1 SAMUEL 15 - Allah Wene Fano Wene Hupla InaneSaul afuni Amalekh mene inom weim yafukwa wene 1 Inenggi ekhe sambul at Samuel en he, Saul mel yagatikhe: ”Hat hebe nineisena Tuhan nen he At againafuri Israel mene inoe raja logouwagaluk yaganetemo hunggul sebelogo menhobagagi anggigi. Andi halok he nineisena Tuhan Omame Mondok Hokho mene a'nogo nen, yi'nogo hilingi'no, iluk ikhe mene andi hesanggo hologo hilingi'no o. 2 Aren he, afuni Amalek mene inombalagen afuni Israel mene o Mesir en wagunem inoasuogoluk isukwa andi nen it wene inoba fagain o. 3 Halok he, afuni Amalek mene were'ma weim lambik, inebe inom, yi mene ti mene inom, ekhe herakfigi'lek mondok legetfisano o. Afuni mondogat ap inom, hemi inom, yenggerugwi inom, omalik inom, inanggo sapi, domba, unta, keledai inom, mondogat wulil tagalogo legetfisano o,” iluk yagatikhe. 4 A'nogo yagatikhemo, at Saul en agoromi tentara mene o Telaim andoma andogorinafikhesik, inebe enggi wenatikhe. A'nogo wenatikhemo, ap tentara Israel mene re, 200.000 nen hilinglagaikhe. Nen, Yehuda mene re, 10.000 nen hilinglagaikhe. 5 A'nogo hilinglagaikhemo, at Saul agoromi inom afuni Amalek mene inaiba kota horokhogo lagaukwasik he, i firokse'ma tonggoma andoma selei mene inelokhoma hou salek welagaukwa. 6 A'nogo salek logolik, afuni Keni mene faget wene mel iluk warogo lakfesikhe: ”Endamat hit hinombalagen afuni Israel mene o Mesir en wagunem, ninagaila'lak, iluk fano hilinginafukwa andi nen he, an nen afuni Amalek mene wulil tagalogo legetfisikhi logolik, hit hinom hinoasi nogo nen he, afuni Amalek mene herakfisaluk heise weak-weak wulibino o,” iluk wene warogo lakfisasikhemo yagaisasukwama re, heise wulifukwa. 7 A'nogo wulifukwama nen, at Saul en ap Amalek mene inom weim yafi logolik, mabenet fisasikhesik he, o Hawila ebekwe lagaikharekwe andoma nen inoarik-inoarik huli o Syur Mesir en abel yikwe o mo liabi wagarek higit andoma fisa lagaikhe. 8-9 A'nogo inoarik laga logolik, afuni Amalek mene mondogat inom, tentara inom, mondogat inoatikhe. A'nogo meneat he, at Saul agoromi tentara mene inomen afuni Amalek mene inoe raja Agag fakfesukwasik, eluk fikhi logolik he, wam domba sapi ebe mondok fano mene inom, sapi, domba eagwi otholik mene inom, yi mene ti mene onggo hokho mene inom, wendeberogo wanhi logolik he, wam weak mene inom, yi mene ti mene onggo endebat mene inom enek he, mondok legetfisasukwa. At Tuhan nen, ”Saul raja logogin lek,” iluk isikhe wene 10 A'nogo hilingitukwama, At nineisena Tuhan nen Samuel mel yagatikhe: 11 ”At Saul An hera'nobagaluk wulifesik, An nen, yi'nogo hilingi'no, iluk yagati mene nane hologo hilingiti'lek andi nen, afuni Israel mene inoe raja menfigi andi nambigen e, iluk anggigi o,” iluk yagatikhemo, at Samuel endawimo weak agaikhesik he, hundik-handik nineisena Tuhan oba limamit falogo yagatu mondok welagaikhe. 