2 SAMUEL 12 - Allah Wene Fano Wene Hupla Inane

Natan nen Daud komotikhemo aren he, ”An weak hilingiti o,” iluk yagatikhe wene

¹ A'nogo hilingitukwama nen, hobuk At Tuhan nen Natan Allah ane yagaisikhi lagaikhe mene a'nogo ayonggo fesikhesik, Daud oba lakfei wagaikhemo wagaikhesik mel yagatikhe: ”Ap inebe pire mene re, at ekhe kain angge hokhorogo werek mene, nen ekhe re enggi lek elagaik mene emberek inawi kota misi'mo welagaukwa.

² Logolik, ap kain enggi werek mene a'nogo re anggo yi wam ti wam inom, domba inom, hokhorogo welagaikhe.

³ A'nogo meneat he, ap elagaik mene a'nogore anggo domba eak onggo palhikhe mene misigenek welagaikhe. Were'ma, wam andi re ap andi againafuri inom misi'mo logolik, arat ena wanhikhemo hokho agaikhe. A'nogo kulhi logolik, sumburu ap a'nogo amburu ebe meneat wogotik, i at agaiwak hinagaisogo ninggerek menebaat hinagaisogo wogotik, ikhi lagaikhe. Ariginhi logolik, wam andi at a'logo onggwaregen takhasikhe mene hangge agoumo fisogo nogo ikhi lagaikheat.

⁴ A'nogo were'ma inenggi ekhe sambul he, ap kain a'nogo arugi oba wagaukwama, it faget onggwarek anggo domba inom sapi inom, warisa mene werek kwelegat he, ap enggilek mene a'nogo anggo domba misigenek mene a'nogoat wani lagaikhesik he, arugi omanogo warisasikhe,” iluk yagatikhe.

^5-6 Ap eilmo wulalhak mene obabut weak hilingitikhe mene faget a'nogo yagatikhemo, at Daud esanggo holhikhesik he, a'mage hokhorogo lagasikhesik, mel yagatikhe: ”Ap enggi werek mene andi obabut mondok weak hilingite andi ri! Neisena Tuhan eluk welagarek mene oak. Ap andi nen he, wam domba andi onggo enggi attak figik, hobuk figik, huli 4 oba fagain o. A'nogo fugunem ap andi wene oba fembik ebe pinggi wasugun,” iluk yagatikhe.

⁷ A'nogo yagatikhemo, at Natan nen Daud mel yagatikhe: ”Ap enggi werek mene igi andi, hat hebe aro. Halok he, nit afuni Israel mene nineisena Tuhan nen he, mel yagahete: An nen he, hat ebe afuni Israel mene inoe raja logouwageluk menhobagagi, hat ebe Saul en hoasigiluk ikhi lagaikhe mene re, telhafigi anggigi.

⁸ A'nogo telhafigisik, at Saul en ferinarek welagaikhe mene andi, hat wokheti logolik, at agagwi mondogat wokhetigiat anggigi. A'nogo wokhetigisik, hat hebe afuni Israel mene inom, Yehuda mene inom, inoe henupogot logoinogoluk menhobagasigi. Ariginhafigi a'nogo mene re, hat hendawimo nen andem elo'lek anggegen halok he, An nen andem higithogo ekhe inom eberogoat wokhesigin aro.

⁹ Mene re, an nen, yi'nogo hilingi'no, ti'nogo hilingi'no, iluk yagaheti lagi mene andi, nane hendawimo seramet fegendik an neilhanem weak hilingiten andi nenahalok? Nenahalok haren weak mene andi hilingiten? At Uria a'nogo re aben weim ambisangma nen wasuageluk miminginafen. Haren he at agwe helikhi logolik he at ebere ap Amon mene nen wasuageluk herakfisegen andi!

¹⁰ Haren An nane sagalogo fegendik, ap Uria agwe andi helegenma re, o yogondak huli nen mondok-mondok andoma re haren tagomangge mene ambisangma andoma re weim ambisangma nen enek inoatunem wa'laga logogun o.

