1 SAMUEL 28 - Allah Wene Fano Wene Hupla Inane

¹ Inenggi ekhe inom welagaukwasigen he it afuni Filistin inap inagoromi sikhe fisogo mene andogerinafikhesik he afuni Israel mene inoasi kugun iluk hilingiti logolik at Akhis nen he Daud mel yagatikhe, ”Hat he helurogo, hat inom hat hagoromi inom he an nebikhit asimbik weim yabi kugun a'nogo,” iluk yagatikhe.

² A'nogo yagatikhemo re, at Daud en onggo ikhi logolik, ”Andi re elok hilingisu hago, we an hamingmingengge nen neisena hat faget ninggi'nogo hilingitunem neagain aple nen o,” iluk yagatikhe. A'nogo isikhemo at Akhis nen ikhi logolik he, ”Fano! Hat he an nebe kagalnarek nugu mene logolik ninom mondok nikhi logogun nen menhobagagi o,” iluk yagatikhe.

Saul heinogengge oba lagaikhesik kino yagatikhe wene

³ At Saul en afuni heinogengge inoba lagaikharek mene inom, wesagun, ”Hobuk yi'nogo hilinglasigin,” iluk agarek mene inom, mondogat afuni Israel mene were'ma logogun lek, iluk mugusogo wulakfisasikhesik oba nen, at Samuel ebe a'nogo wa'lagaikhemo, afuni Israel mene mondogaren fong warogo ebe warek at onggwarek aiba Rama andoma salhukwa andi.

⁴ A'nogo were'ma nen, ap tentara Filistin mene ap Israel mene inoasuogoluk, inebe andogotukwasik, inawi tenda o kota Sunem horokhogo andoma wusi wagaukwa. A'nogo wusi wagaukwama, at Saul ogore, ap Israel mene andogerinafikhesik, inawi tenda Tom Gilboa oba andoma wutukwaat.

⁵ A'nogo wutukwasik, at Saul ap tentara Filistin mene omanogo eilenggen yerisasikhesik he, ailo mondok hokho agaikhe.

⁶ A'nogo ailo agaikhesik, Tuhan nen, ”Yi'nogo hilingi'no,” iluk yaganesuageluk he, abiba ogo, oagengge hukhagarek mene enu Urim, Tumim oba ogo, athe, ap Allah ane yagaisagarek mene inoba ogo, ekhe yaganesugun hea iluk kino yagatikhe mene re, at Allah nen onggo yagati'lek kamo isikhe.

⁷ A'nogo kamo isikhe andi nen, at Saul en agoromi inoba mel yagaisasikhe: ”Heinogengge he mene nen, yi'nogo hilingi'no, iluk yaganesuagen oba lagen he, ekhe herasi lani o,” iluk yagaisasikhemo, iren he, ”O En-Dor andoma, he a'nogo mene ekhe werego,” iluk yagatukwa.

⁸ A'nogo yagatukwama, at Saul ebe elokhe munenogo re ap inebe pire mene inom lagaukwasik, he heinogengge mene a'nogo aiba o hubanggo kwisukwasik at Saul en he a'nogo mel yagatikhe: ”Ap ekhe wa'lagaikhe mene nen he, yi'nogo hilinglasigin iluk yaganesuagaluk wole'nogen he, enu yagahesigin o,” iluk yagatikhe.

⁹ A'nogo yagatikhemo, at he a'nogo nen he, ”Ap kain raja Saul en he, afuni ekhe nen, yi'nogo hilinglasigin, iluk yagaisagarek mene inom, heinogengge mene inom, mondogat afuni Israel mene were'ma yoma logogun mondok lego, iluk mugusogo wulakfisasikhe a'nogo helu meneat he, an nebe noasuagaluk, lalnabigiluk wagen andi nenahalok?” iluk yagatikhe.

¹⁰ A'nogo yagatikhemo, at Saul en he, ”Tuhan eluk welagarek mene oak. Haren a'nogo igin andiba wene hoba fogoin mondok lego, iluk hombuk palogo wene watheti o,” iluk yagatikhe.

¹¹ A'nogo yagatikhemo, at he a'nogo nen he, ”Halok, hat faget an nen wolesigen he, ap wa'lagaikhe mene egen andi enu sa,” iluk heinok wokhasikhemo, at Saul en he, ”Samuel wolhan o,” iluk yagatikhe.

¹² A'nogo yagatikhemo, at he a'nogo Samuel eilenggen yethasikhesik he, ane kweti logolik, Saul mel yagatikhe: ”Noe, hat hebe re, raja Saul meneat he, nenahalok an lalnafen,” iluk yagatikhe.

