1 TAWARIKH 23 - Allah Wene Fano Wene Hupla Inane

¹ At Daud ebe mondogat yaman agaikhesik he at amlogo Salomo a'nogo afuni Israel mene faget inoe raja logouwageluk menfesikhe.

It Lewi inaben yabu hilingiti lagaukwa mene a'nogo

² Raja Daud a'nogo nen he it afuni Israel mene inogogwi melalinafu mene inom, it imam inom, it Lewi inap inom, kabogerinafikhesik,

³ aren it Lewi inap inebe umur 30 tahun nen ambolkwe hilingik mene nek wenaginafukwa. A'nogo wenaginafukwama re inebe lambulogo re 38.000 nen hilinglagaikhe.

⁴ A'nogo hilinglagaikhemo re, it inebe 24.000 nen he Tuhan Ailoba a'nogo yabu hilingiti logouwageluk fisasukwa, nen it inebe 6.000 nen aremnogo re o wene katokhogo palharek oba pengadilan a'nogo elonggoma andoma lisu palhik, amu-amu mene hilingitik, yi mene ti mene o andi elonggoma nen hilingitu mene omanogo halhik, ikhi logouwageluk fisasukwa.

⁵ Nen it inebe 4.000 nen he yaga werek mene faget fisasikhe, nen 4.000 ekhe re wuniba Tuhan fogerasuogeluk pinggong fouksegenggeba anethugu mene faget fisasikhe.

⁶ At Daud en he it Lewi inap a'nogo re esa henagan it ineisok erokwe hilingik mene higithogo, Gerson mene inom, Kehat mene inom, Merari mene inom logalogo fisasikhe.

⁷ Hun Gerson andi re amlogomi ap inebe pire mene inenu re, Ladan inom Simei inom andem.

⁸ At Ladan andi re amlogomi inebe henagan welagaukwa mene inenu re: Yehiel inom, Zetam inom, Yoel inom andem.

⁹ It ap andi re hun Ladan ambisangma mene it ineisok erokwe faget inogogwi kepala hakhogo welagaukwa inap. (Solomit, Haziel, Haran inom he hun Simei againafuri.)

^10-11 Hun Simei amlogomi andem inebe ta'lagaukwa mene higit-higit inenu re yi: Yahat, Ziza, Yeus, Beria inom andem. It Yehus inom Beria inom inambisangma tago mene re inebe we endebengge welagaukwa, andiba re it inobaget he inunggulenu misik mene iluk anggikhi lagaukwa.

¹² Hun Kehat he amlogomi inebe enggaminogo mene welagaukwa, inenu re: Amram inom, Yizhar inom, Hebron inom, Uziel inom andem.

¹³ Hun Amram andi re it Harun inom Musa inom ineisena. (At Harun inom, aren tagomangge mene inom he, inenggi hundik-handik samban ugu mondok logolik yi mene ti mene hilingitu mene omanogo halhik, Tuhan obaget amben fano mene nolhik, Tuhan obaget hilingitik, Tuhan enuba afuni fanoabet fisigik, hilingiti logouwageluk wenagaisogo fisasikhe.

¹⁴ Allah amingmingengge Musa a'nogo againafuri re it Lewi inap inoba misi'mo kwelabek welagaikhe.)

¹⁵ At Musa re amlogomi inebe pire welagaukwa: inenu re, Gersom inom, Eliazer inom, andem.

¹⁶ Hun Gersom amlogomi mene inoe kain hilinglagaikhe mene enu re Sebuel.

¹⁷ At Eliezer he amlogo we misik enek welagaikhe mene enu re, Rehabya. Oba nen he at Rehabya nek he againafuri inebe hokhorogo welagaukwa.

¹⁸ Hun Kehat amlogo pirenek mene Yizhar a'nogo nen he amlogo misik ekhe welagaikhe; enu re, Selomit. At andi re it afuni it ineisogerokwe andi faget kepala welagaikhe.

¹⁹ Hun Kehat amlogo henaganek mene Hebron a'nogo amlogomi inebe enggaminogo welagaukwa, manggusa mene enu re: Yeria ombo'ne re Amarya, ombo'ne re, Yahaziel, ombo'ne re Yekameam, inom andem.

