2 PETRUS 1 - Allah Wene Fano Wene Hupla Inane

Hai warinafikhe wene

¹ Nerugwi nagaila'lak. An Simon Petrus Yesus Kristus nen, at amingmingengge logouwageluk nayonggo fesikhesik laknobagai wagaikhemo wagagi. Andi re, at ebe Allah at logolik, obabut higithogo nek hilingiterek a'nogo nen, hit ninom higithogoat ninendawinggen aroba himbiret fugunem telninabi'logo mene halok, wene yi lisu palogo hinoba lakfei wagi andi.

² Hiren Allah inom, ninoe Enupogot Yesus inom, emberek inebe furogo hineluat welagep andi nen, it inobabut fano a'nogo nen fano mene wokhisigik, hinendawinggen hambugethinafik, hokhorogo ugu mondogat logouwago.

”Nit nineisena Allah nen wena'ninafikhesik ninayonggo fesikhe,” iluk yagaisasikhe wene

³ At Allah etok mondogat logolik, yi mene ti mene elalinat hilingitunem fogeratu mondok welagaikharek mene a'nogo nen ninayonggo fesikhe andi. Halok, niren at ebe furogo ninelu a'luk, nit ninebe nineluk logolik, at faget higithogo hilingiti logouwageluk, at onggwarek omameba yi mene ti mene wo'nisasikhemo eise agosik welago.

⁴ It afuni kweangma yoma yi mene ti mene inamolo nen, inendawinggen en nunggunem inobabut weak hilingi'luk weak agaikharek mene andi herakfisaluk heise wulibi we'luk he, Allah obabut wanuageluk, fano mene wo'nisili'logo andi. Aren elalinat hilingitunem fogeratu mondok welagaikharek mene a'nogo nen he, ”Yi mene ti mene onggoba wanu elo'lek mene, mondok hokho fano mene wokhisagain werego,” iluk abok yaganisasikhe mene andi, ebe wo'nisili'logo andi.

⁵ Andi nen he, hit andi mene eise asubagaigen, hinagaiyekhogo hilingiti logoino. Hinendawinnggen Kristus oba himbirik welagep mene andi oba loukhogo re, inobabut higithogo hilingitarek andi mene eise a'luk hilingiti logoino. Higithogo hilingiti logolik, andi mene oba loukhogo re, Allah ebe inelu agaikharek andi mene eise a'no.

⁶ Allah ebe hinelu logolik, andi mene oba loukhogo re, inendawinggen sebelek welagaikharek mene andi, eise a'no. Hinendawinggen sebelek logolik he, andi mene oba loukhogo re, yi mene ti mene faget hilingiti logolik, inafe morogo welagaikharek andi mene, eise a'no. Hinafe morogo logolik he, andi mene oba loukhogo re, Allah awe a'ma logolik, at endawimo amolo anggikherek higithogo hilingitarek mene andi, eise a'no.

⁷ Allah endawimo amolo anggikherek higithogo hilingiti logolik, andi mene oba loukhogo re, inerugwi inagaila'lak inendawirogo welagaikharek andi mene, eise a'no. Hinerugwi hinagaila'lak hinendawirogo logolik, andi mene oba loukhogo re, afuni inebe mondogat inendawinggen hundik welagaikharek andi mene, eise a'no.

⁸ Hit he, hinobabut andi mene mondogat eise a'luk, hobugalep hokhorogo eise a'luk logogun andi nen, we tulemat alemarogo welagi'lek, ninoe Enupogot Yesus Kristus furogo hinelu asuguno.

⁹ A'nogo meneat he, it hit mene fena nen inobabut andi mene eise agi'lek logogun halok he, ineilenggen mumat afumak hangge salek werek. A'nogo logolik, iren he, ”Weak hilingiti lagagu mene, Allah nen sobalninafikhe,” iluk agarek meneat he, at oba inonggot a'luk werek andi.

¹⁰ Andi nen he, nerugwi nagaila'lak. Hinebe Allah nen wenakhinafikhesik, hinayonggo fesikhe andi re, eberogoat hilinglasuageluk, hiren anggilukhogo hinomamerogo hilingiti logoino. A'nogo hilingiti logogun halok, hinendawinggen Allahba himbirik mene herakfisaluk wulibugun lego.

¹¹ Ninoe Enupogot Yesus Kristus telninabi'logo mene a'nogo, kain mondogat logogin oba andoma hinobagai kwikhi logolik, aren he, ”Hit hinebe eisewerego,” iluk, hai warogo fanorogo wokhinarek kwigino.

¹² Andi nen he, wene ebe wene hinelu agagipsik hinendawinggen wurikhogo fisogo welagep meneat he, an nen wene igi andi faget hundik-handik hinendawimo ebethisikho mondok logogino.

^13-14 At ninoe Enupogot Yesus Kristus nen yaganetikhe hagat, an nebe nagap mene elama faget welagi yi re, herakfisaluk weak-weak lagain higit welagi, iluk an nelu welagi andi nen he, yogondak nebe neluk welagi yaba re, wene andi faget hinendawimo eberogo yagahisugu mondok logigin anggikhi lagi o.

¹⁵ Hobuk nebe wa'lagi halok, wene andi hit hinendawimo eberek mondok logobagaigen iluk, fanorogo yagaisikhi logogino.

”Yesus ebe fogeratarek mene yi'nogo nineilenggen hasugu,” iluk yagaisasikhe wene

¹⁶ Ninoe Enupogot Yesus Kristus omame hokho a'nogo ebe wagaikhe mene faget hinelurogo yagahisikhi lago andi re, suetninung afuni inendawimo kagalogo pilingitarek mene andi oba lirogo yagahisikhi lago lego. We, at ebe Enupogot mene wagaikhemo, ninonggwarek nineilenggen tomok hasugu mene nen yagahisikhi lago o.

¹⁷ Nit o andoma were'ma, nineisena Allah nen, at Yesus ebe fogeratik, hai watik, ugunem nit ninesanggo holhugu. At Allah ebe esin fogeratu mondok welagaikharek mene a'nogo nen he, ”An namlogo nendawinggen hundik mene, nendawimo nagaiyek anggigirek mene re, ebe ariaro,” iluk,

¹⁸ ane pogoroba nen pelakfei wagunem, nit Yesus ninom tom Allah onggwarek andom unggul andiba logolik ninesanggo tomok holhugu o.

¹⁹ A'nogo holhugu andi nenat, Ninendawimo nen he, ”It ap Allah ane yagaisikhi lagaukwa mene nen isukwa mene andi eberogoat,” iluk attak endebat hak anggikhi lagagu mene, hobuk ninesanggo holhugu andiba nen, mondok furogo futfesugu andi. Halok he, o mumat were'ma, afuni nen esage ibilogo fugunem, selekhogo mondok welagaikharek andi hak, wene andi hinendawinggenma eberogo mondok wanhi logoino. A'nogo wanhu were'ma, hobuk o mum mene wei ugu kwelek, hesagal wap liabi wagarek andi hak, at Kristus hinendawinggenma selegethinabi wesigino.

^20-21 Wene Allah ane andi re, it afuni inendawimo kagalogo ekhe isukwa lego. We, inebe afuni meneat he, Allah Areagun en inendawimo kagalogo yagaisugu kwelek, Allah nen isikhe wene andi yagaisikhi lagaukwa andi nen, wene Allah ane lisu palogo fesukwa mene werek andi, Allah Areagun en ninendawimo kagalhi'le'ma, ninonggwarek ninalegaren furogo futfogoin elo'lego.