¹³ A'nogo yagatikhemo, at raja Saul en he, ”Hailo lego. Heilenggen yethegen mene andi yaganom,” iluk yagatikhemo, at he a'nogo nen he, ”Munggwat ekhe kweang a'ma nen lagai wagunem yethigi o,” iluk yagatikhe.

¹⁴ A'nogo yagatikhemo, at Saul en he, ”Elokhenggen ningginik mene yethegen,” iluk heinok wokhasikhemo, at he a'nogo nen he, ”Ap ebe yaman mene asu sogosu pisarek laberek mene weinam agama higi o,” iluk yagatikhemo, at Saul endawimo nen he, ”Andi Samuel at higi,” iluk futfesikhesik he, eindep awi yagaisogo fogeratikhe.

¹⁵ A'nogo hilingitikhemo, at Samuel en Saul mel yagatikhe: ”Nenahalok haren an elelnafi lagen? Nenahalok haren an nekhengge sugulogo wesuageluk wolnabi wagen,” iluk yagatikhemo, at Saul en he, ”Ap Filistin mene nen ninoasuogeluk wagaikhama, Allah nen he, an nen hilingisigin mene yaganesuagaluk kino yagati meneat he, nebe hera'nobagaikhemo nogo nen he, ap at ane yagaisagarek mene yagaisugunem yaganeti'legat, nabiba yaganeti'legat, andi nen nobakhe palagama nen he, an hobuk hilingisigin mene haren yagane'nogoluk yagahesi wagi o, neisena,” iluk yagatikhe.

¹⁶ A'nogo yagatikhemo, at Samuel en he, ”Nineisena Tuhan nen hat hebe arat herakhobagaikhesik, ebe haselei mene hilinglagama meneat he, an noba nenahalok heinok wani wagen?

¹⁷ At Tuhan nen an yaganetikhemo, hat yagahetigi hagat, haren afuni Israel mene ferinarek welagen mene andi waganogo re, at Daud wogotemo o.

¹⁸ Nineisena Tuhan nen hat yagaheti logolik, haren he, afuni Amalek mene andi inebe inom inangge inom mondok legetfisano, iluk yagahetikhe meneat he, haren at ane sagalogo hilingitigin andi nen, Tuhan nen a'nogo hilinghafunem hikhi lagen andi.

¹⁹ Allah nen he, hat hebe inom, ap Israel mene inom, hinebe mondogat ap Filistin mene inenggiba fagain o. Foumo, ohealek hat hebe inom, hagainafuri inom, an welagiba andogosugun o. Nen, ap tentara Israel mene mondogat nineisena Tuhan nen ap Filistin mene inenggiba fagain o,” iluk yagatikhe.

²⁰ A'nogo yagatikhemo at Saul esanggo holhikhesik aremnogoat, youk hokho mene lagaikhesik he, talorogo kweangma pou isikhe. A'nogo pou isikhesik, enggi ekhe hup hundik lingge hundik sumburu ninggi'lek welagaikhe andi nen he, omame mondok lek welagaikhe.

²¹ A'nogo were'ma, at he heinogengge a'nogo at Saul oba horokhogo wagaikhesik, eilenggen kwelakhasikhe re, Saul obakheindok mondok palagaikhesik weregen he, mel yagatikhe: ”An nebe noasugun werek kwelegat, haren kino yaganeten mene andi hane hologoat hilingiti andi o.

²² Andi nen haren ogore, sumburu wokhetunem naluk, kwe homamerogo lanogen he, sumburu hat nagain mene weragaisogo fagain mene andi nane hologoat nano o,” iluk yagatikhe.

²³ A'nogo yagatikhe meneat he, at Saul en he, ”Sumburu nunggu aple nabiro,” iluk yagatikhe. Oba nen he, at Saul agoromi nen ogore, ”Nan o,” iluk inane ninghogoat yagatukwama, ebe kweangma nen menlagaikhesik, e talek oba hu'lagaikhe.

²⁴ A'nogo hu'lagaikhemo, at he a'nogo weak-weagat wam sapi eak otholik fano mene warogo senggelogo isatik, tepung ekhe waganogo, enggi nen puselogo mulel-malelhogo, enggen roti fisuagaluk pelafarek mene a'nogo mene elonggoma pelafi'lek weratik, isikhe.

²⁵ A'nogo isatik, weratik, isikhesik, Saul ebe inom, agoromi inom, wogisasikhemo, nasukwa. A'nogo naluk, o hubanggo andi sambul inambotkwe wagaukwa.