1 TIMOTIUS 1 - Allah Wene Fano Wene Hupla Inane

Hai watikhe wene

^1-2 Timotius namlogo e. Hendawinggen Kristus oba himbiret fesigin andi nen, an namlogo eberogoat agaginmo re, wene yi an Paulus nen lisu palogo hoba lakfei wagi andi. At Allah nen telninaferek mene inom, Kristus Yesus nen fanotninabigin iluk ninendawimo anggikhi lago mene a'nogo inom, emberegenat nayonggo fuluk, at Kristus Yesus faget hilingiti logouwageluk laknobagai wagaukwama wagagi andi. Nineisena Allah inom, ninoe Enupogot Kristus Yesus inom, emberek inobabut fano a'nogo nen, fano mene wokhetik, inendawithafik, hendawinggen hambugethafik, ikhi logouwago.

Timotius nen it afuni ekhe higithogo komorinafi logouwageluk yagatikhe wene

³ An o Efesus nen o Makedonia yoma wesigeluk he, hat hendawimo kagalogo wene mel iluk yagahetigi anggigi: ”Hat hebe o yoma logoino. Logolik he, it ekhe nen wene ebe mene lek. We, hunogo mene yagaisili'lagwi mene andi igi'lek inane palfouwageluk komorinafi logoino.

⁴ It andi nen he, suetninung ineranen kagalogo pilingitik, Ninebe a'nogo ta'larik wagagu, iluk wene komo wene eroba nen palfigi'legat pilingirik mondok lagik, ili'lagwi andi meneba inendawinggen eberek mondok logoinogo nen he, igi'lek herakfisoageluk komorinabino aro,” iluk yagahetigi anggigi. Wene andi mene ugunem, ebe wene ninendawinggen Allah oba himbiret fuluk were'ma, aren fanotninabigin andi mene hokhorogo agarek lego. We, wurep oba inane hokhoat sagalharek andi.

⁵ Inendawinggen Allah nen horinafunem he, inonggwarek inendawimo nen he, ”An wene noba lek, nendawinggen selek welagi,” iluk anggikhi logolik, inendawinggen eberogoat Allah oba himbiret fuluk welagaikharek andi nen, afuni inendawirogo welagaikharego. Halok he, it a'nogoat logouwageluk komorinafi logoino, iluk yagahetigi andi.

⁶ Menere, it ekhe nen inobabut fano hilingitarek andi mene hilingiti lagaikharesigen herakfisaluk kwanirogo tulemat lek asigin mene andiat hilingiti logolik, inonggwaregenat nong akhili'lagwi andi.

⁷ It andi nen he, ”Wene Allah nen komotninafikhe wene a'nogo, niren yagaisikhi logogun,” iluk inamolo nen yagaisikhi logoligat he, wene ebe futfigi'lek inonggot logoligat he, ”Wene ebe yi'nogo, eberogoat furogo yagaisogo,” iluk ili'lagwi meneat he, futfigi'legat ili'lagwi andi.

⁸ Wene Allah nen komotninafikhe wene andi, niren futfuluk, hilingisu higithogo hilingiti logogun halok, fano o, iluk, ninelu.

⁹ Eberogoat he, wene Allah nen komotninafikhe wene andi, afuni higithogo hilingitarek mene faget isikhe fuk. We, afuni komore'lek inesanggo holhi'lek hilingitarek mene inom, Allah inabit logolik weak hilingitarek mene inom, inebe Allah faget fisigi'lek Allah ane sebelogo hilingitarek mene inom, ineisena inagaisalak inebe mondok inoatarek mene inom, afuni ekhe hesanggeat inebe mondok inoatarek mene inom,

¹⁰ aben hemi pailak fakfisigik, ap-ap fakfisigik, agarek mene inom, afuni ekhe inagainafuri mene inenggi abisak hinaginafarek mene inom, ineranen agarek mene inom, ”Wene eberogoat igin,” iluk Allah enu hombuk palilugat he, lalinafarek mene inom, it mondogat a'nogo hilingitarek mene faget isikhe. Nen, it ekhe inobabut ebe wene fanotninaferek wene andi sagalogo herakfisaluk weak hilingitarek mene an igi'lek mene mondogat ekhe faget inomat isikhe.

