1 SAMUEL 30 - Allah Wene Fano Wene Hupla Inane

Ap Amalek mene inom weim yafukwa wene

^1-5 A'nogo lagaukwasik he linggene pire welagaukwasik at Daud inom, agoromi omanogo inom sugulogo o kota Ziklag lagaukwa. It inebe omanogo lagaukwasik hilingitunemen he ap Amalek mene re o Yehuda abel a'ma selatan fikhit andoma pin kwi wagaukwasik he, o Ziklag a'nogo inom inoasi wagaukwa. Iren he ap misik iluk ogo ekhe inoatukwa lek meneat he, o kota a'nogo abirengge endu fikhi logolik he, kwe pikhit louwogeluk hemi inom, yenggerugwi inom, afuni fena inom hele warogo woginarek lagaukwa. Nen, iren he at Daud eisok erokwe mene mondogat inom, nen at agoromi ineisok erokwe mene mondogat inom, hele warogo woginarek lagaukwaat. Nen, a'nogo laga logolik he at Daud agagwi inebe pire hele Ahinoam inom Abigail inom aremnogo ogore inomat woginarek lagaukwama re, at Daud inom agoromi inom he inendawinggen warugu mondok logolik he leagu werek kwelek enek he inoba mondogat lebelek agaikhe.

⁶ At Daud agoromi omanogo re ninagagwi, ninagainafuri nalagaikhama iluk he inendawinggen heiselhi lagaukwa. Andiba re iren at Daud huk helep wasugun iluk hilingiti lagaukwa. A'nogo hilingitunem Daud oba enggin-fenggin mondok hokhorogo hikhi lagaikheba nen he, at endawinggen eisena Tuhan Allah nen omamet fikhi lagaikhe.

⁷ A'nogo hilingitu logolik at Daud en ap imam Ahimelekh amlogo Abyatar a'nogoba ikhi logolik he, ”Efod andi waluk eme o!” iluk yagatikhe. A'nogo yagatikhemo at Abyatar en efod a'nogo waluk wogosi wagaikhe.

⁸ Wogosi wagaikhemo at Daud en Tuhan oba heinok wokhikhi logolik he, ”Afuni weagerinafarek mene o yoma pin kwi wagaikha o, andi re an nen muginarek layoga, lega? Nen, an nen it inombo'ne lamo eloga lega?” iluk heinok wokhasikhe. A'nogo heinok wokhasikhemo Tuhan nen onggo yagati logolik he, ”I o, Haren he it muginarek lambik he ap hele warogo woginarek lili'lagwi mene andoma fikhalogo wulak fisa lan o,” iluk yagatikhe.

^9-10 A'nogo yagatikhemo re, at Daud a'nogo agoromi inebe 600 nen aremnogo inom lagaukwa. It lagaukwasik i Besor ima asi lagaukwasik he, at Daud a'nogo re agoromi inebe 400 mene inom enek pikhit lagaukwa, nen it fena inebe 200 nen aremnogo re mondogat inomame lek agaukwasik i Besor a'nogo palogo wulibi lagu aple elo'lek agaikhemo aremnogo welagaukwa.

¹¹ It lagaukwa mene a'nogo ebekhalem lagunemen he at Daud agoromi omanogo nen yenggerek abomalik misik ekhe o Mesir leimo omanogo nen inom ambi agaukwasik he hondo'luk at Daud were'ma fei wagaukwa. Fei wagaukwama re at a'nogo sumburu inom, i inom noageluk wogetikhe.

¹² Andi nen kue e arah enggen oba hilingik mene inom, anggur enggen omolo pire meneba iringik mene inom wogetikhemo arat nasikhemo re, at ebe linggene henagan inukhogo sumburu inom i inom ninggi'lek welagaikhemo a'luk he, sumburu nen ebe sisarogo welagaikhe mene a'nogo ebe omame agaikhe.

¹³ A'nogo agaikhemo Daud en heinok wokhikhi logolik he mel yagatikhe, ”Hat heisena re sa, nen hat hebe re koma mene?” iluk heinok wokhasikhe. Ma re, abo a'nogo nen onggo ikhi logolik he, ”An he nawi Mesir mene o, nen nebere afuni Amalek mene inamingmingengge welagi mene, iluk isikhe. An nebe ou wanhu werek kwelek he neisena nen herak nobagaluk lagama re nenggi henagan ou wanhu welagarigo, isikhe.

¹⁴ Niren he o afuni Kreti inap inanggweangma o Yehuda nen abel a'ma selatan fikhit andoma inom, it ap Kaleb unggulenu mene werek fikhit andoma inom, pin kwi lagosik he, o kota Ziklag inom he mondogat endu fato o,” iluk yagatikhe.

¹⁵ A'nogo isikhemo Daud en heinok wokhikhi logolik, ”Haren ap inenggiabisak wanharek mene were'ma andoma an hondo'narek lagain hamolo a, habira?” iluk heinok wokhasikhe. Ma re, at abo a'nogo nen ikhi logolik he, ”An he namolo o, oba nen neisena haren Allah eluk werek mene enuba wene wa'neti logolik he, hat he an nen hoasigin lego, nen heisena attak meneba ogo wogosigin legaro, iluk noe haren igin halok enek he fano o,” iluk isikhe.

