1 TIMOTIUS 6 - Allah Wene Fano Wene Hupla Inane

¹ Afuni ekhe nen Allah enu weak igik, at ane niren yagaisikhi lago mene faget, ”Wene andi weak,” igik, inogo iluk, Allah againafuri mene it ekhe inamingmingengge a'luk hilingiri'lagwi mene andi, inonggwarek inogogwi mene andi inawe a'ma logolik, inendawimo nen, ”Noe andi agaugwerati logogun,” iluk, agaugwerinafi logouwago.

² A'nogo agaugwerinafi logolik, it inamingmingengge mene andi inendawimo nen he, ”An noe andi endawinggen Allah oba himbiret fuluk welagarek andi nen nemberek Allah againafuri misigat mene nagailak nemberek,” iluk inogogwi inebe inendawimo nen sebelfisigi'legat, ”An noe lebethikhi lagi yi, endawinggen Allah oba himbirik werek mene hilingi'mo nendawio,” iluk, hobuk ekhe inom hokhorogoat leberisikhi logoguno. Wene igin yi mondogat haren yagaisigik, komorinafik, ikhi logoino.

”Wene hunogo meneat he, ebe wene hak, yagaisugunem esinet fogoin lek,” iluk yagatikhe wene

³ It afuni ekhe nen fano wene ninoe Enupogot Yesus Kristus nen hilingitikhe wene a'nogo inom, ”Allah awe a'ma kuluk, yi'nogo hilingiti logogun,” iluk, wene yagaisikhi lago mene andi inom, herakfisaluk, hunogo wene yagaisili'lagwi mene ekhe werek.

^4-5 It andi nen he, wene ebe inonggot meneat he, inonggwarek fogerakhikhi logolik afuni ekhe inawene mene faget inane sagalhik, wene hokhorogo palhik, ikhi logouwogeluk, inabit aga logogun mene esinet fili'lagwi andi nen, wurep oba re, afuni ekhe inendawinggen lek agunem ebe wene inonggot a'luk, it-it inom wene palhik, pou igik, ineranenat inabok weak palhik, inendawimo nen tulemat wene weak mene it ekhe inoba figik, yei-yei wene-wene palfigi'lek ugu mondok welagaikharek andi. A'nogo hilingiti logolik inendawimo nen he: ”Nit Allah awe a'ma kuluk hilingiti lago andiba, ninenggi werek asugun,” iluk, eberogoat iluk anggili'lagwi andi.

^6-7 Meneat he, ninagaisalak inalabutmo nen ta'laga logolik he, yi mene ti mene ekhe ninenggim waluk wagorek lek andi hak, ninebe wa'laga logolik he, yi mene ti mene ekhe waluk logoin legat andi nen, ninenggi werek logou hak, nit Allah awe a'ma kuluk logolik ninendawimo nen he, ”Elogat welago,” iluk, ninafe morogo logoumo nek he, ebe mene eise asugun andi.

⁸ Menere, ninggi logogun mene inom, ninagap oba labeti logogun mene inom, werek halok he, ”Andi elogat werek,” iluk anggogoino.

^9-10 A'nogo meneat he, afuni nen he, ”Esin uang andiat,” iluk inendawinggen tulemet fuluk he, o wurep oba yi weak ti weak hilingiri'lagwi andi, ero andi aro. It ekhe nen uang andi mene herasuogeluk, inendawinggen Allah oba himbirik welagaikharesigenat he, herakfisaluk hobuk eba salukhogo waragarek hak, it inonggwarek inendawimo wiik-weakhogo hilingiri'lagwi andi. Andi nen he, afuni ekhe nen, ”Yi mene ti mene hokhorogo helaluk ninebe kain logoilo e,” iluk anggili'lagwi andi re, paik hele fugunem ke'nokhogo wa'lagarek hak, Iblis nen inendawimo kagalhunem, yi mene ti mene inamolo anggogoin lek meneat he, weagerinabigin mene inamolo iluk anggili'lagwi andi nen he, inebe weaget fakhigik, nonget fakhigik, agarek andi.

At Timotius onggwarek faget tegelikhi logouwageluk yagatikhe wene

¹¹ It a'nogo hilingitarek meneat he, hat he, hebe Allah amlogo welagen andi nen, andi mene hilingiti'lek herakfisaluk logoino. A'nogo logolik, Allah endawimo anggikherek mene higithogo hilingitik, awe a'ma kuluk, at faget hilingitik, hendawinggen at oba himbirik welagik, afuni hendawirinafik, hafe morogo welagik, hobabut enago welagik, ikhi logoigeluk, andi meneat esinet fikhi logoino.

