1 SAMUEL 19 - Allah Wene Fano Wene Hupla Inane

Saul en Daud murok nikhi lagaikhe wene

¹ At Saul en he, ”An Daud wasigiluk ikhi lagi,” iluk weim abok amlogo Yonatan inom, agoromi mondogat inom yagaisasikhe. A'nogo meneat he, Yonatan nen at Daud ebe endawinggen hundik mondok welagaikhe,

² andi nen, Daud mel yagatikhe: ”An neisena nen hat hebe hoasigiluk ili'lago o. Ma re, hat hafe hebelogo nikhi logoino. Ohealek hubet siakhogo o obalik hinagoma ekhe hina'lasi lambik andoma hinago logoino o.

³ Were'ma, an neisena nemberek o leimo andoma wesimbik he, hat hebe hinago logogin oba higit mendek logolik, an neisena nen hat hoasigiluk ili'lago andi faget yagasigin o. Yagasimbik he, yi'nogo ogo, iluk hat yagahesigin o,” iluk yagatikhe.

⁴ A'nogo yagatikhesik, hobuk at Saul emberek lagaukwasik, wene Daud faget fano mene mel yagatikhe: ”At Daud en hat hoba weak ekhe hilingisogo figi'lek, we, henu fano legeisogo fili'lago, andi nen he haren at ebe watun o.

⁵ Aren he, nebe noasigin andi nailo, iluk anggigi'legat, Goliat Filistin mene a'nogo ebe watikhe andiba nen Tuhan nen nit afuni Israel mene hokhorogo ninomame asuageluk hilingninobagaikhemo ninomame ago andi. Wene a'nogo hilinglagaikhe andi hat heilhanem hilinglagaikhemo hasigindik hendawimo hagaiyek hokho mene agaikhe anggigi. A'nogo meneat he, neisena, at Daud weak ekhe hilingiti'le'maat, haren weak hilingisogo ebe wasigiluk ikhi lagen andi nenahalok,” iluk yagatikhe.

⁶ A'nogo yagatikhemo, at Yonatan nen isikhe mene a'nogo Saul en futfesikhesik he, ”An nen Daud ebe wasigin mondok lego,” iluk Tuhan enu hombuk palhikhe.

⁷ A'nogo palhikhemo, at Yonatan nen Daud wolosi lagaikhesik, wene Saul emberek isukwa mene andi mondogat yagatikhe. A'nogo yagatikhesik he, Daud ebe waluk Saul oba wagaikhemo, at Daud Saul faget attak hilingiti lagaikhe hagat hilingiti lagaikhe.

⁸ A'nogo hilingitu were'ma ap Filistin mene nen inoasuogeluk weim hobuk eroratukwama, at Daud en it inoba wulifikhesik, inebe mondogat mabenet fisasikhemo re heise helalagaukwa.

⁹ A'nogo helalagaukwama, inenggi ekhe sambul he, at Saul arige enggimoat fisogo aiba hurek were'ma, aremnogoat nineisena Tuhan nen munggwarengge obabut weak mene ayonggo fesikhesik oba lakfei wagaikhe. A'nogo lakfei wagaikhe andi sambul he, at Daud ambinggong watu welagaikhe.

¹⁰ A'nogo watu ebe o hobat oba higit were'ma, at Saul en sige a'nogoba tunghogo wasigiluk tungethasikhe meneat he, Daud ebe ale'ma pokhogo lagaikhemo re, sige o hobat oba hun fesikhe. A'nogo hilingitikhemo, at Daud onggwarek agap telogo heise lagaikhe.

¹¹ A'nogo lagaikhemo, andi sambul hubanggoat at Saul en, agoromi nen Daud ineil wanhi logombik ohealek hubet halok ebe wasuagaluk he, inayonggo fesikhesik, Daud aiba lakfisasikhe. A'nogo meneat he, it andi oan lagi'lek werek kwelek, Daud agwe Mikhal en he, mel yagatikhe: ”Hat hebe o hubanggo yiat heise wulibigin lek halok he, hobit hubet hebe mondok hoasugun o,” iluk yagatikhe.

¹² A'nogo yagatikhesik, Daud ebe jendela folelekwe nen pelakfesikhemo re, heise lagaikhe.

¹³ At Mikhal en a'nogo wulakfesikhesik, tugwi kembu ap-ap alik hilingik mene wanhikhesik he, Daud nogo ikhi lagaikheba weingfesikhe. A'nogo fesikhesik, kambing esi mene unggulmo legeisogo figik, tugwi kembu ebe selimut salogo figik, isikhe.

