1 SAMUEL 9 - Allah Wene Fano Wene Hupla Inane

Saul Samuel emberek ambi agaukwa wene

¹ Ap ekhe inunggulenu Benyamin mene, ebe kain angge yi mene ti mene hokhorogo logolik along-palonghogo welagaikhe mene enu re, Kish. Kish andi eisena re, Abiel. Nen, Abiel eisena re Zeror, Zeror eisena re Bekhorat, Bekhorat eisena re Afiah.

² At Kish andi amlogo re, ap souge fano mondok mene enu Saul welagaikhe. Afuni Israel mene ap mondogat endebat fano hangge meneat he, arenek he, eil alili mondok fano pugunsek welagaikhe. At oakhuse re it Israel mene endep mangge omolo huli werek kwelek arenek he mondok uan mene welagaikhe.

³ Were'ma, inenggi ekhe sambul he, at Kish anggo keledai fenakwe longgosikhe. A'nogo longgosikhe andi nen he, at Kish nen he, Saul mel yagatikhe: ”Hamingmingengge ekhe hemberek he, wam keledai omanogo herasi lani o,” iluk yagatikhe.

⁴ A'nogo yagatikhemo, at Saul amingmingengge a'nogo emberek wam a'nogo o tom Efrayim oba inom, o Salisa andoma inom, mondogat yiling-waling heratukwa mene re, heratukwa mondok lek. Andi nen he, o Sahalim kwe heratukwa mene re, andoma legaren he, hobuk afuni Benyamin mene inaiba herasi lagaukwa ma nen he, le'ma nong agaukwa.

⁵ O andoma legen he, hobuk o Zuf lagaukwasik, at Saul en amingmingengge a'nogo mel yagatikhe: ”An neisena wam keledai faget endawi fiti'lek nit ninebe faget endawinggen fiti logoinogo nen he, ninambotkwe louwogo,” iluk yagatikhe.

⁶ A'nogo yagatikhemo, at amingmingengge a'nogo nen he, ”Ah, nenangot hambigen, ap o kota yi mene ebe Allah amingmingengge mene re, wene aren ugunem sugi agi'lek tibenek ugunem afuni nen agaugweratarek mene ekhe werego. Halok he, aren wam keledai longgoikhe mene andi, koma werek, iluk yaganisagain enggere, at oba louwogo,” iluk yagatikhe.

⁷ A'nogo yagatikhemo, at Saul en he, ”Nit Allah amingmingengge andi oba logoin halok he, niren nena mene wogosugun anggegen? Niren kwemangge waluk wago mene aremnogo mondogat lek agama, amungge ogo ekhe werek lek omari,” iluk yagatikhe.

⁸ A'nogo yagatikhemo, at amingmingengge a'nogo nen he, ”Fanoasuak, an mene uang perak misigat ekhe welagama yi. Halok he, at Allah amingmingengge andi nen, Wam keledai andi andoma werek, iluk yaganisoagen he, uang yi wogosuogo,” iluk yagatikhe.

^9-11 A'nogo yagatikhemo, at Saul en he, ”Fano. Nit at oba louwogo,” iluk yagatikhesik, o kota ap Allah amingmingengge a'nogo were'ma lagaukwa. Lagaukwasik o kota lagauwogoluk tom oba lagasukwa hak he, helime silerik inebe fenakwe ekhe i mogo habuli'mo hinatunem inom ambi agaukwasik he, ”Ap heinogengge a'naga o kota yoma werega?” iluk heinok wogisasukwa. It afuni o andem oba welagaukwa andem sambul he, at ekhe nen wene ekhe Allah oba heinok wokhogoin halok, ”Nit ap Allah ane yagaisikherek mene oba louwok, u hak he, nit ap heinogengge oba louwok,” iluk ikhi lagaukwa andi nen, iren helime silerik omanogo a'nogo yagaisasukwa andi.

^12-13 A'nogo yagaisasukwama, it helime silerik omanogo nen he, ”At he, werek. We yogondak yaat hinelokhoma porem lili'lago. Hit weak-weak logoin halok he ebe mukha logoin. Yogondak afuni inobaget punuba andoma mezba oba wam warogo nolugun nen he we yogondagat waga o, at o kota yogondagat kwikhesik werek enggere hinom ambi asugun. Wam Allah faget warogo nolesugun mene andi oan Allah nen fanot fouwagaluk ayonggo figi'le'ma re, afuni inayonggo fogoin mene andoma inambengge ekhe nogoin lek andi nen, attak o kota kwikhe o. Halok he, yogondak yaat sumburu nageluk tom oba oan lagagi'le'ma ambi asi lani o,” iluk yagaisasukwa.

¹⁴ A'nogo yagaisasukwama, at Saul amingmingengge emberek a'nogo o kota kwisukwasik, kwe ambe pale'ma kwisukwa hak he, Samuel punuba Allah faget hilingisugun oba lagaigiluk wulibi wagaikhe hak inom ambi agaukwa.