¹¹ Nen, wene andi higithogo, fano wene a'nogo an nen yagaisilik nikhi logouwageluk noba fesikhe. Fano wene andi re, Allah fogeratik, hai watik, ogorek mene a'nogo ane aro.

Allah hai watikhe wene

^12-13 An attak he, Yesus abok weak palhik, ebe nendawimo nen sebelfuluk Allah againafuri mene yi enggin ti enggin hilinginafik, ikhi lagagi meneat he, ninoe Enupogot Kristus Yesus endawitnafikhesik, ”Haren hobuk an faget hendawinggen lenurogo hilingiti logogin,” iluk, wene yi an noba fuluk nayonggo figik, omame wo'netik, isikhe andi. A'nogo weak hilingiti lagagi andem sambul he, an nendawinggen ninoe Enupogot Kristus Yesus oba himbiret figi'lek logolik, a'nogo hilingisu lek meneat he, nonggoren hilingiti lagagi andi nen, aren nebe endawitnafikhe andi nen, hai wati lagi o.

¹⁴ Andi re, at ninoe Enupogot Kristus Yesus obabut fano nen hokhorogo endawitnafikhesik, nobabut he, at inom hundik logolik hilingitarek hagat, nendawinggen at oba himbiret figik, afuni ekhe nendawirinafik, hokhorogoat ikhi logouwageluk, nebe wo'nafikhe andi.

¹⁵ Afuni weak hilingitu were'ma Kristus Yesus nen ninebe telninabigeluk kweangma yoma pi wagaikhe iluk igi andi, afuni nen he, ”Wene andi eberogoat,” iluk furogo wanugun mene. Afuni ekhe weak endebat hak hilingitarek meneat he, an enek he, weak hokhorogo mondok hilingiti lagagi andi.

¹⁶ Menere, it afuni ekhe hobuk inendawinggen Yesus oba himbiret fugunem ineluk mondok logouwageluk hilinginabigin mene inendawimo nen anggikhi logolik he, ”Paulus weak hilingitu kwelegat he, Kristus Yesus endawimo pugagi'lek afe morogo mondok welagaikhesigen, endawiratikhesik ebe wanhikhe andi re, aren afuni weak hilingitarek mene a'nogo woginafere'ma higi,” iluk, Allah obabut enegat futfouwageluk, an tak a'nogo wo'nafikhe andi.

¹⁷ Nineisena kain Enupogot Allah andi alegaro. At ebe nineilenggen hogorek lek. Walhasikhe etok mondok welagarek mene andi aro, iluk, fogeratik, hai watik, ugu mondok logouwogo, iluk, ”Amin,” igi andi.

¹⁸ Timotius namlogo e. An wene yi komorogo yagahesik. It ekhe nen wene attagat hat honggwarek faget ikhi logolik he, ”At yi'nogo hilingiti logogin,” iluk, isukwa hak, fano wene yi faget, weim inomamerogo yafarek hak, homamerogo yagaisikhi logoino o.

¹⁹ It ekhe nen, ”Wene andi eberogoat,” iluk wanharesik, inendawimo selekhogo logou meneat he, hobuk weak hilingiri'lagwi andi nen, e so ima wula'lakhogo pikherek hak, hela paga andi. Hat andi hangge hilingiti'lek, hendawimo nen, ”An weak ekhe hilingiti'lek, nendawinggen selek welagi,” iluk hendawinggen Allah oba himbiret fuluk homamerogo hilingiti logoino.

²⁰ It weak a'nogo hilingitarek andi, inebe ekhe re, Himeneus Aleksander emberegen Allah abok weak palhi lagaikhama, hobuk inobabut hebelasimbik weak hilingiti'lek kamo uageluk inebe Iblis wogetimo werek andi.