2 SAMUEL 11 - Allah Wene Fano Wene Hupla Inane

Daud he Batsyeba ebe wanigiluk hilingitikhe wene

¹ It ap kaindek inenupogot andoma mo lagagunem weim yafaresi'mo re, tahun andiba mo lagagunem, at Daud en agot kain Yoab inom, agoromi kabelek mene ekhe inom, ap tentara Israel mene mondogat inom, selei mene inom weim yabi loagaluk lakfisasikhemo lagaukwasik, ap Amon mene inebe mabenetfisaluk inoati logolik, o kota Raba latukwa. A'nogo meneat he, at Daud ebe weim oba inom lagi'lek kamo isikhesik o Yerusalem welagaikhe.

² A'nogo logolik inenggi ekhe sambul he, at Daud linggene nogo isikhesik eluk agaikhesik he, awi wa'lengge awi wuri'mo obuluk liokse'ma andoma lagasikhesik yethasikhe re, he ekhe mondok fano mene kume watunem eilenggen yethasikhe.

³ Hasikhesik, ”He andi sa,” iluk afuni inoba heinok wogisa loagaluk afuni ekhe inayonggo fesikhesik lakfisasikhemo lagaukwasik, heinok wanhukwama, iren he, ”He ari enu re Batsyeba, eisena enu Eliam, nen agun he ap Uria unggulenu Het mene a'nogo agwe,” iluk yagaisasukwama, iren he Daud yagasi wagaukwa.

⁴ A'nogo yagasi wagaukwama re, he andi wani loagaluk ap ekhe lakfisasikhemo lagaukwasik waluk Daud aiba wagaukwama, he a'nogo at emberek nogo isukwa. Andem sambul, at he Batsyeba andi amep hikhi lagaikhe mene kerat palagaikhemo it hilingitarek hak ebene horatikhesik were'ma, a'nogo nogo iluk aiba ambotkwe lagaikhe.

⁵ A'nogo lagaikhesik welagaukwasigen he, he a'nogo omalik a'ma agaikhemo, aren he, ”Omalik arat na'ma agama,” iluk at Daud oba wene lakfei wagaikhe.

⁶ A'nogo lakfei wagaikhemo, at Daud en he, afuni ekhe mel yagaisasikhe: ”Ap Yoab en he, ap Uria unggulenu Het mene a'nogo noba wesuagaluk yagasuagen yagasi lani o,” iluk lakfisasikhemo yagasi lagaukwama re, at Yoab en Uria Daud oba lakfei wagaikhemo wagaikhe.

⁷ Wagaikhesik, at kain Daud oba wagaikhemo, Daud en he, ”At Yoab inom, agoromi tentara Israel mene inom, inebe ninggi'nogo werek. Nen, weim ninggi'nogo yabi'lagwi,” iluk heinok wokhasikhe.

⁸ Heinok a'nogo wokhasikhesik mel yagatikhe: ”Haiba hambotkwe lambik he, set endebat halok ekhe warano o,” iluk yagatikhemo, at Uria Daud aiba andoma nen wulifikhemo at Daud en hadiah fano mene ekhe weat wogosuagaluk ombo'ne lakfesikhe.

⁹ Oba nen he, at Uria ebe aiba lagi'lek, we it ap kain Daud serogo welagaukwa mene inom Daud aiba pa'leget kwe ambe palek oba andoma nogo isikhe.

¹⁰ A'nogo nogo isikhesik were'ma, it ap ekhe nen he, ”Uria yoma nogo ikhesik werek,” iluk Daud yagatukwama, aren he, Uria mel yagatikhe: ”Hat hebe o yatmaat lagendik wagen meneat he, haiba hambotkwe lagi'lek hilingiten andi nenahalok,” iluk heinok wokhasikhe.

¹¹ A'nogo yagatikhemo, at Uria nen he, mel yagatikhe: ”Ap tentara Israel mene inom, Yehuda mene inom, Peti Wene Warogo Allah nen wo'ninafikhe, iluk hilingik a'nogo weim mondok inomamerogo yafu kwelek waluk nikho. Nen, at Yoab agoromi kabelek mene inom ogore tenda o leikwe salhigik nugu kwelek mene at he, an hamingmingengge yi nambotkwe oloba lambik, sumburu ninggik, i ninggik, nagwe nemberek nogo igik, uagaluk yaganeten andi nenahalok, noe. Noe, hat hebe hoak, an hat egen andi a'nogo hilingisigin mondok lego,” iluk yagatikhe.

¹² A'nogo yagatikhemo at Daud en he, ”Wene arat egen o. Hat o yogondak yoma set warogo logoin o. Nen ohealek hubet halok enek he lakhobagagin o,” iluk yagatikhe. A'nogo yagatikhemo, at Uria andi sambul o Yerusalem welagaikhe. A'nogo were'ma, ohealekwe re at Daud en sumburu ninom nogoin iluk ayonggo fesikhe.

