1 SAMUEL 24 - Allah Wene Fano Wene Hupla Inane

Daud en Saul wasigin nabit iluk herakfisasikhe wene

¹ Aremnogo nen he at Daud a'nogo higilogo re o wilayah En-Gedi ba lagaikhesik helep oumokwe andoma hinago welagaikhe.

² A'nogo lagaikhesik were'ma, at Saul en he afuni Filistin mene inom weim yabi lagaikhesik wagaikhesik holhasikhe re Daud a'nogo o En-Gedi horokhogo o leimo andoma werek ugunem holhikhe.

³ A'nogo ugunem holhikhesik he weak-weak aremnogo at Saul agoromi it afuni Israel mene omanogo mene weim inanini mene nek inebe 3.000 nen wendeberogo fisasikhesik he at Daud inom agoromi inom o mo lagai wagarek fikhit andoma re Tom enu ekhe Kambing Maro agarek oba andoma heraginabi logoin iluk lagaukwa.

⁴ Lagaukwasik he, at Saul a'nogo kwe esanggoma wam domba awi ekhe miren hakhogo wuri'mo andoma asi lagaikhe. Lagaikhesik he andem oumo ekhe were'ma at Saul a'nogo amisema andoma kwigin iluk kwi lagaikhe. Nen ebe asuak he, at Daud agoromi inom omanogo re oumo andi elema a'lima hinago were'ma, Saul a'nogo kwi lagaikhe.

⁵ A'nogo kwi lagaikhemo at Daud agoromi omanogo nen inoeba yagati logolik he, ”Tuhan nen hat yagaheti logolik, Hat haselei mene re ninoe henggiba wokhesumo hat hendaimo at oba hilingisigin anggagain higithogo hilingi'no iluk, yagahete lek nogo? iluk yagahetikhe hilingi'mo yogondak yi re i aple at andiba hilingisuageluk werek enggere, nineisena haren hilingisino!” iluk yagatukwa. A'nogo yagatukwama re at Daud a'nogo linglong Saul were'ma aremnogo asi lagaikhesik he, ane legengge at Saul asu jubah a'nogo wurepma endebat ekhe tiliphogo wanhikhe.

⁶ A'nogo tiliphogo wanhikheba nen, hobugen at Daud endawimo nen he eige an nen a'nogo hilingiti andi re weagat hilingiti o, iluk anggasikhe.

⁷ A'nogo anggasikhesik, agoromi yagaisikhi logolik he, ”An noe raja andi Tuhan nen wenagaisogo menfikhe mene hilingi'mo, an nen weak ekhe hilingisogo figi hanogoluk Tuhan nen ogal nafi logouwago. Nen at ebe andi re nineisena Tuhan nenat wenagaisogo menfikhemo re an nen at oba we endebat iluk ogo ekhe ouet fagain lego!” iluk yagaisasikhe.

⁸ At Daud agoromi inendawinggen a'nogo sebelhikhesik he, Saul ebe wa'ni, iluk yagaisasikhe lek. A'nogo hilingitikhemo at Saul ebe menla'luk oumo a'nogo herakfuluk he, pikhit lagaikhe.

⁹ Lagaikhemo, at Daud ogore oumo a'nogo nenat ombo'ne wulifikhesik, ambot fikhiren he, ”Saul noe,” iluk yagatikhe.

¹⁰ A'nogo yagatikhemo, Saul elokhe hebekhogo yetlasi wagaikhe re, at Daud a'nogo eindep awi yagaisogo Saul agaugwerati logolik mel yagatikhe: ”Afuni ekhe nen he, Daud en weagethabigiluk ili'lago, iluk ineranen wene yagaheta meneat he, eberogoat, iluk inane hesanggo holfegendik hilingiti lagen andi nenahalok?

¹¹ Yogondak he oumo andi nen hat honggwaregen enegat hegen andi. Tuhan nen he noe hat hebe an hamingmingengge nenggiba arat wo'nete o. Nen an hamingmingengge nagoromi ekhe nen he, Wasin, iluk nendawimo kagalha mene re, Wasugun lego, iluk mel yagaisigi: An nen he noe raja Tuhan nenat wenagaisogo menfikhemo re, an nen at ebe wasigin mondok lego, iluk yagaisigi andi.

