2 KORINTUS 2 - Allah Wene Fano Wene Hupla Inane

¹ Andi nen he, an hit hinoba wagi halok hit hinendawimo weagethinobagagi hanogoluk, kamo igin iluk, nendawimo arat anggigio.

² An nen hit hinendawimo weagethinabumo re, hit hinendawimo weak werek kwelek, an nendawimo hobuk sa nen fanotnabigin. Elo'lek andi.

³ Hirenat an nendawinggenma fanotnabugun andi. Hit an nendawinggen fanotnabumo an nendawimo nagaiyek anggigi halok he, hit mondogat hinendawimo hinagaiyek asugunat anggikhi lagi. Andi nen he, an hit hinoba wagunem hiren an nendawimo weaget nabinogo iluk, hinoba wesu nabiren, wene arat lisu palogo hinoba lakfei wagagi andi o.

⁴ Wene lisu palogo attak lakfei wagagi andi re, nendawimo weagat, nendawinggen engginatma, le hokho aga logolik lakfei wagagi o. Hinendawinggen weak asuageluk lakfei wagagi fuk. Lego. We, an hit nendawi mondok welagi andi hinelu asuageluk hinoba lakfei wagagi andi.

”Ap weak hilingite mene andi hinendawirogo ebe wanino,” iluk yagaisasikhe wene

^5-6 Ap ekhe andi nen ninendawimo weagetfesikhe andi re, an enek nendawinggen weaget fesikhe fuk. Andi hit mondogat hinendawimo weagetfesikhe ugun meneat he, ap inobabut ariginik mene halok, hinebe hokhorogoaren ap andi komorogo wene oba fesigip andi arat. Halok he, an hobuk nane ninghogo wene oba fagain he, nabit.

⁷ Hobuk he, at weak hilingitikhe mene andi, endawimo mondok weak asimbik, ebe weak asinogo iluk he, endawimo fano asuageluk weak hilingitikhe mene hiren sebelogo herakfisaluk, endawinggen sebelino.

⁸ At ap andi ebe hinendawirogo ambotkwe wanubagaigen iluk, komorogo yagahisigi andi.

⁹ An nen, ”Hit yi'nogo hilingi'no,” iluk, yagahisasigi a'nogo, nane hologo hilingiri'lagwi a? Lega, iluk hinobabut paligeluk wene andi lisu palogo hinoba lakfei wagi andi.

^10-11 Aren hit weagethinafe mene andi, hiren sebelogo herakfisegep halok he, an nen sebelogo herakfisagainaro. An nen sebelogo herakfisagain mene werek halok he, at Iblis obabut lagokhogo hilingiterek ninelu andi nen, mabenetninabinogo iluk, hit faget, at Kristus eilhanemat sebelogo herakfisagaino.

Paulus o Troas logolik endawinggen firik welagaikhesik, o Makedonia wagaikhe wene

¹² An o Troas andoma wagagi hak he, fano wene Kristus hilingitikhe wene a'nogo, afuni andoma mene fano asuak yagaisoageluk ninoe Enupogoren yaganetikhemo yagaisugu welagagi.

¹³ Meneat he, nagailak Titus a'nogo nemberek ambi agi'legen he, nendawinggen firik welagagisik afuni andoma mene hai warinapluk o Makedonia wagagi.

”Kristus ninom hundik logolik ninomame agorek,” iluk yagaisasikhe wene

¹⁴ A'nogo meneat he, at Kristus omame agaikhe andiba elokhe wanhu kwelek nugunem, nit at ninom hundik mene Allah nen Kristus ombo'ne wo'ninarek nikherek, iluk fogerasuogo. A'nogo wo'ninarek nikhi logolik, amben fano mene sang-panghogo lagarek hak, at Kristus hilingitikhe wene a'nogo niren wialogo o yi awi ti awi waluk loageluk wo'ninarek nikherek.

^15-16 Andi re, at Kristus nen he, amben fano mene Allah faget endu nolesu hak, nit ninebe Allah wogeterek andi. Wogetunem, it afuni alomat lari'lagwi mene nen he, ”Amben weak. Afuni inebe inoaterek mene amben hangge,” palharek. Meneat he, it afuni telinabi'lagwi mene nen he, ”Amben fano, inebe inelugerinaferek mene hangge,” palharek. A'nogo palharek andi nen he, wene andi sa hagen elok waluk lagain anggegep?

¹⁷ It afuni ekhe inebe hokhorogoaren he, yi mene ti mene onggo ha awarik lagaikharek hak, Allah ane a'nogoat waluk lagaikharek. Meneat he, nit enek he, a'nogo lek. We, Allah nen, at ane waluk loageluk ninayonggo fesikhe andi nen, at eilhanemat ninendawinggen misigat Kristus ninom hundigat logolik, yagaisilik laga lago o.