilinghugu halok he, hiren weak-weak ebe pinggi wa'no. Hinailo su fuk, wene andi faget he we an namu nen enek ambisangma noba asigin halok ogore wanigin enggere, iget figi'lek inambong siserogo nek hilingi'no!” iluk komotfisasikhe.

²⁹ A'nogo komorinafikhemo re, it amingmingengge omanogo nen he at Absalom en melalfisasikhe aple aremnogo higithogo re iren at Amnon a'nogo ebe watukwa. A'nogo watunem he it Daud againafuri fena omanogo nen ineilenggan hasukwasik he weak-weak inanggo bagal omanogoba lagasukwasik he heise linggi-longgo i lagaukwa.

³⁰ It omanogo inaiba logoin iluk ebekhalem oan lagunem he afuni nen Daud oba tak yagasi laga logolik he, ”At Absalom a'nogo nen he nineisena raja hagainafuri omanogo mondogat inoatemo re, misik ekhe eluk werek lek!” iluk yagatukwa.

³¹ A'nogo yagatukwama re at raja a'nogo menlagaikhesik he endawi ouen he asu tilip-talaphogo lakfisasikhesik ohulumo sagaumsek were'ma, it agoromi pegawai omanogo ogore inasu tilip-talaphogo lakfisasukwasik welagaukwaat.

³² Oba nen he, at Yonatab hun Simea Daud oe amlogo a'nogo nen ikhi logolik he, ”Neisena raja haren he hagainafuri inebe mondogat omanogo wa'lagaikha iluk hendawi wenggelhi logolik, hoba sinurogo werek lego. We at Amnon a'nogo nek wata o. At andi nen hele Tamar a'nogo inom nogogama weagerogo fikhe a'nogo nen he, at Absalom endawimo sebelek werek engge a'nogo re yogondak weinam aga yi o.

³³ Enggere, neisena raja haren it hagainafuri inebe mondogat omanogo wa'lagaikha iluk he eberogo angga fugo, we at Amnon a'nogo nek watama wa'laga o” iluk yagatikhe.

³⁴ It a'nogo hilingitu kwelek a'nogo re at Absalom a'nogo ailo nen heise lagaikhemo re, it ekhe Daud aiba istana kagalek welagaukwa mene nen ineilenggen yethasukwa re, o Tom Hanoraim fikhit a'nogo nen afuni hokhorogo pelabek pi wagunem yethasukwasik at abo Yonatab a'nogo nen raja oba eluet fei lagaukwa.

³⁵ Andi nen at Yonadab en raja oba ikhi logolik he, ”A'li re hat noe hagainafuri omanogo pi weri'lagwi a'li! An fage yagaheti a'nogo re eberogo nen igimo,” iluk yagatikhe.

³⁶ At a'nogo we ane kerat isikhesik were'ma nen he, it Daud againafuri omanogo o Daud were'ma a'nogo kwi lagaukwa. Kwi lagaukwasik he, it a'nogo le agunem at Daud inom, at amingmingengge omanogo inom he inebe mondogat inendawi ane tuk-tuk le agaukwa.

^37-38 Nen, a'nogo hilingitu kwelek, at Absalom a'nogo re o kwe ambe at raja Talmai hun Amihur amlogo o Gezur mene a'nogo awi sili wuri'mo omanogo lagaikhesik welagaikhe. At ebe andoma werek kwelek enek he tahun henagan hilingitikhe. Nen, at Daud a'nogo re at Amnon faget he aninurogo fong watu welagaikhe.

³⁹ Oba nen he at Daud a'nogo endawi ou a'nogo lek agaikhesik he aren amlogo Absalom a'nogo oba ebethugu mondok welagaikhe.