1 SAMUEL 8 - Allah Wene Fano Wene Hupla Inane

Afuni Israel mene nen he, ”Ninoe raja ekhe menfogoin o,” iluk kino isukwa wene

¹ At Samuel arat yaman agaikhesik he, amlogomi at obulu'mo afuni Israel mene inogogwi logolik, wene inoba figik, kotik, ikhi logouwagaluk menfisasikhe.

² Amlogomi andem manggusa mene enu re, Yoel, nen ombo'ne mene enu re, Abia. It andem o Bersyeba logolik wene afuni Israel mene inoba figik, kotik, ikhi lagaukwa.

³ A'nogo meneat he, it inobabut he, ineisena obabut higithogo hilingiti lagaikhe hak hilingiti lagaukwa lek. We, inonggwarek faget saburikhi logogun mene nek hilingiti lagaukwa. A'nogo hilingiti logolik, afuni weak hilingitarek mene nen he, at Samuel againafuri it werekwe asuagaluk uang inoba waluk wagunem helikhi logolik, wene afuni inoba higithogo figik, kotik, ikhi lagaukwa lek.

⁴ A'nogo hilingiti lagaukwa andi nen, afuni Israel mene inogogwi mondogat andogotukwasik, Samuel o Rama were'ma oba wagaukwa.

⁵ A'nogo wagaukwasik he, mel yagatukwa: ”Hesanggo holin o, nineisena hat hebe arat yaman agen, nen hagainafuri inobabut he, hat hilingitendek hanggere lek. Andi nen he, afuni inunggulenu hunogoat mene inogogwi raja logolik higithogo ferinarek welagaikharek andi hak, nit ogo ninoe raja ekhe logolik fetninarek logouwagen he, ap ekhe heragaisogo menfeinogo, nineisena,” iluk yagatukwa.

⁶ A'nogo yagatukwa meneat he, iren kino isukwa mene andi, at Samuel endawimo weak agaikhemo, samban oba nineisena Tuhan yagatikhe.

⁷ A'nogo yagatikhemo, Tuhan nen onggo yagati logolik he, ”Iren hat inoe raja logogin inabiren ili'lagwi fuk. We, Anat inoe raja logogin inabiren ili'lagwi o. Ma re, iren kino yagaheta mene andi mondogat inane hesanggo holino o.

⁸ An nen it o Mesir en woginarek wulibi wagagi andi huli nen, An heraknobagaluk wulifasik he, tugwi kembu fogerari'lagwi andi. Andi nen he, it inobabut An noba a'nogo hilingnafi lagaikhasigen yogondak he hat hoba a'nogoat hilinghabi'lagwi andi.

⁹ A'nogo hilingiri'lagwi andi nen he, iren kino yagaheta mene andi inane hesanggo holino o. A'nogo meneat he, haren mel yagaisano: Hobuk ap ekhe hinoe raja menfogoin meneat he, yi'nogo hilinghinafi logogin, iluk inelurogo yagaisano o,” iluk yagatikhe.

¹⁰ At Samuel en wene nineisena Tuhan nen yagatikhe mene andi mondogat it ap inoe raja ekhe menfouwagaluk kino yagatukwa mene omanogo yagaisikhi logolik mel yagaisasikhe:

¹¹ ”Hobuk hinoe raja andi menfoumo yi'nogo hilinghinafi logogin. Aren he, hit hinagainafuri tentara asuagaluk ane ning-nanghogo yagahisikhi logogin. It andi esa ekhe kereta waluk nikhi logogun mene menfisigik, esa ekhe wam kuda ambol oba hurek nikhi logogun mene menfisigik, nen at enupogot andi ebe angge kereta ba lagu kwelek, it esa ekhe ineisok oba humusek attak-attak laga logogun mene menfisigik, ikhi logogin andi.

¹² It ekhe tentara inebe 1.000 mene inogogwi logouwagaluk menfisigik, it ekhe tentara 50 mene inogogwi logouwagaluk menfisigik, ikhi logogun. A'nogo hilingiti logolik, hinagainafuri ekhe at eabu wokfisikhi logouwagaluk yagaisigik, it ekhe awi yago mene ebe tatik, palhik, ikhi logouwagaluk yagaisigik, it ekhe sige sikhe wutik, kabelhik, ikhi logouwagaluk yagaisigik, it ekhe yi mene ti mene kereta weim yafarek mene faget hilingiti logouwagaluk yagaisigik, ane ning-nanghogo yagaisikhi logogin aro.

¹³ Nen, hina'logomi re, amusu amben mondok fano mene hilingiti logouwagaluk yagaisigik, sumburu roti mene inom, yi mene ti mene inom, isatik, weratik, ikhi logouwagaluk yagaisigik, ikhi logoginat.

¹⁴ A'nogo hilingiti logolik, aren he hit hineabu mondogat helikhi logolik, hinanggweang anggur yabu inom, zaitun yabu fanoma andoma inom helaluk he at agoromi pegawai faget wogisikhi logogin o.

¹⁵ Nen, hit hineabukwe ekhe inom, anggur yabukwe inom, yi mene ti mene awi yasugun mene enggen hinenggi wenakhaluk, 10 ba asi lagu halok, hokhokwe 9 hit aga logolik, ekhe misik andi at raja faget fisugunem, aren agoromi tentara inogogwi mene inom, agoromi ekhe inom, wogisikhi logogin aro.

¹⁶ A'nogo hilingiti logolik, at eabu hilingiti logouwagaluk hit hinamingmingengge hemi inom, ap inom waganogo, at faget hilingiti logouwageluk fisigik, hinanggo mondok fano mene omanogo at heligik, hinanggo keledai re at eabu hilingiti logouwageluk heligik, ikhi logogin o.

¹⁷ Hit hinanggo domba kambing mondogat hinenggi wenagaisogo 10 asi lagu halok, hokhokwe 9 he hit aga logolik, misik andi at helikhi logogin, hit hinebe at amingmingengge logouwagaluk hilinghinafi logogin a'naga o.

¹⁸ A'nogo hilinghinafunem weakhogo logolik, hiren he, Nit ninoe raja heragaisogo menfogo a'nogo nen weak mondok hilingninabi'lago yi re, ninabire, iluk nineisena Tuhan yagati logogun meneat he, Aren hit hinane esanggo holhi logogin lek a'naga o,” iluk yagaisasikhe.

¹⁹ A'nogo yagaisasikhe meneat he, it afuni inunggulenu andi inaben he, ”Samuel ikhe andi weak ikhe,” iluk herakfisasukwasik he, mel yagatukwa: ”Nit ninoe raja ekhe logogin ninamolo anggogosi'mo re, nit he ninoe raja wo'nisagainaro,” iluk isukwa.

²⁰ Nit he, afuni inunggulenu hunogoat mene inogowi raja were'ma welagaikharek andi hangge logogun ninamolo. Nit ninoe raja andi menfoumo, aren nit fetninarek logolik, weim yafunem wo'ninarek nikhi logogin ninamolo o,” iluk yagatukwa.

²¹ At Samuel en wene a'nogo yagatukwa mene andi mondogat esanggo holhikhesik, nineisena Tuhan yagatikhemo,

²² Tuhan nen he, ”Haren it inane holimbik he, it faget ap ekhe inoe raja logouwagaluk unggul sebelogo menfeino o,” iluk yagatikhemo, at Samuel en afuni Israel mene omanogo pugulogo inaiba lombok wulaginafikhe.