²⁰ Hun Kehat amlogo enggaminogo nek mene Uziel a'nogo nen he amlogomi inebe pire welagaukwa: Manggusa mene re Mikha, nen at ombo'ne re Yisia.

²¹ Hun Merari re amlogomi inebe pire welagaukwa, inenu re: Mahli inom he Musi inom andem. At Mahli re amlogomi inebe pire welagaukwa: Inenu re Eleazar inom, Kis inom,

²² oba nen he at Eleazar he amlogomi legengge we a'logomi nek tagaisogo ebe wa'lagaikhemo re it ineisena ekhe Kis nen taginarek welagaikhe mene inonggwarek inerugwi omanogo inom wok-wok agaukwa mene andoma nek welagaukwa.

²³ Hun Merari amlogo pirenek mene Musi a'nogo nen he amlogomi ap inebe henagan welagaukwa: Inenu re, Mahli inom, Eder inom, Yeremot inom.

²⁴ It ap Lewi inap a'nogo inenu it inebe ta'larik wagaukwa aple inom, inunggulenu hilingik welagaikhe aple inom, higit-higit palek welagaikhe mene re a'nogo andi. It inebe re umur 20 tahun nen ambolkwe nek asi lagunem Tuhan Awiba omanogo yabu hilingiti logouwageluk fisikhi lagaukwa.

²⁵ At Daud en ikhi logolik he, ”It afuni Israel mene ineisena Tuhan Allah a'nogo nen At againafuri inoba inailo legengge logouwageluk hilingfikhesik, At ebe ogo mondok-mondok o Yerusalem logogin.

²⁶ Andi nen he, Tuhan Awi sabu a'nogo inom, yi aple ti aple At obaget hilingiti logolik, hilingitarek mene andoma re it Lewi inap andi nen ha'luk laga logogun hanogo,” iluk yagaisasikhe.

²⁷ At Daud en ane elugun warogo wene melalogo fesikhe mene andomaba re, it Lewi inap omanogo mondogat he inebe umur 20 tahun hilinglagu halok he, yabu hilingiti logouwageluk inenu palhi lagaukwa.

²⁸ It andi nen he Harun ambisangma mene it imam-imam omanogo nen Tuhan Awi wuri'mo a'nogo obaget wene hokhoba hilingisuogeluk hilingitunem inom, yi mene ti mene o andi elonggokwe inom, senggelekwe inom werek mene andoma yaga logouwageluk faget inom, nen yi mene ti mene mondogat Tuhan faget iluk enogo horogo werek mene andoma emetlasinogo iluk inom, andoma mondogat faget yaga logolik leberisikhi logouwageluk wogisasikhe.

²⁹ Iren ogo wene yi faget hilingiti logogun mene re yi: roti Tuhan obaget weragaisogo fei wagu mene inom, tepung Allah obaget foukhogo hilingiti logogun mene inom, kue serapolweak mene ebe ragi legenggeba werago mene inom, wam werogo inom, tepung e zaitun amusu inom munenek engge inom, andi faget hilingiti logolik halhi logogun. Nen irenat he, afuni nen Tuhan Awi wuri'mo obaget fei wagu mene omanogo enggin walhigik, keralhik, hilingiti logogun.

³⁰ Andi hilingiti logolik he, it andi re hubet inom, hubanggo inom hundik-hundik Tuhan fogerati logolik wuni wati logogun.

³¹ It andi nen ekhe re inenggi Sabat a'nogoba inom, tugi ket fololhunem fogerati logolik inom linggene amu-amu mene omanogoba fogerati logolik inom, wam ekhe warogo Tuhan obaget fei wagu halok ogo halhi logogunat. It Lewi inap andi linggene hundik-hundik yabu hilingiti logogun mene faget iluk he wene melalogo mondogat fesikhe andi. Mondok-mondok faget it Lewi inap andi re yabu andi mene nek hilingiti logogun isikhe.

³² Ekhe it yabu wogisikhi logolik he, Tuhan Awi sabu a'nogo halhik, Tuhan Awi wurik a'nogo halhik, it inagaila'lak hun Harun ambisangma mene a'nogo Tuhan obaget wene kabogeti logolik hilingitunem leberisigik, hilingiti logogun o,” iluk isikhe.