1 SAMUEL 20 - Allah Wene Fano Wene Hupla Inane

Yonatan nen Daud lebethikhi lagaikhe wene

¹ A'nogo hilinglagaikhemo, at Daud o Rama era'lu horokhogo o Nayot andoma nen at Yonatan oba lagaikhesik mel yagatikhe: ”An nen weak ninggi'nogo mene hilingitimo. An nanini at oba ninggi'nogo mene figimo, Hat heisena oba weak ki mene hilingitimo noasigiluk ili'lago?” iluk heinok wokhasikhe.

² A'nogo yagatikhemo, at Yonatan nen he, ”A'nogo ugun o. Nineisena Tuhan oak. An neisena nen hat hebe hoasigin lego. Aren endep wene hokho wene hilingisigiluk he, an yagane'luk enek hilingiterego. Nen aren hilingiterek mene andi re, an yaganeti'lek endawimo hinaterek mondok lego. Andi nen he, hat egen mene andi re eberogo asigin lek meneat egen o,” iluk yagatikhe.

³ A'nogo yagati lagaikhemo, at Daud en he, ”Haren an hendawi hundik mondok welagen andi, at Saul elu mondogo. Andi nen he, hat an faget hendawimo weak asinogoluk, wene andi aren hat yagahesigin mondok lek anggigi o. A'nogo meneat he, nineisena Tuhan eluk mondok welagarek mene oak. An nebe yogondak yaat wa'lasigin horogat agama welagi andi eberogoat yagaheti o,” iluk yagatikhe.

⁴ A'nogo yagatikhemo, at Yonatan nen he, ”Haren, we, nena mene kino yaganeten halok he, an nen hane hologo hilingisigin enego,” iluk yagatikhe.

⁵ A'nogo yagatikhemo, at Daud en he, ”Ohealek tugi ket fololhe mene faget seni isago raja Saul nemberek nonggorek hak na meneat he, hat hendawimo nen fano anggegen halok an o leimo hina'lasi lambik yogondak huli nen o age huli andi re a'lima hinago logogin o.

⁶ Andi nen hat heisena nen he, Daud ebe wagi'lek andi nenahalok, iluk heinok wokhikhe halok he, mel yaga'no: At Daud en yaganeti logolik, An neisena, nagaisa, nogogwi nagoromi mondogat ninom tahun ekheba faget, Allah nen fano fetninarek welaga, iluk, at faget wam warogo nolesuogoluk andi nen he, weak-weak o Betlehem laga-lagi iluk an yagane'luk laga, ino.

⁷ A'nogo yagatunem, at ninoe raja nen he, fano, iluk ikhe halok he, an fano logogin meneat he, wene palhe halok he, hendawimo nen he, at raja nen Daud wasigiluk weim abok arat ikhemo higi, iluk anggano o.

⁸ Nit nemberek hundik fano logouwok, iluk nineisena Tuhan eilhanem wene wat-wat isugu andi nen he, an faget lebetniikhi logoinogoluk yagaheti o. An weak ekhe hilingitimo halok, harenat an nebe noasigin meneat he, heisena nen noasuageluk at enggiba nobagagun o,” iluk yagatikhe.

⁹ A'nogo yagatikhemo, at Yonatan nen onggo yagati logolik he, ”Hailo agun o. At neisena nen hat hoasigin iluk weim abok igin mene an eberogoat nelu agi halok he hat yagahesigin o,” iluk yagatikhe.

¹⁰ A'nogo yagatikhemo, hobuk at Daud en he, ”Haren heisena wene a'nogo yagatunem, aren ane oba harorogo palhe halok he, an sa nen yaganesi wesigin he,” iluk heinok wokhasikhe.

¹¹ A'nogo yagati lagaikhemo, at Yonatan nen he, ”Nit o leimo louwogo,” iluk yagatikhesik, emberek o leimo lagaukwa.

¹² Lagaukwasik, at Yonatan nen Daud mel yagatikhe: ”Nit afuni Israel mene nineisena Tuhan eilhanemat wene yi yagahesigin andi, At Allah elu logogin o. O hobit hubet hea, athe, age hea, o mo yogondak werek ya higirat, hat faget an neisena endawimo ninggi'nogo wenggeli'lago andi re yaganesuageluk mimingisimbik he aren ambi hat hoba obabut fano hilinghabu menel hilingitu halok he wene hoba lakfei wesigin o.

¹³ Nen, elokhe age logolik hat hoasigiluk mene hangge werek halok he, hat hebe heise lanogen iluk wene warogo hoba lakfei wesigin aro. Mene re, an a'nogo hilingisigin igi mene andi ebe hilingiti'lek halok, nineisena Tuhan nenat an nebe noasuago. Nineisena Tuhan nen an neisena lebethikhi laga hagat harogo lebethiikhi logouwago.

