1 TAWARIKH 9 - Allah Wene Fano Wene Hupla Inane

Afuni hele warogo hugisa lagaukwaba omanogo nen inambotkwe inaiba wagaukwa wene

¹ It afuni Isreal mene mondogat he inebe ineisok erokwe lombok ta'larik wagaukwa mene higit-higit inenu lisu palogo welagaikhe. Inenu lisu palogo welagaikhe mene andi re buku it Israel mene inogogwi raja mene a'nogoba palek welagaikhe. It Yehuda mene weak hilingiti lagaukwa mene omanogo ambisangma unggum he it inebe woginarek afuni huginabi lagaikharek oba o Babel omanogo fisa lagaikhe.

² It inanggele'ma andoma fem attak-attak it inonggwarek inanggweang oba inawi kota omanogoba inambotkwe wagaukwa mene re. It afuni holhu mene yugunat inom, imam inom, it Lewi mene inom, Tuhan Awi wuri'mo yabu hilingiti lagaukwa mene inom, omanogo tak wagaukwa.

³ It inunggulenu Yehuda mene fena inom, Benyamin mene fena inom, Efraim mene fena inom Manasye mene fena inom he, nekhengge wagaukwasik o Yerusalem andoma welagaukwa.

^4-6 It inunggulenu Yehuda mene inom, at Yehuda amlogo Peres inom, Syela inom, Zerah inomen tagomangge omanogo ineisok erokwe lombok, o Yerusalem welagaukwa mene inebe lambulogo re 690 nen welagaukwa. At Peres ambisangma nen tagongge mene re hun Utai nen melalinafi lagaikhe. Hun Utai andi ta'lagaikhe mene ero fikhiren erembul fikhit he, Utai, Amihud, Omri, Imri, Bani, inom andem. At Syela ambisangma nen tagongge mene re hun Asaya nen melalinafi lagaikhe. At andi re it mene ineisok erokwe faget inoe kain welagaikhe. At Zerah ambisangma nen tagongge mene re hun Yeuel en melalinafi lagaikhe.

^7-9 Afuni inunggulenu Benyamin mene ineisok erokwe lombok o Yerusalem andoma inebe 956 en welagaukwa. It ineisok erokwe omanogo faget inogogwi kaindek welagaukwa mene re: Salu hun Mesulam amlogo, hun Hodawya omba, hun Hosenua ambu andi inom, Yibnia hun Yeroham amlogo andi inom, Ela hun Uzi amlogo andi inom, hun Mikhri omba andi inom, Mesulam hun Sefaca amlogo, hun Rehuel omba, hun Yibnia ambu, andi inom, mendek welagaukwa.

It imam inap o Yerusalem welagaukwa mene a'nogo re yi

^10-12 It imam fenakwe yi re o Yerusalem welagaukwa mene a'nogo yi: Yedaya inom, Yoyarim inom, Yakhin inom, Azarya inom, Hilkia amlogo ombawi re, Mesulam inom, Zadok inom, Merayot inom, Ahitub inom. (Azarya re o Tuhan Ailoba yabu hilingiti lagaukwa mene omanogo faget inoe kain welagaikhe.) Adaya hun Yeroham amlogo at ombawilak he hun Pasyur inom, Malkia inom andem. Nen Masai hun Adiel amlogo a'nogo ombawi re hun Yahzera inom, Mesulam inom, Mesilemit inom, Imer inom it andem mendek welagaukwa.

¹³ It imam omanogo ineisok erokwe faget inogogwi kaindek mendek welagaukwa mene inebe re 1.760 nen welagaukwa. It ap andi re At Tuhan Awi wuri'mo omanogo yabu ekhe mene ekhe mene hilingitu mene faget he inelu-pinelu inap welagaukwa.