¹² Afuni inawe walhouwogeluk sa awewerek-sa awewerek walhagarek hak, nineluk mondok logogun andi mene hela lageluk, hendawinggen Allah oba himbirik logolik, at faget homamerogo hilingiti logoino. A'nogo hilingiti logombik, andi mene hela lanogeluk, Allah nen hayonggo fesikhemo, haren he, ”Nendawinggen Kristus oba himbiret fuluk yi'nogo hilingiti logogin,” iluk afuni hokhorogoat ineilhanem fakhogo isigin andi higithogoat homamerogo hilingiti logoino.

¹³ Allah nen afuni ninebe inom, yi mene ti mene inom, mondogat ninelugetninaferek mene a'nogo eilhanemat, Kristus Yesus afuni nen ap Pontius Pilatus oba waluk lagaukwama, ane eberogoat fakhogo yagatikhe a'nogo eilhanemat, wene yi komorogo yagahesigin.

¹⁴ Haren wene aren yaganisasikhe wene andi mondogat higithogo hilingiti logolik, weak mene hilingiti'lek tegelek were'ma, afuni ekhe nen wene hoba figi'legat logombik, huli ninoe Enupogot Yesus Kristus ebe weinamhogo wesigin andi huli hilinglasuageluk yagaheti andi.

¹⁵ At Allah nen, ”Yi huli weinamet fagain,” iluk anggasikhebaat weinamet fugunem wesigino. At Allah fogeratu mondok welagaikharek mene, alegat omame werego. Andi nen, inenupogot welagaikharek andi mondogat faget he, inoe Enupogot at alegaro. Nen, yi afuni ti afuni inogogwi kaindek welagaikharek mene andi, mondogat inoe kain he alegaro.

¹⁶ Nen, at ebe wa'lagi'lek etok mondok welagarek menere, at alegaro. At ebe o selek oba mondok were'ma, ineilenggen siluk pabuk iluk, oba horokhogo la elo'lek. At ebe afuni ekhe nen ineilenggen hagarek legat. A'nogo ha elo'lek. Omame mondok logogin mene andi, fogeratu mondok logouwogo, iluk ”Amin,” igi andi.

¹⁷ Yi mene ti mene mondogat lek asigin meneat he, it ap kaindek inenuwerek mene andi inendawimo nen fogerakhikhi logolik, ”Nagarek kweangma mene yoma mondok hokhorogo yi nen nebe fano logogin,” iluk, anggikhi logoinogo. Athe, at Allah nen yi mene ti mene mondogat ninendawimo agaiyekhogo helikhi logouwageluk hokhorogo wo'nisikherek a'nogo nenat fanotninabigin iluk futfikhi logouwagen komorinafi logoino.

¹⁸ It andi fanorogo hilingiti logolik, inagarek hokhorogo logou hak he, afuni ekhe fanorogo leberisikhi logolik, inagarek lek mene wogisigik, sumburisigik, ikhi logouwageluk komorinafi logoino.

¹⁹ A'nogo hilingiti logogun halok he, yi mene ti mene hobuk mene faget andogorogo fagarek hak, fano hilingiti logolik, hobuk mondok logogin mene fagerat fakhikhi logombik he, ninebe eberogoat ninelugetninabumo logogun andi meneat heloageluk komorinafi logoino o.

^20-21 Timotius namlogo e. Allah nen hayonggo fikhi logolik, ”Yi mene hilingiti logoino,” iluk, hoba fesikhe mene andiat fanorogo fisogo logolik, homamerogo hilingiti logoino. It ekhe nen Allah ane yagaisogoin mene andi igi'lek logolik, we tulemat, lek asigin mene fagerat wene palhi logolik, ”Wene ninelu,” iluk, ili'lagwi andi re inonggot logoligenat ili'lagwio. It andi nen he, ”Wene ebe mene arat futfogo,” iluk ikhi logolik, Allah ane eberogoat mene herakfisaluk nong asi wulifa andi nen, wene andi mene wanhi'lek herakfisaluk logoino o. Nagaila'lak. Allah obabut fano a'nogo nenat fethinarek logouwago.