¹⁴ An nebe neluk welagi halok, nemberek nineisena Tuhan eilhanem wene wat-wat ogo andi nen he, Allah nen herakninobagagi'lek ninebe endawitninafu welagarek andi hak, hendawinggen noba hundik logoino o. A'nogo meneat he, nebe wa'lagi halok,

¹⁵ afuni an nen tagongge mene inoba hendawinggen hundik mondok logoino o. Nen, nineisena Tuhan nen hat haselei mene inebe mondogat legetfisikhe halok ogore,

¹⁶ nit nemberek wene wat-wat ogo mene andi minggilasimbik palasugun mondok lego. A'nogo meneat he, nemberek palasugun halok he, nineisena Tuhan nen wene hat hoba fagain o,” iluk yagatikhe.

¹⁷ A'nogo yagatikhemo, at Yonatan nen Daud wene wareti logolik he, ”An nonggwarek nebe nendawinggen hundik welagirek andi hak, hat hebe nendawinggen hundik logogin andi nen, haren, an hat nendawinggen hundik logogin o, iluk wene attak wa'neten hak hobuk ogo wa'nom aro,” iluk yagatikhe.

¹⁸ A'nogo yagatikhesik, hobuk at Yonatan nen mel yagatikheat: ”O hobit seni tugi ket folelhe mene faget isasugun. Andi nen he, hat sumburu e tale'ma ninggi lagen oba hebe legen he, at ebe lek, iluk eberogoat inelu asugun o.

¹⁹ A'nogo hebe lek logombik, o age hebe legat halok, ninggi'nogo ugun anggegen! Andi nen he, hat hebe attak hinago welagen oba a'nogo hina'lasi lambik, helep hokho mene kabokse'ma ambotma aremnogo hinago logolik ye'narek logoino o.

²⁰ O agere, an wesimbik, yi mene ti mene ekhe were'ma pisinget hagarek hak, an nen tok nenggi henagan oba helep andem higit pisinget hagain a'naga.

²¹ A'nogo pisinget hambik, namingmingengge ekhe yagati logolik he, tok attak andogosi lan, iluk yagasumo lagunem he, tok ebe horok arem werek ari wanin o, iluk yagati halok, hat hendawimo nen he, i, wene legen higi, iluk hebe wulibi we'no o. Hat hobuk hebe hoasugun mondok lego, iluk nineisena Tuhan enuba hombuk palogo yagaheti o.

²² A'nogo meneat he, an namingmingengge andi yagati logolik, tok he endep yatmaat a'lem hangge lagama, iluk yagati halok, hendawimo nen he, Tuhan nen heise loagaluk yaganete higi, iluk heise lano o.

²³ Nit nemberek wene wat-wat ogo mene andi fisogo mondok logouwogen he, Tuhan nenat fetninarek mondok logouwago,” iluk yagatikhe.

²⁴ A'nogo yagatikhemo, at Daud o leimo hina'lasi lagaikhe. A'nogo lagaikhemo, at kain Saul tugi ket folelhe mene faget seni isago nouwogoluk wagaikhe.

²⁵ Wagaikhesik, at ebe o hobat oba lambokhogo hu'laga lagaikhe hagat hu'lagaikhe. A'nogo hu'lagaikhemo, at Abner Saul abel fena hu'lagaikhemo, at Daud hu'lagarek oba selek werek kwelek, at Yonatan Saul elokhoma higit hu'lagaikhe.

²⁶ A'nogo meneat he, at Saul endawimo nen he, ”At Daud en weak mene ekhe enggi fakfikhesik oba horati'legen, nit Allah againafuri hilingitorek hak hilingisuogoluk wagi'lek higi,” iluk anggasikhesik he, andi sambul endawimo nen he, ”Daud ebe lek yi nenahalok,” iluk areng palhikhe lek.

²⁷ A'nogo kamo isikhe meneat he, ohealek tugi ket folelhe mene faget logolik, Daud hurek werek oba aremnogo ebe legaren he, Yonatan mel yagatikhe: ”At Daud he o hu'mo nen engge yogondagen ogo nit sumburu isago nouwogeluk ugunem, ebe wagi'legat andi nenahalok?” iluk heinok wokhasikhe.

²⁸ A'nogo yagatikhemo, at Yonatan nen onggo yagati logolik he, ”At Daud en he, an o Betlehem lagain, iluk an yagane'luk laga o.

