1 SAMUEL 16 - Allah Wene Fano Wene Hupla Inane

At Samuel en Daud raja logouwageluk amusu unggul oba warogo menfesikhe wene

¹ At Samuel enggi ekhe inom endawimo a'nogo weak were'ma, nineisena Tuhan nen mel yagatikhe: ”Hat Saul faget henggi miren oba hendawimo a'nogo weak logogin nogo? An nen he, at Saul afuni Israel mene inoe raja logogin mondok lek, iluk arat igi lek nogo? Andi nen he, hat yogondak zaitun amusu ekhe wanimbik he, o Betlehem lan o. Lambik, ap enu Isai amlogo ekhe raja logouwageluk arat wenagaisogo figimo werek andi nen he, lan o,” iluk yagatikhe.

² A'nogo yagatikhemo, at Samuel en he, ”An lambik ninggi'nogo hilingisigin? An nen a'nogo hilingitunem, at Saul esanggo holimbik he, nebe noasigin a?” iluk heinok wokhasikhemo, Tuhan nen he mel isikhe, ”Haren wam sapi eak oan mene waluk lambik he, afuni yi'nogo yagaisano: an wam nineisena Tuhan faget warogo nolesigiluk wagi o, iluk yagaisano.

³ Yagaisegen halok he, at Isai wam warogo Allah noletunem andi wesuageluk ayonggo feino. An nen hat hilingisigin mene yagahesigin o. An nen, ap ebe yi, iluk yagahesigin mene andiat, at ebe raja logouwagaluk amusu unggul oba warogo menfeino o,” iluk yagatikhe.

⁴ A'nogo yagatikhemo, at Samuel en Tuhan nen yagatikhe hagat hilingitikhesik, o Betlehem arat lagaikhemo, it afuni o kota andoma mene inogogwi kaindek ina'manggen hokhorogo lagaukwasik he, ebe wanhukwasik mel yagatukwa: ”Hat nit nisa wagen yi re, fano wene yaganisageluk wagen a?” iluk heinok wokhasukwa.

⁵ A'nogo yagatukwama, at Samuel en he, ”Eberogoat. Wam nineisena Tuhan faget warogo nolesuogeluk wagi o. Andi nen he, hit ninom wam warogo nolugun anggegep halok he, afuni inenggisabul hotarek andi hak, hinoba fanorogo horasimbik, hinebe Allah faget fisano o,” iluk yagaisasikhesik, ap Isai againafuri inom inebe lombok inoba fanorogo horatukwasik he, wam warogo Allah noletunem wesuageluk inayonggo fesikheat.

⁶ A'nogo inayonggo fesikhemo, inebe arat andogosi wagaukwama re, at Samuel ap Isai amlogo Eliab eilenggen hasikhesik endawimo nen he, ”Nineisena Tuhan nen wenagaisogo fikhe mene a'nogo re, ebe yi higi,” iluk anggasikhe.

⁷ A'nogo anggasikhe meneat he, At nineisena Tuhan nen Samuel mel yagatikhe: ”At ari ebe An nen wenati mene re lego, andi nen he hat hendawimo nen ebe fano, oakhuse uan andi nen ebe yiat higi, iluk anggagun o. Afuni re, inagap endakwe nek isagarek meneat he, An he, inendawinggenma isigirego,” iluk yagatikhe.

⁸ A'nogo yagatikhemo, hobuk at Isai nen amlogo Abinadab Samuel elokhoma menlasi loageluk yagatikhemo lagaikhe meneat he, Samuel en he, ”At yi ogore, nineisena Tuhan nen wenate mene legaro,” iluk yagatikhe.

⁹ A'nogo yagatikhemo, amlogo Syama menlasi loageluk yagatikhemo lagaikhe meneat he, at Samuel en he, ”At yi ogore, nineisena Tuhan nen wenate mene legaro,” iluk yagatikhe.

¹⁰ A'nogo nek ikhi lagaikhemo, at Isai nen he, againafuri inebe 7 nen mondogat a'nogo Samuel elokhoma misik-misik loageluk lakfisigik isikhe meneat he, at Samuel en he, mel yagatikhe: ”It inebe yi mondogat nineisena Tuhan nen wenaginafe mene re lego,” iluk yagatikhe.

¹¹ A'nogo yagatikhesik, ”Hat hagainafuri ap inebe ya ara?” iluk heinok wokhasikhemo, at Isai nen he, ”An namlogo elabo mene ekhe werek meneat he, wam domba waluk lagasik konik nikho o,” iluk yagatikhe. A'nogo yagatikhemo, at Samuel en he, ”At andi oan wagi'lek werek kwelek, nit wam isago nogoin mondok lego, andi nen he, ayonggo ap ekhe lakfisan o,” iluk yagatikhe.

