2 SAMUEL 10 - Allah Wene Fano Wene Hupla Inane

Daud en afuni Amon mene inom Siria mene inom mabenet fisasikhe wene

¹ Inenggi ekhe inom welagaukwasigen he at Nahas raja o Amon welagaikhe mene a'nogo wa'lagaikhemo, at amlogo Hanun obali'mo raja menlagaikhe.

² A'nogo menlagaikhemo at raja Daud en ikhi logolik he, ”At Nahas andi re nagailak ninom mondok hundik welago mene hilingi'mo re, an nen at amlogo Hanun andi ninom pali wasigiluk welagi,” iluk isikhe. A'nogo isikhesik at Daud en he hun Hanun eisena wa'lagaikhemo endawimo konogo iluk he ap o Amon kweang oba omanogo lakfisasikhe.

³ Lakfisasikhemo it aremnogo o Amon asi lagaukwasik hilingitunemen he, it o andoma inogogwi melalinafarek mene omanogo nen at raja Hanun a'nogoba ikhi logolik, ”Nineisena hun hokho haren anggikhi logolik he, at Daud en ap lakfisa waga andi re hun hokho heisena wa'laga mene a'nogo along anggikhi logolik hai warogo iluk lakfisa wagama iluk angga fuk! Aren ap lakfisa waga andi re o kota yoma pin kwi wesuogelugen he ineilenggen panesuagaluk lakfisa waga ari,” iluk yagatikhe.

⁴ A'nogo yagatikhemo re at Hanun a'nogo nen he, at Daud en agoromi lakfisasikhe mene omanogo fakfisasikhesik he inomboro fena hogol figik, inasu celana ineindep huli lebegetik isikhesik he, hinaiba lani iluk lakfisasikhe.

⁵ A'nogo lakfisasikheba nen he it inaiba lagu aple inenggali agu nen logolik at Daud oba yagasi loageluk wene warogo fesukwama, ”It he inebe a'nogo werek,” iluk yagasi lagaukwama, aren wene lakfikhi logolik he, ”An nen ap lakfisa wagi mene andoma re o Yerikho logouwak, o andoma were'ma nen inomboro wulifu halok enek he wesugun o,” iluk wene warogo lakfesikhe.

⁶ Aren a'nogo isikhemo nen it afuni Amon mene nen anggikhi logolik he, niren hilingitoba at Daud a'nogo nit ninom aselei mene aga, iluk anggasukwasik weim ya'nisoageluk ap yonggore it sikhe fisogo mene Sirian inap o Bet-Rehob inom, Zoba inom, welagaukwa mene re inebe 20.000 nen inom, it weim yafu inap inawi Tob mene re inebe 12.000 nen inom, nen at raja o Maakha mene agoromi inebe 1.000 nen inom yonggo fesikhe.

⁷ A'nogo hilingitukwama at Daud esanggo holhikhesik he, at Yoab inom agoromi inom weim yafarek mene omanogo inom inoba re, it inaselei mene andi hinom weim yabi lani, iluk lakfisasikhe.

⁸ It Amon inap he wulibi wagaukwasik it inaiba eroma ibu kota a'nogo o Raba kwe ambe kwi lagaikharek oba omanogo erati lagaukwa, nen it Siria inap inom, Tob inap inom, Maaka inap inom he, o leimo omanogo eratukwa.

⁹ A'nogo eratukwama at Yoab a'nogo eilenggen yerisasikhe re, it aselei mene esa logalek omanogo re elokhe fikhiren mamingi'luk ambot fikhiren mamingi'luk at ebe tulem hukhogo kwelakfesukwama hasikhesik, aren it ap tentara Israel mene weim inomamerogo hilingisu hak mene nek folhigik fisasikhesik he, it tentara Siria mene omanogo inom weim eilem-eilem yabuageluk fisilik lagaikhe.

¹⁰ Nen it tentara Israel mene fenakwe omanogo re at agot Abisai a'nogo nen erarogo hilingfisaluk he, it ap Amon inap inom inelokhe wuthigik wal hoageluk yagatikhe.

¹¹ At Yoab en agot oba ikhi logolik he, ”An ambi it Siria mene ninom walhugunemen nomame lek agu halok he hat weak-weak an lebetnea we'no. Nen harogo it Amon mene hinom walhugunemen homame lek agu halok he an nen weak-weagat lebethea wesigin.

¹² Hendawinggen hambuget hano! Nit he ninambong serogo nit ninunggulenu mene faget inom, o kota nineisena Allah aiba omanogo faget inom yabuogeluk welago hilingi'mo re. We At Tuhan nen enek At endawimo agaiyek anggikhe mene nek hilingisuago,” iluk yagatikhe.

¹³ A'nogo isukwasik he at Yoab agoromi sikhe fisogo mene omanogo inom weim a'nogo sinelogo yabi kwisukwama nen he, it tentara Siria mene omanogo heise wulifukwa.

¹⁴ A'nogo wulifunem it Amon mene omanogo nen yerisasukwasik he, it omanogo ogore at Abisai a'nogo oba nen herakfuluk inambothan inawi kota elonggoma kwi lagaukwa. At Yoab a'nogo it Amon mene inom weim mondogat yakfuluk a'nogo re ambotkwe inaiba o Yerusalem wagaikhe.

¹⁵ A'nogo hilingitukwama it Siria inaben inendawimo wenggel hikhi logolik he, ”Afuni Israel mene nen nit ninomame lek hilingisogo ninobagaga,” iluk anggasukwasik he, iren inagoromi weim yafarek mene mondok felelenghogo andogosi wesuageluk yagaisasukwa.

¹⁶ Andi nen at raja Hadadezer o Zoba agun a'nogo nen he it afuni Siria inap o Efrat ima nen mo liabi wagarek fikhit werek mene andoma wesuakhogo hondoginabi lani, iluk miminginafikhemo wolinabi lagaukwama re, it a'nogo inoe Sobakh at raja Hadadezer en agoromi sikhe fisogo mene omanogo inoe panglima o Zoba mene a'nogo nen woginarek he o Helam wagaukwa.

¹⁷ A'nogo wagaukwa mene a'nogo at Daud esanggo holhikhesik agoromi Israel mene weim yafarek mene omanogo weak-weak andogerinafikhesik he, i Yordan palogo o Helam omanogo kwi lagaukwa. Andoma nen he it Siria inaben sikhe fisogo mene ogo inagoromi erarogo hilingfisasukwasik he, it Daud mel a'nogo inoba weim yabi kwi wagaukwa.

¹⁸ Oba nen it Israel mene nen he it Siria inap omanogo inoarik-inoarik wulaginabi lagaukwa. At Daud agoromi tentara omanogo nen he, kereta ba lisogo laga logolik weim yabi lagaukwa mene omanogo re inebe 700 nen inoatukwa, nen it wam kuda amboloba lagaluk weim yabi lagaukwa mene re inebe 40.000 nen inoatukwa. Nen ekhe alek mene re at Sobakh it sikhe fisogo mene inoe panglima a'nogo re ebene tok watukwa mene nen enggin tunghogo hilinglagaikhesik he weim yafukwaba omanogo nen ebe pinggi wa'lagaikhe.

¹⁹ A'nogo hilingitukwama, at Hadadezer en it raja aren ferinarek werekwe mene omanogo it Israel mene inaben inomame leget fisugunem isasukwasik he, iren he hit ninom sebesugun iluk isukwasik it inebe afuni Israel mene ina'ma agaukwa. A'nogo agaukwa huli a'nogo nen he it Siria inaben he Amon inap ekhe menggelisikhi lagaukwa lek.