1 TIMOTIUS 4 - Allah Wene Fano Wene Hupla Inane

”Afuni ekhe nen wene weak wene ineranenat hinendawimo kagali wesugun a'naga,” iluk yagatikhe wene

¹ Allah Areagun nen wene fakhogoat yaganisikhi logolik he, ”O wurep oba, afuni ekhe Allah ane eberogoat iluk anggili'lagwi mene nen, wene andi, Ninabit, iluk herakfisaluk he, Iblis agoromi nongerinafarek mene inawe a'ma kuluk, wene iren yagaisagarek wene andi fakfuluk hilingiti logogun.

² Hilingiti logolik he, afuni inenggi senap agunem, ki mene fakfogo heat iluk agarek andi hak, it andi inendawimo min a'luk he, yi weak hilingitimo higi. Yi fano hilingitimo higi, iluk anggigi'lek hesanggeat hilingiti logogun. A'nogo hilingiti logolik, ineranen lalfalhogo hilinginafi logogun andi.

³ Iren wene ikhi logolik he, Hemi woginabugun mondok lek, igik, Yi mene ti mene nenggarek mene andi, ekhe yi mene wesa. Ninggi logogun lek, igik, ikhi logogun,” iluk, Allah Areagun nen yaganisasikhe higithogo ili'lagwi andi. Meneat he, nenggarek mene andi, Allah nen nit ninendawinggen at oba himbirik logolik, ebe wene andi futfogo halok he, hai warogo ninggi logouwageluk elalhikhe mene faget ili'lagwi andi.

^4-5 Yi mene ti mene Allah nen elalhikhe mene andi fano nego. Samban ugunem Allah ane andiba fanot fikherek iluk, ”Yi weak mene,” iluk herakfisigi'legat, Allah hai warogo ninggi logogun enek.

”Hat Kristus Yesus amingmingengge logolik higithogo hilingiti logoino,” iluk yagatikhe wene

⁶ Wene fano wene ninendawinggen Allah oba himbiret fogorek mene a'nogo yagaheti lagagumo, haren wanhigindik higithogo hilingiti lagen andiba hebe sougwet hafunem he, wene yogondak yagaheti andi ninerugwi ninagaila'lak Allah againafuri mene ekhe yagaisikhi logoino. A'nogo yagaisikhi logogin halok he, hat Kristus Yesus amingmingengge logolik, at faget fanorogo hilingiti logogin andi.

⁷ Afuni nen suetninung ebe wene lek meneat he, tulemat ineranen pilingitarek mene andi herakfisikhi logoino. Herakfisaluk, Allah awe a'ma logolik hilingitarek mene andiat homamerogo yanggulikhi logoino.

⁸ Afuni inebe faget mep elukhogo inenggingge wanharek andi, yogondak ya elama faget endebat fano hak hilingitarek. Meneat he, ninendawinggen faget Allah awe a'ma logolik, at eabu wanhi logoumo, at Allah nen he, ”Yogondak hineluk welagep mene faget inom, hobuk hineluk mondok logogun mene faget inom, fano mondok asigino,” iluk, abok yaganisasikhe andi eberogoat.

⁹ Halok, wene andi ninendawinggenma furogo wanuguno.

¹⁰ Allah ebe re, yi afuni ti afuni mondogat telinaferek mene welagarek meneat he, esin hangge re, nit ninendawinggen at oba himbiret fikhi lago mene halok telninaferek andi nen, ninendawinggen at eluk mondok welagarek mene oba himbiret fuluk, at faget ninaberali lekhogoat ninomamerogo hilingiti lago.

¹¹ Wene andi mondogat afuni ekhe nen higithogo hilingiti logouwageluk yagaisigik, komorinafik, ikhi logoino.

¹² Hat hebe souge welagen andi nen, it afuni ekhe nen inendawimo sebelhobagagun lego. Hebe sougweat logolik, afuni ekhe inendawinggen Allah oba himbirik werek mene nen hat hobabut wanuageluk hane higithogo yagaisigik, hobabut higithogo hilingitik, afuni hendawirinafik, hendawinggen Kristus oba himbirik welagik, weak hilingiti'lek heil lomborogo welagik, ikhi logoino.

¹³ An nebe oan wagi'lek werek kwelek he, Allah ane lisu palek andiat it ekhe inesanggo holuagen enu salhik, komorinafik, yagaisigik, ikhi logoino.

¹⁴ Hat faget fageat it ap Allah againafuri kwelaginarek welagaikharek mene nen inenggi hunggul oba sebelhu kwelek, it ap Allah ane yagaisagarek mene nen mel isukwa andi: ”Hat hobuk yi'nogo hilingiti logoino,” iluk, yagahetukwa higithogo, Allah obabut fano nen ninobabut tomok wo'nisikherek a'nogo hat wokhetikhe mene andiba hilingiti'lek hobakhenene herakfisaguno.

¹⁵ It afuni mondogaren hat hobabut palhi logolik he, ”At Timotius attak fano hilingiti lagasik yogondak fano mondogat hilingiri'logo,” iluk enegat futhobagauwageluk, wene yagaheti mene andi mondogat hendawinggenma fakhambik hilingitu mondok logoino.

¹⁶ A'nogo hilingiti logolik, honggwarek faget inom, it afuni ekhe yagaisikhi lagen mene faget inom, hobabut hebelogo logoino. Hebelogo logolik, hendawimo puk agi'lek, andi meneat hilingitu mondok logoino. A'nogo hilingiti logogin halok he, honggwaregen hebe teligik, afuni ekhe hane holi'lagwi mene inebe telinafik, igino.