1 TAWARIKH 21 - Allah Wene Fano Wene Hupla Inane

Daud en ap inenu lisu palogo wenaginafukwa wene

¹ At Iblis nen he it afuni Israel mene alomarogo fisagain iluk endawimo anggasikhesik, andi nen he aren Daud endawimo kagalhi logolik he, ap inenu lisu palogo wenasuageluk hilingitikhe.

² Andiba re at Daud en Yoab inom, at agoromi sikhe fisogo mene inogogwi perwira omanogoba yagaisikhi logolik he, ”Afuni Israel mene inebe seberogo miren werek andi an nelu asuakhogo re, hiren ap wenagaisogo inenu lisu palik he o unggut-unggut andoma huli mondogat pali lano o,” iluk yagaisasikhe.

³ A'nogo yagaisasikhemo re, at Yoab en onggo ikhi logolik he, ”We at Tuhan nen enek, afuni Israel mene yogondak werek mene andem we endep hak werek oba nen he, ekhe inom mangorogo 100 hakhogo inomat to'mot fikhi logouwak. Noe hebe kain mene, it mondogat andoma re hat ha'ma logolik legen a? Werek omanogo ri. Nenahalok niren wenaginabimbik inenu palugun nogo? Weak mene hilingisugun andiba re hobuk afuni Israel mene inebe mondogat ambisangma hogoin logou hak, ”iluk yagatikhe.

⁴ A'nogo yagatikheba nen he, at raja re aren hilingi'ni iluk wene melalhikhe mene a'nogoba senek welagaikhemo re, at Yoab a'nogo it afuni Israel mene welagaukwa kwe omanogo o unggut-unggut omanogo mondogat lagaikhesik he nekhengge sugulogo o Yerusalem wagaikhesik,

⁵ ap inenu wenatunemen ambisangma seberogo agaikhe mene a'nogo at raja Daud oba eluabet fei wagaikhe. Wenatukwa mene andi nen ap enek it sikhe fisogo mene omanogo nen hilingitarek mene hilingisu elok welagaikhe mene re inebe 1.100.000 nen it afuni Israel meneba omanogo a'nogo welagaukwa. Nen, Yehuda meneba re inebe 470.000 nen welagaukwa.

⁶ Oba nen he at raja Daud en wene wulafikhe mene a'nogo re at Yoab he abit anggasikhesik he it inunggulenu Lewi mene inom Benyamin mene inom welagaukwa kwe andoma re wenati'lek herakfisasikhe.

⁷ Allah nen ogore ap inenu lisu palogo wenaginafukwa mene andi faget abit anggasikhesik Aren it afuni Israel mene inoba wene fesikhe.

⁸ A'nogo wogisasikhemo re at Daud en Allahba samban ikhi logolik he, ”Allah neisena o, an mondok weak hilingitimo, naweak sebelogo leget fisan o, an nen hilingiti mene andi re mondok kemburogo hilingiti o, neisena!” iluk samban isikhe.

^9-10 A'nogo samban isikhemo re Tuhan nen nabi Gad Tuhan ane ugu mene Daud yagati lagaikhe mene a'nogoba yagati logolik mel isikhe: ”Lambik he, Daud yagati logolik mel ino, An nen wene ero henagan mene wokheti lagi. Enggere haren ero ki mene wenakhagain halok he An nen andi meneat hilinghobagagin, ikhe iluk yagasi lan o,” iluk yagatikhe.

¹¹ A'nogo yagatikhemo re, at Gad a'nogo Daud ambit lagaikhesik he Tuhan en wene yi'nogo ino iluk yagatikhe mene a'nogo yagasi lagaikhe. Aren yagati logolik he, ”Hun hokho haren he ki mene wenak hagain hamolo:

¹² O yomaba sumburu ouwak tahun henagan inukhogo logogin mene andi fano a, athe, neisena hat hebe it haselei mene nen mukharek nugunem en enek tugi henagan logogin mene andi hamolo a, athe, o yoma abirengge Tuhan en lingge henagan oba nek At enggarok hangge ou mondok weak mene Aren agoromi malaikat lakfisikherek mene omanogo ekhe warek mene waluk yi kwe ti kwe mondogat wesigin mene andi hamolo a. An nen Tuhan oba, yi'nogo ikhe, iluk yagasigin enggere haren yogondak yiat tekhogo in o.” iluk yagatikhe.

¹³ A'nogo yagatikhemo re at Daud en onggo ikhi logolik he, ”Eige, an mondok alomat lasigin higi! Oba nen he Aren endawi hundik hilinginaferek mene andi re hokho hilingi'mo re, afuni nen unggum wo'nesu hak andi re, we At Tuhan nen enek unggum wo'nesigin fano o,” iluk yagatikhe.

¹⁴ A'nogo isikhemo re, At Tuhan en ou mondok weak mene it afuni Israel mene inoba lakfei wagaikhemo re it inanggelekwe nen afuni inebe 70.000 nen wa'lagaukwa.

¹⁵ Andi nen he, Tuhan en malaikat ekhe o Yerusalem legatfisa loageluk lakfei wagaikhe. Oba nen he, at malaikat a'nogo hun Arauna awi Yebus agun a'nogo nen gandum enggen kigilhi lagaikheba aremnogo asi wagaikhe hak he Tuhan ane isikhe mene a'nogo hebekhogo yagati logolik he, Arat, inoatun o,” iluk yagatikhe.

