1 SAMUEL 5 - Allah Wene Fano Wene Hupla Inane

Peti Wene Warogo Allah nen wo'ninafikhe iluk hilingik a'nogo afuni Filistin mene inanggele'ma welagaikhe wene

¹ Afuni Filistin mene nen Peti Wene Warogo Allah nen wo'ninafikhe, iluk hilingik a'nogo telogo waluk o Eben-Haezer en he, it inawi kota enu Asdod andoma fei lagaukwa.

² Fei lagaukwasik, peti a'nogo it inandugwi kembu fogeratarek mene enu Dagon andi awi wuri'mo ebe welagarek oba era'lu fei kwisukwa.

³ A'nogo fei kwisukwasik, ohealekwe afuni o kota Asdod andoma welagaikharek mene o huberat siakhogo wagaukwasik kwelakhasukwa re, kembu Dagon a'nogo tamakhogo elokhe sogoum lagaikhesik, Peti Wene Warogo Allah nen wo'ninafikhe, iluk hilingik a'nogo elokhoma were'ma hasukwa. A'nogo hasukwasik, kembu a'nogo ambotkwe waganogo obuluk welagaikheba aremnogo menfesukwa.

⁴ A'nogo menfesukwa meneat he, ohealek hubet kwelakhasukwa re, kembu a'nogo Peti Wene Warogo Allah nen wo'ninafikhe, iluk hilingik a'nogo elokhoma tukhumhogo lagaikhesik were'ma hasukwaat. Andi sambul enek he, kembu a'nogo ungguloak inom, enggi fena-fena inom, tekhogo re, kwe kwagarek oba were'ma, obakhe tulem enek he aremnogo were'ma hasukwa.

⁵ (A'nogo hiling lagaikhe andi nen, ap kembu Dagon eisewerek mene inom, afuni inebe lombok inanggembu Dagon fogeratarek mene o Asdod welagaikharek mene inom, tugwi kembu Dagon awi wuri'mo kwikhi logolik halok he ebekhalem andem yogondak huli nen ineisok sebelhigi'lek afane kwi lagaikharek.)

⁶ Hobuk he, at nineisena Tuhan nen he, afuni Filistin mene o kota Asdod welagaukwa mene inom, o esanggokwe yi awi ti awi welagaukwa mene inom, wene inoba fikhi logolik, ou weak mene inebene tuk-tugengge hilinglasuagaluk inoba fesikhe.

⁷ A'nogo fesikhemo inebene a'nogo agunem hasukwasik, mel isukwa: ”Afuni Israel mene ineisena Allah nen nit ninebe inom, ninandugwi kembu Dagon inom, wene enggin mene ninoba fikhe o. Andi nen he, Peti Wene Warogo Aren woginafikhe iluk hilingik mene andi o yoma aninurogo fisogo logogun mondok lego,” iluk isukwa.

⁸ A'nogo isukwasik, afuni Filistin mene inogogwi kaindek inebe 5 nen omanogo andogosi wesuagaluk inayonggo fesukwa. Inayonggo fesukwama wagaukwama re, mel yagaisasukwa: ”Afuni Israel mene ineisena Allah nen Peti Wene Warogo woginafikhe iluk hilingik mene andi ninggi'nogo hilingisugun anggegep,” iluk heinok wogisasukwama, iren he, ”O Gat andoma lakfeino o,” iluk yagaisasukwa. A'nogo yagaisasukwama, afuni Filistin mene inaiba kota ekhe enu Gat andoma lakfesukwa.

⁹ A'nogo fei lagaukwa meneat he, peti a'nogo o andoma fei lagu kwelek inenggi andibaat, nineisena Tuhan nen afuni o kota andoma mene wene inoba fesikhesik, yenggerugwi inom, inaluendek inom, mondogat inebene tuk-tugengge hilinglasuageluk inoba fesikhe, a'nogo fugunem inailo nen inane mondok hokhorogo sagalik lagaukwa.

¹⁰ Inane a'nogo sagalik lagaukwasik, Peti a'nogo afuni Filistin mene inawi kota ekhe enu Ekron agarek oba andi waluk lagaukwa. A'nogo waluk lagaukwasik, o kota andoma fei lagunem he, afuni o kota andoma mene nen inane hokhorogo mel isukwa: ”Afuni Israel mene ineisena Tuhan nen Peti wene warogo woginafikhe iluk hilingik mene andi nit ninebe mondogat ninoasuagaluk waluk wagaikha andi nenahalok,” iluk isukwa.

¹¹ A'nogo isukwasik he, inogogwi kaindek omanogo andogosi wesuagaluk inayonggo fesukwama, wagaukwama re, mel yagaisasukwa: ”Nit ninebe inom, ninagainafuri inom, ninoasinogo iluk, afuni Israel mene ineisena nen Peti Wene Warogo woginafikhe, iluk hilingik mene andi, attak welagaikheba ambotkwe lakfeino o,” iluk yagaisasukwa. A'nogo yagaisasukwa hak he, Allah nen afuni o kota andoma welagaikharek mene omanogo mondogat wene weak mene inoba fesikhemo re, inane mondok hokhorogo sagalik lagaukwa.

¹² Nen, it afuni ekhe inebe inoati'lek, we, inebene tuk-tugengge hilinglasuageluk inoba fesikhe mene andi heinet wati logolik, it inandugwi kembu nen telinabuageluk enu hombuk palhi lagaukwa.