1 TAWARIKH 11 - Allah Wene Fano Wene Hupla Inane

Daud it afuni Israel mene inom Yehuda mene inom inobaget inoe raja menlagaikhe wene

¹ It Israel inap inogogwi kaindek inebe mondogat at Daud ambit o Hebron lagaukwasik oba yagati logolik he mel yagatukwa, ”Nit yire ninoe hun hokho hagaila'lak hamep mene wago o.

² O attak at Saul en nit fetninarek logolik melalninafunem aremnogo nenat, it Israel inap weim yabi logoin iluk hilingitunem he ninoe hun hokho harenat it sikhe fisogo inap omanogo woginarek kwikhi lagagin anggigi. Nen, andi nen At Tuhan nen wene watheti logolik ogore, ’Hat he An nagainafuri inobaget inoe raja logolik melalinafi logoinogen menhobagagin o,’ iluk abok yagahetikheat anggigi, iluk yagasi lagaukwa.

³ A'nogo yagasi lagaukwama at Daud a'nogo it afuni Israel mene inogogwi omanogo inom o Hebron nen Tuhan elokhoma ane hombuk palhikhemo re, Tuhan nen hun Samuel ebe nen, ”At Daud a'nogo asigin,” iluk abok isikhe higithogo re, iren at Daud ungguloba amusu warogo afuni Israel mene inobaget inoe raja logouwageluk menfesukwa.

⁴ Linggene ekhe sambul he, at raja Daud inom, it Israel inap inagoromi sikhe fisogo mene omanogo mondogat inom he, o kota Yerusalem pin kwi lagaukwa. Andem oba re o kota andi re enu Yebus salogo it afuni o kota andi inonggwarek eisewerek Yebus inap omanogo welagaukwa.

^5-7 It afuni Yebus inap omnogo nen Daud oba ikhi logolik he, ”Hat he nit ninawi kota yiba kwi wesigin lek,” iluk yagatukwa. Oba nen he at Daud en it inebe himbirengge enu Sion a'nogo sebeli kwisikhe. Andem sambul he at Daud en it agoromi omanogo inoba wene menfikhi logolik he, ”Ap misik ekhe nen fem attak-attak ap Yebus mene ekhe wasigin halok he, ap andi it ap sikhe fisogo mene inoe panglima asigin,” iluk ane menfesikhe. A'nogo ane menfesikhemo nen he at Yoab a'nogo nen tak it afuni Yebus mene were'ma weim sineli kwisikhemo, at a'nogo it sikhe fisogo mene inoe menfesikhe. (Yoab agaisa enu re Zeruya.) It Yebus inaben himbirengge enu Sion a'nogo sebeli kwisikhesik he, at Daud a'nogo o andoma welagaikhe. Andiba re it inendawi himbirengge a'nogo huli andi nen enu Daud awi kota.” iluk ikhi lagaukwa.

⁸ Kota a'nogo at Daud en nekhengge wusigin iluk he, kweang attak punurogo filik lagasikhe mene o punu mo wulibi wagarek higit andoma eroratikhe, andi nen hobuk he o a'nogo at Yoab en fakfesikhesik he mondogat wurogo fesikhe.

⁹ At Tuhan Omame Hokho mene a'nogo nen lebet hugunem a'luk he Daud a'nogo ekhe inomat omame aga lagaikhe.

At Daud raja were'ma obaget ninghogo hilingiti lagaukwa mene a'nogo

¹⁰ At Daud agoromi a'ma mene Daud obaget hilingitu hobalhu welagaukwa inap a'nogo inenu re yi: It andi re afuni Israel mene inom he at Daud raja menlasuak iluk Tuhan nen, a'nogo asigin, iluk abok isikhe higithogo obaget hilingiti lagaukwa inap. Nen, it andi re at Daud raja menlagaikhemo nen ogore obaget hilingiti logolik mondok welagaukwa inap a'nogo.

¹¹ Ap sikhe fisogo mene inap inoe perwira attak mene andi re hun Yasabam o Hakhmoni mene andi, aren it inunggulenu Triwira ”Esa Henagan,” ikhi lagaukwa inap andi melalinafu mene faget mendek welagaikhe. Hun andi re enggi ekhe sambul weim yafi logolik he ap inebe 300 nen mene arigeba talhigik inoatikhe agun.

¹² It inunggulenu triwira Esa Henagan andiba nen ap pirenek mene re hun Eleazar hun Dodo amlogo it inunggulenu Ahoi mene andi welagaikhe.

^13-14 O Pas-Damim andoma weim yafi logolik he, aren Daud ebikhit agaikhesik it Filistin inap werekwe weim yabi lagaukwa. Nen, it Israel inap sikhe fisogo mene omanogo heise wulifu kwelek he at inom at agoromi inom enek he no gandum yago mene yabumo andoma nen hambuget fesukwasik, it Filistin inap a'nogo inom weim yafukwa. A'nogo yafunemen At Tuhan nen omamet fesikhe mo aselei mene a'nogo mondogat mabenet fisasikhe.

^15-16 Linggene ekhe sambul he it Daud agoromi perwira inebe 30 omanogo mene henagan ekhe o Adulam Oumo tom oba helep leget hakhogo wagane'ma andoma at Daud inom ambi asuogeluk lagaukwa. Andi sambul he it afuni Filistin mene re o Refaim tonggoma andoma inawi tenda wurogo were'ma. Nen it esa ekhe re o Betlehem sebeli kwisukwasik welagaukwa.

¹⁷ A'nogo lagaukwama re at Daud awi eroma faget endawi nunggu nen he aren ikhi logolik mel isikhe, ”Eige, an he o Betlehem kwe kwi laguba i mogo habuli'mo a'nogo mene hinagongge ekhe nele e,” iluk isikhe.