12 Yagatu welagaikhesik, ohealek hubet siakhogo re, Saul oba lageluk lagunem afuni nen he, ”Saul he, attagat o kota Karmel a'lima at faget afuni ekhe inendawinggen wenggelogo inendawimo eberek logouwageluk helep ekhe menesigiluk he, weak-weagat lagama o. Andoma a'nogo hilingi'luk ambotkwe o Gilgal wesigin o,” iluk yagatukwa. 13 A'nogo yagatukwama, at Samuel Saul herarik lagaikhesik, emberek ambi agaukwasik at Saul en he, Samuel mel yagatikhe: ”Nineisena Tuhan nen fanothafi logouwago. An nen At nineisena Tuhan nen, yi'nogo hilingi'no, iluk yaganete hagat hilingiti o,” iluk yagatikhe. 14 A'nogo yagatikhe meneat he, at Samuel en he, ”A'nogo hilingiti egen meneat he, wam sapi, domba, ane ye-kwe ugunem nesanggo holhi andi ninggi'nogo mene,” iluk heinok wokhasikhe. 15 A'nogo yagatikhemo, at Saul en he, ”Wam andoma re, afuni Amalek mene inanggo hugul wanho mene o. An nagoromi tentara mene nen wam domba, sapi mondok fano mene re fologo nineisena Tuhan Allah warogo nolesugun mene faget waluk waga logolik, fenakwe mondogat legetfogo o,” iluk yagatikhe. 16 A'nogo yagatikhemo, at Samuel en he, ”Po'logoin. O yogondak hubanggo Tuhan nen yaganete mene yagahesigin o,” iluk yagatikhemo, at Saul en he, ”Yaganom o,” iluk yagatikhe. 17 A'nogo yagatikhemo, at Samuel en he, ”Hat honggwarek hendawimo nen he, An elo'lek iluk anggugu kwelek meneat he, afuni Israel mene inunggulenu lombok inoe kain raja logoinogen iluk nineisena Tuhan nen wenagaisogo hobagasikhemo, it inoe hilinglagendik ferinarek welagen lek nogo a? 18 A'nogo welagen andi nen, nineisena Tuhan nen he, afuni Amalek mene Allah ane holhi'lek weak hilingitarek mene andi hinom weim yafi logolik, inebe mondok felelenghogo leget fisanogen iluk yagahete andi. 19 A'nogo meneat he, haren nineisena Tuhan nen, yi'nogo hilingi'no iluk yagahete mene ane hologo hilingiten lek andi nenahalok? At ane holhi'lek a'nogo hilingiti logolik, yi mene ti mene hugulengge henggiabisak wanhen andi nenahalok? A'nogo hilingiten andi nen, nineisena Tuhan endawimo weak aga o,” iluk yagatikhe. 20 A'nogo yagatikhemo, at Saul en he, ”An he yi'nogo hilingi'no, iluk yaganete hagat ane hologo weim yabi lagarik wagi. Weim yafi logolik, afuni Amalek mene felelenghogo inoati logolik, inoe raja Agas nek he hele warogo waluk wagi o. 21 A'nogo meneat he, an nagoromi nen, it inanggo mondogat wati'lek, we wam sapi, domba ebe fano mene wendeberogo wanhasik he, nineisena Tuhan faget warogo o Gilgal yoma nen nolesuogeluk waluk wagaikha o,” iluk yagatikhe. 22 A'nogo yagatikhe meneat he, at Samuel en he, ”At nineisena Tuhan amolore, At ane hologo hilingisugun andi esin a? Athe, wam warogo nolesugun andi esin a. At nineisena Tuhan ane hologo hilingisugun andi esin mondok meneat he, at wam warogo nolesugun andi re elo'lek hangge o. Wam asei andi re elo'lek hak oba nen he, yi'nogo hilingi'no iluk ikherek mene andi hologo hilingitu mene nek he mondok fano o. 23 Nineisena Tuhan ane sagalogo fulak inom weim palek logolik hilingitarek mene andi re, hugurue nen afuni ekhe onggolek inoatarek andi hangge aro. Nen, inonggwaregen fogerakhagarek andi re, tugwi kembu fogeratarek hangge aro. Andi nen he, haren nineisena Tuhan Allah ane sagalogo hilingiten andi nen, Aren he, hat hebe kain raja logogin lek, iluk ikhe andi,” iluk yagatikhe. 