1 SAMUEL 26 - Allah Wene Fano Wene Hupla Inane

Daud en Saul wasigin nabit iluk enggi pirenek meneba herakfesikhe wene

¹ Inenggi ekheba re it afuni o Zif mene nen he at Saul ebe o Gibea were'ma oba lagaukwasik yagati logolik he, ”Daud a'nogo re tom Hakhila ba o Yehuda leimo nen esanggoma aremnogo hinago logolik werek,” iluk yagasi lagaukwa.

² A'nogo yagasi lagaukwama re at Saul a'nogo weak-weak agoromi ap Israel mene weim yafu aple inanini mene nek inebe 3.000 nen inom Daud a'nogo herasi logoin iluk o Zif omanogo wagaukwa.

³ Wagaukwasik he Saul a'nogo tom Hakhila alilukwe esanggoma aremnogo o tenda wurogo nogosikhe. A'nogo nogogu kwelek at Daud esanggo holhasikhere Saul a'nogo ombo'ne waga logolik o leimo werek ugunem holhikhe.

⁴ A'nogo holhikhesik aren ap yenal palhu mene ineil penesi loageluk lakfisasikhesik he, Saul ebe eberogo re andem werek iluk elu agaikhe.

⁵ A'nogo elu agaikhesik Daud a'nogo weak-weak Saul awi tenda salogo nogokhi lagaikhe ba omanogo lagaikhesik hilingitunemen he, Saul awi sabu nogokhi lagaikheba a'nogo re Abner hun Net amlogo a'nogo nogokhi lagaikhe, nen Saul en awi sabu a'nogo re tulem wuri'mo agoromi tentara inawi re abel fena-fena haningisogo wurik welagaikhe.

⁶ A'nogo hilingi'mo hasukwasik, Daud en hun Ahimelekh o Het mene a'nogo inom, Abisai inom, abo Yoab andi re (it inagaisa hwe Zeruya) a'nogo amlogomi aremnogo inom inoba heinok wogisikhi logolik he, ”Hun Saul awi sabu salogo nogoli'lagoba ari ailo lek mene an ninom sa kugun ilik heinok wogisasikhemo at Abisai nen ikhi logolik he, ”An o!” iluk isikhe.

⁷ A'nogo isukwasik hup a'nogo sambul he Daud inom Abisai inom he inebe linglong o sabu sale'ma a'nogo kwi lagaukwasik kwelakhugunemen he, at Saul ebere fem tulem nogogunem he arige kabelek a'nogo unggul higithogo aremnogo kweangma taunghogo welagaikhe. Nen, Abner inom agoromi tentara omanogo inom he abel fena-fena nogokhi lagaukwa.

⁸ A'nogo nogogunem he Abisai nen Daud oba ikhi logolik he, ”Allah nen he o yogondak hup yiba hat haselei mene a'nogo henggiba arat fikhe yi. Enggere an nen we nenggi pireba lek oba nen he nenggi misigamat onggwarek arige ariba ebe talogo kweang inom hun feiyogen he, io hilingisin iluk in o,” iluk yagatikhe.

⁹ Oba nen he Daud en ikhi logolik, ”Haren at oba yi'nogo ti'nogo ekhe hilingfou fuk! Afuni nen ap raja Tuhan nen wenagaisogo menfikhe meneba weak mene hilingfisugu halok he Tuhan nen unggum wogisikherek enggere.

¹⁰ Neisena Tuhan eluk werek mene enuba hilingi'mo re at ebe wa'lasigin oba horok asigin halok ogo, nen weim yafunemen weim ambisangma asigin halok ogo nineisena Tuhan onggwaregen enek Saul ebe wasigin andi re an nelu o.

¹¹ Arigini'mo re, we At Tuhan ninoe raja ebe wenagaisogo menfikhe mene andi nen enek an nen wati hanogo iluk elele waganogo nobagakhi logouwak! Nen nit he arat logoin enggere, we arige ari inom, agaiwak ari inom enek he wanini o!” iluk yagaisasikhe.

¹² A'nogo isikhesik he at Daud en hun Saul mene arige inom, agai oak inom unggulmo higit welagaikhe mene aremnogo waluk lagaukwa. A'nogo hilingitunem andi re Tuhan nen it inebe mondogat omanogo nogo homokhogo uageluk hilingfisasikhemo re, ap misigen iluk ogo, hilinglaga aple a'nogo ineilenggen isigik, ineluk agik, isukwa mondok lek andi.

¹³ A'nogo hilingitukwasik Daud a'nogo tonggo amu meneba hukhogo kwi lagaikhesik punuba andoma lagaikhemo re, Saul awi tenda sale'ma omanogo nen he eil uanhogo hilingik welagaikhe.

¹⁴ A'nogo lagaikhesik Daud en Abner inom tentara Saul mene omanogo inom inoba ane kweti logolik, ”Abner! Haren an nane hesanggo holhi lagen a?” iluk ane kwetikhemo, Abner en ogo ane kweti logolik he, ”Raja faget hane kwetu mondok welagen mene andi re hat sanogo?” iluk yagatikhe.

