2 KORINTUS 4 - Allah Wene Fano Wene Hupla Inane

”Ebe meneat he, iwak enggalasigin mene elonggoma hinago werek,” iluk yagaisasikhe wene

¹ At Allah ninebe endawi nen he, at faget yi'nogo hilingiti logouwageluk ninayonggo fesikhe andi nen he, ninendawimo puk a'luk herakfisigi'lek hilingitoat welago.

² Nit he, afuni nen yi mene ti mene hinagaisogo weak hilingitaresik inenggali agarek andi mene herakfisasugu. A'nogo herakfisaluk, afuni lalinafik, Allah ane wene ekhe mene oba mangorogo yagaisigik, ogorek lek. Afuni yoma inendawimo lombogen futninobagauwageluk he, wene ebe wene Allah eilhanem fakhogoat yagaisilik nikhi lago.

³ Fano wene yagaisilik nikhi lago mene andi, afuni ekhe nen futfili'lagwi meneat he, it afuni longgo ili'lagwi mene nek he, wene andi faget inendawinggenma afumak enek laberek werego.

⁴ A'nogo werek andi re, it afuni kweangma mene ineisena Iblis a'nogo nen inendawinggen Allah oba himbiret figi'lek mene andi, inendawinggen mumerinafikhemo werego. At Kristus Allah hanggeatma re, ebe fogeratarek wene, fano wene andi nen selegerinabugun meneat he, selegerinabinogo iluk, inendawinggen mumerinafikhemo werek andi.

⁵ Wene yagaisilik nikhi lago andi re, ninonggwarek hilingitorek wene fuk. Lego. We, at Yesus Kristus hilingitikhe wene aro. At Yesus ebe ninoe Enupogot iluk he, nit at faget hit hinamingmingengge welago, iluk yagaisogorek andi.

⁶ At Allah nen ikhi logolik he: ”O mum andi anggele'ma nen selek asuak,” iluk isikhe andi hak, arenat nit ninendawimo mum mene andi selegetninafikhemo welago. A'nogo logolik, at Kristus elokhonggen mo hangge amulit yatunem nineilenggen yethaluk he, at Allah fogeratarek mene a'nogo ebe ariginik iluk futfikhi logouwageluk a'nogo selegetninafikhe andi.

⁷ Nit wene yi'nogo yagaisilik nugunem, afuni ineilenggen nisikhi logolik, inendawimo nen he, ”It inomame lek. We, at Allah omame hokho higi,” iluk enegat futfikhi logouwageluk, iwak kweang mene hilingisogo hinatarek hak, fano mene andi nit sebelek mene ninendawimo ninobagaikhemo werego.

⁸ Afuni nen nit yi enggin ti enggin hilingninabi'lagwi mene, ninebe mondok weagetninafi'lek welago. A'nogo hilingninafunem, ninggi'nogo hilingisu he iluk, ninendawinggen nonghonget ninabi'logo, meneat he ninendawinggen abolok ili'logo lek.

⁹ It afuni ekhe nen, weagetninabuogeluk ili'lagwi meneat he, at Allah nen ninalegenek herakninobagagi'lego. Yei ninoatunem talorogo laga lago meneat he, ninebe mondok wa'laga lago lego.

¹⁰ A'nogo wa'lagi'lek welago andiba, at Yesus ebe wa'lagaikhesik eluk agaikhemo re, nit ninendawimo eluk welagarek andi, enegat asuageluk, at watukwa hak, nit hundik-handik ninoasuogeluk ugunem telninaferek andi.

¹¹ At Yesus wa'lagaikhesik eluk agaikhemo nit ninebe wa'lagorek mene yi ninendawimo eluk welagarek andi enegat asuageluk, nit yogondak nineluk werek kwelek, at Yesus faget hundik-handik ninoasuogeluk ugunem telninaferek andi.

¹² Afuni nen nit wa'lasuageluk hilingninabi'lagwi menere Allah nen hit hinebe hineluget hinabi'logo andi.

¹³ At Allah aneba lisu palogo fikhi logolik he, mel isukwa: ”Nendawinggen at oba eberogoat himbirik logolik nane igio,” iluk isikhemo lisu palogo fesukwa higithogoat, nit he, ninendawinggen at oba eberogoat himbiret fuluk wene yagaisikhi lago andi.

¹⁴ A'nogo yagaisikhi logolik, ninendawimo yi'nogo anggikhi lago. At Allah nen he, ninoe Enupogot Yesus ambotkwe eluget fesikhe andi hak, nit at ninom higithogoat nineluget ninafikhesik he, hit ninomat Yesus oba ninobagai lagain iluk ninelu.

¹⁵ Nit yi enggin ti enggin mondogat hikhi lago andi re, hit fageraro. A'nogo hikhi lagoba, at Allah obabut fano mondogen afuni ekhe endawiratik, ekhe endawiratik, inebe hokhorogoat lambulik endawirinafi logolik telinafunem he, inebe hokhorogoaren, Allah hai wari'lagwi andiba, it ekhe nen Allah fogerari'lagwio.

”Ninendawinggen Allahba eberogoat himbiret fuluk hilingiti logogun,” iluk yagaisasikhe wene

¹⁶ Andi nenat, ninendawimo puk a'luk herakfisigi'lek ninghogo hilingiti lago. Ninagap endakwe yi re, weagagu kwelegat he, ninendawinggenma re, hundik-handik ket hilingninafu mondok werego.

¹⁷ Nit yogondak, yi enggin ti enggin hilingninabi'lagwi andi re, elama faget endebat hago. Meneat he, a'nogo hilingninabi'lagwi andiba, hobuk fogeratarek mene etok mondok logogin mene mondok hokhoat eise asuguno.

¹⁸ Nit he, yi mene ti mene nineilenggen hogorek mene andi lek asigin meneat he, nineilenggen hogorek lek mene andi etok mondok logogin andi nen he, nineilenggen hogorek mene andi faget ninot somarogo hilingiti'lek, we, nineilenggen hogorek lek mene andi faget ninot somarogo hilingiti lagoo.