Biblia Todo Logo
Bìoball air-loidhne

- Sanasan -

1 SAMUEL 3 - Allah Wene Fano Wene Hupla Inane


Tuhan ebe Samuel elokhoma menlagaikhe wene

1 A'nogo hilinglarik lagu kwelek he, at Samuel ebe yenggerek engge hun Eli a'ma logolik, Tuhan obaget hilingiti lagaikhe. Andem oba re, At Tuhan nen yi'nogo hilinglasigin enggere ebe yi'nogo hilingi'no iluk aneba yagaisugu mene inom, inabikhanggoba yagaisugu mene inom he mondogat lek welagaikhe.

2 A'nogo meneat he, o hubanggo ekhe sambul he at Eli ebe mondok yaman agaikhesik eilenggen mum asigiluk ugungge a'nogo re, o senggele'ma omanogo kwisikhesik nogokhi lagaikhe.

3 Nen, at Samuel he, nineisena Tuhan awi su mene wuri'mo obalik mondok hore'ma a'nogo Peti Wene Warogo Allah nen wo'ninafikhe mene era'lu horokhogo omanogo nogokhi lagaikheat. A'nogo nogo ugu kwelek, o hil oan mogolhi'le'ma, nen, lampu oan ibilik werek kwelek,

4 Tuhan nen Samuel woletikhemo, at Samuel en onggo yagati logolik he, ”Woi, neisena!” isikhe.

5 A'nogo yagatikhesik, ap Eli oba weak-weak lagaikhesik he, mel yagatikhe: ”Wolnafen andi nen wagi o, neisena,” iluk yagatikhemo, at Eli nen he, ”An he wolhafi lego, namlogo. Hambotkwe nogo i lan,” iluk yagatikhemo, hobuk nogo i wagaikhe.

6-7 A'nogo nogo i wagaikhemo, Tuhan nen, Samuel hobuk woletikhe meneat he, Samuel Allah inom ambi agu aple onggot andi nen he ebe furogo, ”Neisena Tuhan nen wolnafe,” iluk futfigi'lek wongetfesikhe. Andi nen he, at Samuel eluk agaikhesik, ap Eli hobuk ha lagaikhesik he, mel yagatikhe: ”Wolnafen andi nen wagi o, neisena,” iluk yagatikhemo, at Eli nen he, ”Namlogo e. An hat wolhafi lego. Hambotkwe nogo i lan o,” iluk yagatikhe.

8 A'nogo nogo i wagaikhemo, At Tuhan nen enggi pireba Samuel woletikhesik, hobuk ekhe henaganek engge woletikheat. Andi nen he, eluk agaikhesik ap Eli ha lagaikhesik, mel yagatikhe: ”An wolnafen andi nen wagi o, neisena,” iluk yagatikhemo, andi sambul Eli endawimo nen he, ”Yenggerek andi re Tuhan nen woleri'lago higi,” iluk futfesikhe.

9 A'nogo futfesikhe andi nen, mel yagatikhe: ”Hambotkwe nogo i lan o. A'nogo nogo ugunem, hobuk wolhafe halok he, mel yaga'no: Neisena, hamlogo hamingmingegge mene nebe yi logolik nesanggo holek welagi o. Yaganom, neisena, iluk yaga'no,” iluk yagatikhemo, at Samuel nogo ikhi lagaikheba wagaikheat.

10 Wagaikhesik were'ma, At nineisena Tuhan wagaikhesik, andoma mendek logolik, Samuel woletikheat: ”Samuel, Samuel,” iluk woletikhemo, at Samuel en he, ”Neisena. Hamingmingegge nesanggo holek welagi o, yaganom,” iluk yagatikhe.

11 A'nogo yagatikhemo, At nineisena Tuhan nen he, mel yagatikhe: ”An nen afuni Israel mene faget inailo mene ekhe hilingisigin o. A'nogo hilingitunem afuni inesanggo holugun mene inebe lombok inobakheindok palasugun.

12 Andi sambul he, An nen ap Eli againafuri inom yi wene ti wene, hinoba fagain o, iluk yagati mene andi eroma nen pikhit wurep oba huliat mondo'-mondok inoba fagain o.

13 An nen attagat Eli yagati logolik he, hat hagainafuri An nenu weagarogo weak mondok hilingiri'lagwi andi nen, mondo'-mondok weak asuagaluk wene inoba fagain, iluk yagatigimo, at Eli nen at againafuri nen weak hilingiri'lagwi mene andi elu meneat he, aren he, hit a'nogo hilingisugun mondok lego, iluk palfouwageluk oba harorogo wenagisigi'lek herakfisili'lago andi.

14 A'nogo herakfisili'lago andi nen, An nen wene yi'nogo hombuk palogo mondok tekhogo igi. At Eli againafuri nen weak hokhorogo hilingiri'lagwi mene andi faget inanggo warogo nolnesugun halok ogo, at he, yi mene ti mene ekhe wo'nesugun halok ogo, sagalogo legetfisagain mondok lego, iluk hombuk palogo igi o,” iluk yagatikhe.

15 A'nogo yagatikhemo, at Samuel hobuk nogo isikhesik, o wei isikhemo eluk agaikhesik he, Tuhan awi wuri'mo a'nogo kwe mondogat hurik lagaikhe. A'nogo hurik lagaikhe meneat he, wene esanggo holhikhe mene omanogo ap Eli yagasu ailo agaikhemo re, kamo isikhe.

16 A'nogo kamo isikhe meneat he, at Eli nen Samuel woleti logolik, ”Samuel namlogo e,” iluk woletikhemo, aren he, ”Wui, neisena,” iluk yagatikhe.

17 A'nogo yagatikhemo, at Eli nen he, ”Nineisena Tuhan nen wene ninggi'nogo mene yagahete. Yagahete mene andi mondogat an yaganom o. Haren an yaganeti'lek ekhe hinaten halok he, nineisena Allah nen wene eberogoat enggin mene hoba fagain o,” iluk yagatikhe.

18 A'nogo yagatikhemo, at Samuel en he, wene Allah nen yagatikhe mene omanogo ekhe hinati'lek mondok felelenghogo yagatikhe. A'nogo yagatikhemo, at Eli nen he, ”Andi re Tuhan nenat yagahetemo re, Aren yi fano anggikhe mene andi nek hilingisuago,” iluk isikhe.

19 A'nogo yagatikhesik oba nen, at Samuel ebe mondok alue aga lagaikhe. A'nogo alue agu kwelek, At nineisena Tuhan fisogo mondok logolik, at Samuel en wene ugu mene mondogat eberogoat mene nek hilinglaga logouwagaluk hilingfikhi lagaikhe.

20-21 A'nogo hilinglaga lagaikhe andi nen, afuni Israel mene inaiba o yi awi ti awi Bersyeba huli nen Dan huli mondogaren he, ”Samuel andi ebe Tuhan ane yaganisili'lago mene o,” iluk ikhi lagaukwa. At Samuel en wene yagaisikhi lagaikhe mene re, afuni inunggulenu Israel mene mondogaren, at ane inesanggo fanorogo holhi lagaukwa. At nineisena Tuhan ebe o Silo andoma, at Samuel elokhoma attagat menlagaikhesik, wene yagatikheba omanogo re, hobuk inelokhoma menlaga lagaikheat.

Lean sinn:



Sanasan