¹⁸ A'nogo ugunem holhukwasik he, it ap sikhe fisogo mene inogogwi perwira henagan aremnogo re sorogo it Filistin inap inawi sabu salogo welagaukwa kwe a'nogo nen he i mogo a'nogoba hinasi lagaukwasik waluk Daud wogosi wagaukwa. Wogosi wagaukwama nen he at Daud en ninggi'legengge Tuhan obaget hilingiti lagi iluk he kweisalisasikhe.

¹⁹ Aren ikhi logolik he, ”Neisena Allah oak, an i yire nagain lek! Nen, an nen i yi nagain halok he, andi re an nen it ap inebe wenalu werek kwelek hinasi lagaikha inap yi namep na hak nagain andi re nabit!” iluk isikhe. Andi nen he at Daud en i a'nogo nasikhe lek andi. It ap inebe henagan Daud obaget ninghogo hilingiti lagaukwa inap andemen hilingitukwa mene re andi.

^20-21 It ap sikhe fisogo mene inogogwi perwira inebe 30 nen mene andem faget inenu re, ”Esa 30 nen,” u hak Tridasawira iluk ikhi lagaukwa. It inenu andi inap andi re hun Abisai, Yoab agot a'nogo nen melalinafi lagaikhe. Aren he ap inebe 300 nen mene inoatikhe more, at he enu lego agun welagaikhe. Oba nen, at he ap inenu Triwira inanini inap andi inom he higitsek lek welagaikhe.

²² Ap misik lego mene ekhe inu Benaya hun Yoyada amlogo awi Kabzeel agun ekhe welagaikhe. At andi re ailo'lek mondok li'lek agun welagaikhe. Hun andi nen he it Moab mene inobaget hilingiti lagaukwa inap inogogwi pire mene ekhe inoatikhe. Nekhe agun andi nenat enggi ekheba o salim es mondok huli'liphogo hilingi'mo kiling elekwe kwi lagaikhesik mene singa misik ekhe wasi kwisikheat.

²³ Aren he ap Mesir agun obakhe mondok hokho agun misik ekhe watikhe. Hun andi oak huse welagaikhe mene re 2 meter eil ambolkweat welagaikhe. Nen, ap andi re arige kabelek obakhe mondok hokho mene waluk nikhi lagaikhe, oba nen he at Benaya re tomuk senogo aiba lagaikhesik wasi lagaikhe andi. Ap Mesir agun andi arige enggim senek welagaikhe mene a'nogo telogo wanhikhesik he oak waganogo onggwarek ebe pinggi watikhe.

²⁴ Hun Benaya andi re it inenu Esa 30 nen u hak Tridasawira, ikhi lagaukwa mene a'nogoba welagaikhe agun. Aren hilingiti lagaikhe mene re andoma.

²⁵ It Esa andiba mene re at Benaya andi nek he mondok elokhoma agun welagaikhe, oba nen at he it inenu Esa Henagan u hak Triwira ikhi lagaukwa inap andi nen hilingik welagaukwa hakhogo hilingik welagaikhe lek. At Daud en he hun Benaya a'nogo at onggwarek ebe kagalek nugu mene faget inoe kepala menfesikhemo welagaikhe.

^26-47 A'makwe yire it sikhe fisogo mene inogogwi: perwira amu mene mondok lego welagaukwa inap a'nogo re yi: Asael Yoab agot a'nogo inom, Elhanan hun Dodo awi Betlehem mene amlogo a'nogo inom, Samot awi Harod mene a'nogo inom, Heles awi Peloni mene a'nogo inom, Ira hun Ikes amlogo awi Tekoa mene a'nogo inom, Abiezer awi Anator mene a'nogo inom, Sibkhai awi Husa mene a'nogo inom, Ilai awi Ahohi mene a'nogo inom Maharai awi Netofa mene a'nogo inom, Heled hun Baana amlogo awi Netofa mene a'nogo inom, Itai hun Ribai amlogo awi o wilayah it inunggulenu Benyamin meneba nen o Gibia agun a'nogo inom, Benaya awi Piraton mene a'nogo inom Hurai awi o Gaas tonggokwe omanogo mene andi inom, Abiel awi Araba mene andi inom Azmawet awi Bahurim mene andi inom, Elyahba awi Saalbon mene andi inom, Hasyem awi Gizon mene andi inom, Yonatan hun Sage amlogo awi Harari mene a'nogo inom Ahiam hun Sakhar amlogo awi Harari mene a'nogo inom Elifal hun Ur amlogo andi inom, Hefer awi o Mekherati agun andi inom, Ahia awi Peloni mene andi inom, Hezrai awi Karmel mene andi inom, Naari hun Ezbai amlogo andi inom, Yoel abo Natan agailak andi inom, Mibhar hun Hagri amlogo andi inom, Zelek awi Amon mene andi inom, Naharai awi Beerot agun at Yoab sikhe waluk nikhi lagaikhe agun andi inom, Ira inom, Gareb inom inawi Yetri inap andem inom, Uria awi Het agun andi inom, Zabad hun Ahlai amlogo andi inom, Adina hun Siza amlogo (It inunggulenu Ruben mene inoe at attak mene agoromi inebe 30 nen welagaukwa) mene andi inom, Hanan hun Maakha amlogo andi inom, Yosafat awi Mitni mene andi inom, Uzia awi Asyatarot mene andi inom Syama inom, Yeiel inom hun Hotam o Aroer mene andi againafuri andem inom, Yediael inom, Yoha inom, hun Simri awi Mahawim mene andi inom, Yeribai inom, Yosawya inom, hun Elnaam againafuri andem inom. Yitma awi Moab mene andi inom, Eliel, Obed, Yaasiel inawi o Mezobaya inap andem inom welagaukwa.