1 SAMUEL 23 - Allah Wene Fano Wene Hupla Inane

At Daud en o kota Kehila telhikhe wene

¹ Linggene misik sambul he it ekhe nen Daud yagati logolik, ”Afuni Filistin inaben o kota Kehila pin kwikhi logolik inangge gandum enggen ket palek mene mondogat telaga,” ugunem holhikhesik he,

² aren Tuhan heinok wokhikhi logolik he, ”An nen it afuni Filistin mene andi inoasi lagain fano a, lega?” iluk heinok wokhasikhemo, At Tuhan nen onggo yagati logolik he, ”Fano, haren it inoasi laga logolik he it afuni Kehila mene andi telinabi lan o,” iluk yagatikhe.

³ Oba nen he it Daud agoromi inom welagaukwa mene omanogo nen ikhi logolik he, ”Nit o Yehuda yomaba mene ogore mondogat ninailo nen hilingiti lago, nen niren ap tentara Filistin mene were'ma o Kehila inoasi logoin iluk logoin oba andoma re ebenagaik,” iluk yagatukwa.

⁴ Andiba re at Daud en ekhe inom Tuhan nen yi'nogo hilingisin iluk yaganesuageluk he kinotikhemo, At Tuhan nen onggo yagati logolik he, ”Hendawinggen fitun o, it Filisitin inap sikhe fisogo mene andoma re An nen hat henggiba fagain enggere o kota Kehila andi kwi lambik inoasi lan o,” iluk yagatikhe.

⁵ A'nogo yagatikhemo re, at Daud inom agoromi inom o Kehila lagaukwasik o a'nogo pin kwikhi logolik he, afuni Filistin mene hokhorogo inoatukwasik it inanggo takhagarek mene mondogat telasukwa. At Daud en it afuni o kota Kehila mene a'nogo telogo fisasikhe andi.

⁶ Nen at Abyatar ap Ahimelekh amlogo a'nogo heise Daud ambit waga logolik omanogo re aren it imam inami'mo walimo higit poti lagaikhe mene enu efod a'nogo waluk wagaikhesik he, at Daud oba o Kehila were'ma waluk wagaikhe.

⁷ Afuni nen Saul yagati logolik, at Daud a'nogo re o Kehila werek iluk eluet fesukwama, at Saul en wenggelhikhi logolik he, ”Fano! Yogondak he at wulibigin mondok lek! At Allah nen an nenggiba asuageluk, at Daud ebe leget fak leget o kota haningisogo kwelabek meneba onggwaregen elema ke'nok i kwikhe a'li,” iluk isikhe.

⁸ A'nogo isikhesik, at Saul en agoromi tentara esa fologo-falogo hilingfisasikhesik he at Daud inom agoromi inom hukhogo kwelakfisogoin iluk o Kehila lagaukwa.

⁹ Oba nen he at Saul en Daud oba a'mage fesikhesik hilingisigin iluk wenggelhikhe mene a'nogore at Daud mondogat elu agaikhe. Andi nen he aren imam Abyatar a'nogo yagati logolik, ”No efod ari waluk eme o,” iluk yagatikhe.

¹⁰ Andi yagatikhemo waluk wagaikhemo re at Daud en samban ikhi logolik he, ”Neisena Tuhan Allah, afuni Israel mene ineisena, an yoma logolik nesanggo holhugunemen he Saul a'nogore an hamingmingengge yi nobaget o kota Kehila yi wolelenggen hogo feigiluk wesigiluk ili'lago ugunem nesanggo holhi o.

^11-12 Wene a'nogo ugunem holhigi mene andi re eberogo a? Neisena, Tuhan Allah afuni Israel mene ineisena nen an yaganom o,” iluk samban isikhe. A'nogo samban isikhemo Tuhan nen onggo yagati logolik he, ”Eberogo, at Saul ebe wesigiluk ili'lago o,” iluk yagatikhe. A'nogo yagatikhemo at Daud en ekhe inom heinok wokhikhi logolik he, ”It afuni o kota Kehila yoma mene nen he an inom an nagoromi inom he, at Saul enggim wogosugun a? Lega. Iluk heinok wokhasikhemo At Tuhan nen ikhi logolik he, ”Io, iren he hat hebe waganogo at enggiba fogoin o,” iluk yagatikhe.

¹³ A'nogo yagatikhemo re at Daud inom agoromi inebe 600 mene hakhogo inom he, o Kehila a'nogo herakfuluk wulibi lagaukwasik o ekhema nen ekhema higilogo lagik lagaukwa. A'nogo lagaukwama at Saul yagati logolik he, at Daud a'nogo re o Kehila herakfisaluk heise wilifa o, iluk yagatukwama esanggo holhikhesik he inoasigin iluk inabok palhikhe a'nogo re sugwi agaikhe.

At Daud o Tom oba lagaikhesik welagaikhe wene

¹⁴ A'nogo lagaikhesik at Daud a'nogore Tom oba o Sif leimo helep elema andoma welagaikhe. At ebe Saul en sirok-murok nikhi lagaikheba nen he Allah nen raja andi enggiba fikhi lagaikhe lek.

