1 YOHANES 4 - Allah Wene Fano Wene Hupla Inane

”Allah Areagun inom, munggwarengge lalinaferek mene inom, enegat futfisogoin,” iluk yagaisasikhe wene

¹ Nerugwi nagaila'lak. Nendawilage. Afuni inebe hokhorogoaren he, ”Niren Allah ane yagahisikhi lago,” iluk ineranen ili'lagwi mene inebe arat weinam agaikhasik, o yi awi ti awi nikho andi nen he, ekhe hinoba we'luk, wene yagahisugunem, hiren he, ”Allah Areagun endawimo logolik yaganisili'logo,” iluk hinendawinggen inoba himbiret fugubo. Athe, ”Eberogoat Allah Areagun endawimo logolik ili'logo a? Hunogo mene endawimo logolik yaganisili'logo a,” iluk inobabut tak palimbigen, inebe futfisikhi logoino o.

² Hiren he, ”At andi Allah Areagun endawimo werega? Hunogoat mene werega,” iluk inobabut tak palhi logogun andi re, yi'nogo. It ekhe wesimbik he, ”At Yesus Kristus andi, Allah nen lakfei wagaikhemo eberogoat abat ta'lasi wagaikhe,” iluk fakhogo agarek mene nen ugu halok, hiren he, ”It andi Allah Areagun inendawimo logolik ili'lagwi,” iluk, futfisikhi logoguno.

³ A'nogo meneat he, it ekhe nen Yesus faget wene a'nogo fakhogo agarek lek mene nen ugu halok, hiren he, ”It andi inendawimo Allah Areagun werek fuk. Hunogoat mene werego,” iluk futfisikhi logogun aro. It andi faget wene Allah nen fageat yaganisikhi logolik, ”At ekhe Kristus emberek mondok weak mene wesigin a'naga o,” iluk yaganisasikhe mene, hinesanggo holhigip a'naga, yogondak kweangma yoma inebe arat weinam agaikhasik werek andi aro.

⁴ Mene re, nagainafuri e. It afuni kweangma mene inendawimo welagarek mene andi omame lek meneat he, hit enek he, hinebe Allah againafuri hilingi'mo at Areagun omame mondok hokho mene hinendawimo werek andi nen he, it ap andi mabenetfisaluk welagep andio.

⁵ It andi inebe afuni kweangma mene inagainafuri andi nen he, iren wene kweangma weneat ugunem, inane it afuni kweangma mene nenat inesanggo holharek andi.

⁶ Mene re, nit he, ninebe Allah againafuri mene logolik ninane ugunem, it ekhe Allah ebe inelu mene halok, inesanggo holhik, nen, it ekhe inebe Allah againafuri mene fuk, hunogoat mene halok he, inesanggo holhi'lek herakfisigik, agarego. A'nogo ugunem niren he, ”Allah ebe mene Areagun it andi inendawimo werek, nen it ekhe andi munggwarengge lalinaferek mene inendawimo werek,” iluk enegat futfisogorek andi.

”Allah nen endawi'ninaferek andi hak, nit-nit nendawi-hendawirogo logogun,” iluk yagaisasikhe wene

⁷ Nerugwi nagaila'lak. Nendawilage. Afuni ekhe inendawirinafarek andi ero at Allah atma re, nit-nit nendawi-hendawirogo logouwogo. Afuni nendawi-hendawirogo logogun mene halok, inebe lombok Allah nen taginafikhemo, at againafuri logolik, at ebe ineluat werego.

⁸ Nen, at Allah obabut he, nit endawitninafu welagarek andi nen, ap sa nen nendawi-hendawirogo logogin lek halok, at andi re Allah ebe onggot werego.

⁹ Mene re, Allah nen, ”Hit hinebe nendawi welagi,” iluk fakhogo sele'mat feigeluk, amlogo misigat tago a'nogo nen, nineluget ninabuageluk kweangma pelabi wagaikhe andi.

