1 SAMUEL 21 - Allah Wene Fano Wene Hupla Inane

Daud Saul agaiserogo heise lagaikhe wene

¹ At Daud a'nogo lagaikhesik he, ap Allah eisewerek mene enu Ahimelekh aiba Nob mene oba lagaikhe. A'nogo lagaikhemo, at Ahimelekh youk weak mene lagaikhesik Daud oba wulibi wagaikhesik he, mel yagatikhe: ”Hat hamunek yoma nenahalok wagen?” iluk heinok wokhasikhe.

² A'nogo yagatikhemo, at Daud en he, ”At kain raja nen he, an nen ekhe at faget hilingisuageluk nenggiba fikhemo hilingisigilugo. Aren ikhi logolik he, hilingi'nogoluk yagaheti andi afuni ekhe inelu asinogo iluk yagaisogoin mondok lego, iluk yaganete. Andi nen he, an nagoromi o ekhema laluk ye'narek logouwagaluk arat lakfisigimo o.

³ Andi nen, eige neisena, nunggu mene yoma ekhe werega, lega. Sumburu roti 5 mene a, athe, we, nena mene ekhe werek halok he, wo'nom o,” iluk yagatikhe.

⁴ A'nogo yagatikhemo, at ap Allah eisewerek a'nogo nen he, ”An sumburu roti amu mene lego. We, Allah faget fisaga mene nek werek. Hat hagoromi mene hemi inom kerat ekhe nogo igi'lek halok he, sumburu andi hat wanigin fano o,” iluk yagatikhe.

⁵ A'nogo yagatikhemo, at Daud en he, ”It eberogoat hemi inom nogo igi'lego. Nit Allah againafuri hilingitorek higithogo re, an nagoromi ninom he, yabu hilingitorek hagat hilingisuagaluk yaganisugunem mene ogo re, hemi ninom oloba nogo ogorek lego. Mene re, yogondak yabu hunogoat esin mene yi hangge hilingisuagaluk ninoba fikhe andi nen hemi ninom mondok nogo igi'lego,” iluk yagatikhe.

⁶ A'nogo yagatikhemo re, at ap Allah eisewerek mene a'nogo nen, sumburu roti amu mene lek andi nen he, Allah faget fisasukwa mene, wam, yi mene ti mene Allah faget noletarek oba welagaikhe mene hobuk obulu'mo ket werago mene fouwogoluk amumo fesukwa mene a'nogo wanhikhesik he, Daud wogotikhe.

⁷ (A'nogo hilingitunem fanoasuak andem sambul he at hun Doeg awi Edom agun andi it at Saul en anggo konharek mene inoe a'nogo aren afuni nen wene melalek oba hilingiti logolik obaget hilingitu aple hilingisigin iluk wagaikhesik andoma welagaikhe.)

⁸ Andi nen at Daud en hun Ahimelekh a'nogo heinok wokhikhi logolik he, ”An he hun raja a'nogo nen he we ferekhogo mimingisogo laknobagai wagama yi mene ti mene halek legengge, nasikhe inom, nenggarok inom heligi'legengge wagarik he neisena haren harige ogo, henggarok ogo an waluk la mene ekhe fisogo welagen a, lega? iluk heinok wokhasikhe.

⁹ A'nogo heinok wokhasikhemo at Ahimelekh a'nogo nen onggo yagati logolik, ”An he Goliat ap Filistin agun haren o Ela tonggoma nen watigin mene a'nogo enggarok a'nogo nek fisogo welagai o. Nen karok ebere no efod it imam lagen ina'mi'mo porek engge a'nogo ambotma yeligengge werek andi. Yoma re we misik andi nek werek enggere hat wanigin hamolo halok he wanin o,” iluk isikhemo at Daud en ikhi logolik, ”Karok andi re o mondogat yomaba nen he we andi nek he mondok fano mene hilingi'mo re an wo'nom o,” iluk isikhe.

¹⁰ Linggene a'nogo sambul he at Daud a'nogo hun raja Saul were'ma nen herakfuluk hun Akhis it afuni o kota Gad mene inoe raja a'nogo were'ma ambit lagaikhe.

¹¹ Lagaikhemo, it hun Akhis agoromi pegawai omanogo nen yagati logolik he, ”Hun yi re, Daud aiba logolik raja mendek werek agun a'nogo lek nogo a? Hun ari faget he, it helime nen wuni wulagaisogo warik laga logolik he yi'nogo ikhi lagaukwa, At Saul en he ap inebe we beribu-ribu nek inoate, oba nen he, Daud en he, berpuluh-puluh ribu inoate, iluk awuni felalogo ikhi lagaukwa agun a'nogo lek nogo a?” iluk yagatukwa.

¹² A'nogo yagatunem at Daud en esanggo holhikhesik he, inane a'nogo isukwa mene a'nogo faget at Daud en endawimo ebetikhi logolik he, at raja Akhis mene a'nogoba ailo hokho mene agaikhe.

¹³ A'nogo anggasikhe andiba re, at Daud a'nogo afuni hokhorogo inelokhoma aremnogo nen wenenebo mene nen hilingitarek hakhogo eranhogo lugulugwi palhikhe. A'nogo hilingitikhemo iren ebe hambogosugun iluk hilingitukwaba nen he, at ebe inobakheindok pala'luk hilingitarek mene hakhogo agaikhesik he kwe o kota kwi lagaikharek oba a'nogo kegeboti logolik, wesilagap saruruphogo omboro bene pugu kwelek herakfisasikhesik welagaikhe.

¹⁴ A'nogo hilingitunem at Akhis nen agoromi (pegawai) omanogo yagaisikhi logolik, ”Hit he, ap yi ebe wenenebo pali'lago iluk hineilenggen hikhi lagep lega? Nenahalok yoma hondo'luk wagep?

¹⁵ An naiba ap lugulugwi palharek menere endep hak hilingigen, hiren ap wenenebo mene yi hondo'luk wageba?” iluk yagaisasikhe.