It Lewi inap o Yerusalem welagaukwa mene a'nogo

^14-16 It Lewi inap inenu a'makwe yi re o Yerusalem welagaukwa mene a'nogo, Semaya hun Hasub amlogo a'nogo ombawi re hun Azrikam inom, Hasabya inom. It andem he ap Merari ambisangma mene welagaukwa. Barbakar inom, Heres inom, Galal inom, Matanya hun Mikha amlogo a'nogo at ombawi re Zikhri inom, Asaf inom, andem. Obaja hun Semaya amlogo a'nogo ombawi re hun Galal inom, Yedutun inom, andem. Berekhya hun Asa amlogo Elkana omba at ebe o kota Netofa welagaikhe mene a'nogo inom welagaukwa.

O Yerusalem Tuhan Awi wuri'mo kagalek welagaukwa mene

¹⁷ It ap o Tuhan Awi wuri'mo kagalek werek inap inagagwi inagainafuri inom seberogo o Yerusalem welagaukwa mene re: Hun Akub inom, Talmon inom, Ahiman inom, Salum it o kagalek welagaukwa mene omanogo inoe kain welagaikhe mene a'nogo inom, welagaukwa.

¹⁸ It ap andiba nen he yogondak huli nen ogore o mo lagai wagarek fikhit Pintu Gerbang Raja kwagarek oba iluk andoma kagalek logolik welagaikharek. Attak he it ap andi mene re kwe ambe it ap Lewi mene inawi sabu sale'ma lagaikharek fikhit andoma kagalek welagaukwa.

¹⁹ Tuhan Awi sabu sale'ma kwi lagaikharek oba solombonma andoma kagalek logouwageluk he at Salum it ap ero mene, it Korah inap a'nogo inom fisasukwa. (At Salum andi re hun Kore amlogo, Ebyasaf omba.) Attak he it inombawi nen ogore Tuhan Awi sabu salek oba andoma hilingiti logolik he yabu andi meneat hilingiti lagaukwa.

²⁰ Pinehas hun Eleazar amlogo re it faget inoe kain welagaikheat. (At Tuhan nenat fisogo logouwak!).

²¹ Hun Zakharia Meselemya amlogo andi ogore o Tuhan Awi sabu wuri'mo solombonma kwe kwi lagaikharek oba andoma kagalek welagaikheat.

²² It ap o kwe kwi waguba kagalek logouwageluk menfisasukwa inap andi inebe re 212 nen welagaukwa. It inebe re inawi sili hilingik higithogo inenu palek welagaikhe. It inombawi attak welagaukwa inap andoma at raja Daud inom, at Allah ane yagaisikhi lagaikhe mene nabi Samuel inomen he it ineabu andi mene logouwageluk wogisasukwa.

²³ A'nogo wogisasikhe huli andi nen engge it inebe inom, nen iren tagomangge mene inom he tukhogo Tuhan Awi wuri'mo kwi lagaikhare'ma kwe ambe andiba kagalek welagaukwa.

²⁴ Kwe andi ebere enggaminogo nen ambe palek welagaikhe, Kwe ambe misik he abel poikwe utara fikhit, nen ekhere maikwe selatan fikhit, ambe ekhere mo erokwe timur fikhit, nen ambe ekhere mo erembulkwe barat fikhit palek welagaikhe. A'nogo pale'ma re kwe ambe palek omanogo ebe lombok he it ap Lewi mene misik-misik it ebekhalem kagalek welagaukwa mene omanogo inoe kepala logouwageluk fisikhi lagaukwa.

²⁵ It inagaila'lak fena o inawi sili endep-endep kwe werek mene omanogo nen he, hobugalep inagaila'lak hundik-hundik minggu misik inukhogo leberisikhi lagaukwa.

²⁶ Oba nen he, it inebe enggaminogo inogogwi kaindek welagaukwa mene aremnogo nek he femhogo yabu hilingiti lagaukwa. It andi nen he Tuhan Awi wuri'mo elonggoma ambe palek mene omanogo halogo figik, ekhe mene ekhe mene o elonggoma andoma werek mene omanogo halogo figik, hilingiti lagaukwa.

²⁷ It ap andi nen o hubet-habet he kwe kwi wagukwe omanogo hutik, o ebe wuri'mo a'nogo kagalek welagik, hilingiti lagaukwa andi nen it inebe re, o Tuhan Awi wurik a'nogo horokhogo andoma welagaukwa.