¹⁰ It ekhe inendawirinafarek andi ebe re, niren Allah ninendawiratugu fuk, lego. We, at Allah nen nit endawitninafikhesik, aren nit weak hilingitorek mene sebelogo legetfisaluk ho'ninabuageluk, amlogo ninoba pelakfei wagaikhe andi.

¹¹ Nerugwi nagaila'lak. Nendawilage. At Allah nen nit a'nogo endawitninafikhe andi nen, nit ogo re, nit-nit nendawi-hendawirogo logouwogo.

¹² Nen, Allah ebe andi re, afuni ekhe nen ineilenggen mondok higi'lek. Meneat he, nit-nit nendawi-hendawirogo logogun halok he, Allah ninom hundik mondok logoguno. A'nogo were'ma, attak Allah nen endawitninafi logolik, endawimo anggasikhe andi hagat, yi mene ti mene fano katokhogo hilingitarek andi hak, nit-nit nendawi-hendawirogo logouwageluk higithogo hilingninabi'logo andi.

¹³ Allah nen Areagun wo'nisasikhe andiba, niren anggikhi logolik, ”At nit ninom hundik werek. Nen, nit at ninom hundik welago,” iluk futfikhi lago o.

¹⁴ Niren he, ”Allah nen amlogo nineilenggen hikhi lagagu mene andi nen, nit afuni kweangma mene telninabuageluk lakfei wagaikhemo,” iluk abok fakhogo yagahisikhi lago.

¹⁵ Ap sa nen, ”Yesus andi Allah amlogo,” iluk fakhogo yagaisikherek halok, at Allah nen at emberek hundik mondok, nen, aren Allah emberek hundik mondok, welagaikharego.

¹⁶ Niren, ”Allah nen endawitninaferek andi futfogosik eberogoat,” iluk anggikhi lago. At obabut he, endawitninafu mondok welagarek andi nen, sa nen obabut he, afuni endawirinafu mondogat welagarek halok he, Allah nen at emberek hundik mondok, nen, aren Allah emberek hundik mondok, welagaikharego.

¹⁷ At Kristus welagarek andi hak, nit kweangma a'nogo welago andi nen, hobuk Allah nen nit ninanema waganogo wene ninoba figik, kotik, igin andi sambul ninenggali lek logogun. Ninenggali lekhogo logouwageluk he, attak Allah nen endawitninafi logolik, endawimo anggasikhe andi hagat, yi mene ti mene fano katokhogo hilingitarek andi hak, nit-nit nendawi-hendawirogo logouwageluk katokhogo hilingninabi'logo andi.

¹⁸ Afuni ekhe nen it ekhe inom nendawi-hendawirogo logolik, inailo lek welagaikharek andi nen, yi mene ti mene katokhogo hilingitarek andi hak, nit-nit nendawi-hendawirogo hilingiti lago mene andi katokhogo mondok hilinglaga logolik he, ninobabut ninailo mene andi legagarek. Mene re, it afuni ekhe inobabut inailo mene andi, inendawimo nen he, ”Eige! Allah nen hobuk wene ninoba fagain he a,” iluk inobabut youksek welagaikharek andi. A'nogo welagaikharek andi nen, nendawi-hendawirogo hilingitarek mene andi inendawimo fano katokhogo hilinglagarek mondok lego.

¹⁹ Attak Allah nen tak endawitninafikhe andi nen he, nit ogo re, nit-nit nendawi-hendawirogo logouwogo.

²⁰ A'nogo meneat he, afuni nen inerugwi inagaila'lak ineilenggen isagarek mene inendawi lek logoligat he, Allah ineilenggen hagarek lek mene inendawi logogun anggegep? Elo'lego. Halok he, at ekhe erugwi agaila'lak abit welagarek mene nen, ”An Allah nendawi,” iluk ili'logo halok he, eranen ili'logo o.

²¹ Andi nen, at Kristus nen komotninafi logolik: ”Allah hinendawirogo logolik, hinerugwi hinagaila'lak hinendawirogoat logoino o,” iluk yaganisasikhe andi.