¹¹ Ero hat honggwarek hagainafuri weak enat, yi enggin ti enggin hinoba fakhikhi logogun o. Nen, An nen he hat hagagwi honggwarek heil kumurinarek kwelek waganogo re ap amu mene ekhe wogisugunem, aben lingge tulem werek kwelek omanogo inom nogokhi logogun o.

¹² Haren hinagaisogo weak hilingiten meneat he, An nen he, hat weak hilingiten andi enegat asuwageluk, afuni Israel mene mondogat ineilhanem wene weak mene andi weinam hogo hoba lakfei wesigin iluk, yagaheti o, iluk yagahete,” iluk yagatikhe.

¹³ A'nogo yagatikhemo, at Daud en Natan mel yagatikhe: ”An At Tuhan elokhoma mondok weagat hilingiti o,” iluk yagatikhe. Yagatikhemo, at Natan nen he, ”Hat weak hilingiten mene andi, Allah nen sagalogo herakfisikhemo re, hebe wa'lasigin lego.

¹⁴ A'nogo meneat he, hat weak hilingiten andi nen, nineisena Tuhan elokhoma weaget fegenma re, hat hamlogo ket ta'laga mene andi ebe wa'lasigin o,” iluk yagatikhe.

¹⁵ A'nogo yagatikhesik at Natan a'nogo ambotkwe aiba lagaikhe. At Daud amlogo ap Uria agwe sogwe Batsyeba nen tatikhe mene a'nogo, nineisena Tuhan nen ou oba fesikhe.

At Daud amlogo wa'lagaikhe wene

¹⁶ A'nogo oba agaikhemo, at Daud en amlogo andi se asuagaluk, hundik-handik ebe oloba kuluk sumburu ninggi'lek hup inukhogo ebe kweangma wengik logolik samban Allah kino yagati lagaikhe.

¹⁷ A'nogo were'ma, agoromi kaindek mene oba kuluk, ebe menlasuagaluk yagati lagaukwa meneat he, inane esanggo holhi'lek herakfisaluk, ebe menla'luk sumburu inom ninggi'lek kamo ikhi lagaikhe.

¹⁸ A'nogo hilingitu kwelek, inenggi 7 hari were'ma nen, omalik a'nogo ebe wa'lagaikhe. A'nogo wa'lagaikhemo, at Daud amingmingengge nen he, mel isukwa: ”Daud amlogo ebe eluk oba niren at wenenggak yagatunem ninane esanggo holhi laga lek a'nogo re, yogondak ebe wa'lagama re, ebenagaik, endawimo weak asimbik onggwarek ebe waragain o,” iluk isukwasik inailo nen he, ”Hamlogo ebe wa'lagama o,” iluk yagati'lek kamo isukwa.

¹⁹ A'nogo kamo isukwasik, inane samik-samok ugunem at Daud eilenggen isasikhesik he, ”An namlogo a'nogo ebe arat wa'lagama higi,” iluk futfesikhesik, mel yagaisasikhe, ”Yenggerek a'nogo ebe arat wa'lagama a?” iluk heinok wogisasikhemo, iren he, ”I o, ninoe,” iluk yagatukwa.

²⁰ A'nogo yagatukwama, at Daud wengik welagaikhengge a'nogo menlagaikhesik he, kume warogo esi feisalhik, asu laberek mene nonggologo fesikhesik ket mene itik, isikhe. A'nogo hilingitkhesik, eisena Tuhan awi wuri'mo lagaikhesik he eindep awi yagaisogo Allah fogeratikhe. A'nogo hilingi'luk ambotkwe aiba wagaikhesik sumburu wogosuwagaluk yagaisasikhemo, wogetukwama nasikhe.

