1 YOHANES 3 - Allah Wene Fano Wene Hupla Inane

”Allah againafuri inom, Iblis againafuri inom, enegat agaikharek,” iluk yagaisasikhe wene

¹ At Allah nen he, ”It yi an nagainafuri,” iluk ta'ninafikhemo eberogoat nit ninebe at againafuri welago. A'nogo welagorek andi nen, ninebe at endawi mondok welagarek andi hani! A'nogo meneat he, it afuni kweangma mene inobabut inetok mene omanogo nen Allah ebe inonggot andi nen he, nit ninebe inonggoraro.

² Nerugwi nagaila'lak, nendawilage. Yogondak nit ninebe Allah againafuri welago meneat he, hobuk ninebe logogun mene weinamet figi'lek oan hinago werego. A'nogo meneat he, nit ninelu re, Yesus ebe yogondak werek mene nineilenggen furogo hogoin andi nen, at wesigin andi sambul ebe wagunem, nit ninebe at ebe werek andi hak hilinglasuguno.

³ Nit ninendawimo nen, ”A'nogo hilinglasugun,” iluk, oba eberek welagorek mene ninebe lombogen, at onggwarek ebe tegelek welagarek andi hak, nit a'nogoat tegelikhi logoguno.

⁴ Nen, afuni nen weak hilingitarek andi Allah aneat sagalharek andi nen he, ap sa nen weak hilingiri'logo halok, Allah aneat sagalogo hilingiri'logo o.

⁵ At Kristus onggwarek weak hilingiti'lek logolik, nit weak hilingitorek mene sebelogo legetfisageluk, ebe weinamhogo wagaikhe andi hineluo.

⁶ Andi nenat, nirat ninom hundik mondok welago mene halok, ninebe lombok weak hilingitu mondok welagorek lek. Mene re, it afuni ekhe weak enek hilingitu mondok welagaikharek mene inebe lombok he, at ebe ineilenggen higi'lek inonggorat werego.

⁷ Nagainafuri e. It afuni ekhe nen lalhinabinogo iluk hinobabut hebelogo logoino o. Ap sa nen obabut higithogo hilingiterek halok he, at Kristus obabut higithogo hilingiterek andi hagat, hilingitu werego.

⁸ Nen, at ekhe nen obabut weak hilingitu mondok welagarek halok he, at Iblis obabut eroba nenat weak hilingiri'logo andi nen he, at andi ebe re, Iblis amlogo werego. Mene re, at Allah amlogo weinamhogo wagaikhe andi re, at Iblis obabut hilingiterek mene andi, mondok sebelogo legetfisageluk wagaikhe o.

⁹ Nen, afuni Allah nen taginaferek mene halok inebe lombok, at obabut waluk hilingitarek andi nen, weak hilingitu mondok logogun lek. Inebe Allah againafuri logolik weak hilingitu mondok welagaikharek lego.

¹⁰ Allah againafuri inom, Iblis againafuri inom, ninendawi wenggelogo inobabut enegat hilinglari'lagwi re, yi. Ap sa nen obabut higithogo hilingiti'legat, erugwi agaila'lak endawirinafi'legat, hilingiri'logo halok, at andi ebe Allah amlogo lego.

”Hit-hit nendawi-hendawirogo logoino,” iluk yagaisasikhe wene

¹¹ Wene Allah nen he, ”Hit-hit nendawi-hendawirogo logoino o,” iluk yaganisasikhe mene, afuni ekhe nen yagahisasukwama eroba nen hinesanggo holhigip andi aro.

¹² Niren he, at Kain ebe Iblis obabut weak mene andi amlogo agaikhesik onggwarek agot watikhe andi hak hilingisugun lego. Aren agot watikhe andi nenahalok watikhe nogo. At hilingiti lagaikhe mene weak mondok, nen, agot hilingiti lagaikhe mene fano mondok, andi nenat watikhe o.

¹³ Halok, nerugwi nagaila'lak e. Afuni kweangma mene nen, hit inabit mondok hilinghinafu halok he, ”Nailo e,” iluk hinendawinggen fitubo.

¹⁴ Allah nen ninebe wa'lagaikhare'ma nen wo'ninafikhesik, ineluk welagaikhare'ma ninobagaikhemo welago iluk, nit-nit ninerugwi ninagaila'lak ninom nendawi-hendawirogo welago andi nen futfikhi lago o. Halok he, sa nen afuni ekhe endawirogo welagi'lek, abit welagarek mene andi ebe wa'lagaikhare'ma andomaat werego.

¹⁵ Inerugwi inagaila'lak inabit welagaikharek mene andi, it inebe lombok afuni inoare mene aro. Nen, it afuni inoare mene andi, inebe lombok nabulal-habulal eise agi'lek mondok werek, iluk ninelu o.

¹⁶ At Kristus nen tak nit endawitninafikhesik, ebe nit faget wa'lagaikhe andi nen, niren it afuni ekhe inendawirinafarek wene andi futfogosik, at hilingitikhe andi hak, nit ninerugwi ninagaila'lak inebe ninendawi nen, ninebe it faget wa'lasugun fano aro.

¹⁷ Mene re, sa nen at agarek yi mene ti mene kweangma mene fuluk logolik, erei agailak ekhe yi mene ti mene elagaik were'ma eilenggen halugat he, ekhe wogeti'lek endawimo nen anggikhi logolik, nonggwarek enek anggikhe halok, at andi obabut he, Allah nen endawitninaferek andi hangge werek anggegep? Mondok lego.

¹⁸ Halok he, nagainafuri e. Niren afuni ekhe ninendawirinafi'lek logoligat he, ninaneba nek he, ”Ninendawirinafi logouwogo,” iluk ikhi logogun elo'lego. Athe, inebe ninendawirinafik, ninenggiba nen eberogoat leberisikhi logouwogo.

”Nit Allah eilhanem ninailo lekhogo logogun,” iluk yagaisasikhe wene

^19-20 Niren ninobabut a'nogo hilingiti logolik, ninendawimo nen he, ”Nit ninebe Allah ebe mene againafuri welago,” iluk futfogoin. A'nogo futfikhi logolik, nit weak hilingito, iluk ninendawimo enggin welago halok, nit ninebe elo'lek menere, at Allah nek he, ebe hokho logolik, yi wene ti wene mondogat elu nek welagarek, iluk, at eilhanem ninendawimo serogo ninailo lekhogoat logoguno.

²¹ Halok he, nerugwi nagaila'lak. Hinebe nendawi e. Nit ninendawimo nen, ”An weak ekhe hilingiti,” iluk menenei ebeti'lek, ninendawimo serogo welago halok he, at elokhoma ninailo lekhogo logolik,

²² aren wene komotninafikhe wene higithogo hilingitik, at eilhanem endawimo fanorogo nek hilingitik, ikhi lago andi nen, nit yi mene ti mene kino yagatunem, aren wo'nisili'logo.

²³ Aren wene komotninafikhe andi, ebe re: ”Hit hinendawinggen an namlogo Yesus Kristus oba himbiret fuluk, aren yagahisikhe andi hagat, hit-hit nendawi-hendawirogo logoino o,” iluk komotninafikhe andi aro.

²⁴ Nit Allah nen wene komotninafikhe wene andi hologo higithogo hilingiti lago halok he, at Areagun wo'nisasikhemo ninendawimo werek, andiba, nit at ninom hundik, nen, at nit ninom hundik welago, iluk futfikhi lago.