1 YOHANES 5 - Allah Wene Fano Wene Hupla Inane

”It afuni kweangma mene inobabut weak hilingitarek mene andi mabenetfisaluk, inomame agaikharek,” iluk yagaisasikhe wene

¹ Afuni nen he, ”Yesus andi telninabuageluk Allah nen lakfei wagaikhe mene eberogoat Kristus a'nogo aro,” iluk inendawinggen at oba himbiret fagarek mene halok inebe lombok he, Allah nen taginafemo, at againafuri mene werego. Nen, nit nineisena Allah ninendawirogo logolik halok he, at againafuri tago mene andi ninendawirogoat logoguno.

² A'nogo logogun iluk, futfuluk he, Allah ebe ninendawirogo logolik, wene aren komotninafikhe wene andi hologo higithogo hilingiti logolik, at againafuri taginafe mene andi ninendawirogo logogun aro.

^3-4 Nit Allah nen ta'ninafe mene halok ninebe lombogen he, ”Allah ane andi eberogoat,” iluk ninendawinggen at oba himbiret fogorek andiba, it afuni kweangma mene inobabut inetogat logolik weak hilingitarek mene andi mabenetfisaluk ninomame agorek andi. A'nogo mabenetfisaluk ninomame agorek andi nen, wene Allah nen komotninafikhe wene andi enggin fuk, serego. Andi nen he, niren, ”Allah ebe ninendawi welago,” iluk u hak he, aren wene komotninafikhe wene andi hologo higithogo hilingiti logouwogo.

⁵ Afuni inobabut inetogat logolik weak hilingitarek mene mabenetfisaluk inomame agaikharek andi sani nen nogo? Andi re, niren, ”At Yesus andi Allah amlogo,” iluk ninendawinggen at oba himbiret fogorek mene nen aro.

Allah nen Amlogo abok fakhogo yaganisikherek wene

⁶ At Yesus Kristus kweangma pi wagaikhesik were'ma ima nek pelafukwa fuk. Ima pelafik, amep wulagaisogo watik, isukwa. A'nogo hilingitukwa iluk, at Allah Areagun nen wene eberogoat enek yaganisikherek mene a'nogo nen fakhogo yaganisikho welagarego.

^7-8 Yesus andi Kristus aro, iluk, afuni inebe henagan mene nen inane misigat fakhogo u hak he, Allah Areagun en fagetik, Yesus ebe ima pelafukwa andiba fagetik, amep wulagaisogo watukwa andiba fagetik, fakhogo weinam agaikhe andi.

⁹ Wene afuni nen fakhogo yaganisugunem, ”Eberogoat,” iluk futfogorek andi elo'lek. A'nogo meneat he, at Allah ebe amlogo abok fakhogo yaganisasikhe andi nek he, ”Mondok eberogoat,” iluk futfogoin aro.

¹⁰ Afuni inendawinggen Allah amlogo oba himbiret fili'lagwi mene halok he, ”Wene andi eberogo aro,” iluk inendawimo nen futfili'lagwi. A'nogo meneat he, afuni ekhe inendawinggen Allahba himbiret figi'lek mene halok he, ”Wene Allah onggwaregen amlogo faget abok isikhe wene andi eberogoat,” iluk anggigi'lek logolik, Allah eranen ikherek mene hak hilingisogo fili'lagwio.

¹¹ At Allah nen amlogo faget wene fakhogo yaganisikhi logolik, ”Inebe ineluk mondok welagaikharek andi ero re, an namlogo atma re, an nen Yesus ebe wokhisikhi logolik, nabulal-habulal ebe mene wokhisasigi andi,” iluk yaganisasikhe.

¹² Afuni nen Allah amlogo ebe wanha halok he, nabulal-habulal helagasik eise agaikhasik werego. Mene re, it ekhe nen Allah amlogo ebe wanhi'lek halok he, nabulal-habulal hiligi'lek eise agi'legat werego.

”Nabulal-habulal ebe mene eise agosik welago iluk, futfikhi lago,” iluk yagaisasikhe wene

¹³ Hit hinendawinggen Allah amlogo oba himbirik welagep mene halok hinendawimo nen he, ”Nabulal-habulal eise agosik welago,” iluk, hinelu asubagaigeluk, wene mondogat yi lisu palogo hinoba lakfei wagio.

¹⁴ Nen, nit yi mene ti mene Allah endawimo amolo anggikherek mene higithogo, aren wo'nisoageluk kino yagatunem ninane esanggo holheregat andi, iluk futfuluk, at eilhanem ninailo legat kino yagati logoguno.

¹⁵ Andi nen he, niren, ”We, nena mene Allah kino yagatunem, aren ninane esanggo holherek andi,” ninelu halok he, ”Nit yi mene ti mene kino yagato a'nogo arat wo'nisikhemo eisewerek agosik welago,” iluk nineluo.

^16-17 It afuni ekhe weak mondok hilingitaresik he, inobabut oba inebe mondok-mondok wa'lasugun mene werek andi faget, hiren Allah ayonggo fogoin, iluk yagahisigi lego. Athe, inobabut higithogo hilingisu mene werek kwelegat he, kwanirogo weak hilingitarek andi mondogat enu weak meneat he, it ekhe nen weak hilingitunem inobabut oba inebe mondok-mondok wa'lasugun lek mene hilingitarek mene weregaro. Mene re, hit Allah againafuri mene hinerugwi hinagaila'lak ekhe weak hilingitunem obabut oba ebe mondok-mondok wa'lasugun lek mene hilingite halok, at faget Allah ayonggo foumo, aren nabulal-habulal ebe mene wogosigin werego.

¹⁸ Nit Allah againafuri ta'ninafe mene at amlogo manggusa tatikhe mene a'nogo nen kwelakninarek were'ma, at obabut weak mene a'nogo nen enggi fa'nisagain lego. Halok he, nit weak hundik mondok hilingiti logogun lek, iluk nineluo.

¹⁹ It afuni kweangma mene inobabut inetok mene andi mondogat he, at obabut weak mene a'nogo enggiba welagaikharek. A'nogo meneat he, nit enek he, Allah ebe againafuri mene welago, iluk ninelu o.

²⁰ At Allah amlogo ninoba pi wagaikhesik, Allah ebe mene ninelu asuageluk ninendawinggen kagalogo yaganisasikhe. A'nogo yaganisasikhemo, nit he, Allah ebe mene amlogo Yesus Kristus emberek ninom hundik mondok welago. Nen, at Yesus re, ebe Allah ebe mene logolik nabulal-habulal ero arat welagarego.

²¹ Halok nagainafuri e. Hiren tugwi kembu fogeratarek mene andomaba nen agaiserati logolik, hinobabut hebelogo logoino o.