24 A'nogo yagatikhemo, at Saul esanggo holhikhesik he, weak hilingitikhe mene fakhogo Samuel mel yagatikhe: ”Nineisena Tuhan nen, yi'nogo hilingi'no, iluk yaganete mene, haren yaganeten a'nogo, sagalogo weagat hilingitimo o. An nagoromi tentara nen kino yaganetama re an it inoba nailo nen, fano iluk eberogoat yagaisigimo aro. 25 Weak a'nogo hilingiti meneat he, o yogondak an hat nemberek o Gilgal lambik nineisena Tuhan faget ekhe hilingisigen he, weak hilingiti mene andi sagalogo herak fisanogen iluk kino yagaheti o, neisena,” iluk yagatikhe. 26 A'nogo yagatikhe meneat he, at Samuel en he, ”Haren nineisena Tuhan ane sagalogo hilingitenma, afuni Israel mene inoe raja logogin lek, iluk ikhemo re, hat an nemberek o Gilgal logoin mondok nabiro,” iluk yagatikhe. 27 A'nogo yaga'luk, Samuel wesigiluk elokhe hebelogo lagunem he, Saul en Samuel asu sogoi su, enggi nen lisogo fakfugunem he, su a'nogo tiliphogo lagaikhe. 28 A'nogo tilibisikhemo re, at Samuel en Saul mel yagatikhe: ”O yogondak yiat, At nineisena Tuhan nen afuni inunggulenu Israel mene haren ferinarek welagen mene a'nogo nasu lit hegenma tilibikhe andi hak, lisogo wanhesik, hobuk ap ekhe hat hobabut weak andi hangge re lek, athe obabut mondok fano mene arat wogetemo o. 29 At Allah nit afuni Israel mene nineisena fogeratorek mene andi, nit afuni higit he lego, andi nen he eranen wene igik, yi'nogo hilingisigin ilugen, hobuk hunogoat mene igik, ikherek mondok lego,” iluk yagatikhemo, 30 at Saul en he, ”An weak hilingiti meneat he, an nen neisena Tuhan Allah faget hilingisigen he, nemberek louwogo, neisena. An nen a'nogo hilingisigin halok, haren afuni nit mene ninogogwi ineilhanem inom, afuni Israel mene ekhe mondogat ineilhanem inom, agaugwet nobagainogen o,” iluk yagatikhe. 31 A'nogo yagatikhemo, Samuel Saul emberek o Gilgal wagaukwasik, at Saul en nineisena Tuhan faget hilingitikhe. 32 A'nogo hilingitikhemo, at Samuel en he, ”Ap Agag andi yoma waluk we'ni o,” iluk yagaisasikhemo, waluk wagaukwama re, at Agag Samuel oba waga logolik endawimo nen he, ”Nebe noasu mene re, arat herakfanha higi,” iluk endawimo siokhogoat wagaikhe. 33 Wagaikhemo, at Samuel en he, ”Hat henggarok oba, hemi ineagwi warogo legetfisikhi lagen andi hak, an nen hat hagaisa eak ebe warogo legetfagain aro,” iluk yagatikhesik he, o Gilgal nineisena Tuhan wam, yi mene ti mene noletarek oba elokhoma andoma nen ap Agag a'nogo libik-labakhogo watikhe. 34 A'nogo hilingi'luk, at Samuel aiba Rama wagu kwelek, at Saul aiba Gibea wagaikheat. 35 A'nogo hilingitukwasik oba nen, at Samuel eluk logolik oba Saul emberek hobuk ekhe ambi agi'lek welagaikhe. A'nogo meneat he, at Saul faget nineisena Tuhan nen, ”Nambigen Saul afuni Israel mene inoe raja logouwageluk menfigimo nen e,” iluk isikhe mene andi faget Samuel endawinggen heiselhikhe. |
LAI 2013
Indonesian Bible Society