¹⁴ A'nogo fesikhesik were'ma, at Daud ebe fakfembik waluk wesuagaluk Saul en agoromi lakfisasikhe mene omanogo lagaukwama re, at he Mikhal en mel yagaisasikhe: ”Daud ebe oba ou agasik werego,” iluk yagaisasikhe.

¹⁵ A'nogo yagaisasikhemo, wagaukwa meneat he, at Saul en Daud ebe ineil tomok hoageluk hobuk lakfisikhi logolik, mel yagaisasikhe: ”An nen wasigen he, ebe waluk waga logolik, nogo ili'lago mene inom mondogat waluk we'no o,” iluk lakfisasikhe.

¹⁶ A'nogo lakfisasikhemo, lagaukwasik, it a'nogo oloba kisukwasik kwelakhasukwa re, tugwi kembu mene kambing esi unggulmo legeisogo Daud nogo ikherek oba weingisogo were'ma hasukwa.

¹⁷ A'nogo hasukwasik Saul yagasi wagaukwama, aren, he Mikhal mel yagatikhe: ”An naselei meneba nen heise loagaluk wulak fegendigat he heranhogo wene an a'nogo lalnafen andi nenahalok,” iluk yagatikhe. A'nogo yagatikhemo, at he Mikhal en he, ”Aren an yaganeti logolik, An heise loagaluk wulak nobagagin lek halok, hebe hoasigin o, iluk yaganetemo hilingiti o,” iluk yagatikhe.

¹⁸ At Daud heise a'nogo wulifikhesik, pikhit Samuel oba o Rama lagaikhesik he, Saul en Daud wasigiluk hilingiti lagaikhe mene omanogo mondogat tindelogo yagatikhe. A'nogo yagatikhesik, Samuel emberek o Nayot lagaukwasik andoma welagaukwa.

¹⁹ A'nogo lagaikhe meneat he, afuni ekhe nen Saul yagati logolik, ”Daud o Nayot o Rama horokhogo a'lima werego,” iluk yagatukwa.

²⁰ A'nogo yagatukwa andi nen, Saul en agoromi ekhe inayonggo fesikhesik, Daud fakfei loagaluk lakfisasikhe. A'nogo lakfisasikhemo lagaukwa meneat he, andoma ap Allah ane yagaisagarek mene esa ekhe logalek at Samuel en woginarek waga logolik, inane ambineat ami'mit sup ikhi logolik, wuni lagik-wagik watunem isasukwa. A'nogo isasukwasik aremnogoat he, it inendawimo Allah Areagun peterogo kwisikhemo re, inane ami'mit suphogo wuni lagik-wagik watukwaat.

²¹ A'nogo hilingitukwama afuni nen he, ”It a'nogo hilingita,” iluk Saul yagasi wagaukwama, ap hobuk ekhe inayonggo fesikhesik lakfisasikhemo lagaukwa meneat he, it lagaukwasik inane ami'mit suphogo wuni lagik wagik watukwaat. At Saul en enggi pireba ap a'nogo inayonggo fesikhesik lakfisasikhe mene re, a'nogo nek hilingitukwama, hobuk ekhe henaganek mene inayonggo fesikhesik lakfisasikhe mene re, it inoba a'nogoat hilinglagaikhe.

²² A'nogo nek hilinglagaikhemo, hobuk at Saul ebe o Rama lagaikhe. Laga logolik, o Sekhu i mogo hokho mene habuli'mo andoma asi lagaikhesik he, afuni andoma mene mel yagaisasikhe: ”Samuel Daud emberek inebe o koma werek,” iluk inoba heinok wanhikhemo, iren he, ”O Nayot werego,” iluk yagatukwa.

²³ A'nogo yagatukwama, pikhit o Nayot lagunem, Allah Areagun endawimo peterogo kwisikhemo re, ebekhalem o Nayot kwe andoma laga logolik, ane ngai-wai igik, wuni lagik-wagik watik, hilingirik lagaikhe.

²⁴ Laga lagaikhesik arat lagaikhesik he, asu nonggologo fesikhesik, Samuel eilhanem wuni lagik-wagik watik, ane ngai-wai igik, hilingiti logolik, talorogo kweangma hulambetikhesik he, alfulukwangge re linggene nen hundik hubanggo hundik welagaikhe. (O endamaren inane lagokhogo ikhi logolik he, ”Saul ogore, ebe Allah ane yagaisikherek mene nogo?” iluk agarek a'nogo re, ero a'nogo hilingitikhe andi nen agarek.)