²¹ A'nogo hilingitikhemo, it ap at amingmingengge mene nen ineilenggen hasukwasik he, mel yagatukwa: ”Noe, yenggerek andi ebe eluk oba re, hat sumburu ninggi'lek logolik, le aga lagen a'nogo meneat he, ebe arat wa'lagama nek he, hebe menlagendik sumburu nenggen andi re, nit futfogo mondok lego,” iluk yagatukwa.

²² A'nogo yagatukwama, at Daud en he, ”Yenggerek andi wa'lagi'lek oba re, an nendawimo nen he, neisena Tuhan nen endawitnabimbik yenggerek andi eluk logouwagaluk fano hilingisigin hea ba, an eberogoat sumburu ninggi'lek le agu welagi a'nogo o.

²³ A'nogo meneat he, yogondak at ebe arat wa'lagasik oba nen, sumburu ninggi'lek logogin andi nenahalok. An nen ambotkwe elugerasigin anggegep a? An hobuk at lagaba andoma ambit lagain meneat he, at ambotkwe an noba wesigin mondok lego,” iluk yagaisasikhe.

Salomo ebe ta'lagaikhe wene

²⁴ Hobuk at Daud agwe Batsyeba endawinggen sebelhi lagaikhesik he, emberek nogo isukwa. A'nogo nogo isukwama, at Betsyeba omalik a'ma agaikhesik, eak ap takhasikhemo, Daud en enu Salomo salhikhe. Nen, nineisena Tuhan nen omalik andi endawi mondok hasikhe.

²⁵ A'nogo endawi mondok hasikhe andi nen he, Natan, at ane yagaisikhi lagaikhe mene a'nogo nen, omalik andi enu Yetia saluagaluk, lakfei wagaikhemo wagaikhesik enu andiat salhikhe.

Daud en o Raba sebeli kwisikhe wene

²⁶ It omanogo a'nogo hilignitu kwelek at Yoab a'nogo re it o Amon inap inawi eroma o Rama a'nogo inap inom weim yafi lagaikhe. A'nogo yafi logolik he aren arat sebeli ku horogat aga lagaikhe.

²⁷ A'nogo hilingiti logolik aren ap wene waluk Daud yagasi loageluk lakfisa waga logolik he, ”An nen o Raba a'nogo sebeli kwigirik it inagai werek fikhit omanogo re an mondogat nenggim aga o.

²⁸ Enggere yogondak he ap sikhe fisogo mene alinlan werek mene aremnogo andogerisaluk o kota andi sebelogo feinogen he neisena hun hokho haren woginarek elok kugun iluk fano in o. A'nogo asigin andiba re afuni nen ikhi logolik he, an nen o andi sebelhe iluk yaganesi nogore, iluk ikhe yaga'no,” iluk wene warogo lakfesikhe.

²⁹ A'nogo hilingitikhemo at Daud en he agoromi sikhe fisogo mene mondogat omanogo andogerinafikhesik o Raba a'nogo pin talogo inoasi kwikhi logolik he, afuni omanogo inomame leget fisasukwa.

³⁰ At Daud en he at raja o andi mene inoe agun a'nogo nen unggulasu makhota sebelek welagaikhe mene a'nogo unggulmo nen wanhikhesik he at Daud ungguloba sebelfesikhe. Makhota andi enggin he 35 kilo nen hilingi'mo re no permata mondok fano meneba saplirogo pugunhogo hilingik welagaikhe. Nen, o kota andi nen he at Daud en yi mene ti mene hokhorogo hogougeraluk lagaikhe.

³¹ Andi nen it afuni andoma mene re lirinarek laga logolik gergaji inom, posiemanggen meneba nen habulharek mene inom, yaga posie inom, helaluk logoin iluk yagaisasukwasik, it a'nogo ineabu helep kweang tangge mene endu oba weratuba omanogo hilingiti logouwageluk fisasukwa. A'nogo hilingfisasukwasik he at Daud inom agoromi sikhe fisogo mene omanogo inom he nekhengge o Yerusalem wagaukwa.