¹⁵ Ariginik oba nen he at Saul en Daud wasigin iluk hilingiti lagaikhe andi nen he at Daud ogo ailo welagaikheat. Inenggi ekhe sambul he at Daud a'nogo re o Hores Sif leimo andoma welagaikhe.

¹⁶ A'nogo were'ma at Yonatan nen Daud faget heisena Allah nen fetharek werego iluk endawimo ago watfeigiluk he emberek ambi asuogeluk lagaikhe.

¹⁷ Lagaikhesik he at Yonatan nen Daud oba ikhi logolik he, ”Hailo agun o, hat hebere an neisena enggiba re asigin lego. Aren hilingiri'lago andi re hat raja Israel inap faget menlasumo re, an he yabu hat ha'ma wanimbik hilingiti logogin mene a'nogo at neisena re eberogo elu logolik hilingiri'lago o,” iluk yagatikhe.

¹⁸ A'nogo hilingitukwasik he at Yonatan inom, Daud inom, ninom hundik logolik nagailak-hagailakhogo logogun iluk Tuhan eilhanem wene sikhiphogo isukwa. A'nogo hilingitukwasik he at Yonatan a'nogo aiba lagu kwelek, at Daud enek he o Hores welagaikhe.

¹⁹ A'nogo were'ma it afuni Sif mene inebe miren hakhogo, at Saul o Gibea were'ma andoma eluet fei laga logolik yi'nogo yagatukwa, ”At Daud a'nogo re nit ninawi abel ambolkwe tom Hakhila oba nen abel selatan fikhit o Yehuda leimo o Hores horokhogo helep elekwe andoma hinago logolik werego.

²⁰ Nineisena haren at ebe sene'le iluk hilingiti lagen mene andi re, nit mondogat ninelu o. Enggere neisena henu werek haren ferekhogo senesu aple andi re niren hikhi lagoma re hilingisu elok enggere, nit ninaiba andoma we'no o,” iluk yagatukwa.

²¹ A'nogo yagatukwama at Saul en onggo yagaisikhi logolik he, ”Hiren an nobaget fano mene hilingitep andi nen he, At Tuhan nen enek fanot hinafi logouwak!

²² An nesanggo holhi logolik at ebe awenggelek mondok weak iluk ugunem holhirek enggere, hit he hinambotkwe lambik ebe werek oba futfeino, nen at Daud ebe ka werek, ap sa nen eilenggen hikhe, iluk fanorogoat futfei lano o.

²³ Lambik he at ebe hinago welaga kwe helep elekwe andoma fanorogo hera'luk he, nekhengge an noba yi'nogo hilingik iluk yaganesi we'no. A'nogo yaganesi wagep halok enek he an nebe hit ninom seberogo logoin o, lambik he o Yehuda ba andoma ilak-pulakhogo hilingfikhi logolik mene ogore, at ebe o kweang andiba werek halok he ibi-eberogo nenat an nen herasigin o!” iluk yagaisasikhe.

²⁴ A'nogo yagaisasikhemo re, it ap wagaukwa inap omanogo Saul herakfuluk inambotkwe inaiba o Sif lagaukwa. Andem sambul at Daud agoromi inom he o Maon leimo o Yehuda nen abel a'ma fikhit erang tonggoma andoma werek kwelek hilingitukwa.

²⁵ A'nogo were'ma at Saul agoromi sikhe fisogo mene inom Daud herasi wagaukwa ba nen he, afuni at Daud eluet fesukwama at Daud ebe o Maon leimo nen helep eilmo andoma lagaikhesik welagaikhe. Andoma were'ma at Saul a'nogo elu agaikhesik he at Daud a'nogo murok weak-weagat lagaikhe.

²⁶ A'nogo murok lagunem at Daud agoromi tentara inom tom alilu fena fikhit lagu kwelek he, at Saul agoromi inom tom abel fena fikhit nikhi lagaukwa. At Saul agoromi inom a'nogo nen Daud lak a'nogo hukhogo kwelakfisasukwasik fakfisogoin horogat aga lagaikhemo re, at Daud a'nogo weak-weagat Saul elokhoma nen polokhogo heise wulibi lagain iluk hilingitikhe.

²⁷ Aremnogoat he, ferekhogo ap ekhe yonggo at Saul era'lu menlasi wagaikhesik yagati logolik, ”Afuni Filistin mene re nit ninawi mondogat hukhogo kwelakfagasik werek enggere, neisana hat he hambotkwe weak-weak sugulogo louwogo,” iluk yagatikhe.

²⁸ A'nogo yagatikhemo re, at Saul a'nogo Daud murok lagu aple a'nogo herakfuluk he, it afuni Filistin mene inom weim yabigin iluk lagaikhe. Andiba re Tom andi enu minggilinafere'ma iluk Gunung Pemisahan salhukwa andi.