2 PETRUS 2 - Allah Wene Fano Wene Hupla Inane

”Ap Allah ane yagaisagarek mene hangge hobuk weinam asugun,” iluk yagaisasikhe wene

¹ Attagat andoma re, ap ekhe it Allah ane yagaisikhi lagaukwa mene inebe higit we'luk ineranen wene ikhi lagaukwa mene, Allah againafuri inanggelekwe menlarik wagaukwa. Andi higit he, hobuk ap ebe wene yagaisagarek mene hangge wesimbik, ineranen ikhi logogun mene hinanggelekwe ekhe weinam arik wesugun aro. Weinam asimbik he, wene afuni inebe weagerinafarek wene yagahisa kwi wesugun. Kwi wesimbik he, ninoe Enupogoren it ninomat telninabigeluk ninonggo palhikhe meneat he, iren he, ”Athe, nit ninoe lego. Ninonggot,” iluk labelhi logogun andi. Labelumo re, inonggwaregen wene weak-weagat inoba fakhaluk weak akhogoin o.

² A'nogo meneat he, it inendawinggen en nunggunem inenggali legat yi weak ti weak hilingitunem, afuni hokhorogoaren it inobabut waganogo hilingiti logogun andiba, it afuni ekhe nen, Yesus ombo'ne lagaikharek wene, ebe wene andi, abok weak uguno.

³ It ap Allah ane yagaisagarek mene halok weinam asugun andi inobabut he, ”Nit enek wo'nisanik,” iluk agarek mene andi nen, hiren onggo wogisoageluk, wene inonggwarek inendawimo nen kagalogo ineranenat yagahisikhi logogun andi. A'nogo meneat he, it inobabut hilingiti logogun andiba, at Allah nen he, ”It andi wene inoba fembik inebe weagerinabigin,” iluk attagat endawimo tulemat anggasikhe fuk. Aninurogo welagi'lek weagerinabigin mene werego.

⁴ It malaikat Allah nen yonggo pelakfisa wagarek mene ekhe weak hilingitukwama Allah nen herakfisigi'lek, we, wene hobuk inoba feigeluk he, o mum wea'ma inenggi hele warek logouwageluk pelakfisasikhe andi.

⁵ Andi higirat, afuni attagat welagaukwa andem oba logolik, Allah inabit mene nen inobabut weak hilingiti lagaukwama Allah nen herakfisigi'lek. We, i nabunghabung ikhi logolik inoasuageluk inoba pelakfei wagaikhemo inoati logolik, Nuh, afuni inobabut Allah endawimo amolo mene hilingiti logouwageluk wene yagaisikhi lagaikhe mene inom, inebe 7 nen ekhe inom, telinafikhe andi.

⁶ Nen andi higirat he, afuni hobuk Allah inabit a'luk weak hilingiti logogun mene inendawimo nen he, ”Nit ninobabut a'nogo hilingiti logogun halok, Allah nen herakninobagagi'lek a'nogoat ninoasigin higi,” iluk futfikhi logouwageluk, afuni o Sodom Gomora mene inom, Allah nen wene inoba fisasikhesik mondok felelenghogo enduba inoatikhe andi.

⁷ A'nogo inoati logolik, at Lot enek he, obabut higithogo Allah amolo mene hilingitunem, it afuni andoma mene inenggali lek weak hilingiti lagaukwaba re, at endawimo weak ago mondok were'ma Allah nen telhikhe andi.

⁸ It andi inobabut hilingisu lek mene weagat hilingitu weregen, at Lot obabut higit mene inanggele'ma logolik, eilenggen isigik, esanggo holhik, ikhi logolik he, hundik-handigat endawimo weak ago mondok welagaikhe.

⁹ A'nogo meneat he, afuni ekhe Allah amolo mene hilingitunem inendawimo kagaligeluk wagunem, nineisena Allah Enupogoren telinafik, nen it ekhe weak hilingiri'lagwi mene halok, wene hobuk inoba feigeluk ferinarek welagik, a'nogo hilingisigin elu logoligat elok hilingisigin o.

¹⁰ It andi esin hangge re, Allah inendawimo sebelfuluk, yi mene ti mene inendawinggen en nunggunem weak hilingirik nikho andi, Allah nen wene inoba fagaino. Inailo lek inobabut weak hilingiti logolik, pogoroba mene fogerinafu welagaikharek mene andoma, it inailo legat inabok weak palhi logogun andi.

¹¹ It malaikat Allah nen yonggo pelakfisa wagarek mene andi, inomame mondok hokho. Yi mene ti mene hilingisu elogat meneat he, it pogoroba fogerinafarek mene andi, wene inoba fouwageluk, ninoe Enupogot oba woginarek laluk he, iren inabok weak palharek lek. Meneat he, it ap Allah ane yagaisagarek mene hangge ineranen ikhi logogun mene andi, inomame mondok lek. Iren yi mene ti mene hilingisu elo'lek logoligat he, it pogoroba fogerinafarek mene andi inabok weak palhi logogun andi.

