1 TIMOTIUS 3 - Allah Wene Fano Wene Hupla Inane

”Allah againafuri kwelaginarek logouwageluk, ap ekhe inobabut palogo nen menfisogoin,” iluk yagatikhe wene

¹ Wene yi, eberogoat mene igino. It ekhe inendawimo nen anggikhi logolik he, ”An Allah againafuri kwelaginarek logoile,” iluk, inendawimo anggaga halok he, andi fano mondok meneat inamolo nen anggaga andi.

² Andi nen, ap Allah againafuri kwelaginarek logouwageluk halok inobabut he, yiginik mene menfisogoin. Afuni ekhe nen, ”At weak,” iluk wene oba figi'lek mene halok, agwe misigat mene halok, weak hilingisuageluk endawimo kagalhunem elok sebelhaluk werek mene halok, endawinggen uan ebeterek mene halok, hilingisu mene higithogo hilingiterek mene halok, ap pok inonggot mene wagunem woginaferek mene halok, wene furogo yagaisikherek mene halok,

³ i anggur amusu ninggerek lek mene halok, obabut asialokhogo hilingiti'lek enago liokhogo welagarek mene halok, endawimo nen uang hokhorogo namolo anggikherek lek mene halok,

⁴ onggwaregen againafuri mene fano tegelogo ferinarek were'ma re, at againafuri nen ineisena awe a'ma logolik agaukhogo yagatik, ane ugunem hologo hilingitik, agarek mene halok, inobabut ariginik mene halok Allah againafuri ferinarek logoguno.

⁵ At ap ekhe nen onggwarek againafuri fanorogo tegelogo ferinarek logou onggot halok he, Allah againafuri ninggi'nogo kwelaginarek logogin anggegep? Elo'lego.

⁶ Ap ekhe Allah ane oan kerat wanhe mene menfugunem, Allah againafuri kwelaginarek logolik, onggwaregen fogerakhamo re, Allah nen Iblis unggum wogetikhe hak, a'nogoat wene oba fagain andi nen he, Allah againafuri kwelaginarek logouwageluk menfogoin lego.

⁷ Nen, ap Allah againafuri kwelaginarek logogun mene andi, it afuni endakwe mene nen abok weak pali'lagwi mene menfogoin halok, at ebe inendawimo sebelfuluk ineilenggen inabithogo kwelakhigik, paik hele fugunem ke'nok ikherek hak, Iblis nen endawimo kagalimbik ebe fakfigik inogo iluk, abok fano ili'lagwi mene halok menfogoino.

”Allah againafuri leberisikhi logouwageluk, afuni ekhe inobabut palogo nen menfisogoin,” iluk yagatikhe wene

⁸ Andi hagat he, Allah againafuri mene leberisikhi logouwageluk, inobabut yiginik mene menfisogoin. Inoba haro mene halok, inameli pire akhogo agarek lek mene halok, anggur enggen amusu nenggarek lek mene halok, uang, yi mene ti mene fano mene, ”An enek noba logoilep,” anggagarek lek mene halok, menfisogoin o.

⁹ Ekhe re, wene Allah endawimo hinagoat welagaikhesigen weinamet fesikhe wene a'nogo, inendawinggenma fesukwasik, ”An wene noba lek nendawinggen selek welagi,” iluk wene andi ninghogo fisogo welagaikharek mene halok menfisogoin o.

¹⁰ It ap andi oan menfisigi'lek logolik inobabut tak palhi logoumo re, afuni ekhe nen he, ”At weak,” iluk, wene inoba figi'le'ma tegelek welagaikharek mene halok, enegat fut fisaluk he, Allah againafuri mene ekhe leberisikhi logouwageluk, menfisikhi logoguno.

¹¹ Andi hagat he, it andi inagagwi inoba haro logolik inane yonggo waluk nikharek lek mene halok, weak hilingisuageluk inendawimo kagalhunem sebelhaluk werek mene halok, inobabut lenurek mene halok, inobabut ariginik mene halok, inaguni leberisugu mene logouwageluk menfisogoino.

¹² It ap Allah againafuri ekhe leberisugu mene logogun andi re, inagagwi misigat waganek logolik, inagainafuri inom, inagoromi inom, fanorogo tegelogo ferinarek welagaikharek mene halok menfisogoino.

¹³ Iren Allah againafuri ekhe fanorogo leberisugunem he, Allah againafuri nen inabok fano ikhi logolik inane agaukhogo yagaisikhi logogun. A'nogo yagaisugunem, iren he, wene ninendawinggen Kristus Yesus oba eberogoat himbiret fogorek wene andi faget, inailo lek fakhogoat yagaisikhi logogun o.

Ebe wene Allah endawimo hinago mene fakhogo sele'mat fesikhe wene

^14-15 An weak-weak hea wesigeluk nendawimo anggikhi logoligat he, oan wagi'lek logogin halok, nit Allah againafuri ninom logolik ninobabut hilingiti logogun mene helu asuageluk wene yi mondogat lisu palogo hoba lakfei wagi andi. O re, tik oba nen tiang oba ninghogo welagarek andi hak, nit Allah eluk mondok welagarek mene againafuri andogotorek andiba nen, Allah ane ebe wene andi ninghogo fi sogo welagorek andi.

¹⁶ Wene andi, nit Allah awe a'ma logolik eberogoat iluk anggogorek wene hinago welagaikhe mene Allah nenat fakhogo weinamet fesikhemo, ”Wene andi esin,” iluk fakhogo ikhi lago. Andi re: At Kristus ebe afuniat weinam agaikhe o. At Allah Areagun nen, ”At Kristus andi eberogoat,” iluk sele'mat fesikhe o. It malaikat Allah nen yonggo pelakfisa wagarek mene ineilenggen hasukwa o. Agoromi nen at hilingiti lagaikhe wene a'nogo yi afuni ti afuni endakwe mene yagaisilik lagaukwa o. Afuni o yi awi ti awi mene ekhe hokhorogo aren, ”At ebe eberogoat,” iluk, inendawinggen at oba himbiret fesukwa o. At Allah nen pogoroba fogeratu mondok welagaikhare'ma liakfesikhemo welagarego. Wene andi re, at Allah nenat weinamet fesikhemo fakhogo ikhi lago o.