²⁹ At lageluk he, mel yaganete: An neisena nagaisa, nogogwi nen o Betlehem pesta Allah faget wam warogo nolesuogoluk ikhi logolik, hat weak-weak we'no o, iluk yaganetama lageluk yagaheti o iluk yaganete. Halok, haren fano lan, iluk yaganeten halok an noe nagot inoba lagain aro, iluk yaganetesik laga andi nen he, at ebe seni isago ninom nouwogoluk wagi'lek andi, neisena,” iluk yagatikhe.

³⁰ A'nogo yagatunem esanggo holhikhesik he, a'mage Yonatan oba fesikhesik, mel yagatikhe: ”Kembu yanani nen tago mene yi ri. Hat he Daud ebikhit agendik honggwarek inom agaisa inom hinenggalirogo hilingiti lagep a'nogo re, an yogondak arat nelu aga o.

³¹ At ebe eluk werek kwelek, hat hebe afuni o yoma faget inoe raja asigin mondok lek andi futfikhi lagen lega? At ebe an nen mondok wasigin andi nen he, afuni ekhe at heragaisogo waluk wesuageluk weak-weak lakfisan o,” iluk yagatikhe.

³² A'nogo yagatikhemo, at Yonatan nen he, ”Aren weak nena mene hilingitemo ebe mondok wasigiluk ikhi lagen,” iluk yagatikhe.

³³ A'nogo yagatunem Saul esanggo holhikhesik he, Yonatan wasigiluk sige tungethasikhe. A'nogo hilingitikhe andiba nen at Yonatan endawimo nen he, ”Daud ebe eberogo wasigilugat ili'lago higi,” iluk arat futfesikhe.

³⁴ At Yonatan eisena Saul en Daud ebe wasigiluk abiret fesikhe andi nen he, Yonatan endawi weak agaikhemo seni tugi ket folelhe mene faget inenggi hobit hak inom nasukwasigen, andi sambul isago ninggi'lek a'mage het-pet isikhemo re, e talek seni isago nenggarek oba a'nogo herakfisaluk wulifikhe.

³⁵ A'nogo wulifikhesik ohealekkwe re, Daud emberek wene watukwa higithogoat emberek ambi asuogoluk o leimo lagaikhe. Laga logolik, alage yenggerek at amingmingengge mene ekhe emberek lagaukwa.

³⁶ Arat lagaukwasik, amingmingengge a'nogo mel yagatikhe: ”Yogo, an tok pisingethigik lakfagain andi andogosi lan o,” iluk yagatikhemo, alage a'nogo humusek attagat lagu kwelek, tok misigat ekhe alage a'nogo unggulafane pisinghogo lakfesikhe.

³⁷ A'nogo pisinghogo lakfesikhemo, abo a'nogo tok lagaikheba aremnogo lagaikhemo, at Yonatan nen ane lakfikhi logolik he, ”Tok a'nogo re yatmaat endakwe a'lemat laga a'naga!

³⁸ Andi nen he, andem aninurogo mendek werek lek. Weak-weak wani lan,” iluk yagatikhemo, tok a'nogo wani lagaikhesik he, oe oba waluk wagaikhe.

³⁹ At abo andi Yonatan ane isikhe andi futfigi'lek onggot welagaikhe meneat he, it Yonatan Daud emberek enek he, inelumo nogo nen he, futfesukwa.

⁴⁰ A'nogo hilingi'luk, at Yonatan nen he, sikhe at abo a'nogo wogetikhesik he, Waluk o kota hambotkwe lan o, iluk yagatikhemo, waluk wagaikhe.

⁴¹ Abo a'nogo arat lagaikhemo re, at Daud ebe helep hokhorogo kabokse'ma ambotma aremnogo nen Yonatan oba wulibi wagaikhesik he, enggi henagan oba eindep awi yagaisogo hai watikhe. A'nogo hai watikhesik, emberegat inambe saluk-saluk ikhi logolik, le agaukwa. Le a'nogo aga logolik, at Yonatan endawimo endebat heiselhikhe meneat he, at Daud enek he, endawimo mondok hokhorogoat heiselhikhe.

⁴² Inendawimo a'nogo heiselhikhemo, at Yonatan nen Daud mel yagatikhe: ”Allah nen lebethiikhi logouwago. Nen, nit nemberek Tuhan eilhanem wene wat-wat ogo mene andi, Aren he, nit nemberek ninom, niren tagongge mene inom, wene andi fisogo logouwageluk, fetninarek mondok logouwago,” iluk yagatikhe. A'nogo isukwasik, at Daud lagaikhemo re, at Yonatan ambotkwe o kota wagaikheat.