¹² A'nogo yagatikhemo, at Isai nen he, amlogo a'nogo ayonggo lakfisasikhemo, wolesi lagaukwama re, ap alage fano mene agap mola eil alili mondok fano mene wagaikhemo, At nineisena Tuhan nen Samuel mel yagatikhe: ”An nen igi a'nogo ebe ari o. Andi nen he, haren zaitun amusu unggul oba warogo menfein o,” iluk yagatikhe.

¹³ A'nogo yagatikhemo, at Samuel en amusu a'nogo wanhikhesik he, Daud unggul oba warogo ogogwi ineilhanem menfesikhe. A'nogo menfugu kwelek aremnogoat, Allah Areagun Daud endawimo peterogo kwisikhe, kwisikhemo huli andiba nen Daud ebe eluk werek kwelek nineisena Tuhan Areagun endawimo mondok welagaikhe. A'nogo hilingi'luk, at Samuel aiba o Rama ambotkwe wagaikhe.

At Daud a'nogo Saul awi istana ba welagaikhe wene

¹⁴ At Saul Allah Areagun nen herakfisaluk wulifikhemo re, nineisena Tuhan nen munggwarengge obabut weak mene ayonggo fesikhesik Saul oba lakfei wagaikhemo, oba yi enggin ti enggin hugu mondok welagaikhe.

¹⁵ A'nogo hilingiti lagaikhe andi nen, at Saul amingmingengge nen mel yagatukwa: ”At nineisena Tuhan nen munggwarengge obabut weak mene ayonggo fikhesik hoba lakfei wagunem, aren hoba yi enggin ti enggin fili'lago andi ninelu o.

¹⁶ Andi nen he, haren fano anggegen halok he, niren ap gitar waterek elu mene ekhe herasugun o. Herasumo, hat munggwarengge obabut weak mene andi nen hoba yi enggin ti enggin fikhe halok he, hat hoba liokhogo fano logoinogeluk aren gitar wati logouwago,” iluk yagatukwa.

¹⁷ A'nogo yagatukwama, at Saul en he, mel yagaisasikhe: ”Ap gitar watarek inelu mene halok herasi lambik he, noba waluk we'no o,” iluk yagaisasikhe.

¹⁸ A'nogo yagaisasikhemo holhukwasik, at aminmingengge ekhe nen he, ”Ap enu Isai aiba Betlehem mene andi amlogo gitar watu elu mondok mene. At andi obabut tentara logolik weim ailo lek hilingiti logou hak mene. Obabut oba inom, elokheba inom mondok fano. Wenenggak fano ikherek mene. A'nogo ugunem, at nineisena Tuhan nen lebethugu mondok welagarek mene were'ma higi o,” iluk yagatikhe.

¹⁹ A'nogo yagatikhemo, at Saul en he, ap ekhe inayonggo fesikhesik lakfisikhi logolik, ap Isai mel yaga'no isikhe: ”Hamlogo Daud hat mene hanggo domba konhu werek andi, an noba wesuagen he, lakfei we'no o,” iluk yagasuagaluk lakfisasikhemo yagasi lagaukwa.

²⁰ A'nogo yagatukwama, at Isai nen he, wam keledai ekhe wanhikhesik, amboloba kambing eak misigat mene inom, roti inom, iwak wam agap mene hilingik meneba anggur enggen amusu ambem hetokhogo hinago mene inom, liakfesikhesik he, amlogo Daud en Saul wogosi wesuagaluk wogotikhe.

²¹ A'nogo wogotikhemo, at Daud Saul oba wagaikhesik he, amingmingengge hilinglagaikhe. A'nogo hilinglagaikhemo, at Saul en Daud endawinggen hundik logolik, asikhe waluk nikhi logouwagaluk wenagaisogo fesikhemo waluk nikhi lagaikhe.

²² A'nogo waluk nugunem, hobuk at Saul en wene at Isai oba yi'nogo lakfesikhe: ”An at Daud nendawinggen mondok hundik welagi o. Halok he, at yoma mondok logolik, an lebetniikhi logouwageluk kino yagaheti o,” iluk yagatikhemo yagasi lagaukwa.

²³ Andi huli nen he, at Saul munggwarengge obabut weak mene a'nogo oba asi wagu sambul he, at Daud en ambinggong kecapi a'nogo waluk kongeti lagaikhe. A'nogo kongetunem at Saul oba munggwarengge obabut weak mene a'nogo herakfuluk lagunem oba liok uluk, fano welagaikhe.