1 YOHANES 1 - Allah Wene Fano Wene Hupla Inane

Ebe Wene nen inelugerinaferek wene

¹ Wene lisu palogo hinoba lakfei wago andi ebe re, ebe wene ninelugetninaferek mene o attak eroba nen welaikhe a'nogo mene. Wene andi ebere nit arat ninesanggo holhik, nineilenggen tomok higik, yerogo welagik, ninenggi fakhigik, isugu mene a'nogo aro.

² Nen, at eluk mondok welagarek mene andi, ebe eisena emberek eluk mondok welagaikhesigen, eisena nen nit nineilenggen hoageluk weinamet fesikhemo nineilenggen hasugusigenat abok yagahisikhi lago o.

³ Ebe nit nineilenggen higik, ninesanggo holhik, isugu mene andi, nineisena Allah amlogo Yesus Kristus emberek ninom hundik welagorek andi hak, hit nit ninom fano hundik logouwogeluk yagahisikhi lago o.

⁴ Nen, wene yi faget ninendawimo ninagaiyek anggikhi lago mene andi, hobuk ninendawimo hokhorogo eberogoat ninagaiyek hakhouwogeluk lisu palogo hinoba lakfei wago andi.

Allah amlogo nen he, Allah ebe, selek andi aro iluk, yagaisasikhe wene

⁵ Allah amlogo nen yaganisikhi logolik he: ”Allah ebe re, selek andi atma re, o mum he at oba welagarek mondok lek,” iluk yaganisasikhe mene, nit ninesanggo arat holhugu mene yagahisikhi lago andi.

⁶ Nen, nit he, ninaneba nen, ”At ninom hundik welago,” iluk ikhi logoligat he, o mum oba logolik inobabut hilingitarek mene andi hilingiti lago halok he, ebe mene hilingiti'lek nineranen ikhi lago o.

⁷ A'nogo meneat he, Allah ebe selek oba welagarek andi hak, nit ogo re, selek oba logolik, fano hilingiti lago halok, nit-nit nagailak-hagailak ninom hundik were'ma, nit weak hilingitunem at amlogo Yesus amep oba ho'ninafu mondok welagarego.

⁸ A'nogo meneat he, niren ikhi logolik he, ”Nit weak ekhe hilingiti'lek,” iluk ikhi lago halok he, nineranen ninonggwarek lalikhi lago andi nen, ebe wene re ninendawimo mondok lego.

⁹ Mene re, nit weak hilingito mene fakhogo fogoin halok, at obabut higit mondok logolik, wene wa'nisikherek hagat hilingiterek andi nen he, nit weak hilingitorek mene sebelogo legetfisaluk, weak hilingisuogeluk ninendawimo ebetorek mene sobalninaferek.

¹⁰ A'nogo meneat he, niren he, ”Weak ekhe hilingiti'lek welago,” iluk ogorek halok he, niren he, ”Allah eranen ikherek,” iluk u hagat ogorek andi nen, Allah ane nit ninendawimo mondok lego.