2 KORINTUS 7 - Allah Wene Fano Wene Hupla Inane

¹ Halok he, nerugwi nagaila'lak. Hinebe nendawi e. At Allah nen a'nogo logogun iluk abok yaganisasikhe andi nen, ninebeba nen, ninendawinggen oba nen, weak hilingitorek mene andi, fanorogo horogo herakfisouwogo. A'nogo herakfisambik, Allah ebe ninailo logolik he, ninebe at faget fisaluk logouwogen, ninendawinggen katokhogo wurigerati logouwogo.

Afuni o Korintus mene inobabut hebelagaukwama re, Paulus endawimo agaiyek agaikhe wene

² Nit faget he, hiren ninebe wo'ninabu hak hinendawinggen hundik logoino. Niren he, hit ekhe weagethinafik, alomathinafik, lalhinafik, ogo lego.

³ An nen attak yagahisikhi logolik he, ”Hit he, hinebe ninendawinggen oba himbirik welagebo. Halok he, ninom wa'lasumo wa'lasugun aro. Nen, ninom nineluk logoumo, nineluk logogun aro,” iluk a'nogo isigi andi nen he, yogondak wene yagahisigi andi re wene hinoba feigeluk igi lego.

⁴ An nendawimo nen, hit fano hilingisugun, iluk nendawinggen hambukhogo logolik agaugwethinafu mondok welagirego. A'nogo logolik, it afuni ekhe nen weagetninabuogeluk yi enggin ti enggin hilingninafu kwelegat he, an nendawinggen mondok fano agik, hokhorogoat nagaiyek agik, ikhi lagio.

⁵ Nit o Makedonia yoma wagagusik were'ma ogo re, nit set waligi'le'maat, weagetninabuogeluk yi enggin ti enggin hilingninafukwaat andi. Afuni ekhe nen ninoasuogeluk ugunem, nit ninendawinggen ninailo agu kwelek welago.

⁶ Were'ma re, at Allah obabut he afuni nen, ”Ninggi'nogo hilingisugun,” iluk inendawimo weak agunem inendawimo fanorinaferek a'nogo nen, at Titus lakfei wagama andi nen nendawimo fanotnobagaikhe o.

⁷ At Titus ebe waga andiba nek nendawimo fano aga fuk. We, hiren hilingitunem at endawimo fano aga mene yaganesi waga andiba, nendawinggen fanot fikhe aro. Hiren he, ”At Paulus ninom ambi a'lo e,” iluk noba ebetik, ”Ninambigen weak hilingitugu e,” iluk hinendawimo anggigik, it ekhe nen an nabok ugunem, hinendawinggen oba nenat an werekwe agik, egep mene andi pilingisogo yaganesi wagama re, nendawimo nagaiyek hokhorogo anggikhi lagi o.

⁸ A'nogo nendawimo nagaiyek anggigi meneat he, an nen surat attak lisu palogo hinoba lakfei wagagi a'naga nen, ”Inendawimo weagerinafigi andi, kamo u mene nambigen lakfesigi e,” iluk nendawinggen ebeti lagi lek. We, ”Nambigen misigam faget inendawimo weagerinafi,” iluk nendawimo anggikhi lagarigat he,

⁹ yogondak nendawimo nagaiyek anggikhi lagi o. Hit hinendawimo weak aga andi nen nendawimo nagaiyek anggikhi lagi fuk. We, hit hinendawimo weak aga andiba, hit weak hilingitigip mene herakfisaluk hinobabut hebelhep andi nen, nendawimo nagaiyek anggigi o. Hit hinendawimo weak agep andi, at Allah endawimo amolo anggikhebaat weak aga. Halok, niren lalhinafo ugun lego.

¹⁰ Afuni kweangma mene nen inendawimo kagalhunem, inendawimo weak a'luk he, inebe wa'lagaikharek meneat he, at Allah endawimo amolo anggikherek oba inendawimo weak agaresik, weak hilingitarek mene herakfisaluk inobabut hebelagunem he, Allah nen fanorinaferek andi. Fanorinafunem he, ”An nendawinggen weak agaba, nambigen nobabut hebelhi,” iluk hobuk menenei ebetarek lek.

¹¹ At Allah endawimo amolo anggikherek oba hinendawimo weagat a'luk he, ”Nambigen weak hilingitimo,” iluk hinobabut hebelasimbik he, fano mene ninghogo hilingitik, wene hinoba lek higithogo hilingitik, hina'mage lagagik, hinailo agik, ”Paulus ninom ambi a'lo e,” iluk noba ebetik, hinendawimo aganhanhogo hilingitik, at weak hilingitikhe mene andi enggi onggoba wulakfisigik, egep andi hani! A'nogo hilingiti logolik hit weak ekhe hilingiti'lek wene hinoba mene korogo mondok lakfisegebo.

¹² An nen lisu palogo hinoba lakfei wagagi meneat he, at ekhe weak hilingitikhe andi nen lakfei wagagi fuk. Nen, at weak hilingitikhe andiba it ekhe nong agaukwa mene andi faget lakfei wagagi legaro. Andi re, we, hit hinonggwarek hinendawimo nen he: ”Nit Paulus lak ninendawirogo it faget ninghogo hilingisuogeluk welago higi,” iluk Allah eilhanemat, hinonggwarek hinobabut palobagaigen iluk lakfei wagi o.

¹³ A'nogo lakfei wagimo hilingitep andi nen nit ninendawimo fano aga. Andi inom ninendawimo ekhe fano aga re, at Titus hit mondogaren ebe wanhepsik fano hilingitunem endawimo fano aga mene pilingisogo yaganisugunem, ninendawimo ninagaiyek mondok anggogo aro.

¹⁴ An nen attagat Titus yagati logolik he, ”It hobuk fano hilingisugun,” iluk agaugwethinafi lagagi hak hilingitepma re, an nenggali agi'lego. Niren yi wene ti wene eberogoat enek yagahisasugu hak, at Titus yagati logolik hit agaugwethinafugu andi re, eberogo aro.

¹⁵ Aren hit hinebe endawi welaga meneat he, ebe hinoba wagama re, hinailo agik, hinoak lei'leik igik ikhi logoligat at ebe wanhepsik, aren yagahisugunem ane hologo hilingitep mene andi hinoba ebethinafi logolik he, hit mondogat hinebe mondok endawithinabi'logo o.

¹⁶ Nen, an nen he, ”It yi mene ti mene fano hilingiti logogun,” iluk, nendawinggen hambukhogo logolik nendawimo nagaiyek anggikhi lagi o.