1 TAWARIKH 15 - Allah Wene Fano Wene Hupla Inane

Peti Allah nen Wene warogo wo'ninafikhe mene a'nogo waganogo fei wesugun iluk fougetukwa wene

¹ Hun Daud a'nogo nen he o kota elonggoma omanogo o onggwarek werek oba faget wutukwasik he, obalik ekhe re Peti Allah nen Wene warek a'nogo faget ogo o sabu salogo fesukwa.

² A'nogo hilingitukwasik he at Daud en ikhi logolik he, ”It ap Lewi inap andi re Peti andi hambogotik, At obaget mondok-mondok yabu hilingitu welagaik, hilingiti logouwageluk Tuhan nen wenaginafe hilingi'mo re, hit he Peti Tuhan nen Wene warogo wo'ninafe mene andi hambogosi lobagaigo,” iluk yagaisasikhe.

³ A'nogo yagaisasikhesik at Daud en he Peti Tuhan nen wene warogo wo'ninafikhe mene a'nogo obalik pugunetukwama omanogo fouwogeluk logolik he, it afuni Israel mene hokhorogo o Yerusalem kabogesi wesuageluk wolinafukwa.

⁴ Wolinafukwasik, at Daud en he it ap Harun ambisangma mene omanogo inom, Lewi inap inom, andogosuageluk yagaisasikhe.

⁵ A'nogo yagaisasukwama re, it inunggulenu Lewi meneba nen ekhe Kehat mene a'nogo nen he hun Uriel agoromi inebe 120 nen eiso'marogo menlasi wagaikhe.

⁶ It inunggulenu Merari meneba nen he, hun Asaya agoromi inebe 220 nen eiso'marogo menlasi wagaikhe.

⁷ It inunggulenu Gerson mene nen he, hun Yoel agoromi inebe 130 nen eiso'marogo menlasi wagaikhe.

⁸ It inunggulenu Elsafan meneba nen he, hun Senaya agoromi inebe 200 nen mene eiso'marogo menlasi wagaikhe.

⁹ It inunggulenu Hebron mene nen he, hun Eliel agoromi inebe 80 nen eiso'marogo menlasi wagaikhe.

¹⁰ It inunggulenu Usiel meneba nen he, hun Aminadab agoromi inebe 112 nen eisok sobalogo menlasi wagaikhe.

¹¹ A'nogo menlasi wagaukwama re. at Daud en he it imam Zadok inom, Abyatar inom, it ap Lewi inap inebe falfaligen aremnogo et engge: Hun Uriel, Asaya, Yoel, Semaya, Eliel, Aminadab inom, aremnogo wolinafikhe. Wolinafikhesik yagaisikhi logolik he,

¹² ”Hit hinebe re ap inunggulenu Lewi meneba nen it ineisok erokwe omanogo faget inogogwi kepala welagep. Andi halok he, it inom it ap Lewi inap amu mene ekhe inom he, afuni Israel mene ineisena Tuhan Allah a'nogo nen Peti Wene warogo wo'ninafikhe mene a'nogo waluk he, an nen obalik fougetiba ari fei wesubagaigen he hit hinebe fanorogo tegelogo fakhano o.

¹³ Attak he Peti andi waluk wesugun iluk hilingitugu sambul a'nogo re fanorogo hambuget haluk waluk wesu mene re hit hinebe lek welagep. Andiba re, nit Nineisena Tuhan Allah a'nogo nen he, niren At endawimo anggikhe lek mene higithogo fogeratugu lek andiba re unggum wo'nisikhe andi,” iluk yagaisasikhe.

¹⁴ A'nogo yagaisasikhe andiba re, it Lewi inap inom, imam omanogo inom he, it afuni Israel mene ineisena Tuhan Allah nen Peti Wene warogo wo'ninafikhe mene a'nogo waganogo waluk fei wesuogeluk he, it inebe fanorogo tegelogo fakhasukwa.

¹⁵ A'nogo hilingitukwasik he, iren Peti a'nogo hambogoluk waga logolik he, wene melalek At Tuhan nen Musa bene yagaisasikhe higithogo re, iren eba piarogo wa'luk wagaukwa.