¹⁶ A'nogo yagatikhemo at Daud eilenggen liakhasikhe re malaikat a'nogo pogot hilingi'luk kweang hilingi'luk tulem honggole'ma andoma tarik nikhi logolik o Yerusalem legaphogo fagain iluk enggarok enggimo fanghogo were'ma hasikhe. Arigini'mo hasikhe andem sambul he at Daud inom, it afuni melalinafu mene inogogwi a'nogo inom, nit weak hilingitosik iluk inendawi warikhi logolik fong warogo inasu pelagi su laberogo ineindep awi kweangma yakfesukwasik welagaukwa.

¹⁷ A'nogo hilingitukwasik at Daud en samban ikhi logolik mel isikhe, ”Allah neisena, anat weak hilingiti o. An en enek afuni inenu palogo wenaginabuageluk miminginafi o. It afuni inunggulenu yi nen he weak hilingita lego! Tuhan Allah neisena, we an inom an neisok erokwe inom enek unggum ninoba fuluk he, it Hat hagainafuri ariba nen enggin mene andi inoba asinogo re yatma lakfisan o, neisena,” iluk samban isikhe.

¹⁸ A'nogo isikhemo re, at malaikat Tuhan a'nogo nen hun Gad oba Daud yagasi loageluk yagati logolik he, ”Hun Arauna nen gandum enggen kigilhi lagaikheba andem laluk he, Tuhan faget wam warogo nolhuba obalik andem wu'no, iluk yaga'no,” iluk yagatikhemo yagasi lagaikhe.

¹⁹ A'nogo yagasi lagaikhemo re at Daud a'nogo Tuhan en wene melalek Gad ebene nen yagasi lagaikhe mene a'nogo higithogo lagaikhe.

²⁰ Lagaikhesik, hilingitunem en he, gandum enggen lolhi lagaikheba a'nogo re hun Arauna inom, at amlogomi inebe enggaminogo mene inom, gandum enggen kigilhi lagaukwa. It a'nogo lolhunem en he malaikat a'nogo ineilenggen hasukwasik he hun Arauna amlogomi inebe enggaminogo aremnogo re heise hina'lasi lagaukwa.

²¹ Nen, at Arauna a'nogo at eil yethugunemen he at raja Daud a'nogo wagunem hasikhesik he, at ebe Daud ambit horokhogo asi lagaikhesik Daud a'ma sebe isikhesik fogeratikhe.

²² A'nogo hilingitikhemo at Daud en yagati logolik he, ”Ou enggin mene yi legasuakhogo re an obalik yaba Tuhan obaget warogo nolhuba wusigin nendawimo anggigi. Enggere kweang yi an wanigin nen he, onggo yiba iluk yaganom,” iluk yagatikhe.

²³ A'nogo yagatikhemo, at Arauna a'nogo nen onggo ikhi logolik he, ”Hun hokho neisena, we onggo legat wanin. Nen, neisena haren hilingisigin iluk fano anggegen mene andi re, hilingi'no nek. Sapi warogo nolhu mene faget ogo, yoma han, e nolhu mene faget ogore gandum enggen lolhi logolik fougeti mene yomaba neisena haren noligin fano. An nen he, mondogat andi wokheti hilingi'mo re noe haren onggo fagain lek,” iluk yagatikhe.

²⁴ A'nogo yagatikheba nen he, at Daud en onggo ikhi logolik he, ”A'nogo re lego! An he onggo mondok higithogo hunisigin. An nen hat hangge hilingik kwelek, nen haren we onggolek wo'nesigin enggeba nen ogo, Tuhan obaget warogo nolesigin lek.” iluk yagatikhe.

²⁵ A'nogo yagatikhemo re, at Daud en obalik aremnogo faget he, hun Arauna oba uang emas mene 600 nen oba onggo palhikhe.

²⁶ A'nogo palhikhesik he, at Daud en aremnogo Tuhan obaget wam warogo nolhuba misik ekhe wutikhesik, aren wam noletu mene a'nogo inom, lambulogo fisugu mene iluk a'nogo inom, warogo nolhikhe. A'nogo hilingitikhesik he, aren samban isikhemo, samban isikhe mene a'nogo Tuhan en onggo re endu pogoroba nen wam warogo nolek oba a'nogo pelabi wagaikhemo re, wam warogo nolek mene omanogo mondogat endu nasikhe.

²⁷ A'nogo nasikhemo re, At Tuhan en ayonggo nikherek mene malaikat a'nogo yagati logolik he, henggarok awinggaba ambotkwe kwelakfakhan o, isikhemo, at malaikat a'nogo nen Tuhan nen isikhe mene a'nogo higithogo hilingitikhe.

²⁸ At Daud en wam warogo nolhikhesik samban isikhe mene a'nogo Tuhan nen onggo higithogo hilingitunem hasikhesik he, at Daud en obalik hilingik oba a'nogo ekhe inom wam warogo nolhikheat.

²⁹ Andem oba re, Tuhan awi sabu at Musa nen o leimo omanogo nen wutikhe mene a'nogo inom, wam warogo nolhuba obalik Mezbah a'nogo inom he, o Gibeon samban uogeluk kabogeti lagaukwaba omanogo werek kwelek hilingitukwa.

³⁰ Oba nen he, at Daud he malaikat Tuhan enggarok a'nogo faget ailo nen he, ambong serogo Allah ba ane masi lagi'legengge welagaikhe.