¹³ Ayonggo a'nogo fesikhemo sumburu inom ninggi logolik, at Daud en he, i anggur amusu mondok hokhorogo wogotikhemo, ebe sini'nuk palogo obakhe palagaikhe. A'nogo hilinglagaikhe meneat he, at Uria aiba lagi'lek kamo isikhesik, it ap o andoma serogo welagaukwa mene inaiba aselimut talogo nogo isikheat.

¹⁴ A'nogo nogo isikhesik were'ma ohealekwe re, at Daud en surat Yoab faget palhikhesik, at Uria waluk lambik wogosi loagaluk lakfesikhe.

¹⁵ At Daud surat andi Yoab oba palogo lakfikhi logolik, mel yagatikhe: ”Ap Uria andi ebe selei mene nen wasuakhogo re weim mondok aninirogo weri'lagwi fikhit andoma elokhoma feino, fuluk he aren yethiigi'lek werek kwelek he nabel-habel herakfuluk wulibi we'no,” iluk palogo lakfesikhe.

¹⁶ A'nogo yagatikhemo, at Yoab o kota a'nogo o lasigiluk ikhi logolik, selei mene inomamerogo kagalek welagaikharek elumo a'luk he, aremnogoat higit, Uria loagaluk yagatikhe.

¹⁷ A'nogo yagatikhesik, afuni o kota a'nogo o larinabuogoluk kugunem it ap tentara selei mene wulibi waga logolik, ap Yoab agoromi tentara kabelek mene inebe miren mene hakhogo inoati logolik he, at Uria a'nogo inomat inoatukwa.

¹⁸ A'nogo inoatukwama at Yoab en he, weim yafi logolik inoatukwa mene andi, at Daud yagasi wesuagaluk agot ekhe ayonggo fesikhesik lakfei wagaikhe.

¹⁹ A'nogo lakfei waga logolik mel yagatikhe: ”Haren, weim yafi logolik yi'nogo hilingito, iluk yagatunem at kain enupogot esanggo holimbik he,

²⁰ wenakhesimbik, wene mel yagahesigin: O kota andi horok-horok mondok kwegep andi nenahalok? Selei mene nen inebe leget pa'leget esia'leba logolik, hit pelabek pisinghigik hinoasu hak andi hinonggoren kwegeba?

²¹ Attagat o Tebes andoma nen, he mene helep tepung sagalharek meneba ebe leget pa'leget esia'leba nen pelabemangge ap Gideon amlogo Abimelekh watikhemo, ebe wa'lagaikhe a'nogo hinonggot agama leget pak leget andiba horok-horok kwegeba? iluk heinok a'nogo wokhiikhe halok, haren he, hat hagot kabelek mene Uria a'nogo wata aro, iluk yaga'no,” iluk yagatikhe.

²² A'nogo yagatikhemo, at ap Yoab en lakfei wagaikhe mene a'nogo at kain Daud oba wagaikhesik he, wene Daud yagasuagaluk yagatikhe mene a'nogo yagatikhe.

²³ Yagati logolik mel isikhe: ”Nit ninomame lek hangge meneat he, ninaselei mene inomame mondok hokhore'ma, o kota nen wulibi wagaikhasik weim o leikwe ninom yafo. Mene at he, ninom tiligarik laga logolik niren ninomamerogo muginarek o kota leget pa'leget kwe ambe pale'ma omanogo lago.

²⁴ A'nogo muginarek lagoma, inebe leget pa'leget esia'leba nen pelabemangge tok pising-pasanghogo pelabi wagunemen he, hat hagoromi kabelek mene inebe miren mene hakhogo inoati logolik he, at Uria a'nogo inomat wata o,” iluk yagatikhe.

²⁵ Yagatikhemo, at Daud en he, ap Yoab en lakfei wagaikhe mene a'nogo mel yagatikhe: ”At Yoab endawi hambukhogo yagati logolik he, hat hebe hailo a'luk hendawi fitun o. Ap weim yafunem andoma nen ap sani inoasugun he iluk andi re hendawimo menenei wenggelhi'legengge re, o kota andi re it inomame legasimbik, niren ekhe inom hilingisu elo'lek aga, iluk anggoakhogo re o kota andiba mondok hinomamerogo yabino o, iluk yaga'no,” iluk yagatikhe.

²⁶ A'nogo yagaisasikhemo lagaukwama re, afuni nen he Batsyeba yagati logolik he, ”Hagun ebe watama wa'laga o,” iluk yagatukwama esanggo holhikhesik he, endawimo weakhogo fong watu welagaikhe.

²⁷ A'nogo fong watu welagaikhesik kwe wulibu hak agaikhemo, at Daud en he andi wani loagaluk agoromi lakfisasikhemo wani lagaukwasik wagaukwama re, ebe helasikhe. Helasikhesik welagaukwasigen he a'nogo eak ap takhasikhe. A'nogo meneat he, at Daud en hilingitikhe mene andi faget he Tuhan nen abit anggasikhe.