¹⁶ At Daud en it Lewi inap inogogwi melalinafu mene omanogo inoba yagaisikhi logolik he, ap it inunggulenu mene fena nen wuni wulak fuluk, inagaiyek oba pinggong kecapi inom, simbal inom, warik wesuageluk yagaisasikheat.

^17-21 It wuni wulafu aple faget kepala mene andi ineisok erokwe nen he, iren pinggong simbal perunggu ba hilingik mene a'nogoba warik wesuageluk ap wenagaisogo fisasukwa mene inebe re yi: Heman hun Yoel amlogo a'nogo agaila'lak inenu re Asaf hun Bereknya amlogo a'nogo inom he, Etan hun Kusaya amlogo unggulenu Merari mene a'nogo inom. Iren watu mene a'nogo inom laga logolik pinggong kecapi andi ane legeisogo watu mene faget iluk he, it Lewi inap wenagaisogo fisasukwa mene inenu re yi: Zakharia, Yaaziel, Semiramot, Yehiel, Uni, Eliab, Maaseya, Benaya inom andem fisasukwa. It pinggong kecapi a'nogo ane sebelogo watu mene faget iluk he, it Lewi inap omanogo wenagaisogo fisasukwa mene inenu re yi: Matica, Elifele, Mikneya, Azazya, inom he, it Tuhan awi wuri'mo kagalek welagaukwa mene Obed-Edon inom, Yeiel inom, andem fisasukwa.

²² Hun Kenanya andi re pinggong watu mene faget he, elu mondok welagaikhemo re it inunggulenu Lewi inap pinggong warik lagu mene a'nogo inoe kepala hakhogo re at menfesukwa.

^23-24 Nen, it hun Bereknya, Elkana inom, Obed-Edon inom he Peti Tuhan nen Wene warogo wo'ninafikhe a'nogo kagalek logouwageluk wenagaisogo fisasukwa. Nen, it imam Peti a'nogo elokhe kwe attak trompet oba furik laga logogun mene faget wenagaisogo fisasukwa mene inenu re: Sebanya, Yosafat, Netaneel, Amasai, Zakharia, Benaya, Eliezer inom andem fisasukwa.

E Peti Tuhan nen Wene Warogo wo'ninafikhe mene a'nogo waganogo o Yerusalem fei wagaukwa wene

²⁵ A'nogo mondogat fougetukwasik he at raja Daud inom, it Israel inap inogogwi kaindek mene omanogo inom, it sikhe fisogo mene inogogwi perwira omanogo inom, Peti Wene warek a'nogo obaget hokho aple hilingiti logolik hambogosugun iluk hun Obed-Edom aiba a'nogo lagaukwa.

²⁶ Lagaukwasik he, it Lewi inaben Peti Wene warek a'nogo fanorogo pialuk wagunem Allah nen leberisasikhemo wagaukwasik he Allah obaget wam sapi ai mene sabiren inom, domba ai mene ebe sabiren inom warogo noletukwa.

²⁷ A'nogo hilingitukwa sambul andi re at Daud he asu kain linen eil sakhorek meneba seleben segengge laberogo, nen it pinggong warik laga lagaukwa mene inom, hun Kenanya it melalinafi lagaikhe agun andi inom, it Lewi inap inom, ogore a'nogo nek laberek welagaukwa. Nen at Daud ogore asu efod su mene labetikheat.

²⁸ It afuni Israel mene inebe mondogat ogore Peti Wene warek a'nogo pia'luk o Yerusalem fei wagunem andi re inagaiyegen a'mit suphogo re trompet a'nogo futik, nafri watik, simbal pirenet engge tololang etik, kecapi kong etik, hilingirik wagalagaukwa.

²⁹ A'nogo hilingirik waga lagaukwasik he Peti a'nogo waluk o silimo kota a'nogo elonggoma kwi wagunem he, at Saul a'logo he Mikhal a'nogo o jendela hurik elekwe nen eilenggen yethasikhe re at raja Daud a'nogo agaiyegen he fogoil hilik waga lagaikhe. A'nogo hilingirik wagunem hasikhesik he at he Mikhal a'nogo nen he endawimo hebak afe agaikhe.