It ap Lewi inap ekhe fena a'nogo

²⁸ It ap Lewi mene re fena minggilogo wene kabogeti logolik hilingitu mene omanogo faget halhi lagaukwa. It andi nenat he wulak figik, kwelakfigik hilingiti logolik he inenggi wenagaisogo mondok hilingiti lagaukwa.

²⁹ It fenakwe re o Tuhan Awi wuri'mo nen elonggo ma wene kabogeti logolik obuluk hilingiti lagaukwa kwe omanogo halhik, tepung, anggur e zaitun amusu, kemenyan, amben-ambenengge omanogo inom, halhik ikhi lagaukwa.

³⁰ Oba nen he amben-ambenengge omanogo mulelhi lagaukwa inap he it ap imam Allah elokhoma hilingiti lagaukwa mene omanogo nen hilingiti lagaukwa.

³¹ Yi mene ti mene weragaisogo fugu mene waluk Tuhan obaget fuguba omanogo fei lagu mene faget he, ap Lewi mene misik ekhe enu Matica hun Salum amlogo manggusa mene unggulenu Korah mene oba nen menfesukwama logolik hilingiti lagaikhe.

³² It inunggulenu Kehat inap he it samban ugu sambul hari Sabat a'nogo ba linggene hundik-hundik roti enu warek weragaisogo foukhogo fei lagu mene faget welagaukwa.

³³ It Lewi inap a'nogo mene fenakwe ekhe re Tuhan Awi wuri'mo a'nogo nen wuni watu mene faget welagaukwa. It ineisok erokwe mene fenakwe re o Tuhan Awi wuri'mo a'nogo ambe palek fena amu meneba andoma welagaukwa. It inebe re yabu ekhe mene nen ineil palhi'lek hup hundik lingge hundik hilingitu mondok welagaukwa.

³⁴ Ap inenu ambolkwe palek mene yi re, it Lewi inap ineisok erokwe mene inogogwi kaindek lombok mendek welagaukwa inap inebe ta'larik wagaukwa higithogo. It andi re inogogwi melalinafu logolik o Yerusalem welagaukwa inap.

Ap raja Saul ombawi inom, at ambisangma ta'larik wagaukwa mene inom a'nogo

³⁵ Hun Yeiel he o Gibeon wutikhesik andoma welagaikhe. At agwe enu re Maakha,

³⁶ At amlogo manggusa mene andi enu re Abdon; nen ekhe ombo'ne mene re Zur inom, Kis inom, Baal inom, Ner inom, Nadab inom,

³⁷ Gedor inom, Ahyo inom, Zakharia inom, Miklot inom,

³⁸ hun Simea eisena a'nogo. It inambisangma mene re o Yerusalem afuni it mene o andoma welagaukwa mene inom seberogo welagaukwa.

³⁹ Hun raja Saul a'nogo eisena enu re Kis nen omba enu re Ner. At Saul he amlogomi inebe enggaminogo welagaukwa mene inenu re: Yonatan inom, Malkisua inom, Abinadab inom, Esybaal inom andem.

⁴⁰ At Yonatan he amlogo ap misik ekhe welagaikhe mene enu re Meribaal hun Mikha eisena andi.

⁴¹ Hun Mikha andi amlogomi re ap inebe enggaminogo welagaukwa, inenu re: Piton inom, Melekh inom, Tahrea inom, Ahas inom, andem.

⁴² Hun Ahas amlogo re Yoada at amlogomi inebe henagan taginarek welagaikhe. Nen, at amlogomi andem inenu re: Alemet inom, Asmawet inom, Zimri inom andem. Hun Zimri andi ambisangma nen ta'larik wagaukwa menere Moza inom,

⁴³ hun Bina inom, Rafa inom, Elasa inom, Azel inom andem.

⁴⁴ Hun Azel andi amlogomi inebe re falfaligen welagaukwa; inenu re, Azrikam inom, Bokhru inom, Ismael inom, Searya inom, Obaja inom, Hanan inom andem.