2 KORINTUS 3 - Allah Wene Fano Wene Hupla Inane

”At Allah nen wene ket wene ninoba watikhemo, at faget hilingiti lago,” iluk yagaisasikhe wene

¹ A'nogo igi andi, nit ninonggwaregen hobuk agaugwerakhikhi lago nogo? Mondok lego. I a, athe, it afuni ekhe nen hilingitarek andi hak, nit wo'ninabuageluk surat hit wokhisigik, it ekhe nen wo'ninabuageluk surat hiren wogisigik, ikhi lago a? Lego.

² Nit wo'ninabuageluk he, hit hinebeat lisu palek hangge nit ninendawimo were'ma re, afuni mondogaren enu salhik, futninobagagik, ugun werego.

³ Hit hinebe re, wene Kristus nen lisu palogo fesikhemo niren lakfesugu mene hangge welagebo. Lisu andi re, lisu amusuba palhi'lek meneat he, Allah eluk mondok welagarek a'nogo Areagun oba palhikhe. Nen, helep sabia meneba palhi'legat. We, afuni inendawinggen obaat palhikhe.

⁴ At Kristus nen nit ninendawinggen menenei uan horok ebeti'legat he, Allahba himbiret fuluk logouwageluk hilingninafikhe andi nen, wene a'nogo igio.

⁵ Nit ninonggwarek ninomameba yi'nogo ti'nogo hilingisugun elok, iluk ninendawimo anggikhi lago lego. We, at Allah nenat ninomamet ninafikhemo hilingisu elok welago.

⁶ Allah nen wene ket mene ninoba watikhe andi, niren waluk loageluk, arenat ninomamet ninafikhemo elok waluk logoin welago. Wene attak komorinafikhe mene lisu palogo fesukwa higithogo hilingiti'lek halok, andiba inebe inoaterek. Meneat he, Allah Areagun en inelugerinaferek andi nen, nit wene attak lisu palek mene waluk lagi'lek, we, at Areagun en yaganisili'logo mene waluk laga lago andi.

^7-8 Allah nen wene helep oba lisu palhikhe andi herakfisogorek andiba, wene ninoba fakhaluk ninebe wa'lagorego. Mene re, attak wene andi wogisugunem he fogeratukwa. Helep andi at Musa nen waluk pi wagunem he, at elokhonggen amulit hokho mene lek agu kwelegat meneat he, it afuni Israel mene ineilenggen yetha siluk-pabuk isikhe. Wene lisu palek andi wogisugunem fogeratukwa andi hak, at Allah Areagun wo'nisugunem he, hokhorogoat fogerasuguno.

⁹ Wene lisu palek andi higithogo hilingiti'lek oba wene ninoba fakhasugu andi. Meneat he, wene andi wogisugunem fogeratukwa meneat he, andi endebaro. At Yesus nen wene ninoba mene korogo wokhasikhesik Allahba ninambotkwe hunogo ninobagasikhe wene wo'nisasikhe andi faget enek he, hokhorogoat fogerasuguno.

¹⁰ Wene hobuk mene hokhorogoat fogerasugun andi nen he, attak mene fogeratukwa andi hak, hobuk fogerasugun lek agao.

¹¹ Wene attak mene lek asigin werek kwelegat fogeratukwa andi nen he, mondok logogin mene andi hokhorogoat fogerasuguno.

¹² Hobuk a'nogo fano asigin iluk, ninendawimo agaiyek anggikhi logolik he, wene ninailo mondok legat yagaisikhi lagoo.

¹³ Nit he, at Musa elokhonggen amulit hokho a'nogo mondok lek asigeluk ugu kwelegat he, it afuni Israel mene ineilenggen neanogo iluk elokhonggen suba salhikhe andi hak nit a'nogo hilingisugun lego.

¹⁴ Mene re, it andi inendawinggen nonget fesikhemo welagaukwa. Yogondak ogo re, Allah nen, ”Yi'nogo hilinghinabigin,” iluk wene inom watukwa mene lisu palek mene andi, iren enu salhunem he, inendawinggen wenggelagi'lek nong agaikhesik inendawimo kwe palek werek. A'nogo kwe palek mene andi, at Kristus inom hunetunem enek he, inendawinggen kwe palek mene andi elok hu'lagarek andi.

¹⁵ Yogondak ogo re, wene at Musa nen lisu palhikhe wene andi, iren enu salhunem he, inendawinggen wenggelagi'lek, kwe palek werek.

¹⁶ A'nogo meneat he, afuni it mene ekhe inebe hebelogo inelokhe ninoe Enupogot wogetunem he, inendawinggen kwe palek mene andi wokhikherek.

¹⁷ ”Ninoe Enupogot,” iluk igi andi re, Allah Areagun fageraro. Afuni ninoe Enupogot Areagun inendawimo were'ma re, hele fikhalek inale'ma welagaikharek andi.

¹⁸ Ineilenggen inafumak oba it afuni ekhe inebe pikhirat yerisagarek andi hak, nit mondogat ninelokhonggen kwe palek le'ma re, afuni nen ninoe Enupogot fogeratarek mene andi afumak hak ineilenggen yetnisili'lagwi. Nit ninebe at ninoe hangge asuageluk he, hobugalek hilingninafu mondok were'ma fogeratarek mene andi ekhe inomat hokhot ninobagali'logo. At Allah Areagun andi ebe Enupogot atma arenat hilingninabi'logo.