1 TIMOTIUS 2 - Allah Wene Fano Wene Hupla Inane

”Samban yi'nogo ikhi logogun,” iluk yagatikhe wene

^1-2 An nen wene ekhe esin mene yi Allah againafuri komorinabinogeluk yagahesik. Nit afuni ninom fano liokhogo logolik he, Allah fogeratik, afuni faget higithogo hilingitik, ikhi logouwogen he, afuni mondogat faget inom, kaindek inenupogot faget inom, it ekhe inenuwerek logolik fetninarek welagaikharek mene andi inebe mondogat faget inom, samban ikhi logolik he, Allah ayonggo figik, kino yagatik, hai watik, ikhi logouwageluk komorinafi logoino o.

^3-4 At Allah telninaferek mene a'nogo endawimo anggikhi logolik he, ”Yi afuni ti afuni mondogat telinafik, ebe wene furogo inelu asuageluk yagaisigik, agarek mene,” At endawimo amolo anggikherek andi nen he, hit a'nogo ikhi logogun halok he, fano.

⁵ Allah ebe misigaro. Nen, Allah ninom nit afuni ninom hulisanem logolik lambulninabi'logo mene ap ebe Yesus Kristus andi misigaro.

⁶ At Kristus afuni mondogat weak hilingitorek andiba hele warogo fetninarek were'ma hele fikhalogo telninabigeluk onggwarek eranen, ”Nebe noasuak,” iluk wagaikhe andiba, Allah endawimo nen he: ”Afuni mondogat telinabigin,” iluk anggikherek mene andi, enegat asigin higithogoat enegat agaikhe andi.

⁷ A'nogo anggikherek andi nen, aren he, ”Haren ebe wene andi afuni endakwe mene nen eberogoat iluk inendawimo anggaluk wanuageluk, yagaisilik nikhi logoino,” iluk, an nayonggo fuluk laknobagai wagaikhemo, yagaisilik nigirek andi. A'nogo igi andi eberogoat igi. Nera nen igi lego.

Samban ikhi logolik, ”Aben yi'nogo hilingitik, hemi nen ti'nogo hilingitik, uageluk komorinabino,” iluk yagatikhe wene

⁸ Nen, o yi awi ti awi samban ikhi logolik, it aben he, inenggi nen ekhe weak hilingiti'lek, ina'mage lagagi'lek, wene palhi'lek, tegelek mondok logolik, samban ikhi logouwageluk, yagaisagain iluk nendawimo namolo anggigirigen yagaheti andi.

⁹ Andi hak, it hemi re, inesi lalhik, melei itarek hak emas mene itik, eile itarek hak mutiara mene itik, su onggo hokho mene labetik, ugun mondok lek. We, ineil lomborogo logolik, inalilingge siokhogo wanu meneat wanhi logouwageluk yagaisanogeluk yagaheti andi.

¹⁰ Inalilingge wanu hak he, inobabut Allah a'logomi logolik hilingisu hagat, it ekhe fanorogo leberisikhi logouwak.

¹¹ It inane legat logolik, wene yagaisugunem, inesanggo hologoat logouwak.

¹² It hemi nen he, ap inawe a'ma hak fisaluk, ”Yi'nogo hilingisin, ti'nogo hilingisin,” iluk, yagaisigik, wene yagaisigik, ikhi logoinogo iluk an nen wene palhirek andi. It he, we, inane legat logogun.

¹³ Allah nen he, Adam attak elalhikhesigen, hobuk he Hawa elalhikhe andi nen, inane legat logogun igi andi.

¹⁴ Andi hagat, Iblis nen he, Adam attak lalhikhe fuk. We, he andi tak lalhikhemo re, Allah ane sagalogo weak hilingitikhe andi.

¹⁵ A'nogo meneat he, it hemi inendawinggen Allah oba himbiret fuluk he, inebe Allah faget fisaluk tegelek mondok logolik, afuni ekhe inendawirinafik, ineil lomborogo hilingitik, ikhi logogun halok he, omalik taginafunem, Allah nen telinabigin aro.