2 PETRUS 3 - Allah Wene Fano Wene Hupla Inane

”Yesus wesigin, iluk wene watnisasukwa a'nogo, eberogoat wesigin,” iluk yagaisasikhe wene

¹ Nerugwi nagaila'lak. Hinebe nendawi e. Wene attak ekhe lisu palogo hinoba lakfei wagagi andi inom, hobuk lakfei wagi andi inom, hit wene ebe hinelu meneat he, hinendawimo higithogo ebesubagaigen iluk lakfei waga lagi andi.

² Wene andi, it ap attagat Allah nen inayonggo fesikhemo at ane yagaisikhi lagaukwa mene nen isukwaat. Nen, ninoe Enupogot ninebe telninaferek mene a'nogo nen wene komotninafikhe mene, nit ninayonggo fesikhesik hinoba lakninobagai wagaikhemo yagahisasuguat.

³ Wene ebe yi tak futfogoin. O wurep oba re, afuni ekhe inane asegen weak mene inendawinggen en nunggunem inendawimo nen kagalogo weak hilingiti logolik, hinoba wesimbik, inane asegen wokhisikhi logolik he,

⁴ ”Hinoe Enupogoren he, An hobuk wesigin, iluk wene wathisasikhe a'nogo ebe ki waga. Wagi'lek werek kwelek nineisenalak arat wa'lagaukwa meneat he, yi mene ti mene Allah nen omanggum walhasikhemo welagaikhe hagat etok mondok werek yi,” iluk inane asegen wokhisa wesugun o.

⁵ A'nogo ikhi logolik, wene yi inonggorari'lagwi. Omanggum Allah anebaat pogot walhasikhesik he, kweang inom, i inom misikwe were'ma, i ponggwe-manggwe lakfesikhe andiba kweang walhasikhe, iluk wene andi inelu logoligat he, inonggot mene nen agarek ili'lagwi andi.

⁶ A'nogo walhasikhesik he, hobugen iba nabunghabung uageluk isikhemo, kweang andi i andibaat weaget fesikhe andi.

⁷ Mene re, pogot andi inom, kweang andi inom, hobuk enduba weagetfeigeluk Allah ane andibaat elama faget fisogo logombik he, afuni Allah ebe inabit logolik inobabut weak hilingiri'lagwi mene andi, wene inoba fuluk weagerinafik, kweang pogot weagetfigik, misik sambulat hilingisigeluk eranenat enggi fisogo werego.

⁸ Mene re, nerugwi nagaila'lak. Hinebe nendawi e. Wene misigat yi hinonggoragup. Ninoe Enupogot endawimo anggikhi logolik, o lingge misigat welagorek andi re, 1.000 tahun hangge anggikherek. Nen, 1.000 tahun andi re, o lingge ninenggi misigat welagorek andi hanggeat anggikherek. Mene re, emberek higit enek anggikherego.

⁹ It afuni ekhe nen he, ”Ninoe Enupogoren wene watnisasikhe wene a'nogo, ebe wagi'lek aninurogo werek,” iluk anggili'lagwi andi re, aninurogo werek fuk. Hit hinebe endawi nen, At endawimo nen he, ”It ekhe nong asinogo,” iluk afuni mondogat inobabut weak hilingiri'lagwi mene herakfisaluk inobabut hebelasuageluk, eranenat endawimo anggaluk aninurogo werek andi.

¹⁰ A'nogo werek meneat he, afuni inonggorat werek kwelek yi mene ti mene yogot wani kwagarek andi hak, ninoe Enupogot wesigin andi re, a'nogoat wesigin o. Andi sambul, pogot ebe misik sambulat sogoi ane hangge ilik-ilik legagik, yi mene ti mene pogoroba welagarek mene ero inomat endu ninggik, kweang ebe inom, yi mene ti mene kweangma welagarek mene inom, mondogat legagik, igin o.

^11-12 Yi mene ti mene mondogat a'nogo legasigin andi nen, hit hinobabut ninggi'nogo hilingiti logogun anggegep? Allah nen hilingisigin andi sambul pogot endu foumo re, amulogen felelenghogo ninggik, yi mene ti mene ero inom tamuk-tamakhogo ninggik, igin andi nen, weak hilingiti'lek tegelek logolik, hinebe Allah faget fisaluk, at ebe nenangorogo logolik, ebe weak-weak wesuageluk anggilukhogo hilingiti logoino o.

¹³ A'nogo hilingiti logolik ninendawimo nen he, ”Allah nen wene watnisikhi logolik: Pogot ket mene hilingisogo figik, kweang ket mene hilingisogo figik, igin oba andoma kwimbik higithogo nek hilingiti logogun,” iluk, wene watnisasikhe mene a'nogo nenangorogo welago.

¹⁴ Nerugwi nagaila'lak. Hinebe nendawi e. A'nogo wesigin iluk, nenangorogo logolik he, wene hinoba fakhigi'legat, weak agi'legat, Allah hinom fano were'ma at ebe hisa wesuagen, at faget anggilukhogo hilingiti logoino.

¹⁵ A'nogo hilingiti logolik, hinendawimo nen he: ”Ninoe Enupogot endawimo nen menenei uan ebeterek andi nen, weak-weak wagi'lek oan werek andi re, telninabigeluk eranenat oan nenangotninarek werek,” iluk hinendawimo anggano. At ninoe Paulus ebe ninendawi mene a'nogo Allah nen endawimo kagalhikhemo wene a'nogo iluk lisu palogo hinoba lakfei wagaikhe andi.

¹⁶ Aren wene hundik-handigat lisu palogo hinoba lakfei waga logolik, wene andi mene faget ugu mondogat welagarego. Mene re, wene aren lisu palogo hinoba lakfei wagarek mene andi re, wene ekhe futfou elo'lek mene werego. Were'ma re, it ekhe inendawinggen pire abolok werek mene andi nen, wene andi inonggot logolik, wene Allah nen isikhemo Paulus nen lisu palherek mene andi inom, it ekhe nen lisu palhukwa mene andi inom, wene higit werek meneat he, hebelogo weaget fili'lagwi andi. Wene hebelogo weagetfikhi logolik, inonggwaregenat inebe weaget fakhili'lagwi andi.

¹⁷ Nerugwi nagaila'lak. Hinebe nendawi e. Wene andi oan hilinglagi'lek werek kwelek he, hinelurogo logobagaigeluk furogo yagahisigi andi. Hinelu logolik, hinonggwarek hinendawinggen wurikhogoat logoino. It afuni ekhe komore'lek hilingitarek mene andi nen, wene weak wene yagahisikhi logolik, hiren he, ”Eberogoat” anggaluk hinendawinggen wurik welagep mene andi kobokhogo herakfugunem hinebe nongasinogo iluk, hinobabut hebelogo logoino o.

¹⁸ Ninoe Enupogot telninaferek mene obabut fano a'nogo nen wo'nisikherek mene andi wanhik, ebe hinelu agik, ikhi logolik he, hinendawinggen wurik a'luk logoino. Yogondak ya inom, hobuk inom, at Yesus Kristus alegat fogeratu mondok logouwogo, iluk, ”Amin,” igi andi.