¹² Neisena, yogondak he hat hasu sogoi su ari mene libilik an nenggim fisogo welagi yi heilenggen yethame. Eberogoat an nen hat hebe hoasu meneat he, hasu sogoi su wurep endebat enek palhimo yi o. A'nogo hilingiti andiba nen, hat weagethafik, an kain logogiluk hat hoasigiluk igik, ikhi lagi lek, iluk enegat aga andi hegen a? An nen hat weak ekhe hilinghafi'lek meneat he, haren an nebe noasigiluk mu'narek mondok nikhi lagen andiri!

¹³ We nit nemberek ninobaget sa weak iluk andi re At Tuhan nen enek sikhiphogo yaganisoak. Hat neisena nen an hamingmingengge noba hiling nafi lagen mene andi re, At Tuhan nen enek obali'mo onggo wokheti logouwago, andi hilingik kwelek oba nen he an hamingmingengge nen endebengge iluk ogo hat neisena hendawimo ou-pou aple ekhe hiling hobagagi mondok legat.

¹⁴ Omanggum inalue nen inane lagokhogo ikhi logolik he, Afuni inobabut weak mene nenat weak hilingitarek, iluk ikhi lagaukwa andi hat he helu o. Andi nenat, an nen hat hoba weak ekhe hilinghabigin mondok lego.

¹⁵ Afuni Israel mene inoe raja hebe nenat an hamingming engge nebe noasigiluk ikhi lagen andi futfein o. An nebe noasigiluk mu'narek nikhi lagen a'nogo nebe yi heilenggen nean. An hamingmingengge nebe re mene unggul misik warek mene hangge inom, nen no pisang hangge inom, welagi yi.

¹⁶ At nineisena Tuhan nenat an hamingmingengge inom neisena hat inom faget ninawene pilingisogo higithogo palnisoak. We Arenat wene yi kwelakhoak, a'nogo kwelakhambik he neisena hat hoba nen an nebikhit agik, telogo nobagagik, ikhi logouwak,” iluk isikhe.

¹⁷ At Daud en wene a'nogo arat yagatikhesik ane palfesikhemo, at Saul en Daud mel yagatikhe: ”Hat andi namlogo Daud hane a?” iluk yagatikhesik he, le agaikhe.

¹⁸ A'nogo le agaikhesik, Daud mel yagatikhe: ”Hat weak hilingiti'lek meneat he, anat weak hilingitimo o.

¹⁹ An nen hat hoasigiluk ikhi lagi meneat he, haren onggo fano hilingnafenma o. Tuhan nen an nebe hat henggiba fikhe meneat he, haren an nebe noati'lek herakfanhen andi nen, haren an fano hilingnafi lagen, iluk o yogondak yiba enegat aga o.

²⁰ Ap ekhe aselei mene emberek ambi a'luk ebe wati'lek eluk herakfikherek mondok lego. Andi hak, haren an noasu meneat herakfanhen andi nen he, we nineisena Tuhan nenat hat fanothafi logouwago.

²¹ Haren eberogoat afuni Israel mene inobaget inoe raja menlasigin a'nogo yogondak an eberogoat iluk futfigi o. Nen hat hebe inoe raja logolik melalinafunem he kerajaan Israel meneba andoma re mondok inomamerogo logogun.

²² Yogondak he haren an nambisangma ta'lasugun mene faget inom, nen an neisok erokwe mene leget fisugu mene faget inom, leget fisagain lego, iluk Tuhan enuba hombuk palogo wene wa'nom o,” iluk yagatikhe.

²³ A'nogo yagatikhemo, at Daud en he, ”An nen a'nogo hilingisigin lego,” iluk Tuhan enu hombuk palogo yagatikhe. A'nogo iluk, Saul aiba ambotkwe wagaikhemo, at Daud agoromi inom ogo inambotkwe hinago welagaukwaba omanogo lagaukwaat.