¹⁵ Inom oan ambi agi'lek logolik hobit hak he, Tuhan nen Samuel yagati logolik:

¹⁶ ”An nagainafuri afuni Filistin mene nen ferinarek logolik weagerinafunem, an nen telinabuageluk le aga logolik kino yaganeti lagaikha mene andi, inane an arat nesanggo holhirik, o hobit huberat siakhogo o mo ya higirat ap ekhe unggulenu Benyamin mene hinom ambi asuagaluk hoba lakfei wesigin a'naga o. Andi nen he, hemberek ambi agep halok he, at andi nen an nagainafuri Israel mene telinabigin a'naga re, haren, inoe enupogot logouwagaluk amusu unggul oba kweisalogo menfeino o,” iluk yagatikhesik oba nen emberek a'nogo ambi agaukwa andi.

¹⁷ Andi nen he, at Samuel eilenggen Saul yetha wagunem he, Tuhan nen mel yagatikhe: ”An nen o hu'mo yagaheti a'nogo ap ebe yi aro. Aren nagainafuri ferinarek logogin o,” iluk yagatikhe.

¹⁸ A'nogo yagatu kwelek, at Saul a'nogo horokhogo kwe ambe pale'ma kwisikhesik he, Samuel mel yagatikhe: ”Noe, ap heinogengge a'naga aiba koma werek he,” iluk heinok wokhasikhe.

¹⁹ Heinok a'nogo wokhugunem, ”Heinogengge andi, an nebe yi aro. O yogondak hit sumburu an ninom nambik, ohealek hubet siakhogo hit wene mondogat heinok wo'neogoin mene andi onggo yagahisugunemen, hinambotkwe lobagaigen he, o punuba Allah faget hilingisugun oba andoma hit tak lagakhi logoni o. An hinombo'ne lagai wesigin.

²⁰ Nen, hat hanggo keledai hup henagan longgoikhe mene andi re, arat herata andi nen he hendawi fitun o. Nen, andi nek lek oba nen afuni Israel mene were'ma nen, ebe mondok esin onggo hokho anggagarek mene andi, hat hebe inom, heisena eisok erokwe inom, wokhisamo eise asugun o,” iluk yagatikhe.

²¹ A'nogo yagatikhemo, at Saul en he, ”Noe. An yi re nunggulenu Benyamin mene, it Israel meneba inunggulenu werek mene omanogo nen an enek he nunggulenu endep mene, nen an neisok erokwe mene ogore nit ninunggulenu andiba nen he mondok elo'lek mene. Ariginik oba nen he nenahalok neisena haren an noba a'nogo yaganeti lagen?” iluk yagatikhe.

²² A'nogo yaga'luk lagasukwama, at Samuel hobuk lagasikhesik, Saul amingmingengge a'nogo emberek o hulu hokhoma kuogoluk yagaisasikhesik, kwisukwasik he, afuni inayonggo fesikhe mene inebe 30 nen omanogo kursi ambotma meneba hu'lagaukwama, irenek he kursi elokhoma ap kaindek hu'lagaikharek oba hu'lasuagaluk yagaisasikhe.

²³ A'nogo hu'lagaukwama, at Samuel en ap isati lagaikhe mene a'nogoba mel yagatikhe: ”Wam kurik wokheti a'nogo tak isagaisogo ale'ma fei we'no o,” iluk yagatikhe.

²⁴ A'nogo yagatikhemo, aren he, wam oak mene kurik wendeberogo isagaisogo re, Saul awe a'ma fei wagaikhemo, at Samuel en he, mel yagatikhe: ”Wam isago yoma re, hat faget afuni inayonggo figi mene yoma hinom logolik nanogoluk ale'ma tegelogo figi mene. Halok he, nan o,” iluk yagatikhe. A'nogo yagatikhemo andi sambul Saul at Samuel emberek wam inom, sumburu inom nasukwa.

²⁵ A'nogo naluk he, o punuba nen o kota pi wagaukwasik, at Saul o senggelek ambolkwe meneba nogouwageluk yagatukwama nogosikhe.

At Samuel en Saul raja logouwageluk menfesikhe wene

²⁶ A'nogo nogo isikhesik o weigiluk hil mogolhu kwelek, at Samuel en Saul o senggelek ambolkwe mene a'nogoba nogogunem woletikhesik mel yagatikhe: ”An nen lakhobagai lagen he, weak-weak heluk ame o,” iluk yagatikhemo, Saul eluk agaikhesik Samuel emberek wulibi wagaukwa.

²⁷ Wulibi wagaukwasik, o kota era'lu horokhogo asi lagaukwasik he, at Samuel en Saul mel yagatikhe: ”Hamingmingengge ari nit hobuget ninobagaluk attagat loagen yagaom o,” iluk yagatikhemo, at Saul en amingming engge a'nogo yagatikhemo, attagat asi wagaikhemo, at Samuel en mel yagatikhe: ”Allah nen yagahesuagaluk ikhe mene ekhe yagahesigen he, arem logoin o,” iluk yagatikhe.