1 TAWARIKH 19 - Allah Wene Fano Wene Hupla Inane

Daud en ap inunggulenu Amon mene inom Siria mene inom mabenet fisasikhe wene

¹ Inenggi ekhe welagaukwasigen he, at raja Amon agun Nahas a'nogo wa'lagaikhemo re, at amlogo Harun a'nogo obali'mo raja menlagaikhe.

² A'nogo menlagaikhemo re at raja Daud en ikhi logolik he, ”Nahas andi re an nagailak ninom hundik logolik tiphogo nek hilingiti laganggere, an nen ogo at amlogo Harun andiba a'nogo hilingisigin,” iluk isikhe. A'nogo isikhesik he at Daud en ap yonggo o Amon omanogo at Harun eisena wa'laga mene andi endawimo koni loageluk lakfisasikhe.

³ A'nogo lakfisasikhemo o Amon omanogo asi lagaukwasik hilingitunemen he, it ap o andoma melalinafi lagaukwa mene inogogwi kaindek omanogo nen hun raja Hanun a'nogoba ikhi logolik he, ”Nineisena haren anggikhi logolik he, Daud en ap lakfisa waga mene andi re aren hat heisena a'nogo along anggikhi logolik lakfisa waga iluk angga fuk! Aren he nit ninaiba ari hela kwi wesigin iluk, ap ineil wanuageluk lakfisa wagama o,” iluk yagatukwa.

⁴ A'nogo yagatukwama re at raja Hanun a'nogo nen he ap Daud en lakfisa wagaikhe inap omanogo fakfisasukwasik he, inomborosi palogo, inasu huli inago bene palogo, hilingfisasukwasik he hinaiba lani iluk yagaisasukwa.

⁵ Oba nen he it inaiba lagu aple inenggali nen he it aremnogo o Yerikho lagaukwa. Wene agaikhe mene a'nogo faget he, a'nogo hilingita o, iluk at Daud yagatukwama esanggo holhikhesik he, at Daud en wene warogo lakfikhi logolik he, it ap andi re o Yerikho andoma were'ma nen inomborosi wulibumo nek he wesuago, iluk wene lakfesikhe.

^6-7 Andi nen he it raja Hanun inom Amon inap inomen he, Niren hilingito andiba re Daud en nit ninom ninaselei aga, anggasukwasik he, iren he ap o Mesopotamia ambolkwe mene inom, nen o Siria inom Zoba inom Maaka inom inoba iren kereta amboloba lagaluk tok yabik lagaikharek inap a'nogo inebe 32.000 nen engge we elama kino uluk hobuk inonggwarek nekhengge wogisogin nen iluk he, perak 34.000 kilo nen lakfesukwa. A'nogo lakfesukwama re it Maaka inaben sikhe fisogo inap a'nogo inom, kereta elama faget onggo fesukwasik kino isukwa mene omanogo inom, wagaukwasik he o Medeba andoma o sabu wurogo nogo iwagaukwa. Nen, it ap Amon inap ogore o kota andoma nen mondogat weim yabugun iluk wagaukwaat.

⁸ A'nogo wagaukwa aple a'nogo at Daud esanggo holhikhesik he, aren Yoab inom it agoromi weim yafarek inap inom a'nogo inoba weim yabi lani iluk yagaisasikhe.

⁹ It Amon inap he wulibi wagaukwasik it inawi kota o Raba leget waganek meneba nen kwe kwi laguba omanogo eratukwa, nen it raja-raja leberisogoin iluk wagaukwa mene omanogo re o leikwe fikhit omanogo eratukwa.

¹⁰ A'nogo eratukwama re at Yoab en kwelakhasikhe re it aselei mene esa logalek a'nogo ambot fikhit ogo nen elokhe fikhit ogo mondogat hobet hasukwasik at he tulem honggole'ma kwelakfesukwama hasikhe. Andiba re aren it Israel mene nen sikhe fisogo mene inafe mondok hibilik-hebelek mene nek penogo fisasikhesik he it tentara Siria inap inom yabuageluk yagaisasikhe.

¹¹ Nen, it Israel mene sikhe fisogo inap alonghogo a'nogo re, at agot Abisai nen woginarek he it tentara Amon inap omanogo inom yabuageluk wogetikhe.

¹² At Yoab en agot oba ikhi logolik he, ”An it tentara Siria mene andi ninom walhugunemen elo'lek agu halok he, hat he weak-weak an lebetnea we'no. Nen an nen ogore hat it tentara Amon mene hinom walhugunemen elo'legat agu halok he, an nen hat lebethea wesigin.

¹³ Hebere hambuget hano! Nit he nit ninunggulenu mene faget inom, o Allah aiba kota-kota andoma faget inom weim yi yabugun enggere. We At Tuhan endawimo anggikhe mene nek hilingisuak,” iluk yagatikhe.

¹⁴ A'nogo yagatikhesik he, at Yoab inom agoromi tentara esa a'nogo inom it Siria inap werek fikhit weim kugun iluk lagunemen he, it Siria inap a'nogo heise pugulik-pagalik isukwa.

¹⁵ It Amon inap a'nogo nen kwelakhasukwa re it tentara Siria inap a'nogo heise pugulik-pagalik ugunem hasukwasik he, it ogore hun Abisai oba sebetukwasik inomat higilogo re inawi kota fikhit enek kwi lagaukwa. At Yoab a'nogo it ap Amon inap inom weim yafukwasik he o Yerusalem lagaikhe.

¹⁶ A'nogo lagaikhemo re it afuni Siria mene nen anggikhi logolik he, nit he ap Israel inaben mabenet ninobagaga iluk anggasukwa. Andiba re it inagoromi tentara o i Efrat ima mo lagai wagarek fikhit welagaukwa mene omanogo wesuageluk wolinafukwasik he, hun panglima Sobakh it hun raja Hadadezer Zoba agun a'nogo agoromi tentara omanogo inoe andi helagerogo weim yabi loageluk miming inafukwa.

¹⁷ It hilingiri'lagwi mene a'nogo Daud esanggo holhikhesik at Daud en agoromi tentara Israel mene omanogo mondogat andogerinafikhesik he, i Yordan palogo wulibi lagaukwasik he, it Siria inap omanogo inelokhe fikhit a'nogo logali lagaukwa. Logali lagaukwasik it a'nogo inom weim yafunemen he it tentara Siria inap a'nogo it tentara Israel inap omanogo nen inoarik-inoarik inambotkwe muginarek lagaukwa.

¹⁸ At Daud agoromi inomen he, it kereta wurik mene amboloba lagaluk laga logolik halik laga lagaukwa mene a'nogo re inebe 7.000 nen inoatukwa, nen it tentara weim yabuogeluk ineisok oba laga lagaukwa mene a'nogo re inebe 40.000 nen inoatukwa. Nen at Sobakh ap Siria mene inoe panglima a'nogo watukwaat.

¹⁹ It raja hun Hadadezer a'ma welagaukwa mene omanogo nen hasukwa re, it inebe ap tentara Israel inap omanogo nen inoatunem isasukwasik he, iren he, ”Hat Daud ninom sebesimbik, hat ha'ma sebeluk, hane hologo hilingiti logogun o,” iluk yagatukwa. A'nogo hilingitukwasik he it Siria inap a'nogo it Amon inop leberiskhi logogun ninabit iluk herakfisasukwa.