¹⁶ A'nogo isikhesik, at a'nogo nen he it omanogo hondoginarek ap inenggiabisak wanharek mene omanogo inoba fisa lagaikhe. Andem oba re it ap inenggiabisak wanharek mene omanogo inebe re o Yehuda inom Filistin inom aremnogo nen he yi mene ti mene hokhorogo hugul helaluk wagaukwasik it inebe o mondogat andoma sagarogo logolik, sumburu inom, i inom ningik, seni isagaisogo hugulengge heligik hilingiti lagaukwa.

¹⁷ O wei igiluk hil mogolhu kwelek aremnogo re, Daud a'nogo nen it were'ma pin kwisikhemo weim yafu werek kwelek enek he o mondogat hup agaikhe. A'nogo hilingitunem it ap inebe 400 nen mene wam unta amboloba lagaluk wulifukwa mene aremnogo nen enek oba nen he it inaselei mene misik ekhe iluk polokhogo wulibi lagaukwa lek.

¹⁸ At Daud en afuni Amalek mene nen yi mene ti mene mondogat hugul helasukwa mene omanogo fikhalogo wulak fikhi logolik he at agagwi inebe pire aremnogo inom lologo wulakfisasikheat.

¹⁹ Yi mene ti mene andoma misik ekhe longgo isikhe lek. Ekhe mene ekhe mene inom, yenggerugwi inom, hemi inom, it afuni Amalek mene nen hugul helasukwa mene omanogo re hobuk ambotkwe at Daud helasikhe.

²⁰ Andi nen fena re at Daud en he domba inom, wam amu mene inom telhikhe. Telhikhemo at Daud agoromi nen he yoma re Daud faget iluk he yi mene ti mene amu mene telhukwa mene omanogo re it tak ale'ma pa'nakhogoat silogo woginarek laga lagaukwa.

²¹ A'nogo hilingfisasikhesik he, at Daud a'nogo nekhengge sugulogore it ap fenakwe inebe 200 nen mene inomame lek agaukwasik at inom lagaukwa le'ma, i Besor esanggoma fisaluk lagaikhe mene omanogo inambit wagaikhe. Wagaikhemo re iren at Daud agoromi inom omanogo hai warogo woginafukwama, at Daud en ogo it inoba horokhogo lagaikhesik hai warinafikheat.

²² Oba nen he, at Daud agoromi ap inom lagaukwa mene omanogo inanggele'ma re fena inobabut haferek logolik he, an namu nangge nek anggugu mene lagaukwa. It ariginik mene omanogo nen ikhi logolik he, ”It ap yoma re ninom lagi'lek enggere yi mene ti mene telho mene omanogore it ekhe helogoin lek. We it he, it inagagwi inom, inagainafuri inom enek helaluk logoin fano,” iluk isukwa.

²³ Oba nen he at Daud en onggo ikhi logolik he, ”Yago nagaila'lak! At hineisena Tuhan nen nit ninoba wo'nisikhe mene andoma faget he hiren a'nogo ugubo! Nit he Aren ninebe ma'murogo fetninarek logolik, it ap inenggiabisak wanharek mene andoma inoba nen, ninomamet ninobagaikhe le'ma nen ikhi lageba? Ninomamet ninobagaikhe aro.

²⁴ Ariginik enggere ap misik ekhe nen iren aga mene a'nogo fano aga iluk io, u fuk! Nit ninebe mondogat he higithogo nek helogoin. It ap ninasu fisogo logolik welagaikha mene ogore nit weim yabi logoin iluk lago mene nen helogoin andem hak enek helogoin aro,” iluk yagaisasikhe.

²⁵ Hobugen wene andi re at Daud en wene melalek hilingiti logogun mene iluk fesikhemo, it afuni Israel mene werekwe omanogo re yogondak huli nen ogo hologo nek hilingiri'lagwi.

²⁶ A'nogo mondogat hilingitukwasik he, at Daud a'nogo o Ziklag wagaikhesik aren yi mene ti mene telhikhe mene omanogo fena it ap o kota Yehuda mene inogogwi it ap a'nogo hilingitunem fano hilingisuageluk lebethasukwa mene inoba lakfisikhi logolik he, yi'nogo isikhe, ”Afuni Tuhan aselei mene inoba nen inangge telho mene hit hinobaget hinendawi o hinagaiyekhogo iluk he yi o,” iluk lakfisasikhe.

^27-31 Aren o kota-kota lakfisasikhe kwe omanogo enu re yi: o Betel inom, Rama inom, Yehuda inom, abel a'makwe selatan fikhit andoma inom, Yatir, Aroer inom, Sifmot, Astemoa inom, Rakhal inom, afuni Yeramahmeel inawi kota werek mene inom, afuni Keni inap inawi kota inom, Horma inom, Bor-Asan inom, Atakh, Hebron inom andoma lakfisasikhe. O kota at Daud inom agoromi inom leil warik nikhi lagaukwa kwe andoma onggo inagaiyekhogo iluk lakfisasikhe nek.