¹⁵ A'nogo yagatikhemo Daud en onggo ikhi logolik he, ”Abner ahwi, it afuni Israel mene inoba nen he harenek he, ap mondok along hagun welagen nogo abi, hat he nenahalok heisena raja andi faget kagalek welagen lek? We ap horok yogondak andemat ap hinoasugun mene hinawi tenda sale'ma kwi wagaikha andi o.

¹⁶ Abner, hat he yabu furogo hilingiti lagen lek! Neisena Tuhan eluk werek mene enuba hilingi'mo re, hiren ap raja Tuhan nen wenagaisogo menfikhe mene a'nogo furogo kagalek welagep lek andi nen, hit hinebe mondogat he wa'lasuogeluk welagep. Hineilenggen kumut hani! Hinoe raja nen arige a'nogo re koma werek? Nen, heisena agaiwak unggul fikhit werek mene a'naga re koma werek?

¹⁷ A'nogo ugunem Saul en Daud ane enegengge esanggo holhikhesik he, aren heinok wokhikhi logolik, ”Daud ahwi, hat andi re an namlogo a'nogo a?” iluk heinok wokhasikhemo, Daud en onggo ikhi logolik he, ”Hun hokho neisena an a'nogo abi,” iluk yagatikhe.

¹⁸ A'nogo isikhesik ane ekhe inom ikhi logolik, ”Neisena, haren nenahalok an hamingmingengge si'narek-mu'narek nikhi lagen? An hamingmingengge nen weak ninggi'nogo mene hilingitimo?

¹⁹ Neisena an hamingmingengge nen halong anggikhi logolik nane ikhi lagi mene yi holnabin o. Tuhan nen neisena miming hafi logolik, an hamingmingengge yi wasi lan iluk yagahetemo halok he, wam misik warogo nolumo nen he andiba Tuhan anini noba werek mene andi lek hilingisogo fou hak. Oba nen he neisena miming hafe mene andi, aben miming hafemo halok he, it andoma inebe Tuhan nenat homan fisikhi logouwak! Iren a'nogo nek hilingiri'lagwi andiba re, an hamingmingengge kweang Tuhan onggwarek anggweang oba nen wulibi lambik he anggolorogo ningginigin nen iluk o amumu afuni amu mene nen kembu dewa mondok nonggot mene andomaba apne wani laga logogun andi.

²⁰ An hamingmingengge kweang amu mene nonggot meneba Tuhan elokhoma nen wa'lasuageluk nobagau fuk. Afuni Israel mene inoe raja kain mene nenat an hamingmingengge nebe misik no pisang hangge yi faget wasigin iluk waga lagen andi re nenahalok nogo? An hamingmingengge yi aben sue pelaik enggama murok lagaikharek hakhogo mu'narek nikhi lagen andi re, we alomarogo hilingiti lagen o,” iluk isikhe.

²¹ A'nogo isikhemo at Saul en onggo ikhi logolik, ”An weak mondok hilingiti lagi o, andi nen he Daud namlogo e hebe sugulogo eme o! Haren yogondak hup yiba an neluk ekhe inom logouwageluk nobagegenma re, an nen weak mene hat hoba ekhe hilinghobagagin lego. An nobabut he mondok morue. An he we ibi-eberogo nen nonghonghogo hilingiti o,” iluk yagatikhe.

²² A'nogo yagatikhemo Daud en onggo ikhi logolik, ”Neisena hat harige a'nogo re ebe yi werek enggere, hat hagoromi tentara andoma ekhe wani wesuagen he mimingisogo lakfisa me o.

²³ We Tuhan nenat ap higithogo hilingitarek mene inom, it furogo hilingitarek mene inom fanot fisikhi logogin, yogondak yi sambul Tuhan nen hat neisena hebe an hamingmingengge nenggimo fikheba nen he, an hamingmingengge nen neisena raja hebe Tuhan nen wenagaisogo menhobagaikhe mene hoba weak mene ekhe hilingisigin lek iluk anggigi o.

²⁴ Arigini'mo re, yogondak yiba an nen neisena hebe hoasigin lek iluk heluk hobagagi andi hakhogo an hamingmingengge yi ogo a'nogoat Tuhan nen nili waganogo fetnarek logolik enggin noba werek mene fikhalogo wulak nobagakhi logouwago!” iluk isikhe.

²⁵ A'nogo isikhemo Saul en Daud oba ikhi logolik he, ”Namlogo e! We Tuhan nen enek fanot hobagakhi logouwak. Haren yi yabu ti yabu hilingitunem he ambisangma enggen fano mene nek i'laga logouwak,” iluk isikhe. A'nogo isikhemo re, at Daud a'nogo kwe pikhit lageluk lagu kwelek, Saul a'nogo ogore aiba istana lagaikhe.