¹² It ap Allah ane yagaisagarek mene hangge ineranenat yagaisikhi logogun mene andi re, wam endawinggen lek mene ebe fakfuluk wasuagelugat ebe ta'lagarek andi hak, it ap andi nen wene futfigi'lek logolik inabok weak palhi logogun andiba, inonggwarek inebe wam watarek andi hagat Allah nen inoasigin andi.

¹³ Iren it ekhe weak hilinginafi logogun andiba, Allah nen onggo weak hilinginabigin andi. It he, inendawinggen sebelhi'lek linggeneat weak hilingisu inamolo nen hilingiti logogun andi. Su fano werek kwelek he, muli mene oba labulagik, eil fano agik, ikherek andi hak, hit seni isago nunggunem, it andi inendawinggen sebelhi'lek, yi mene ti mene inendawinggen en nunggunem yi weak ti weak hilingiti logoligat, hinoba kwi we'luk, hinom misi'mo ninggi logogun andi.

¹⁴ It ap andi ineilmo re, hemi pailak fakfisogoin mene nek eberek logolik, inabit agi'lek weak hilingitu mondok logogun andi. A'nogo hilingiti logolik, afuni Allah ane kerat waluk, inendawinggen abolok werek mene lalinafi logogun andi. Inobabut he, ”Yi mene ti mene nit enek wo'niselep,” iluk ikhi logouwogeluk attagaren yanggulhukwasik he, andi meneat inelu logolik hilingiti logogun andi. A'nogo hilingiti logogun andi nen, Allah nen homan fisambik weagerinabigin werego.

¹⁵ It andi re, kwe higithogo lagaikharekwe andi herakfisaluk he, attagat at Bileam Beor amlogo kwe kwanirogo lagaikhe andi kwe laga logogun andi. At Bileam endawimo nen he, ”An weak hilingitunem onggo wo'nesuak,” iluk endawimo amolo anggasikhemo,

¹⁶ Allah nen he, ”Hat weak hilingitun o,” iluk komotikhe. Wam keledai amboroba hu'lagaikhesik lagunem, wam ane lek meneat he, aren Bileam yagati logolik, ”Hat Allah ane yagaisikhi lagen mene yi re, mondok weak hilingiten o,” iluk afuni inaneba at wenagetikhe andi.

¹⁷ It ap ineran nen agarek mene andi inobabut he, o hibiba i elesi firok ikherek andi hak, firok igik, ohena sogoien waluk lagarek andi hak, hesanggeat woginarek lagik, ikhi logogun o. Allah nen it andi o mum hikhakse'ma andoma logouwageluk inobuluk halogo fisasikhemo werego.

¹⁸ Afuni ekhe inerugwi inagaila'lak weagat hilingitu kwelek he, herakfisaluk wulibi wesuogeluk ugunem, inendawinggen en nunggunem hobuk weak hilingisuageluk, it ap andi inonggwarek fogerakhikhi logolik we ineranen tulemat inendawimo kagalhi logogun.

¹⁹ Afuni mondogat he, yi mene ti mene omame a'luk mabenetfisugunem, omame asigin mene andi amingmingengge welagaikharek andi nen he, it andi, inonggwarek inebe weagerinaferek mene andi amingmingengge logoligat he, it afuni ekhe yagaisikhi logolik, ”Hit nit ninobabut wanugun halok he, hobuk hinale'ma asugun o,” iluk we tulemat yagaisikhi logogun andi.

²⁰ Afuni re, kweangma weak hilingitarek mene yoma herakfisaluk, heise wulibi we'luk, ninoe Enupogot Yesus Kristus telninafikhe mene ebe inelu a'lugat he, hobuk inambotkwe weak hilingitarek mene andi oba kugunem he, kimalin awiba elugengge kugunem yinggilogo fakfikherek andi hak, fakfisamo re, lebelegat asugun andi. Lebelek asimbik omanggum weak welagaukwa andi re, endebat fano hak. Mene re, hobuk weak asugun andi re, mondok hokhorogoat weak asimbik logogun o.

²¹ It andi ebe wene higithogo murok lagaikharek andi inelu agi'lek logoilepma re, fano hak logoilep. Meneat he inelu a'lugen, wene Allah nen komotninafikhe wene andi herakfisaluk kwanirogo lagaikharek andi nen he, mondok weak asugun o.

²² It andi afuni nen inane lagakhogo mel iluk agarek andi hak hilingiti logogun: ”Mene nen he hebak wurogo fuluk, hobuk ambotkwe na lagarek. Nen, wam he agap fano sobalek mene hobuk fesimo hulele wasi kwikherek,” iluk agarek andi hak he, it a'nogoat eberogo nen hilingiti logogun andi.